1. Wanem hard samting nao David deal witim?

 SAUL, wea hem king blo Israel, laek for killim dae David, so David ranawe and lukaotem ples for haed. Gogo, David needim kaikai, so hem go lo taon blo Nob and askem nomoa faevfala bred from priest lo there. (Fas Samuel 21:1, 3) Bihaen datwan, hem and olketa man blo hem go stap lo wanfala cave. (Fas Samuel 22:1) Why nao Saul laek for killim dae David?

2. Wanem nao Saul duim wea showimaot hem againstim plan blo God? (Fas Samuel 23:16, 17)

² Saul barava jealous lo David bikos pipol laekem David and praisem hem from hem winim staka faet. Saul savve tu Jehovah no laekem hem for gohed rul ovarem Israel from hem no obeyim Jehovah, and Jehovah chusim David for kamap next king. (Readim Fas Samuel 23:16, 17.) From Saul hem king blo Israel, hem garem bigfala army and staka pipol sapotim hem, so David mas ranawe for sevem laef blo hemseleva. Waswe, Saul tingse hem savve stopem plan blo God for David kamap king? (Aesaea 55:11) Bible no talem, bat wanem Saul duim showimaot hem againstim God. Iumi savve olketa wea faet againstim God no savve win!

3. Nomata David kasem hard taem, waswe, hem blamem Jehovah?

³ David no aftarem hae position. Jehovah nao chusim hem for kamap king blo Israel. (Fas Samuel 16:1, 12, 13) Saul barava heitim David. Bat David no blamem Jehovah from Saul laek for killim hem dae, and hem no komplen  taem hem no garem staka kaikai, or from hem mas stap lo cave. Interesting samting nao, taem hem haed lo datfala cave, maet hem raetem song for praisem Jehovah. Yeartext blo iumi hem garem samfala toktok from datfala song: ‘Olketa wea go long Jehovah for help garem evri gudfala samting.’​—Sams 34:10.

4. Olketa wanem kwestin nao bae iumi storyim, and why nao olsem?

⁴ Distaem, samfala wea worshipim Jehovah no garem inaf kaikai and olketa nara samting wea olketa needim. * Lo taem blo coronavirus, staka brata and sista deal witim datwan tu. And from datfala “bigfala trabol” hem klosap for kam, iumi expectim olketa samting for kamap worse. (Matt. 24:21) So lo disfala article bae iumi storyim fofala kwestin hia: Wanem nao David minim taem hem sei hem “garem evri gudfala samting”? Why nao hem important for satisfae witim wanem iumi garem? Why nao iumi savve trustim Jehovah for protectim iumi? Hao nao iumi savve redi distaem for olketa hard taem wea bae kam?

5-6. Hao nao Sams 23:1-6 helpem iumi for minim why David sei olketa wea worshipim God bae “garem evri gudfala samting”?

⁵ Wanem nao David minim taem hem sei olketa wea worshipim Jehovah bae “garem evri gudfala samting”? Toktok lo mek-23 Psalm helpem iumi for minim diswan. (Readim Sams 23:1-6.) Firstfala toktok blo David lo datfala psalm sei: “[Jehovah] hemi gohed fo lukaftarem mi gudfala olsem mi wanfala sipsip blong hem, so mi no sot long enisamting.” Waswe, David minim hem no short lo olketa material samting? Nomoa. Lo olketa nara verse lo datfala psalm, David storyim olketa spiritual blessing wea hem kasem bikos hem acceptim Jehovah olsem  shepherd blo hem. Jehovah leadim David “long olketa stretfala wei,” and lukaftarem hem lo taem wea hem isi and lo taem hem hard. David luksavve bae hem feisim samfala hard taem. And hem luksavve samfala taem bae hem wikdaon olsem hem wakabaot lo ples “wea hemi barava tudak,” and bae hem garem olketa enemy. Bat David savve Jehovah bae lukaftarem hem.

⁶ So iumi kasem ansa nao for firstfala kwestin blo iumi: Hao nao David “garem evri gudfala samting”? David kasem evri samting hem needim lo spiritual saed. David no needim staka material samting for mekem hem hapi. David satisfae lo wanem Jehovah provaedem lo physical saed. Wanem hem important lo David hem for kasem blessing and protection from Jehovah.

7. Olsem Luke 21:20-24 talem, olketa wanem hard samting nao olketa Christian lo Judea feisim?

⁷ Toktok blo David helpem iumi for garem stretfala tingting abaotem olketa material samting. Iumi savve enjoyim olketa material samting wea iumi garem, bat hem shud no main samting lo laef blo iumi. Hem nao wanem olketa Christian lo first century wea stap lo Judea lanem. (Readim Luke 21:20-24.) Jesus warnim olketa hao taem olketa “lukim army hem raonem Jerusalem” olketa mas “ranawe go long olketa maunten.” Sapos olketa duim datwan bae olketa sev, bat olketa bae lusim staka material samting. Wanfala Wastaoa sei olsem: ‘Olketa lusim garden and haos, and no tekem olketa samting from haos blo olketa tu. Olketa sure Jehovah bae protectim and sapotim olketa, and olketa luksavve for worshipim Jehovah hem important winim for garem olketa material samting.’

8. Wanem nao iumi savve lanem from samting wea happen lo olketa Christian lo first century wea stap lo Judea?

⁸ Wanem nao iumi savve lanem from samting wea happen lo olketa Christian lo first century wea stap lo Judea? Datfala Wastaoa sei moa: ‘Maet iumi feisim olketa test saed lo olketa material samting. Waswe, olketa material samting important lo iumi, or hem barava important for iumi faithful lo God for iumi sev? Tru nao, taem end hem kam bae iumi feisim olketa hard taem and maet iumi short lo samfala samting. Iumi mas redi for deal witim olketa samting hia, olsem olketa wea ranawe from Judea lo first century.’ *

9. Hao nao advaes blo aposol Paul for olketa Hebrew Christian helpem iumi?

⁹ Masbi hem hard for olketa Christian lo datfala taem for lusim evri samting and startim niu laef. Olketa need for garem faith lo Jehovah for provaedem wanem olketa needim. Aposol Paul givim advaes for helpem olketa hia faevfala year bifor army blo Rome kam raonem Jerusalem. Hem sei: “Iufala mas no laekem tumas selen, bat iufala mas hapi nomoa long samting wea iufala garem, bikos God hem sei: ‘Bae mi nating lusim iu.’ So iumi mas no fraet, bat sei: ‘Jehovah nao hem helpem mi. Bae mi no fraet. No eniwan savve spoelem mi.’” (Heb. 13:5, 6) Olketa wea followim disfala advaes for garem simpol laef bifor army blo Rome tekovarem Jerusalem mas faendem hem moa isi for garem simpol laef bihaen olketa ranawe. Olketa sure Jehovah bae provaedem wanem olketa needim. Advaes blo Paul helpem iumi tu for trustim Jehovah for lukaftarem iumi.

10. Wanem nao Paul helpem iumi for luksavve lo hem?

¹⁰ Paul givim semkaen advaes lo Timothy and datwan fitim iumi tu. Hem sei: “So sapos iumi garem kaikai, kaleko, and ples for stap, iumi mas satisfae nomoa witim olketa samting hia.” (1 Tim. 6:8) Paul no minim iumi no savve kaikaim naes kaikai, stap lo naes haos, or peim niu kaleko. Wanem Paul minim hem for satisfae witim wanem iumi garem finis. (Phil. 4:12) Paul savve lo samting wea “staka man no savve.” Hem barava important for fren gud witim God winim for garem olketa material samting.—Habakuk 3:17, 18.

11. Wanem nao iumi lanem from toktok wea Moses talem lo olketa Israelite?

¹¹ Maet iumi no garem sem tingting olsem Jehovah abaotem olketa samting wea iumi needim. Tingim wanem Moses talem olketa Israelite bihaen olketa stap lo wilderness for 40 year. Hem sei: “[Jehovah], God blong yufala, hemi blesim yufala long evrisamting wea yufala duim. Olowe long foti yia wea yumi wakabaot long bikfala drae eria, hemi lukaftarem yufala, an yufala nating save sot long enisamting.” (Diutronomi 2:7) For 40-fala year, Jehovah givim manna for olketa Israelite for kaikaim. And Jehovah mek sure kaleko wea olketa karem kam from Egypt hem no brek. (Diutronomi 8:3, 4) Nomata maet samfala tingse olketa shud  garem olketa nara samting tu, Moses remindim olketa Israelite olketa garem wanem olketa needim. Jehovah laekem iumi for satisfae lo wanem iumi garem, and for luksavve eni samting iumi kasem hem blessing from Jehovah and for tinghae lo datwan.

12. Wanem nao showimaot David trustim Jehovah, and no trustim savve blo hemseleva?

¹² David luksavve Jehovah tingim and protectim gud olketa wea lovem Hem. Taem David raetem Sam 34 laef blo hem stap lo danger. Nomata olsem, hem garem strongfala faith hao ‘enjel blong Jehovah gohed fo gadem hem.’ (Sams 34:7) Luk olsem David comparem datfala angel blo Jehovah witim wanfala soldia wea redi for faetem enemy wea kam. Nomata David hem man for faet and Jehovah talem David bae hem kamap king, hem no trustim savve blo hemseleva for iusim ston or sword for killim dae enemy. (Fas Samuel 16:13; 24:12) David trustim God and hem sure datfala angel bae ‘sevem olketa wea tinghae lo Jehovah.’ Distaem iumi no expectim Jehovah for duim mirakol for protectim iumi. Bat iumi savve from iumi trustim Jehovah iumi bae kasem laef olowe, nomata maet iumi dae distaem.

13. Taem Gog blo Magog attakim iumi, why nao bae hem luk olsem hem isi nomoa for olketa finisim iumi, bat why nao iumi no need for fraet? (Lukim piksa lo front page.)

¹³ Klosap nao bae iumi need for barava trustim Jehovah for protectim iumi. Taem Gog blo Magog, wea minim olketa nation, attakim pipol blo God maet hem luk olsem iumi no wei nao. So iumi need for sure Jehovah bae sevem iumi. Olketa nation hia bae tingim iumi olsem olketa sheepsheep wea no garem eni shepherd for protectim olketa. (Esikiel 38:10-12) Iumi bae no garem olketa weapon and no kasem training for faet. Olketa nation hia bae tingse hem isi nomoa for finisim iumi. From olketa no garem faith lo God, olketa bae no luksavve staka angel gaedem iumi and redi for defendim iumi. So olketa bae sapraes tumas taem army blo God lo heven faet for iumi!​—Rev. 19:11, 14, 15.

14. Wanem nao iumi savve duim distaem for redi for wanem bae happen lo future?

¹⁴ Wanem nao iumi savve duim distaem for redi for wanem bae happen lo future? Wanfala samting hem for luksavve olketa material samting hem no barava important, bikos lo future maet iumi bae lusim olketa samting hia. And tu, iumi need for satisfae witim wanem iumi garem and hapi from iumi fren gud witim Jehovah. Taem iumi strongim faith blo iumi lo God, datwan bae mekem iumi sure hem bae protectim iumi taem Gog blo Magog attakim iumi.

15. Wanem nao samfala samting wea happen lo David wea helpem hem for trustim Jehovah?

¹⁵ Tingim nara samting wea helpem David and wea savve helpem iumi tu for redi for olketa hard taem. David sei: ‘Jehovah hemi barava kaen tumas. Yufala trae fo trastem hem, an bae yufala save dat diswan ya hemi tru. Olketa wea go long hem fo hemi gadem olketa, olketa nao hapi.’ (Sams 34:8) Datfala toktok showimaot why David trustim Jehovah for sapotim hem. David depend lo Jehovah and evritaem God helpem hem. Olsem example,  taem David hem young, hem talem Goliath datfala giant blo Philistine: “Tude nomoa, [Jehovah] bae hemi putum yu long han blong mi.” (Fas Samuel 17:46) And tu, taem David waka for King Saul, tu-thri taem Saul trae for killim hem dae. Bat Jehovah “hemi stap wetem” David. (Fas Samuel 18:12) Olketa samting hia helpem David for trustim Jehovah for helpem hem lo eni hard taem wea hem deal witim.

16. Hao nao iumi savve showimaot iumi trustim Jehovah?

¹⁶ Iumi laek for depend lo Jehovah for helpem iumi distaem, mekem iumi barava trustim hem for sevem iumi lo future. Olsem example, iumi need for depend lo Jehovah taem iumi askem boss for tekem taem off mekem iumi savve attendim assembly or convention. Or maet iumi askem boss for iumi no duim ovataem mekem iumi attendim evri meeting and spendem moa taem lo ministry. Sapos boss no letem datwan and iumi lusim waka blo iumi, waswe, iumi garem faith hao Jehovah bae no lusim iumi and hem bae provaedem olketa samting wea iumi needim? (Heb. 13:5) Staka wea duim full-taem service experiencem hao Jehovah helpem olketa lo taem wea olketa barava needim. Iumi savve trustim Jehovah.

17. Wanem nao yeartext for 2022, and why nao olketa chusim datwan?

¹⁷ From Jehovah sapotim iumi, iumi no need for fraetem wanem bae happen lo future. God bae no lusim iumi sapos kingdom hem first samting lo laef blo iumi. Governing Body laek remindim iumi for redi distaem for olketa hard samting wea bae happen lo future, and for garem faith hao Jehovah bae no lusim iumi. Dastawe olketa chusim Sams 34:10 for kamap yeartext blo 2022: ‘Olketa wea go long Jehovah for help garem evri gudfala samting.’