1. Wanem nao showimaot staka famili no garem love?

BIBLE sei lo olketa last day, staka famili bae “no garem love.” (2 Tim. 3:1, 3) Datfala profesi kamap tru distaem. For example, staka hasband and waef savve divorce. Datwan savve mekem tufala feel nogud lo each other and mekem olketa pikinini tingse mami and dadi no lovem olketa. Nomata lo samfala famili wea parents and pikinini stap tugeta, maet olketa no fren gud. Wanfala savveman sei: “Lo staka famili, mami, dadi, and olketa pikinini no savve story lo each other, and olketa busy nomoa for lukluk lo computer, tablet, mobile, or pleim video game. Nomata olketa stap lo sem haos, olketa no savve fren gud witim each other.”

2-3. (a) Olsem Rome 12:10 storyim, iumi laek showimaot love lo hu? (b) Wanem nao bae iumi storyim lo disfala article?

² Iumi no laek for olsem staka pipol lo world wea no showimaot love. (Rome 12:2) Bat iumi laek for strongim love for olketa lo famili blo iumi and for olketa brata and sista lo kongregeson. (Readim Rome 12:10.) Olketa lo famili wea lovem each other barava fren gud tugeta. Hem nao kaen love wea iumi shud garem for olketa brata and sista insaed lo spiritual famili blo iumi. Taem iumi showimaot love for olketa brata and sista, datwan bae helpem iumi for stap gud tugeta and wan mind for worshipim Jehovah.​—Maeka 2:12.

³ Samting wea savve helpem iumi for strongim love for olketa brata and sista and fren gud witim olketa, hem for lane from olketa example lo Bible. Bae iumi storyim samfala example.

4. Wanem nao James 5:11 talem abaotem Jehovah?

⁴ Bible storyim staka samting abaotem olketa naesfala wei blo Jehovah. For example, Bible sei “God hem love.” (1 John 4:8) Taem iumi savve lo datwan, hem mekem iumi laek for fren witim Jehovah. Bible sei tu “Jehovah hem lovem man.” (Readim James 5:11.) Iumi barava tinghae lo love wea Jehovah showimaot lo iumi.

5. Hao nao Jehovah showimaot mercy, and hao nao iumi savve followim example blo hem?

⁵ James 5:11 storyim hao Jehovah lovem iumi, bat datfala verse sei tu Jehovah showimaot mercy. (Eksodas 34:6) Wanfala wei Jehovah showimaot mercy hem taem hem forgivim olketa sin blo iumi. (Sams 51:1) Bible sei for showimaot mercy hem minim for forgivim narawan. Bat tu, taem samwan showimaot mercy hem garem strong feeling for laek helpem narawan wea kasem hard samting. Jehovah sei datfala strong feeling wea hem garem for helpem iumi, hem winim feeling wea mami garem for lukaftarem pikinini blo hem. (Aesaea 49:15) Sapos iumi kasem olketa hard samting, Jehovah showimaot mercy taem hem helpem iumi. (Sams 37:39; 1 Cor. 10:13) Sapos olketa brata and sista mekem iumi feel nogud, iumi showimaot mercy lo wei for forgivim olketa and no gohed for kros. (Eph. 4:32) Bat main wei for showimaot mercy lo olketa brata and sista, hem for helpem olketa taem olketa kasem hard samting. Taem iumi showimaot love and mercy lo olketa narawan, iumi followim example blo Jehovah wea evritaem showimaot love.​—Eph. 5:1.

6. Hao nao Jonathan and David showimaot tufala fren gud?

⁶ Bible storyim samfala example blo olketa wea barava fren gud. Bible sei  Jonathan and David barava fren gud. (Fas Samuel 18:1) Tingim diswan, Jehovah chusim David for kamap next king bihaen Saul. Datwan mekem Saul jealous lo David and trae for killim hem dae. Bat Jonathan, son blo Saul, no joinim dadi blo hem for trae killim dae David. Jonathan and David mekem promis for gohed fren olowe and for evritaem helpem each other.​—Fas Samuel 20:42.

7. Wanem nao maet mekem hem hard for Jonathan and David for kamap fren?

⁷ Maet iumi sapraes Jonathan and David fren gud bikos samfala samting fit for mekem hem hard for tufala olsem. For example, David hem young winim Jonathan and maet Jonathan no laek for fren witim samwan wea young tumas and wea maet no interest lo wanem Jonathan interest lo hem. Bat hem no ting olsem abaotem David. Hem tinghae lo David and laek fren witim hem.

8. Wanem nao Jonathan duim wea showimaot hem gudfala fren blo David?

⁸ Nara samting, maet Jonathan savve jealous lo David. From hem son blo King Saul, hem garem raet for kamap next king. (Fas Samuel 20:31) Bat Jonathan no jealous bikos hem hambol, and hem faithful lo Jehovah. Hem sapotim disison blo Jehovah for chusim David for kamap next king. And tu, Jonathan protectim David, nomata dadi blo hem, Saul, barava kros lo hem.​—Fas Samuel 20:32-34.

9. Wanem nao showimaot Jonathan no jealous lo David?

⁹ Jonathan no fraet for faetem olketa enemy blo Israel and hem savve tumas hao for iusim bow and arrow. Nomata olsem, Jonathan no tingse hem gud winim David. Bible sei Jonathan and dadi blo hem, Saul, tufala savve “muv kuiktaem winim bikfala igol” and tufala “strong winim laeon.” (Mektu Samuel 1:22, 23) Datwan fit for mekem Jonathan for praod. Bat Jonathan no laek winim David, and hem no jealous lo olketa samting wea David duim. Hem tinghae lo wei blo David for no fraet and for trustim Jehovah. And taem David killim dae Goliath, Jonathan barava tinghae lo wanem David duim and laek for fren witim hem. Hao nao iumi savve fren gud witim olketa brata and sista olsem Jonathan fren gud witim David?

10. Hao nao iumi savve showimaot iumi barava lovem olketa brata and sista from heart?

¹⁰ Bible sei iumi “mas barava lovem [iumi] evriwan from heart.” (1 Pet. 1:22) Jehovah showimaot example for iumi followim. Sapos iumi gohed faithful lo Jehovah, no eni samting savve stopem iumi for kasem love blo hem. (Rome 8:38, 39) Samfala taem maet samting mekem hem no isi for fren witim olketa brata and sista, bat iumi need for waka hard for showimaot love. Taem olketa mekem iumi feel nogud, iumi mas gohed for ‘lovem olketa, no kros, mas stap gud tugeta, and traem best for keepim wei for wan mind wea holy spirit helpem iumi for garem.’ (Eph. 4:1-3) Taem iumi waka hard for “stap gud” witim olketa brata and sista, iumi bae no gohed tingim wik point blo olketa. Iumi laek for olsem Jehovah for tingim olketa gudfala wei blo olketa brata and sista.​—Fas Samuel 16:7; Ps. 130:3, NW.

11. Why nao samfala taem hem no isi for showimaot love lo olketa brata and sista?

 ¹¹ Samfala taem hem no isi for showimaot love lo olketa brata and sista bikos iumi lukim wik point blo olketa. Datwan happen lo samfala Christian lo first century. For example, nomata Euodia and Syntyche hapi for “waka hard witim [Paul] for talemaot datfala gud nius,” tufala savve feel nogud lo each other. So Paul encouragem tufala for “mas wan mind.”​—Phil. 4:2, 3.

12. Hao nao iumi savve strongim love wea iumi garem for olketa brata and sista?

¹² Hao nao iumi savve strongim love wea iumi garem for olketa brata and sista? Iumi mas traem best for savve gud lo olketa, and datwan bae helpem iumi for minim and lovem olketa. Iumi laek fren witim olketa nomata olketa olo, young, or kam from difren ples. Tingim, nomata David barava young winim Jonathan, tufala fren gud. Bae hem gud for tingim samwan lo kongregeson wea iu savve fren witim, nomata hem young or olo winim iu. Taem iumi laek fren witim evriwan lo kongregeson, iumi showimaot iumi “lovem evri brata.”​—1 Pet. 2:17.

13. Waswe, evriwan lo kongregeson mas best fren blo iumi, and why nao olsem?

¹³ Iumi savve iumi mas lovem olketa brata and sista, bat waswe, datwan minim evriwan lo kongregeson best fren blo iumi? Nomoa. Iumi lovem evriwan, bat samfala lo olketa kamap best fren blo iumi bikos iumi interest lo sem samting. Jesus sei olketa aposol “olketa fren” blo hem, bat hem lovem tumas fren blo hem John. (John 13:23; 15:15; 20:2) Nomata olsem, Jesus no fevarem John winim olketa nara aposol. For example, taem John and brata blo hem James ask for garem hae position lo Kingdom blo God, Jesus sei: “Mi no garem paoa for disaedem hu nao bae sidaon long raet saed or long left saed bilong mi.” (Mark 10:35-40) Iumi laek followim example blo Jesus for no fevarem olketa best fren blo iumi.  (Jas. 2:3, 4) Sapos iumi fevarem samfala, datwan bae mekem kongregeson for divaed.​—Jude 17-19.

14. Olsem Philippi 2:3 storyim, wanem nao bae helpem iumi for no jealous lo olketa brata and sista?

¹⁴ From iumi lovem olketa brata and sista lo kongregeson, bae iumi no jealous lo olketa and no laek for gud winim olketa. Tingim, Jonathan no jealous lo David and trae for kamap next king. Iumi evriwan fit for followim example blo Jonathan. Iumi no laek jealous lo olketa brata and sista bikos olketa savve duim gud wanfala samting, ‘bat iumi mas hambol and ting long narawan olsem hem winim iumi.’ (Readim Philippi 2:3.) Evriwan fit for duim samting wea savve helpem kongregeson. Taem iumi hambol, bae iumi tinghae lo olketa gud samting wea olketa narawan lo kongregeson savve duim and lane from example blo olketa.​—1 Cor. 12:21-25.

15. Wanem nao iu lanem from experience blo Tanya and thrifala pikinini blo hem?

¹⁵ Taem nogud samting happen lo iumi, Jehovah iusim olketa brata and sista for comfortim and helpem iumi. Olsem example, Tanya and thrifala pikinini blo hem attendim 2019 “Love No Savve Finis!” International Convention lo wanfala taon lo United States. Tanya storyim samting wea happen bihaen Saturday program. Hem sei: “Taem mifala go bak lo hotel lo car, nara car bangam car blo mifala. Mifala barava seke fogud. Car blo mifala barava nogud nao bat mifala no garekil, so mifala go aot from car and standap lo saed road. Then mifala  lukim samwan kolem mifala for kam sidaon lo car blo hem. Hem wanfala brata wea gogo bak tu bihaen convention. Olketa narawan tu laek for helpem mifala. Faevfala brata and sista from Sweden lukim mifala and stopem car blo olketa for chekim mifala. Olketa sista hagem mi and dota blo mi, and datwan comfortim mifala! Mi talem olketa mifala bae olraet nomoa, bat olketa gohed stap witim mifala and lukaftarem mifala kasem taem ambulance hem kam. Lo datfala taem mifala luksavve Jehovah helpem mifala and mifala tinghae lo datwan. Disfala experience strongim love blo mifala for olketa brata and sista, and for Jehovah.” Masbi iuseleva tingim wanfala brata or sista helpem iu taem iu barava needim.

16. Wanem nao savve happen taem iumi olketa brata and sista showimaot love lo each other?

¹⁶ Tingim olketa gud samting wea savve happen taem iumi olketa brata and sista showimaot love lo each other. Datwan savve comfortim narawan taem hem kasem hard taem. Datfala love mekem iumi stap gud witim each other. And tu, hem mekem pipol wea lukaotem truth luksavve iumi olketa disaepol blo Jesus and bae olketa laek for worshipim Jehovah. Bat main samting, love wea iumi showimaot lo each other mekhae lo Jehovah, datfala ‘God wea kaen and sorre long iumi, and wea givim iumi comfort.’ (2 Cor. 1:3) Iumi evriwan laek for fren gud witim olketa brata and sista and gohed strongim love for olketa!