STUDY ARTICLE 3
SONG 35 “Luksavve Long Olketa Samting wea Important”
Mekem Olketa Disison wea Jehovah Hapi lo Hem
“Wei for fraet lo Jehovah hem start blo wisdom, and knowledge abaotem datfala Holy God hem mekem man garem wei for minim samting.”—PROV. 9:10.
MAIN FOCUS
Lo disfala article bae iumi lanem hao for iumi iusim knowledge, wei for minim samting, and wei for luksavve for helpem iumi mekem olketa wise disison.
1. Wat nao challenge wea iumi evriwan feisim?
EVRIDAY iumi savve mekem olketa disison. Samfala disison hem isi for mekem, olsem wat for kaikaim lo breakfast or wat taem for sleep. Olketa nara samting maet hem moa hard for disaedem. Olsem olketa disison wea affectim health blo iumi, hapi wea iumi garem, loved wans blo iumi, or worship blo iumi. Iumi laekem olketa disison wea iumi mekem for helpem iumi and famili blo iumi. Important samting, iumi laek for mekem olketa disison wea Jehovah hapi lo hem.—Rome 12:1, 2.
2. Wat nao thrifala samting wea bae helpem iu for mekem olketa wise disison?
2 Samting wea savve helpem iu for mekem olketa wise disison, hem if iu (1) savve gud lo information firstaem, (2) savve lo tingting blo Jehovah abaotem situation, and (3) ting raonem olketa difren idea. Lo disfala article bae iumi discussim thrifala samting hia, and bae iumi lanem tu hao for garem wei for luksavve.—Prov. 2:11.
SAVVE GUD LO INFORMATION FIRSTAEM
3. Storyim example lo why iu need for savve gud lo information firstaem bifor iu mekem wanfala disison.
3 First samting wea savve helpem iumi for mekem gud disison, hem for savve gud lo information firstaem. Why nao datwan important? Tingim wanfala sik patient wea go for lukim doctor taem hem garem serious health problem. Hao, datfala doctor bae kwiktaem mekem disison for givim medicine and no chekim gud datfala patient or askem hem olketa kwestin firstaem? Hard for doctor duim olsem. Iu tu bae mekem wanfala gud disison if lo firstaem, iu ting raonem gud information abaotem situation blo iu bifor iu disaed. Hao nao iu savve duim datwan?
4. Olsem Proverbs 18:13 storyim, wat nao bae iu duim for savve gud lo information firstaem? (Lukim tu piksa.)
4 Wanfala wei for savve gud lo information hem for askem olketa kwestin. For example, if iu kasem invitation for go lo wanfala hapitaem. Hao, bae iu attendim? If iu no savve gud lo host or olketa arrangement for datfala hapitaem, iu need for askem hem olketa kwestin olsem: “Lo wea and wat taem nao datfala hapitaem bae kamap? Haomas pipol nao bae attend? Hu nao bae lukaftarem datfala program? Hu nao olketa wea bae kam? Wat nao olketa activity wea olketa planim? Hao, bae olketa provaedem alcohol lo there tu?” For savve lo ansa, bae hem helpem iu for mekem wanfala wise disison.—Readim Proverbs 18:13.
Askem kwestin for savve lo full information (Lukim paragraf 4) a
5. Wat nao iu shud duim if iu kasem finis evri information abaotem wanfala situation?
5 Next, bikos iu kasem finis evri information, lukluk gud lo full situation. For example, wat if iu herem dat samfala wea bae attend no tinghae lo olketa Bible principle, or iu faendaot olketa bae provaedem alcohol, bat no eniwan stap for kontrolem. Hao, iu luksavve datfala hapitaem bae kamap wanfala wild party? (1 Pet. 4:3) Or hao if datfala party bae kamap lo semtaem witim kongregeson meeting blo iu or lo taem blo field ministry? Taem iu luksavve lo full situation, datwan minim iu redi for next step wea bae helpem iu for mekem gud disison. So iu need for duim nara samting. From iu savve nao lo datfala situation, iu need for faendaot wat nao tingting blo Jehovah abaotem datwan?—Prov. 2:6.
WAT NAO TINGTING BLO JEHOVAH ABAOTEM DATFALA SITUATION?
6. Olsem James 1:5 storyim, why nao iumi shud prea lo Jehovah for help?
6 Askem Jehovah for helpem iu for minim tingting blo hem. Jehovah promis for givim iumi wisdom for luksavve if disison blo iumi bae mekem hem hapi. Jehovah laek for givim iumi wisdom bikos “hem kaen tumas for givim samting long evriwan and bae hem no kros long man wea askem hem.”—Readim James 1:5.
7. Wat nao iu savve duim for garem sem tingting olsem Jehovah? Storyim example.
7 Bihaen iu prea lo Jehovah for direction, traem best for luksavve lo ansa blo hem. Tingim disfala example: If iu travel lo wanfala niu ples and iu lus, maet iu askem samwan lo datfala ples for help. Bat hao, bae iu go from hem bifor hem garem chance for helpem iu? Nomoa. Bae iu lisin gud lo direction wea hem talem. Lo sem wei tu, bihaen iu askem Jehovah for wisdom, trae for luksavve lo ansa wea hem givim taem iu studyim olketa law and principle lo Bible wea fitim situation blo iu. For example, taem iu ting raonem if bae iu attendim datfala hapitaem wea iumi storyim finis, hem gud for tingim wat Bible talem abaotem wild party, bad association, and wei for putim Kingdom first winim wat iuseleva laekem.—Matt. 6:33; Rome 13:13; 1 Cor. 15:33.
8. Wat nao iu savve duim if iu needim help for faendem information wea iu lukaotem? (Lukim tu piksa.)
8 Nomata olsem, samfala taem iu still needim help for faendem information. Maet iu savve kasem help from wanfala mature brata or sista. Bat iu bae kasem gud samting tu from wei for duim research seleva. Staka information stap lo olketa study tul blo iumi olsem, Research Index for Olketa Jehovah’s Witness and Scripture for Laef blo Christian. Remember, goal hem nao for mekem olketa disison wea Jehovah hapi lo hem.
Savve lo tingting blo Jehovah (Lukim paragraf 8) b
9. Hao nao iumi savve sure dat disison blo iumi hem mekem Jehovah hapi? (Ephesus 5:17)
9 Hao nao iumi savve sure dat disison blo iumi hem mekem Jehovah hapi? First samting, iumi mas savve gud lo hem. Bible sei: “Knowledge abaotem datfala Holy God hem mekem man garem wei for minim samting.” (Prov. 9:10) Iumi savve garem trufala wei for minim samting taem iumi savve gud lo wei blo Jehovah, purpose blo hem, and wat hem lovem or heitim. Askem iuseleva: ‘From mi savve lo Jehovah, wat kaen disison nao bae mekem hem hapi?’—Readim Ephesus 5:17.
10. Why nao olketa Bible principle hem important winim wat famili laekem or culture blo iumi?
10 For mekem Jehovah hapi, samfala taem iumi mas disaedem samting wea maet mekem olketa wea klos lo iumi for no hapi lo iumi. For example, samfala parents maet tingse olketa helpem dota blo olketa taem olketa insist for hem maritim man wea garem staka selen or wea savve peim big bride price, bat man hia hem no wanfala strong spiritual person. Hem tru, olketa laekem dota blo olketa for garem olketa material samting, bat hu nao bae helpem hem for gohed strong lo spiritual wei? Wat nao tingting blo Jehovah lo kaen situation olsem? Iumi savve lukim ansa lo Matthew 6:33. Disfala scripture encouragem olketa Christian for putim ‘Kingdom olsem first samting lo laef blo olketa.’ Nomata iumi respectim parents blo iumi and pipol lo community, important samting nao hem for mekem Jehovah hapi.
TING RAONEM OLKETA IDEA
11. Wat nao quality wea Philippi 1:9, 10 storyim, wea savve helpem iu for ting raonem olketa difren idea?
11 Afta iu tingim olketa Bible principle wea involve lo disison blo iu, then iu need for ting raonem samfala difren idea wea join witim datwan. (Readim Philippi 1:9, 10; lukim “full discernment” lo English study note.) Disfala quality, ‘gudfala tingting’ or wei for luksavve, bae helpem iu for lukim klia result blo each idea. Samfala taem hem isi for mekem disison. Bat no evri disison hem olsem. Wei for luksavve bae helpem iu for mekem olketa wise disison nomata situation hem complicated.
12-13. Hao nao wei for luksavve bae helpem iu mekem wise disison saed lo waka for selen?
12 Tingim disfala situation. Iu lukaotem waka for sapotim famili blo iu. Tufala waka nao hem available. Iu ting raonem evri information, olsem wat kaen waka nao datwan, schedule, haomas hour hem tekem for iu go kasem waka ples, and olketa nara samting olsem. Tufala waka hia no brekem eni Bible principle. Maet iu laekem wanfala waka winim narawan bikos hem waka wea iu interest lo hem or salary hem hae. Bat, samfala nara samting moa iu need for ting raonem bifor iu mekem disison.
13 For example, which wan lo tufala waka hia nao bae affectim schedule blo iu for go lo kongregeson meeting? Hao, datfala waka bae affectim wei wea iu lukaftarem famili and for helpem olketa lo spiritual wei? For ting raonem olketa kwestin olsem bae helpem iu for putim first lo laef “olketa samting wea barava important” wea minim worship blo iu for Jehovah and wat famili needim, winim wei for aftarem olketa material tings. Then, bae iu mekem disison wea Jehovah bae blessim.
14. Hao nao wei for luksavve and for showim love helpem iumi no mekem narawan feel nogud?
14 Wei for luksavve hem helpem iumi tu for ting raonem hao disison blo iumi savve affectim nara pipol, from datwan bae iumi no laek duim samting wea savve “spoelem faith bilong olketa narawan.” (Phil. 1:10) Diswan barava important taem iumi mekem olketa personal disison abaotem kaleko and lukluk blo iumi. For example, iumiseleva maet laekem wanfala type of grooming or design blo kaleko. Bat hao if samfala pipol aotsaed or samfala lo kongregeson bae feel nogud lo datwan? Wei for luksavve bae helpem iumi for respectim tingting blo olketa. Love bae motivatim iumi for laek for duim gud samting for “nara pipol” and for hambol. (1 Cor. 10:23, 24, 32; 1 Tim. 2:9, 10) Then disison wea iumi mekem bae showimaot dat iumi lovem and respectim olketa narawan.
15. Wat kaen plan nao man need for duim bifor hem mekem wanfala big disison?
15 If iu need for mekem wanfala big disison, ting abaotem wat iu need for duim for mekem datfala disison hem succeed. Jesus teachim iumi for kaontem kost firstaem. (Luke 14:28) For mekem disison blo iu succeed, tingim haomas taem, tings wea iu bae needim, and hard waka wea involve lo datwan. Samfala taem, iu maet need for story witim famili blo iu for disaedem wat each wan bae duim for sapotim datfala disison. Why nao plan olsem hem important? Maet hem helpem iu for luksavve if iu need for adjustim disison blo iu or followim nara idea. And taem iu includim famili blo iu and lisin lo olketa idea blo olketa, bae olketa willing for sapotim iu for mekem datfala disison for succeed.—Prov. 15:22.
MEKEM DISISON WEA BAE SUCCEED
16. Wat nao olketa idea wea savve helpem iu for mekem wanfala disison wea bae succeed? (Lukim tu box “ Hao for Mekem Olketa Wise Disison.”)
16 If iu followim olketa idea wea iumi storyim finis, iu redi for mekem wanfala wise disison. Hem minim iu kasem finis evri information wea iu needim and iu lukim olketa principle wea bae helpem iu for mekem disison wea Jehovah hapi lo hem. Then iu savve askem Jehovah for helpem iu duim samting for mekem datfala disison for succeed.
17. Wat nao main samting wea savve helpem iumi for mekem gud disison?
17 Nomata if staka disison wea iu mekem bifor hem successful, remember important samting wea savve helpem iu mekem gud disison, hem no for depend lo own savve or experience blo iu, bat for depend lo wisdom wea kam from Jehovah. Jehovah nomoa savve givim trufala knowledge, wei for minim samting, and wei for luksavve, wea hem nao olketa important part lo wisdom. (Prov. 2:1-5) Jehovah savve helpem iu for mekem olketa disison wea bae mekem hem for hapi.—Ps. 23:2, 3.
SONG 28 Kamap Fren Bilong Jehovah
