STUDY ARTICLE 4
SONG 30 Dadi, God, and Fren Bilong Mi
Jehovah Hem Barava Lovem Iumi
“Jehovah hem lovem [iumi].”—JAS. 5:11.
MAIN FOCUS
Love wea Jehovah garem for iumi bae mekem iumi for fren klos witim hem, mekem iumi feel sef, savve dat bae hem lukaftarem iumi gud, and hem strongim iumi.
1. Taem iu ting abaotem Jehovah, wat nao iu tingim?
HAO, enitaem iu trae for imaginim lukluk blo Jehovah? Wat nao kam lo mind blo iu taem iu prea lo hem? Iumi no savve lukim Jehovah, bat Bible describem lukluk blo hem. Bible kolem Jehovah olsem “wanfala sun and shield,” and “wanfala fire wea savve bonem evri samting.” (Ps. 84:11; Heb. 12:29) Lo wanfala vision, Ezekiel describem hao Jehovah hem luk olsem wanfala metal wea shaen for gud, sidaon lo wanfala sapphire throne, and wanfala rainbow shaen raonem hem. (Ezek. 1:26-28) Hao Bible describem Jehovah lo hia maet mekem iumi for sapraes or feel olsem iumi no fit for fren witim hem.
2. Wat nao maet mekem hem hard for samfala fren klos witim Jehovah?
2 From iumi no savve lukim Jehovah, maet iumi faendem hem no isi for bilivim hem lovem iumi. Or maet hem hard for bilivim dat Jehovah bae lovem iumi bikos lo olketa nogud samting wea happen lo iumi bifor. Or maet really dadi blo iumi no lovem iumi. Jehovah understandim why iumi savve feel olsem and tingse hem hard for iumi fren klos witim hem. For helpem iumi, hem storyim olketa naes quality blo hem insaed Bible.
3. Why nao iumi laek story abaotem love blo Jehovah?
3 Wanfala best word for describem Jehovah hem love. Bible sei: “God hem love.” (1 John 4:8) Evri samting wea Jehovah duim, hem bikos lo love. Love blo God hem barava big and strong tumas, dastawe hem showim datwan lo olketa wea no lovem hem tu. (Matt. 5:44, 45) Lo disfala article, bae iumi story abaotem Jehovah and love blo hem. Taem iumi gohed lane abaotem Jehovah, bae iumi lovem hem go moa.
JEHOVAH BARAVA LOVEM IUMI
4. Hao nao iu feel abaotem wei wea Jehovah lovem iumi? (Lukim tu piksa.)
4 “Jehovah hem lovem [iumi].” (Jas. 5:11) Insaed Bible, Jehovah comparem hemseleva witim wanfala mami wea lovem pikinini blo hem. (Isa. 66:12, 13) Imaginim wanfala mami wea barava kea for smol baby blo hem. Hem karem baby antap knee blo hem and story kaen lo hem. Taem baby krae or feel pain, mami mek sure hem kasem wat hem needim. Taem iumi kasem hard taem, iumi sure Jehovah lovem iumi. Wanfala man wea raetem psalm hem sei olsem: “Taem olketa wari blo mi hem tumas for mi. Iu comfortim and mekem tingting blo mi hem kwaet.”—Ps. 94:19.
“Olsem wanfala mami wea comfortim son blo hem, so mi bae gohed for comfortim iufala” (Lukim paragraf 4)
5. Wat nao loyal love blo Jehovah mekem iu sure lo hem?
5 Jehovah hem loyal. (Ps. 103:8) Hem no givap lo iumi nomata taem iumi duim samting wea rong. Staka taem nao nation blo Israel duim samting wea mekem Jehovah feel nogud. Nomata olsem, taem olketa repent, hem assurem olketa lo loyal love blo hem. For example, hem talem olketa: “Iu kamap samting wea spesol lo eye blo mi, Iu kasem honor, and mi lovem iu.” (Isa. 43:4, 5) Love blo Jehovah hem no change. Iumi savve evritaem trustim datwan. Nomata iumi duim wanfala serious mistek, Jehovah no lusim iumi. Taem iumi repent and kam bak lo Jehovah, iumi bae still experiencem love blo hem. Hem promis hao “hem bae barava forgivim” iumi. (Isa. 55:7) Bible sei taem Jehovah forgivim iumi, bae iumi “strong” bak moa.—Acts 3:19.
6. Wat nao Zechariah 2:8 teachim iumi abaotem Jehovah?
6 Readim Zechariah 2:8. From Jehovah lovem iumi, hem kwiktaem for minim feeling blo iumi and laek for protectim iumi. Taem iumi sorre, hem tu sorre. So iumi savve sure hem bae ansarem iumi taem iumi prea lo hem: “Protectim mi olsem pupil lo eye blo iu.” (Ps. 17:8) Eye hem wanfala sensitive and spesol part lo body. So taem Jehovah comparem iumi witim pupil lo eye blo hem, hem olsem Jehovah sei, ‘Eniwan wea spoelem iufala, pipol blo mi, hem spoelem wat hem spesol lo mi.’
7. Why nao iumi need for strongim trust blo iumi lo love blo Jehovah?
7 Jehovah laekem iumi for trustim dat hem lovem iumi each wan. Bat Jehovah savve from olketa samting wea iumi duim bifor, maet hem mekem iumi wonder if hem bae lovem iumi. Or maet iumi feisim wanfala situation distaem wea mekem iumi daotem love blo Jehovah. Wat nao bae strongim trust blo iumi lo hem? Bae iumi lane abaotem hao Jehovah showim hem lovem Jesus, olketa anointed Christian, and iumi evriwan.
HAO JEHOVAH SHOWIMAOT LOVE BLO HEM
8. Why nao Jesus sure Dadi blo hem lovem hem?
8 Jehovah and Son blo hem bin stap tugeta for long taem winim eniwan. During staka billion year wea tufala stap tugeta lo heven, tufala barava klos and gohed strongim love blo tufala for each other. Lo Matthew 17:5, iumi savve lukim klia hao Jehovah lovem Jesus. Jehovah savve sei, ‘Mi hapi lo disfala man.’ Bat from hem laekem iumi for savve hao hem barava lovem Jesus, hem kolem hem “Son bilong mi wea mi lovem.” Jehovah barava hapi lo Jesus, especially from hem willing for givim laef blo hem. (Eph. 1:7) And Jesus no daotem hao Dadi blo hem lovem hem. Jesus barava feel sure lo love blo Dadi blo hem. Staka taem Jesus talem hao Dadi blo hem lovem hem.—John 3:35; 10:17; 17:24.
9. Wanem toktok nao showim Jehovah lovem olketa anointed Christian? Explainim. (Rome 5:5)
9 Jehovah confirmim tu dat hem lovem olketa anointed Christian. (Readim Rome 5:5.) Lo Greek languis, disfala verse showimaot hao love wea Jehovah garem for olketa anointed wan hem strong tumas olsem wata lo wanfala stream wea flow. Olketa anointed Christian savve hao God barava “lovem” olketa. (Jude 1) Aposol John storyim feeling wea olketa garem taem hem sei: “Dadi hem barava lovem iumi! Hem kolem iumi olketa pikinini bilong hem.” (1 John 3:1) Hao, Jehovah lovem olketa anointed Christian nomoa? No, Jehovah duim samting wea showimaot hem lovem iumi evriwan.
10. Wat nao pruvim Jehovah hem barava lovem iumi?
10 Wat nao Jehovah duim wea barava confirmim hem lovem iumi? Jehovah provaedem ransom, wea datwan showim bigfala love wea hem garem for iumi! (John 3:16; Rome 5:8) Jehovah givim spesol Son blo hem for dae for iumi evriwan, mekem iumi savve kasem forgiveness for olketa sin blo iumi and savve fren witim Hem. (1 John 4:10) Taem iumi ting raonem datfala price wea Jehovah and Jesus peim, bae iumi understandim go moa hao tufala barava lovem each wan lo iumi. (Gal. 2:20) Jehovah no peim datfala ransom for fitim justice nomoa. Bat hem duim datwan bikos hem lovem iumi. Jehovah showimaot hem lovem iumi taem hem sakrifaesim spesol Son blo hem, Jesus. Jehovah letem Son blo hem for safa and dae for iumi.
11. Wat nao iumi lanem from Jeremiah 31:3?
11 Olsem iumi bin storyim, Jehovah no haedem feeling blo hem, bat hem talem iumi hao hem barava lovem iumi. (Readim Jeremiah 31:3.) Jehovah pullim iumi kam lo hem bikos hem lovem iumi. (Comparem Deuteronomy 7:7, 8.) No eni samting or eniwan savve separatem iumi from love blo hem. (Rome 8:38, 39) Hao nao iu feel abaotem disfala love blo God? Readim Psalm 23, and lukim hao love blo Jehovah hem affectim David and hao datwan savve affectim iumi tu.
HAO NAO IU FEEL ABAOTEM LOVE BLO GOD?
12. Wat nao main point lo Psalm 23?
12 Readim Psalm 23:1-6. Lo Psalm 23, David talem hao hem trustim dat Jehovah lovem hem and kea for hem. Hem describem klos frenship wea hem and Jehovah garem, and hem kolem Jehovah lo Shepherd blo hem. David feel sef taem hem letem Jehovah for leadim hem, and David barava depend lo hem. David savve dat Jehovah bae showim love lo hem evriday. Wat nao mekem hem for barava sure lo datwan?
13. Wat nao mekem David sure dat Jehovah kea for hem?
13 “Bae mi no short lo eni samting.” David savve Jehovah lukaftarem hem gud bikos Jehovah evritaem provaedem wat hem needim. David savve tu hao Jehovah hem fren blo hem and Jehovah hapi lo hem. Dastawe hem sure hao nomata wat nao bae happen, Jehovah bae gohed for provaedem wat hem needim. Bikos David trustim hao Jehovah lovem hem and bae lukaftarem hem, datwan helpem hem for no wari bat hem hapi and satisfae.—Ps. 16:11.
14. Hao nao Jehovah lukaftarem iumi?
14 Jehovah bae lukaftarem iumi, especially taem olketa nogud samting happen lo iumi. Claire, a wea waka lo Bethel for winim 20 year finis, no savve wat for duim for helpem famili blo hem taem olketa feisim wanfala big problem. Dadi kasem stroke, wanfala sista blo hem disfellowship, smol bisnis blo famili mas klos daon and bank tekem haos blo olketa. Hao nao Jehovah lukaftarem olketa? Claire sei: “Jehovah lukaftarem famili blo mi taem hem provaedem wat olketa needim each day. Staka taem, wat Jehovah givim hem winim wat famili needim! Mi savve ting abaotem hao Jehovah helpem mifala, and bae mi no savve forgetim love blo hem. Datwan helpem mi for gohed servem Jehovah witim hapi, nomata mi feisim samfala hard taem.”
15. Hao nao Jehovah strongim David? (Lukim tu piksa.)
15 “Hem strongim mi.” Samfala taem, David hem wari bikos lo olketa problem and hard taem wea hem feisim. (Ps. 18:4-6) Bat from Jehovah lovem and kea for David, datwan strongim hem. Jehovah leadim fren blo hem David wea taed tumas lo “ples wea garem staka grass” and “for rest lo ples wea garem wata.” From datwan, David hem kasem bak strong blo hem and gohed hapi for servem Jehovah.—Ps. 18:28-32.
Nomata David barava wari, Jehovah lovem and kea for hem, datwan strongim hem (Lukim paragraf 15)
16. Hao nao Jehovah strongim iu?
16 Distaem tu, bikos lo loyal love wea Jehovah showim nao hem mekem iumi fit for gohed faithful taem iumi kasem olketa hard taem. (Lam. 3:22; Col. 1:11) Tingim example blo Rachel. Hem sorre tumas taem hasband lusim hem, and lusim Jehovah during lo COVID-19 pandemic. Wat nao Jehovah duim for hem? Rachel sei: “Jehovah duim samting wea mekem mi sure hem lovem mi. Hem givim olketa frens wea spendem taem witim mi, tekem kam kaikai, sendem olketa encouraging message and olketa scripture, smile lo mi, and olketa remindim mi hao Jehovah kea for mi. Mi thankiu lo Jehovah staka taem from hem givim mi wanfala big famili wea lovem mi.”
17. Why nao David “no fraetem eni samting wea savve spoelem” hem?
17 “Mi no fraetem eni samting wea savve spoelem mi, bikos iu stap witim mi.” Staka taem laef blo David stap lo danger, and hem garem staka paoaful enemy. Bat from Jehovah lovem David, hem feel sef and kasem protection. David luksavve Jehovah stap witim hem lo evri situation, and datwan strongim hem. So hem sing olsem: “[Jehovah] rescuem mi from evri samting wea mi fraetem.” (Ps. 34:4) Nomata samfala taem David barava fraet, hem ovakamim datwan bikos hem savve Jehovah lovem hem.
18. From iu sure Jehovah lovem iu, hao nao datwan strongim iu taem iu fraet?
18 Taem iumi savve Jehovah lovem iumi, hao nao datwan savve strongim iumi taem iumi insaed wanfala situation wea mekem iumi fraet? Susi, wea hem wanfala pioneer describem feeling blo hem and hasband, taem son blo tufala suisaed. Hem sei: “Taem sorre samting happen lo laef, hem savve barava affectim iu and mekem man no savve wat for duim. Bat from Jehovah lovem mifala, datwan mekem mifala for feel sef and kasem protection.” Rachel wea iumi storyim finis, sei: “Lo wanfala naet wea mi feel sorre tumas, wari, and fraet, mi prea big lo Jehovah. Stretawe, mi feelim hao hem comfortim and helpem mi for garem peace. Hem olsem wanfala mami wea comfortim baby blo hem, and then mi sleep nao. Mi bae no forgetim datfala taem.” Tasos wanfala elder, hem stap lo prison for fofala year bikos hem no laek for joinim army. Wat nao Jehovah duim wea showim hem lovem and kea for hem? Hem sei: “Jehovah provaedem staka samting winim wat mi needim. Datwan strongim go moa trust blo mi lo hem. And tu, Jehovah iusim holy spirit blo hem for mekem mi hapi nomata mi stap lo prison, ples wea no isi. Diswan mekem mi sure taem mi waka klos witim Jehovah, bae mi kasem staka gud samting from love blo hem. So mi start for regular pioneer taem mi lo prison.”
FREN KLOS WITIM GOD WEA LOVEM IU
19. (a) Taem iumi savve God lovem iumi, hao nao datwan savve affectim olketa prea blo iumi? (b) Which scripture wea storyim love blo Jehovah nao iu laekem? (Lukim box “ Olketa Toktok wea Mekem Iumi Sure Jehovah Lovem Iumi.”)
19 Olketa experience wea iumi storyim finis hem showim hao Jehovah, “God wea garem love” hem stap witim iumi! (2 Cor. 13:11) Hem interest lo each wan lo iumi. Iumi barava sure “loyal love blo Hem stap raonem” iumi. (Ps. 32:10) Taem iumi gohed ting raonem hao hem showim love for iumi, bae iumi lukim klia hao hem lukaftarem iumi, and iumi bae laek for fren klos witim hem. Iumi savve feel free for prea lo hem and talem hao iumi needim love blo hem. Iumi savve storyim olketa wari blo iumi lo hem bikos iumi sure hem understandim and willing for helpem iumi.—Ps. 145:18, 19.
20. From Jehovah lovem iumi, hao nao datwan mekem iumi for fren klos witim hem?
20 Olsem wanfala fire wea savve mekem iumi for feel warm lo wanfala cold day, love blo Jehovah for iumi tu savve comfortim iumi taem iumi kasem olketa hard situation. Dastawe, iumi hapi for acceptim love blo Jehovah wea savve comfortim iumi and givim iumi peace. And from hem lovem iumi, iumi evriwan laek for sei: “Mi lovem Jehovah”!—Ps. 116:1.
WAT NAO ANSA BLO IU?
-
Hao nao bae iu describem love blo Jehovah?
-
Why nao iu sure dat Jehovah hem barava lovem iu?
-
From iu sure Jehovah lovem iu, hao nao datwan strongim iu taem iu fraet?
SONG 108 God Hem Love and Hem Faithful
a Mifala changem samfala nem.