1-2. (a) Why nao iumi no sapraes taem iumi feisim olketa hard taem? (b) Wat nao bae iumi storyim lo disfala article?

 IUMI pipol blo Jehovah no sapraes taem iumi feisim olketa hard taem. Olsem Bible talem, iumi luksavve hao “iumi mas kasem plande hard samting firstaem bifor iumi savve go insaed Kingdom bilong God.” (Acts 14:22) Iumi savve tu hao samfala problem blo iumi bae no finis go kasem taem wea iumi bae stap lo niu world wea no eniwan bae dae, sorre, krae, or feelim pain tu.—Rev. 21:4.

² Jehovah no protectim iumi from olketa hard taem, bat hem helpem iumi for deal witim. Tingim wanem aposol Paul talem lo olketa Christian lo Rome. Firstaem hem storyim olketa problem wea hem and olketa nara brata feisim. Then hem storyim hao Jehovah helpem olketa for “barava win.” (Rome 8:35-37) Diswan minim iumi savve gohed for kasem blessing from Jehovah nomata iumi feisim wanfala hard taem. Lo disfala article bae iumi storyim hao Jehovah helpem Joseph and hao Hem savve helpem iumi tu.

3. Hao nao laef blo Joseph hem seknomoa change?

³ Jacob barava lovem tumas son blo hem Joseph. (Gen. 37:3, 4) From datwan, olketa brata blo Joseph jealous lo hem. Gogo, olketa salem Joseph lo samfala Midianite bisnisman. Olketa bisnisman hia tekem Joseph go farawe lo Egypt, and lo there, olketa salem hem moa lo Potiphar, wea hem komanda blo olketa gard blo Pharaoh. Laef blo Joseph hem change kwiktaem tumas! Hem son wea dadi lovem tumas, then seknomoa hem slave blo wanfala Egyptian.​—Gen. 39:1.

4. Wanem challenge nao maet iumi feisim wea klosap semsem witim wat happen lo Joseph?

 ⁴ Bible sei hao “olketa nogud samting savve happen lo evriwan.” (Eccl. 9:11, Holy Bible—Easy-to-Read Version) Samfala taem iumi feisim olketa hard taem wea Bible sei hem savve “kasem olketa nara man tu,” wea minim olketa problem wea savve kasem evriwan. (1 Cor. 10:13) Or iumi maet kasem hard taem bikos iumi olketa disaepol blo Jesus. For example, maet pipol tok spoelem, againstim, or persecutim iumi bikos iumi faithful lo God. (2 Tim. 3:12) Jehovah savve gohed helpem iumi lo eni hard taem wea iumi feisim. Hao nao hem duim datwan for Joseph?

5. Wat nao mekem Potiphar luksavve Jehovah blessim Joseph? (Genesis 39:2-6)

⁵ Readim Genesis 39:2-6. Potiphar luksavve Joseph hem wanfala young man wea kleva tumas and hem man for waka. And tu, hem luksavve ‘Jehovah nao blessim evriting wea Joseph duim.’ b Gogo, Potiphar appointim Joseph for boss lo haos blo hem and for lukaftarem evri samting wea hem onam. From datwan, Jehovah blessim evriting wea Potiphar onam.

6. Hao nao maet Joseph feel abaotem situation blo hem?

⁶ Imaginim hao Joseph mas feel abaotem situation blo hem. Wat nao hem mas laekem tumas? Waswe, hem laekem Potiphar for luksavve lo wanem hem duim and for rewardim hem? Maet nomoa, masbi Joseph laekem tumas for kamap free and for go bak lo dadi blo hem. Tingim, nomata hem kasem staka privilege lo haos blo Potiphar, Joseph still slave lo wanfala boss wea no worshipim Jehovah. Jehovah no mekem Potiphar for letem Joseph for kamap free. And situation blo Joseph bae worse go moa.

7. Hao nao situation blo Joseph kamap worse go moa? (Genesis 39:14, 15)

⁷ Genesis chapter 39 storyim hao waef blo Potiphar laekem Joseph and gohed trae for switim hem. Each taem, Joseph sei no. Gogo waef blo Potiphar kros  tumas lo Joseph and accusim hem and sei Joseph trae for reipim hem. (Readim Genesis 39:14, 15.) Potiphar herem datwan and putim Joseph lo prison, and Joseph stap lo there for staka year. (Gen. 39:19, 20) Hao nao datfala prison? Hebrew word wea Joseph iusim wea iumi transleitim lo “prison” savve minim “hol lo graon,” wea datwan showim ples wea Joseph stap hem dark and hem no wei nao. (Gen. 40:15; footnote) And tu, Bible showimaot olketa chainim tufala leg blo hem and putim iron raonem nek blo hem. (Sams 105:17, 18, SIPB) So situation blo Joseph hem worse go moa. Firstaem hem slave wea olketa trustim, then end ap hem insaed prison nao.

8. Nomata situation blo iumi hem gohed for kamap worse, wat nao iumi savve sure lo hem?

⁸ Waswe, enitaem iu feisim wanfala situation wea gohed for kamap worse nomata iu gohed for prea? Datwan savve happen. Jehovah no protectim iumi from olketa hard taem insaed disfala world wea Satan rulim. (1 John 5:19) Nomata olsem, iumi sure hao Jehovah hem savve lo situation blo iumi and hem kea for iumi. (Matt. 10:29-31; 1 Pet. 5:6, 7) And tu, hem promis olsem: “Bae mi nating lusim iu.” (Heb. 13:5) Jehovah savve helpem iumi for no givap nomata luk olsem iumi no wei nao. Distaem bae iumi storyim hao Jehovah duim datwan for Joseph.

9. Wat nao showimaot Jehovah stap witim Joseph taem hem stap lo prison? (Genesis 39:21-23)

⁹ Readim Genesis 39:21-23. Nomata situation blo Joseph lo prison hem kamap worse, Jehovah gohed blessim Joseph. Hao nao hem duim datwan? Gogo, wei blo Joseph mekem datfala bigman blo prison tu respectim and trustim Joseph olsem Potiphar. Then, hem appointim Joseph for lukaftarem evri nara prisoner. Bible sei “datfala bigman blo prison nating warim eni samting wea Joseph lukaftarem.” So Joseph duim gudfala waka wea hem savve busy lo hem. Datwan hem change wea Joseph nating expectim! Tingim, hem no mek sense for wanfala prisoner wea olketa accusim and sei hem trae for reipim waef blo wanfala hae official, for kasem position olsem. Bat olsem Genesis 39:23 storyim, reason why diswan happen hem bikos “Jehovah stap witim Joseph and Jehovah blessim evri samting wea Joseph duim.”

10. Explainim why Joseph maet feel olsem Jehovah no gohed helpem hem lo olketa hard taem wea hem feisim.

¹⁰ Imaginim moa, hao nao Joseph mas feel abaotem situation blo hem. Tingim, olketa accusim hem and putim hem lo prison. Waswe, iu tingse Joseph bae feel olsem Jehovah gohed for blessim evriting wea hem duim? Wat nao hem mas laekem tumas? Waswe, hem laekem for datfala bigman blo prison for favorim hem? Maet nomoa, masbi Joseph laekem tumas for olketa releasem hem from prison. Hem even askem nara prisoner wea klosap for release for story on behalf lo hem lo Pharaoh mekem hem aot from prison. (Gen. 40:14) Bat datfala man no storyim datwan lo Pharaoh. So Joseph mas stap lo prison for tufala year moa. (Gen. 40:23; 41:1, 14) Nomata olsem, Jehovah gohed for helpem hem. Hao nao Jehovah duim datwan?

11. Wat nao Jehovah helpem Joseph for duim, and hao nao datwan help for mekem plan blo Jehovah kamap tru?

¹¹ Taem Joseph insaed prison, Jehovah mekem Pharaoh, king blo Egypt, for lukim tufala dream wea mekem hem wari fogud.  So hem laekem tumas for savve lo mining blo tufala dream hia. Taem hem savve Joseph fit for talem mining blo olketa dream, hem talem samfala man for go kolem Joseph for kam lo hem. Jehovah helpem Joseph for talem mining blo tufala dream hia, and tu, Pharaoh barava tinghae lo olketa gudfala advaes blo Joseph. From Pharaoh luksavve Jehovah stap witim Joseph, hem appointim hem for lukaftarem and givim kaikai for evri pipol lo Egypt. (Gen. 41:38, 41-44) Gogo bigfala hangere kamap lo Egypt and lo Canaan tu, wea hem kantri wea famili blo Joseph stap. Lo datfala taem Joseph fit for sevem famili blo hem, wea gogo Messiah bae kam from datfala famili laen.

12. Wat nao samfala samting wea Jehovah duim for gohed helpem Joseph?

¹² Tingim olketa samting wea happen lo Joseph wea hem nating expectim. For example, hu nao mekem Potiphar for appointim Joseph, wanfala slave, for lukaftarem evriting blo hem? Hu nao mekem datfala bigman blo prison for markem Joseph for lukaftarem olketa nara prisoner? Hu nao mekem Pharaoh for lukim olketa dream and helpem Joseph for talem mining blo olketa, and for hem appointim Joseph for lukaftarem and givim kaikai lo Egypt? (Gen. 45:5) Hem barava klia dat Jehovah nao gohed for helpem Joseph. So nomata olketa brata blo Joseph plan for killim hem dae, Jehovah changem situation hia for fulfillim plan blo Hem.

13. Waswe, Jehovah kontrolem evri samting wea happen lo iumi? Explainim.

¹³ Wat nao iumi savve lanem from story blo Joseph? Waswe, Jehovah kontrolem evri samting wea happen lo iumi? Waswe, hem bihaenem olketa nogud samting for happen for wanfala gud reason? Nomoa, Bible no teachim datwan. (Eklesiastes 8:9, SIPB; Eccl. 9:11) Bat iumi savve, taem iumi kasem hard taem, Jehovah lukim datwan and hem herem iumi taem iumi krae lo hem for help. (Sams 34:15; 55:22, SIPB; Isa. 59:1) And tu, Jehovah savve gohed for helpem iumi for deal witim olketa hard taem wea iumi feisim. Hao nao hem duim datwan?

14. Hao nao Jehovah savve helpem iumi lo taem wea iumi feisim hard taem?

 ¹⁴ Staka taem Jehovah savve helpem iumi taem hem provaedem comfort and encouragement lo taem wea iumi barava needim. (2 Cor. 1:3, 4) Hem nao samting wea happen lo Eziz, wanfala brata lo Turkmenistan wea olketa sentencem hem for stap lo prison for tu years, from hem faithful lo God. Hem sei: “Lo morning wea olketa bae judgem kot case blo mi, wanfala brata readim Isaiah 30:15 for mi, wea sei: ‘Sapos mind blo iufala hem kwaet and showimaot iufala trustim mi, bae iufala strong.’ Disfala verse helpem mi for garem peace lo mind and for trustim Jehovah lo evri samting. Mi ting raonem datfala verse and hem helpem mi lo full taem wea mi lo prison.” Waswe, iu savve tingim enitaem wea Jehovah provaedem comfort and encouragement lo taem wea iu barava needim?

15-16. Wat nao iumi lanem from wanem hem happen lo Tori?

¹⁵ Staka taem, iumi no luksavve lo hao Jehovah helpem iumi for deal witim wanfala hard taem go kasem taem wea hem finis. Hem nao wanem happen lo wanfala sista wea nem blo hem Tori. Son blo hem, Mason, hem sik lo cancer for sixfala year gogo hem dae. Datwan barava brekem heart blo Tori. Hem sei: “From mi wanfala mami, datwan hem barava hard tumas for mi deal witim.” Hem sei tu: “Mi sure olketa parents bae agree hao for lukim pikinini blo iu safa hem worse winim for iuseleva nao safa.”

¹⁶ Tori sorre tumas for lukim son blo hem safa, bat bihaen hem ting raonem hao Jehovah helpem hem lo datfala taem. Hem sei: “Taem mi ting bak, mi luksavve Jehovah gohed helpem mi lo full taem  wea son blo mi sik. For example, nomata lo taem wea Mason sik tumas and no fit for lukim olketa visitor, olketa brata and sista savve draev kam for tufala hour for visitim mifala lo hospital. Evritaem samwan bae stap lo there for sapotim mifala. And tu, olketa brata and sista helpem mifala saed lo olketa material samting. Nomata hem no isi, mifala garem wanem mifala needim. Tru nao, Jehovah gohed provaedem wanem Tori barava needim and hem duim sem samting for Mason tu.​—Lukim box “ Jehovah Provaedem Wanem Mifala Barava Needim.”

17-18. Wat nao bae helpem iumi for luksavve and tinghae lo olketa samting wea Jehovah duim for helpem iumi? (Sams 40:5)

¹⁷ Readim Sams 40:5 (SIPB). Goal blo samwan wea savve klaemapem olketa maunten hem for kasem top lo maunten. Bat hem savve stop lo samfala ples followim datfala maunten for enjoyim olketa samting wea hem lukim. Olsem tu, hem gud for stop samfala taem and ting raonem wanem Jehovah gohed duim for helpem iumi taem iumi feisim hard taem. Lo end blo each day, hem gud for tingim: ‘Hao nao Jehovah blessim mi tuday? Hao nao Jehovah gohed for helpem mi nomata hard taem hia hem no finis?’ Trae for luksavve nomata lo wanfala samting wea Jehovah duim for helpem iu.

¹⁸ Maet iumi prea for olketa hard taem blo iumi for finis, and datwan hem stret and mek sense. (Phil. 4:6) Bat iumi shud luksavve tu lo olketa blessing wea iumi kasem distaem. Tingim, Jehovah promis for strongim iumi and for helpem iumi for no givap. So gohed tinghae lo olketa samting wea Jehovah duim for helpem iumi. Then, iumi bae luksavve hao Jehovah gohed for helpem iumi lo olketa hard taem wea iumi feisim, olsem hem helpem Joseph.​—Gen. 41:51, 52.