1-2. (a) Wanem taem nao maet iumi tingim tumas olketa wea iumi lovem wea dae finis? (b) Lo naet bifor Jesus dae, wanem nao hem duim?

 NOMATA samwan wea iumi lovem hem dae longtaem finis, iumi no savve forgetim hem. Maet evri year lo datfala date wea hem dae, iumi bae tingim hem tumas.

² Evri year lo date wea Jesus Christ hem dae, iumi hipap witim staka million pipol evriwea lo world for tingim dae blo hem. (1 Pet. 1:8) Iumi hipap for tingim Jesus bikos hem givim laef blo hem for sevem iumi from sin and dae. (Matt. 20:28) Jesus laekem iumi for hipap olsem, bikos lo naet wea hem duim firstfala Memorial witim olketa disaepol, hem sei lo olketa: “Gohed for duim diswan for showimaot iufala rememberim mi.” *​—Luke 22:19.

3. Wanem nao bae iumi storyim lo disfala article?

³ Samfala wea attendim Memorial lo dae blo Christ garem hope for go lo heven, bat staka million pipol wea attend garem hope for stap lo earth. Lo disfala article, iumi bae storyim olketa reason why tufala grup hia luk forward for attendim Memorial evri year. Iumi bae storyim tu gud samting wea iumi kasem from datwan. Bat firstaem bae iumi storyim why olketa anointed wan attendim Memorial.

4. Why nao olketa anointed wan kaikaim bred and drinkim wine lo Memorial?

⁴ Evri year, olketa anointed wan wea attendim Memorial kaikaim bred and drinkim wine. Why nao olketa fit for duim datwan? Tingim samting wea happen lo naet bifor Jesus hem dae. Bihaen Jesus and olketa aposol blo hem celebratem Pasova, Jesus pasim bred and wine lo 11-fala faithful aposol and talem olketa for kaikaim and drinkim. Iumi kolem datwan Evening Kaikai blo Lord. Then Jesus storyim tufala agreement. Wanfala hem niu agreement and narawan hem agreement for rul lo wanfala Kingdom. * (Luke 22:19, 20, 28-30) Olketa aposol and samfala narawan moa bae kamap king and priest lo heven bikos lo tufala agreement hia. (Rev. 5:10; 14:1) So olketa anointed Christian wea laef distaem savve kaikaim bred and drinkim wine bikos olketa nomoa insaed lo tufala agreement hia.

5. Storyim nambawan hope wea olketa anointed wan garem.

⁵ Nara reason why olketa anointed wan attendim Memorial, hem bikos hem chance for olketa tingting abaotem hope blo olketa. Olketa garem nambawan hope for go lo heven and no savve dae. Olketa bae rul witim Jesus and olketa narawan lo 144,000. And spesol samting nao, olketa bae garem chance for lukim Jehovah. (1 Cor. 15:51-53; 1 John 3:2) For kasem olketa privilege hia, olketa luksavve olketa mas gohed faithful go kasem taem olketa dae. (2 Tim. 4:7, 8) Olketa anointed wan hapi tumas taem olketa tingim disfala hope blo olketa for go lo heven. (Titus 2:13) Bat waswe lo olketa “nara sheepsheep”? (John 10:16) Why nao olketa attendim Memorial?

6. Why nao olketa nara sheepsheep attendim Memorial evri year?

⁶ Olketa nara sheepsheep hapi for attendim Memorial for lukluk lo wanem hem gohed, bat olketa no kaikaim bred and drinkim wine. Lo 1938, hem firstaem for olketa wea garem hope for stap lo earth for herem hao hem fitim for olketa attendim Memorial. The Watchtower blo March 1, 1938 sei: “Hem barava stret and fitim for olketa [nara sheepsheep] for attendim datfala meeting and lukim wanem hem gohed. . . . Hem taem for olketa hapi tu.” Olsem samwan wea kasem invitation for attendim wanfala wedding, olketa nara sheepsheep hapi for attendim Memorial for lukluk lo wanem hem gohed.

7. Why nao olketa nara sheepsheep luk forward for herem Memorial tok?

⁷ Taem olketa nara sheepsheep attendim Memorial, olketa tu tingting abaotem hope blo olketa. Olketa luk forward for herem Memorial tok bikos hem storyim wanem Jesus and 144,000 wea rul witim hem bae duim for olketa lo datfala Wan Thousand Year Rul. Jesus Christ wea King, witim olketa nara ruler hia bae help for mekem disfala earth kamap paradaes and helpem olketa man for kamap perfect. Memorial tok hem helpem staka million nara sheepsheep for tingim hao olketa Bible profesi olsem Aesaea 35:5, 6, Aesaea 65:21-23, and Revelation 21:3, 4  bae kamap tru. Hem chance for olketa tingim datfala taem wea olketa bae stap lo niu world witim famili and olketa fren blo olketa. Datwan bae strongim hope blo olketa and mekem olketa for laek gohed worshipim Jehovah.​—Matt. 24:13; Gal. 6:9.

8. Storyim nara reason why olketa nara sheepsheep attendim Memorial.

⁸ Nara reason why olketa nara sheepsheep attendim Memorial, hem for showimaot olketa lovem and sapotim olketa anointed wan. Bible storyim hao olketa anointed wan and olketa wea hope for stap lo earth bae sapotim each other. Hao nao olketa duim datwan? Bae iumi storyim samfala example.

9. Hao nao profesi lo Sekaraea 8:23 showimaot feeling blo olketa nara sheepsheep for olketa anointed Christian?

⁹ Readim Sekaraea 8:23. Disfala profesi showimaot feeling blo olketa nara sheepsheep for olketa anointed Christian. Datfala toktok “wanfala Jiu” and “yufala” lo verse hia, hem piksarem sem grup wea hem nao olketa anointed wan. (Rome 2:28, 29) Tenfala man wea “langguis blong olketa hemi deferen” piksarem olketa nara sheepsheep. Taem verse hia sei olketa nara sheepsheep “holem kaleko” blo olketa anointed wan, datwan showimaot olketa barava laek joinim olketa anointed wan for worshipim Jehovah. So taem olketa nara sheepsheep attendim Memorial, datwan showimaot olketa sapotim olketa anointed Christian.

10. Wanem nao Jehovah duim for datfala profesi lo Esikiel 37:15-19, 24, 25 hem kamap tru?

¹⁰ Readim Esikiel 37:15-19, 24, 25. Disfala profesi kamap tru from Jehovah mekem olketa anointed wan and olketa nara sheepsheep for garem wan mind and sapotim each other. Disfala profesi storyim tufala stik. Stik “blong Jiuda” (tribe wea olketa king blo Israel kam from) piksarem olketa wea garem hope for go lo heven. And stik “blong Israel” * piksarem olketa wea garem hope for stap lo earth. Jehovah joinim tufala grup hia for kamap olsem “wanfala stik.” Diswan minim olketa wan mind for waka tugeta anda lo King blo olketa Christ Jesus. Evri year, olketa anointed wan and olketa nara sheepsheep attendim Memorial olsem “wanfala sekson nomoa” and Jesus nao “lukaftarem olketa.”​—John 10:16.

11. Hao nao “olketa sheepsheep” wea Matthew 25:31-36, 40 storyim, showimaot olketa sapotim olketa brata blo Christ?

¹¹ Readim Matthew 25:31-36, 40. “Olketa sheepsheep” lo disfala tokpiksa blo Jesus hem minim olketa nara sheepsheep wea garem hope for stap lo earth. Main samting wea olketa duim for helpem olketa anointed wan hem for sapotim olketa hia lo preaching waka wea gohed evriwea lo world, and for teachim pipol for kamap disaepol.​—Matt. 24:14; 28:19, 20.

12-13. Wanem nao samfala nara wei wea olketa nara sheepsheep sapotim olketa brata blo Christ?

¹² Evri year, lo olketa week bifor Memorial, olketa nara sheepsheep sapotim olketa brata blo Christ for duim campaign for invaetem olketa wea interest for attendim Memorial. (Lukim box “ Waswe, Iu Garem Plan for Olketa Month blo Memorial?”) And tu, nomata no eni anointed wan stap lo kongregeson blo olketa nara sheepsheep, olketa arrangem evri  samting for Memorial. Olketa hapi for duim olketa samting hia for sapotim olketa brata blo Christ. Olketa savve Jesus ting lo wanem olketa duim for sapotim olketa brata blo hem, hem olsem olketa duim for hem nao.​—Matt. 25:37-40.

¹³ Nomata wanem hope nao iumi garem, wanem nao samfala nara reason for iumi evriwan attendim Memorial?

14. Wanem nao Jehovah and Jesus duim wea showimaot tufala lovem iumi tumas?

¹⁴ Iumi tinghae lo love wea Jehovah and Jesus showimaot for iumi. Jehovah duim staka samting for iumi wea showimaot hem lovem iumi. Bat wanfala samting wea winim olketa samting hia, hem sendem kam spesol Son blo hem for dae for iumi. (John 3:16) Iumi luksavve Jesus tu lovem iumi tumas from hem willing for dae for iumi. (John 15:13) Iumi no savve changem bak love wea Jesus and Jehovah showimaot for iumi. Bat iumi savve showimaot iumi tinghae lo datwan lo wanem iumi duim lo laef blo iumi. (Col. 3:15) And iumi attendim Memorial for showimaot iumi lovem Jehovah and Jesus, and for tingim love blo tufala.

15. Why nao olketa anointed wan and olketa nara sheepsheep tinghae lo datfala ransom?

¹⁵ Iumi tinghae lo datfala ransom. (Matt. 20:28) Olketa anointed wan barava tinghae lo datfala ransom bikos hem mekem olketa for garem nambawan hope. From olketa garem faith lo sakrifaes blo Christ, lo tingting blo Jehovah olketa raeteous and hem adoptim olketa olsem olketa pikinini blo hem. (Rome 5:1; 8:15-17, 23) Olketa nara sheepsheep tu tinghae lo datfala ransom. From olketa garem faith lo sakrifaes blo Christ, God forgivim sin blo olketa, olketa fit for worshipim hem, and olketa garem hope for sev lo taem blo “datfala big trabol.” (Rev. 7:13-15) Olketa anointed wan and olketa nara sheepsheep showimaot olketa tinghae lo ransom taem olketa attendim Memorial evri year.

16. Wanem nao nara reason for iumi attendim Memorial?

¹⁶ Nara reason why iumi attendim Memorial hem bikos iumi laek for obeyim komand blo Jesus. Nomata wanem hope nao iumi garem, iumi laek for obeyim disfala komand wea Jesus talem lo naet wea hem startim first Memorial: “Gohed for duim diswan for showimaot iufala rememberim mi.”​—1 Cor. 11:23, 24.

17. Taem iumi attendim Memorial, hao nao datwan helpem iumi for strongim love blo iumi for Jehovah?

¹⁷ Iumi strongim love blo iumi for Jehovah. (Jas. 4:8) Olsem iumi lanem lo disfala study, taem iumi attendim Memorial, datwan givim iumi chance for tingting abaotem hope wea Jehovah givim lo iumi, and for ting raonem bigfala love wea hem showimaot for iumi. (Jeremaea 29:11; 1 John 4:8-10) Taem iumi ting raonem tufala samting hia, datwan bae strongim love blo iumi for Jehovah and helpem iumi for barava fren gud witim hem.​—Rome 8:38, 39.

18. Taem iumi ting raonem example blo Jesus, datwan helpem iumi for duim wanem?

¹⁸ Iumi laek for followim example blo Jesus. (1 Pet. 2:21) Lo olketa day bifor Memorial, iumi duim Bible reading abaotem olketa samting wea happen lo last  week blo Jesus lo earth, abaotem dae blo hem, and abaotem taem wea hem laef bak. Then lo Memorial, iumi herem wanfala tok wea helpem iumi for tingim love wea Jesus showimaot for iumi. (Eph. 5:2; 1 John 3:16) Taem iumi read abaotem and ting raonem example blo Jesus, iumi laek “duim sem samting wea hem duim.”​—1 John 2:6.

19. Wanem nao bae helpem iumi for gohed fren gud witim God?

¹⁹ Iumi laek for gohed fren gud witim God. (Jude 20, 21) Iumi bae gohed fren gud witim God taem iumi obeyim hem, mekhae lo nem blo hem, and duim samting wea mekem hem hapi. (Provebs 27:11; Matt. 6:9; 1 John 5:3) Taem iumi attendim Memorial, datwan bae helpem iumi for disaed strong for gohed fren witim Jehovah for olowe.

20. Wanem nao olketa gudfala reason for iumi attendim Memorial?

²⁰ Nomata iumi garem hope for laef olowe lo heven or lo earth, iumi garem olketa gudfala reason for attendim Memorial. Evri year lo date wea Jesus Christ hem dae, iumi hipap tugeta for tingim datwan. Bat main samting, hem for tingim bigfala love wea Jehovah showimaot lo iumi from hem sendem kam Son blo hem for dae for iumi. Lo disfala year, Memorial bae kamap lo evening lo Friday, April 15, 2022. From iumi lovem Jehovah and Son blo hem, iumi mek sure no eni samting stopem iumi for attendim Memorial lo dae blo Jesus.