1. Hao nao iumi savve iusim taem blo iumi for fren gud witim Jehovah?

 IUMI laek for spendem taem witim pipol wea spesol lo iumi. Tufala wea marit hapi tumas for spendem taem tugeta. Olketa young wan laek for spendem taem witim olketa gud fren blo olketa. Iumi evriwan laek for spendem taem witim olketa brata and sista lo kongregeson. Bat God nao main wan wea iumi laek iusim taem blo iumi for hem. Iumi savve duim datwan taem iumi prea lo hem, readim Bible, and ting abaotem plan blo hem and olketa nambawan wei blo hem. Hem gud samting for iusim taem blo iumi for fren gud witim Jehovah!​—Ps. 139:17, NWT.

2. Wanem nao iumi savve busy lo hem?

² Nomata iumi laek for prea, studyim Bible, and for ting raonem wanem iumi lanem, maet iumi no garem inaf taem for duim olketa samting hia from iumi busy. Maet iumi busy lo waka, olketa famili responsibility, and olketa nara samting wea iumi mas duim.

3. Wanem nao nara samting wea savve mekem iumi busy tumas?

³ Olketa nara samting tu savve mekem iumi busy tumas. Sapos iumi no careful, iumi savve busy lo samfala samting wea no rong, bat wea mekem iumi for no garem taem for Jehovah. Olsem example, iumi needim taem for rest and relax. Hem olraet for duim samfala hapitaem, bat sapos iumi spendem staka taem for duim datwan, bae iumi no garem taem for duim olketa spiritual samting. So tingting  gud abaotem haomas hapitaem iumi duim.​—Provebs 25:27; 1 Tim. 4:8.

4. Wanem nao bae iumi storyim lo disfala article?

⁴ Lo disfala article, iumi bae storyim why hem important for iusim taem blo iumi for duim olketa spiritual samting. Bae iumi storyim tu hao iumi savve iusim gud taem blo iumi for fren witim Jehovah, and why hem gud for duim datwan.

5. Hao nao kaonsel lo Ephesus 5:15-17 savve helpem olketa young wan for mekem best disison lo hao for iusim laef blo olketa?

⁵ Tinghae lo olketa spiritual samting. Olketa young wan mas disaedem wanem for duim lo laef blo olketa. Maet olketa teacher and olketa famili member wea no Witness encouragem olketa for go lo university mekem olketa garem gud waka and kasem staka selen. Sapos olketa disaed for duim olsem datwan bae mekem olketa busy tumas. Bat parents and olketa fren blo olketa lo kongregeson bae encouragem olketa young wan for garem olketa spiritual goal. Wanem nao bae helpem wanfala young wan wea lovem Jehovah for disaed gud? Bae hem gud for young wan hia readim and ting raonem toktok lo Ephesus 5:15-17. (Readim.) Bihaen hem readim olketa verse hia, hem gud for datfala young wan for tingim: ‘Wanem nao “Jehovah laekem” mi for duim? Wanem nao bae mi duim witim laef blo mi for mekem Jehovah hapi, and for “iusim gud taem” blo mi?’ Tingim, “iumi stap long barava nogud taem” and klosap nao disfala world wea Satan rulim bae finis. Best disison wea olketa young wan savve mekem, hem for iusim laef blo olketa for mekem Jehovah hapi.

6. Wanem nao Mary chus for duim, and why nao datwan hem wise?

⁶ Luksavve lo wanem hem important. Samfala taem, maet iumi need for disaed sapos iumi bae duim spiritual samting or nara samting wea iumi laek for duim. Bat for iusim gud taem blo iumi, iumi mas luksavve which wan nao important. Wanfala example lo diswan hem taem Jesus visitim Mary and Martha. From Martha hapi tumas Jesus kam lo haos, hem redyim staka kaikai for Jesus. Bat Mary, sista blo Martha, chus for sidaon witim Jesus and lisin lo hem. Samting wea Martha duim hem no rong, bat Jesus sei Mary nao “chusim stret samting.” (Luke 10:38-42.) Maet gogo Mary forgetim nomoa wanem olketa kaikaim lo datfala taem, bat iumi sure hem no forgetim wanem hem lanem from Jesus. Mary hem hapi for iusim taem blo hem for lisin lo Jesus, and iumi tu hapi for iusim taem blo iumi for fren gud witim Jehovah. Hao nao iumi savve iusim gud datfala taem?

7. Why nao hem important for prea, studyim Bible, and for ting raonem wanem iumi lanem?

⁷ Luksavve hao hem part lo worship blo iumi for prea, studyim Bible, and for ting raonem wanem iumi lanem. Taem iumi prea, iumi story witim Dadi blo iumi lo heven wea lovem iumi tumas. (Sams 5:7) Taem iumi studyim Bible, hem for lane from God wea garem bigfala savve. (Provebs 2:1-5) Taem iumi ting raonem wanem iumi lanem, datwan helpem iumi for tingting abaotem olketa naesfala wei blo Jehovah, and nambawan plan blo hem for iumi olketa man. Diswan hem  gudfala wei for iusim taem blo iumi. Bat wanem nao savve helpem iumi for duim gud olketa samting hia?

8. Wanem nao iumi lanem from Jesus go stap lo wilderness?

⁸ Trae faendem ples wea kwaet. Tingim example blo Jesus. Hem go stap lo wilderness for 40-fala day bifor hem startim ministry blo hem lo earth. (Luke 4:1, 2) From no eniwan savve disturbim Jesus, hem savve prea lo Jehovah and ting raonem wanem Dadi blo hem laekem hem for duim. Diswan helpem Jesus for redi for olketa test wea kasem hem bihaen. Wanem nao iumi lanem from example blo Jesus? Sapos iumi insaed wanfala big famili, maet bae hem no isi for faendem kwaet ples lo haos for duim study and prea. So maet hem gud for faendem nara ples for duim datwan. Hem nao samting wea Julie duim taem hem laek for prea lo Jehovah. Hem and hasband stap lo wanfala smol apartment lo France, so staka taem hem no stap seleva. Julie sei: “Mi savve wakabaot go lo park evriday. Lo there, no eniwan disturbim mi and mi savve story gud witim Jehovah.”

9. Nomata Jesus hem busy, wanem nao showimaot hem laek for spendem taem witim Jehovah?

⁹ Taem Jesus stap lo earth hem barava busy bikos staka pipol savve kam lo hem. Wanfala taem, “evriwan long datfala taon nao standap aotsaed” long haos wea hem stap bikos olketa laek lukim hem. Jesus hapi for helpem olketa, bat bihaen datwan hem mek sure hem garem taem for prea lo Jehovah. Bifor sun kamap, hem “go long wanfala ples wea kwaet” and prea lo Dadi blo hem.​—Mark 1:32-35.

10-11. Olsem Matthew 26:40, 41 storyim, wanem kaonsel nao Jesus givim lo olketa aposol lo garden blo Gethsemane, bat wanem nao olketa duim?

¹⁰ Lo naet wea olketa killim dae Jesus, Jesus faendem kwaet ples for hem prea lo garden blo Gethsemane. (Matt. 26:36) Lo datfala taem, Jesus talem olketa aposol blo hem important samting abaotem prea.

¹¹ Tingim samting wea happen lo datfala naet. Taem Jesus and olketa aposol kasem garden blo Gethsemane hem barava leit lo naet. Jesus talem olketa aposol for “gohed for lukaot,” and then hem go for prea. (Matt. 26:37-39) Bat taem hem prea, olketa sleep nao. Hem kam bak and wekapem olketa and talem olketa for “gohed for lukaot and prea.” (Readim Matthew 26:40, 41.) Hem savve olketa wari and taed tumas and hem luksavve datwan mekem olketa “no strong for duim” wanem olketa laek for duim. Tufala taem moa Jesus go for prea, and  each team hem kam bak hem lukim olketa aposol sleep nomoa and no prea.​—Matt. 26:42-45.

12. Wanem nao savve helpem iumi sapos iumi faendem hard for prea from iumi taed or warim samting?

¹² Luksavve lo gud taem for prea. Maet from iumi taed or warim samting, iumi faendem hard for prea. Staka narawan savve feel olsem tu. Wanem nao savve helpem iumi? Sapos hem wei blo iumi for prea lo Jehovah bifor iumi sleep, maet hem gud for prea lo taem wea iumi no taed tumas. From samfala leidaon taem olketa prea datwan savve mekem olketa for sleep, so maet hem gud for sidaon or nildaon. Bat hao sapos iumi no savve prea from iumi warim samting? Storyim datwan lo Jehovah, and iumi savve sure Jehovah bae minim iumi and helpem iumi.​—Sams 139:4.

13. Wanem nao savve disturbim iumi taem iumi duim study or attendim olketa meeting?

¹³ No busy lo nara samting taem iumi study. Prea hem wanfala wei for fren witim Jehovah, bat hem important tu for studyim Bible and attendim olketa meeting. Wanem nao savve helpem iumi for concentrate taem iumi duim olketa samting hia? Trae for tingim wanem savve disturbim iumi lo taem blo meeting or taem iumi studyim Bible. Maet samwan ringim, emailim, or textim iumi lo mobile, tablet, or computer blo iumi. Distaem staka billion pipol garem olketa samting hia and hem barava helpem olketa. Bat olketa savveman sei mobile savve barava disturbim pipol. Wanfala doctor sei: “Phone savve mekem pipol for no concentrate lo wanem olketa duim.” Lo olketa assembly and convention, chairman savve talem iumi for changem setting blo mobile blo iumi mekem hem no disturbim olketa narawan. Bae hem gud for duim sem samting taem iumi study seleva mekem mobile no disturbim iumi.

14. Olsem Philippi 4:6, 7 storyim, hao nao bae Jehovah helpem iumi for concentrate?

¹⁴ Askem Jehovah for helpem iumi for concentrate. Taem iumi duim study seleva or iumi lo meeting and luksavve iumi start for tingim nara samting, askem Jehovah for helpem iumi. Sapos iumi warim wanfala samting, maet hem  no isi for concentrate lo olketa spiritual samting. Bat hem barava important for concentrate, so prea for peace blo God for gaedem heart blo iumi and for gaedem tu “tingting” blo iumi.​—Readim Philippi 4:6, 7.

15. Wanem gud samting nao iumi kasem taem iumi duim olketa spiritual samting?

¹⁵ Hem gud for iusim taem blo iumi for prea lo Jehovah, studyim Bible, and ting raonem olketa samting iumi lanem abaotem hem. Why nao olsem? First reason, hem bikos datwan bae helpem iumi for mekem olketa gud disison. Bible sei hem gud for “fren wetem waes man, [bikos] bae yu waes.” (Provebs 13:20) Jehovah nao hem barava wise, so taem iumi fren gud witim hem datwan bae helpem iumi for wise tu. And bae iumi disaedem olketa samting wea mekem hem hapi and no mekem hem sorre.

16. Taem iumi prea and studyim Bible, hao nao datwan helpem iumi for teach gud?

¹⁶ Mek-tu reason, hem bikos datwan bae helpem iumi for teach gud. Taem iumi studyim Bible witim samwan, iumi laek for helpem hem for fren gud witim Jehovah. From iumi prea and studyim Bible, datwan helpem iumi for lovem Jehovah and hem bae helpem iumi for teachim Bible study blo iumi for lovem Jehovah tu. Tingim example blo Jesus. Hem savve storyim lo olketa disaepol blo hem why hem lovem Dadi blo hem, and datwan helpem olketa for lovem Jehovah tu.​—John 17:25, 26.

17. Why nao hem important for prea and for duim study seleva?

¹⁷ Mek-thri reason, hem bikos datwan bae helpem iumi for garem strongfala faith. Taem Jehovah ansarem olketa prea blo iumi for help, comfort, or sapot, hao nao datwan savve helpem iumi? Datwan strongim faith blo iumi. (1 John 5:15) Wanem moa savve strongim faith blo iumi? Study seleva, bikos “bihaen man herem message nao hem savve garem faith.” (Rome 10:17) Bat iumi mas duim nara samting tu for strongim faith blo iumi. Wanem moa iumi mas duim?

18. Storyim why hem important for iumi ting raonem wanem iumi lanem.

¹⁸ Taem iumi studyim Bible, hem important for iumi ting raonem wanem iumi lanem. Tingim wanem man wea raetem Sams 77 duim taem hem wari bikos hem tingse Jehovah no hapi lo hem and olketa nara Israelite. From hem wari tumas, hem no savve sleep lo naet. (Verse  2-8) So hem sei lo Jehovah: “Bae mi tingting strong long evri gudfala samting an evri bikfala samting wea yu bin duim.” (Verse 12) Nomata disfala man savve lo olketa samting wea Jehovah duim for pipol blo hem bifor, hem wari and sei: “Waswe, God hemi no sore long mifala nao? Waswe, kros blong hem long mifala hemi ovam moa nao wei wea hemi kaen long mifala?” (Verse 9) So hem ting raonem evri samting wea Jehovah duim bifor and hao God showimaot mercy lo pipol blo hem. (Verse 11) Hao nao datwan helpem hem? Disfala man luksavve hard for Jehovah lusim pipol blo hem. (Verse 15) Sapos iumi ting raonem wanem Jehovah duim for pipol blo hem bifor and wanem hem duim for iumi distaem, datwan bae strongim faith blo iumi tu.

19. Wanem nao mek-foa reason for iusim taem blo iumi for duim olketa spiritual samting?

¹⁹ Mek-foa reason wea barava important, hem bikos datwan bae strongim love blo iumi for Jehovah. Iumi need for garem strongfala love for Jehovah bikos datwan bae helpem iumi for obeyim hem, willing for duim wanem hem laekem, and no givap lo olketa hard taem. (Matt. 22:37-39; 1 Cor. 13:4, 7; 1 John 5:3) Hem barava spesol samting for iumi fren witim Jehovah!​—Sams 63:1-8.

20. Hao nao iu plan for iusim gud taem blo iu?

²⁰ Tingim hao prea, studyim Bible, and for ting raonem wanem iumi lanem, hem part lo worship blo iumi. Olsem Jesus, faendem ples wea kwaet for prea and for duim study. No busy lo nara samting taem iumi study. And askem Jehovah for helpem iumi for concentrate taem iumi duim study seleva or lo taem blo meeting. Sapos iumi iusim gud taem blo iumi distaem, Jehovah bae blessim iumi and iumi bae enjoyim laef for olowe lo niu world.​—Mark 4:24.