STUDY ARTICLE 1
Iumi Trustim Hao ‘Evri Toktok blo God Hem Barava Tru’
YEARTEXT FOR 2023: ‘Evri toktok blo iu hem barava tru.’—SAMS 119:160, SIPB.
SONG 96 Buk Bilong God Hem Nambawan
ARTICLE BAE STORYIM a
1. Why nao staka pipol distaem no trustim Bible?
STAKA pipol distaem no savve hu nao olketa savve trustim. Olketa no sure sapos pipol wea olketa respectim olsem olketa bigman lo gavman, olketa scientist, and olketa bisnisman bae laek for duim samting for helpem olketa. And tu, olketa no respectim olketa leader blo olketa religion wea sei olketa Christian. So hem fitim nomoa for olketa pipol hia no trustim Bible wea olketa leader hia sei olketa followim.
2. Olsem Sams 119:160 (SIPB) storyim, wat nao iumi savve trustim?
2 From iumi worshipim Jehovah, iumi bilivim hao hem nao “God blo truth” and hem evritaem laekem iumi for kasem gud samting. (Ps. 31:5; Isa. 48:17) Iumi savve trustim wanem iumi readim lo Bible from ‘evri toktok blo God hem barava tru.’ (Readim Sams 119:160, SIPB) Iumi agree witim wanfala savveman wea sei: “Evri samting wea God talem hem tru and hem evritaem kamap tru. Pipol blo God savve trustim wanem hem talem bikos olketa trustim God.”
3. Wat nao bae iumi storyim lo disfala article?
3 Hao nao iumi savve helpem olketa narawan for trustim Bible olsem iumi? Bae iumi storyim thrifala reason why iumi savve trustim Bible. Bae iumi storyim hao message lo Bible hem no change, olketa profesi lo Bible wea kamap tru, and hao Bible garem paoa for changem laef blo pipol.
MESSAGE LO BIBLE HEM NO CHANGE
4. Why nao samfala pipol tingse message lo Bible hem change?
4 Jehovah God iusim samting olsem 40-fala man for raetem olketa buk lo Bible. Bat kam kasem distaem, olketa original manuscript wea olketa man hia raetem no stap. Olketa copy nomoa iumi garem. Datwan mekem samfala pipol for tingse message wea stap lo Bible distaem hem change and no barava semsem witim message wea 40-fala man hia raetem bifor. Wat nao mekem iumi sure message lo Bible hem no change?
Pipol wea kasem training for copyim olketa Hebrew Scripture barava careful taem olketa duim datwan. Diswan hem for mek sure olketa copyim stret toktok blo God (Lukim paragraf 5)
5. Hao nao olketa raetem olketa copy blo olketa Hebrew Scripture? (Lukim piksa lo front page.)
5 From Jehovah protectim message lo Bible, hem talem pipol blo hem for raetem olketa copy lo datwan. Hem talem olketa king lo Israel bifor for raetem olketa copy blo datfala Law for olketa seleva and hem markem olketa Levite for teachim olketa law hia lo olketa pipol. (Deut. 17:18; 31:24-26; Neh. 8:7) Bihaen olketa Jew kamap free from Babylon, samfala man raetem staka copy blo olketa Hebrew Scripture. (Ezra 7:6, footnote) Olketa man hia careful taem olketa raetem olketa copy hia. Gogo, olketa kaontem olketa word and olketa leta tu for mek sure olketa copyim stret. Nomata olsem, from olketa no perfect samfala lo olketa copy wea olketa raetem garem olketa smol mistek. Bat from staka copy hem stap, hem isi for faendem olketa mistek hia bihaen. Hao nao olketa faendem?
6. Hao nao olketa savveman fit for faendem olketa mistek insaed olketa copy blo Bible?
6 Olketa savveman distaem garem wei for faendem olketa mistek wea olketa man wea copyim Bible mekem. Tingim diswan, if olketa markem 100-fala man for copyim wanfala page and wanfala lo olketa mekem mistek. Wanfala wei for faendem datfala mistek, hem for comparem copy blo man hia witim evri copy blo olketa narawan. Olsem tu, taem olketa savveman comparem staka difren copy blo olketa Bible manuscript, datwan helpem olketa for faendem eni mistek or text wea wanfala man aotem.
7. Why nao iumi sei staka man wea copyim olketa Bible manuscript barava careful?
7 Olketa man wea copyim olketa Bible manuscript barava waka hard and duim best blo olketa for copyim stret. Tingim example wea showimaot datwan. Wanfala barava old manuscript wea olketa wakem lo 1008 or 1009 C.E., hem complete copy blo olketa Hebrew Scripture. Olketa kolem datfala manuscript Leningrad Codex. Bat no longtaem go nomoa, olketa faendem staka Bible manuscript and part blo olketa manuscript, wea olketa wakem 1,000 year bifor datfala Leningrad Codex. Samwan maet tingse from olketa man gohed copyim olketa manuscript hia insaed winim 1,000 year, datfala Leningrad Codex bae hem barava difren from olketa old manuscript hia wea olketa just faendem. Bat datwan hem no tru. Taem olketa savveman comparem olketa old manuscript wea olketa faendem bihaen witim olketa copy blo olketa manuscript wea stap finis wea no old tumas, olketa savveman hia faendaot hao olketa word nomoa change lelebet bat message hem no change.
8. Why nao olketa copy blo olketa Greek Scripture difren from samfala nara buk wea olketa raetem lo semtaem?
8 Olketa Christian lo first century tu raetem olketa copy blo olketa Greek Scripture. Olketa mekem staka copy lo 27-fala buk blo olketa Greek Scripture, for iusim lo meeting and preaching waka. Wanfala savveman wea comparem olketa manuscript blo olketa Greek Scripture witim olketa nara buk wea olketa raetem lo semtaem, hem story olsem abaotem olketa Bible manuscript hia: “Staka copy blo olketa Greek Scripture nao stap distaem winim olketa nara buk hia.” Datfala buk Anatomy of the New Testament sei: “Iumi savve trustim wanem iumi readim lo wanfala gud transleison blo olketa Greek Scripture distaem, from message wea insaed hem semsem witim message blo olketa man wea raetem Bible.”
9. Olsem Isaiah 40:8 storyim, wat nao hem tru abaotem message lo Bible?
9 For staka handred year, staka man wea copyim Bible olketa barava careful taem olketa duim datwan, dastawe iumi garem Bible wea stret wea iumi savve readim and studyim distaem. b Iumi savve Jehovah nao hem mek sure message blo hem no change and stap kam kasem distaem. (Readim Isaiah 40:8.) Bat samfala maet sei, nomata message lo Bible no change, datwan no pruvim Bible hem kam from God. Distaem bae iumi storyim samfala pruv wea showimaot Bible hem kam from God.
IUMI SAVVE TRUSTIM OLKETA BIBLE PROFESI
Left: C. Sappa/DeAgostini/Getty Images; right: Image © Homo Cosmicos/Shutterstock
Olketa Bible profesi kamap tru lo bifor and lo distaem tu (Lukim paragraf 10-11) d
10. Storyim wanfala profesi wea kamap tru wea pruvim wat 2 Peter 1:21 talem hem tru. (Lukim olketa piksa.)
10 Staka profesi lo Bible wea kamap tru olketa raetem staka handred year bifor olketa happen. Wanem happen lo history hem pruvim datwan. Iumi no sapraes lo diswan bikos evri profesi lo Bible hem kam from Jehovah. (Readim 2 Peter 1:21.) For example, tingim olketa profesi abaotem taem wea olketa winim taon blo Babylon bifor. Lo mek-eit century B.C.E., profet Isaiah profesi abaotem hao bae olketa tekovarem datfala maeti taon. Hem even talem tu wanfala man wea nem blo hem Cyrus nao bae tekovarem datfala taon and hao bae hem duim. (Isa. 44:27–45:2) Isaiah profesi tu abaotem hao gogo Babylon bae distroe and no eniwan bae stap insaed. (Isa. 13:19, 20) Datwan nao samting wea happen. Lo 539 B.C.E., olketa blo Media and Persia tekovarem Babylon, and ples wea datfala maeti taon stap lo hem bifor hem kamap desert distaem. Lukim video Bible Storyim Hao Babylon Bae Distroe lo electronic copy blo Enjoyim Laef for Olowe! buk, leson 03 point 5.
11. Storyim hao profesi lo Daniel 2:41-43 hem kamap tru distaem.
11 Distaem tu iumi lukim olketa Bible profesi gohed for kamap tru. For example, tingim datfala profesi blo Daniel abaotem England-America World Paoa. (Readim Daniel 2:41-43.) Datfala profesi showimaot hao wanfala “part” blo datfala world paoa bae “strong” olsem iron, and nara “part blo hem bae wik” olsem clay. And iumi lukim hao datwan hem happen. Datfala world paoa barava strong olsem iron bikos hem nao main wan wea lead for winim World War I and World War II, and hem garem maeti army wea strong tumas. Bat olketa citizen blo hem mekem hem wik tu, from staka taem pipol savve protest againstim gavman and olketa big bisnis lo kantri. Wanfala expert saed lo politik lo world sei: “England-America hem barava divaed saed lo politik winim eni nara democratic kantri lo world distaem.” And England, wea hem nara part lo disfala world paoa, hem tu divaed saed lo politik lo olketa year wea go pas. Diswan hem bikos pipol no savve agree for which kantri insaed lo European Union nao olketa shud waka klos witim. Diswan mekem hem barava hard for England-America World Paoa for wan mind for duim eni samting.
12. Wat nao olketa Bible profesi mekem iumi sure lo hem?
12 Staka Bible profesi wea kamap tru helpem iumi for trustim olketa promis blo God lo future. Iumi garem sem tingting olsem man wea raetem disfala psalm: “Mi bin weitem yu fo sevem mi . . . Mi gohed fo trastem nomoa olketa toktok blong yu.” (Sams 119:81, SIPB) Lo Bible, Jehovah promisim iumi “gudfala future” and givim iumi “hope.” (Jer. 29:11) For iumi garem gudfala future iumi no trustim wanem olketa man trae for duim, bat iumi trustim olketa promis blo Jehovah. So iumi laek for studyim gud olketa Bible profesi, bikos datwan bae helpem iumi for trustim toktok blo God lo Bible.
ADVAES LO BIBLE HELPEM STAKA MILLION PIPOL
13. Olsem Sams 119:66, 138 (SIPB) storyim, wat nao nara reason why iumi savve trustim Bible?
13 Nara reason why iumi savve trustim Bible hem bikos hem helpem pipol wea followim olketa advaes insaed. (Readim Sams 119:66, 138, SIPB.) For example, samfala couple wea gogo for divorce olketa hapi moa distaem from olketa followim olketa advaes lo Bible for no divorce. And olketa pikinini blo olketa hapi and feel sef bikos olketa parents hia lovem and kea for olketa.—Eph. 5:22-29.
14. Storyim example wea showim taem pipol followim advaes lo Bible, datwan helpem olketa for garem gudfala laef.
14 Nomata olketa wea dangerous criminal bifor, taem olketa followim advaes lo Bible olketa mekem olketa bigfala change lo laef blo olketa. Tingim hao advaes lo Bible helpem wanfala prisoner wea nem blo hem Jack. c Hem wanfala lo olketa barava raf criminal lo prison wea kasem sentence for dae. Bat wanday, Jack joinim wanfala Bible study. From olketa brata wea conductim datfala study kaen tumas, Jack barava tinghae lo datwan and hem tu start for study. Hem followim wanem hem lanem lo Bible and wei blo hem start for change and hem kaen lo olketa narawan. Gogo Jack qualify for kamap anbaptaes pablisa and then hem baptaes. Hem gohed preach abaotem Kingdom lo olketa nara prisoner and hem studyim Bible witim fofala lo olketa. Lo day wea bae olketa killim hem dae, Jack hem wanfala gudfala man. Wanfala lawyer blo hem sei: “Wei blo Jack barava difren nao from taem wea mi savve lo hem 20 year bifor. Wanem Olketa Jehovah’s Witness teachim hem from Bible barava changem laef blo hem.” Nomata Jack mas dae, example blo hem showimaot iumi savve trustim Bible and Bible garem paoa for changem laef blo pipol.—Isa. 11:6-9.
Advaes lo Bible helpem staka pipol from staka baekgraon for changem laef blo olketa (Lukim paragraf 15) e
15. From pipol blo Jehovah followim advaes lo Bible, hao nao datwan mekem olketa difren from pipol lo world? (Lukim piksa.)
15 Pipol blo Jehovah wan mind bikos olketa followim advaes lo Bible. (John 13:35; 1 Cor. 1:10) From iumi garem peace and wan mind, datwan mekem iumi difren from staka pipol lo world wea divaed saed lo politik, kala skin, and baekgraon. Wanfala young man wea nem blo hem Jean sapraes for lukim hao pipol blo Jehovah wan mind. Hem growap lo wanfala kantri lo Africa. Hem joinim army taem war start lo kantri, bat gogo hem ranawe lo nara kantri. Lo there, hem meetim Olketa Jehovah’s Witness. Jean sei: “Mi lanem hao pipol wea followim tru religion no join lo politik and no divaed, bat olketa lovem each other.” Hem sei tu: “Bifor mi givim laef blo mi for faet for kantri. Bat taem mi lanem truth lo Bible, mi givim laef blo mi for duim waka blo Jehovah.” Jean barava change and distaem hem no faetem pipol from difren baekgraon, bat hem storyim message lo Bible abaotem peace lo evriwan wea hem meetim. From advaes lo Bible barava helpem pipol from staka difren baekgraon, datwan pruvim iumi savve trustim Bible.
GOHED TRUSTIM HAO TOKTOK BLO GOD HEM TRU
16. Why nao hem important for gohed trustim Bible?
16 From disfala world gohed for kamap worse, datwan bae testim trust wea iumi garem lo Bible. Pipol maet trae for mekem iumi daotem sapos Bible hem tru and sapos Jehovah iusim datfala wakaman wea faithful and wise for leadim iumi distaem. Bat if iumi barava sure toktok blo Jehovah lo Bible hem tru, iumi bae againstim olketa samting olsem wea testim faith blo iumi. Iumi bae disaed strong for ‘obeim olketa lo blong Jehovah, go-go kasem taem iumi dae.’ (Sams 119:112, SIPB) Bae iumi “no save sem” for talemaot truth from Bible lo olketa narawan and for encouragem olketa for followim. (Sams 119:46, SIPB) And iumi bae “patient and hapi” nomata iumi feisim samfala barava hard situation, or persecution.—Col. 1:11; Sams 119:143, 157, SIPB.
17. Wat nao yeartext blo iumi remindim iumi for duim?
17 Iumi thankiu lo Jehovah for helpem iumi for savve lo truth! Diswan mekem iumi garem peace and trust, and tu, hem helpem iumi for savve lo stret samting for duim lo laef insaed disfala world wea pipol konfius and evri samting olobaot. From iumi savve lo truth, iumi garem hope for kasem gudfala laef lo future anda lo Kingdom blo God. Yeartext blo iumi for 2023 bae helpem iumi for gohed trustim hao evri toktok blo God hem tru!—Sams 119:160, SIPB.
SONG 94 Tinghae Long Bible
a ‘Evri toktok blo iu hem barava tru.’ (Sams 119:160, SIPB) Datwan hem yeartext for 2023 wea savve strongim faith blo iumi. Masbi iu bilivim toktok lo yeartext blo iumi. Bat staka pipol no bilivim Bible or bilivim hao Bible garem olketa advaes wea savve helpem iumi. Lo disfala article bae iumi storyim thrifala reason wea iumi savve iusim for helpem pipol wea garem gudfala heart for trustim Bible and olketa advaes blo hem.
b For samfala information moa abaotem hao Bible no change kam kasem distaem, go lo jw.org and typem “History and Bible” lo search box.
c Mifala changem samfala nem.
