STUDY ARTICLE 2
SONG 132 Wan Body Nao
Olketa Hasband, Respectim Waef blo Iufala
“Olketa hasband . . . mas respectim [waef].”—1 PET. 3:7.
MAIN FOCUS
Disfala article bae storyim hao wanfala hasband savve respectim waef blo hem lo toktok and wat hem duim.
1. Wat nao wanfala reason why Jehovah mekem marit arrangement?
JEHOVAH hem “datfala hapi God,” and hem laekem iumi for hapi tu. (1 Tim. 1:11) Hem givim iumi staka present for mekem iumi enjoyim laef. (Jas. 1:17) Wanfala lo olketa present hia hem marit. Taem man and woman marit, tufala promis for lovem, respectim, and kea for each other. Taem hasband and waef keepim love blo tufala strong, tufala bae barava hapi.—Prov. 5:18.
2. Wat nao happen lo staka marit distaem?
2 Sorre samting nao, distaem staka marit couple forgetim promis wea olketa talem lo wedding day. From datwan, olketa no hapi. No longtaem go nomoa, wanfala report from World Health Organization storyim hao staka hasband abusim waef blo olketa lo physical wei, lo toktok, or saed lo feeling. Hasband wea abusim waef, maet treatim waef witim respect taem tufala stap witim olketa narawan, bat taem tufala lo haos, hem treatim nogud lo waef blo hem. Nara samting wea affectim marit, hem taem hasband savve lukluk lo pornography.
3. Wat nao samfala samting wea mekem hasband for garem wei for abusim waef?
3 Wat nao mekem samfala hasband for abusim waef blo olketa? Maet hem bikos hem lukim dadi blo hem raf and treatim nogud mami blo hem, so hem tingse wei for abusim waef hem normal samting. And tu, maet culture blo hem promotim rong idea for sei “wanfala real man” mas raf mekem waef savve dat hem nao boss. Maet samfala no lanem tu hao for kontrolem feeling blo olketa, includim wei for kros. And for lukluk lo pornography evritaem, hem mekem samfala man for garem tingting wea no stret abaotem olketa woman and sex. And wanfala report showim hao during lo COVID-19 pandemic, disfala situation kamap worse. Bat, olketa samting hia hem shud no excuse for hasband abusim waef blo hem.
4. Wat nao olketa Christian hasband need for careful lo hem, and why nao olsem?
4 Olketa Christian hasband need for careful for no letem tingting blo world wea hem no stret, for affectim hao olketa ting lo olketa woman. a Why? Wanfala reason hem bikos staka taem, wat man ting abaotem hem nao bae hem duim. Aposol Paul warnim olketa anointed Christian lo Rome for “no gohed followim wei bilong pipol long disfala world.” (Rome 12:1, 2) Taem Paul raetem datfala toktok for olketa lo Rome, luk olsem kongregeson hia start longtaem finis. Bat, wat Paul talem showim dat samfala lo kongregeson still followim kastom and tingting blo world. Dastawe hem kaonselem olketa for changem tingting and wei blo olketa. Datfala kaonsel fitim olketa Christian hasband distaem tu. Sorre samting nao, tingting blo world hem affectim samfala lo olketa and olketa even abusim waef blo olketa. b Hao nao Jehovah expectim wanfala hasband for treatim waef blo hem? Ansa for datwan hem lo theme scripture blo disfala article.
5. Olsem 1 Peter 3:7 storyim, hao nao hasband shud treatim waef blo hem?
5 Readim 1 Peter 3:7. Jehovah komandim olketa hasband for respectim waef blo olketa. Respect hem join witim wei wea iumi treatim samwan wea iumi tinghae lo hem. Hasband wea respectim waef blo hem, bae treatim hem lo wei wea kaen and showimaot love. Lo disfala article, bae iumi storyim hao wanfala hasband savve showimaot respect lo waef blo hem. Bat firstaem, bae iumi discussim wat samfala hasband duim wea no showimaot respect lo waef.
REJECTIM WEI FOR DUIM SAMTING WEA NO RESPECTIM WAEF
6. Hao nao Jehovah feel abaotem olketa man wea physically abusim waef blo olketa? (Colossae 3:19)
6 Hasband shud no physically abusim waef. Jehovah heitim eniwan wea raf and violent. (Ps. 11:5) Jehovah barava no laekem olketa hasband for abusim waef blo olketa. (Mal. 2:16; readim Colossae 3:19.) Olsem theme scripture blo iumi lo 1 Peter 3:7 storyim, if hasband no treatim gud waef blo hem, datwan bae affectim frenship blo hem witim God. Jehovah bae no even lisin lo olketa prea blo hem.
7. Olsem Ephesus 4:31, 32 storyim, olketa wat kaen toktok nao hasband mas avoidim? (Lukim tu “Mining blo Wanfala Toktok.”)
7 Hasband shud no abusim waef lo toktok. Samfala hasband abusim waef blo olketa lo wei for tok kros and talem toktok wea mekem waef feel nogud tumas. Bat Jehovah heitim tumas ‘wei for kros, singaot, and tok nogud.’ c (Readim Ephesus 4:31, 32.) Jehovah herem evri samting. So hao hasband story lo waef blo hem, even taem tufala stap seleva, hem important lo Jehovah. Wanfala hasband wea tok raf lo waef blo hem, no spoelem nomoa marit blo hem, bat hem spoelem tu frenship blo hem witim God.—Jas. 1:26.
8. Hao nao Jehovah ting lo wei for lukluk lo pornography, and why nao olsem?
8 Hasband shud no lukluk lo pornography. Hao nao Jehovah ting lo wei for lukluk lo pornography? Hem barava heitim datwan. Hasband wea lukluk lo olketa nogud piksa spoelem frenship blo hem witim Jehovah and no showimaot respect for waef blo hem. d Jehovah expectim hasband for gohed faithful lo waef blo hem, no just lo wei for stap klia lo adultery bat for no ting abaotem datwan tu. Jesus sei man wea lukluk lo nara woman and laek for durong witim hem, hem duim finis adultery “long heart bilong hem.” e—Matt. 5:28, 29.
9. Why nao Jehovah heitim wei wea hasband no respectim waef blo hem saed lo sex?
9 Hasband shud no duim samting wea no respectim waef saed lo sex. Samfala hasband forcem waef for duim sex lo wei wea no showimaot respect and spoelem konsens blo waef or mekem hem feel dat hasband no lovem hem. Jehovah heitim kaen wei for no kea and selfish olsem. Hem expectim hasband for lovem and kea for waef, and for respectim feeling blo hem. (Eph. 5:28, 29) Hao if wanfala Christian hasband duim samting wea no respectim waef, abusim hem, or lukluk lo pornography? Wat nao savve helpem hem changem tingting and wei blo hem?
HAO NAO HASBAND SAVVE CHANGEM WEI BLO HEM FOR NO SHOWIMAOT RESPECT?
10. Hao nao example blo Jesus savve helpem olketa hasband?
10 Wat nao savve helpem hasband for changem wei blo hem for abusim waef and no showimaot respect? Hem savve waka hard for followim example blo Jesus. Nomata Jesus no marit, hao hem treatim olketa disaepol blo hem, hem example lo hao hasband shud treatim waef blo hem. (Eph. 5:25) For example, tingim wat olketa hasband savve lanem from wei wea Jesus treatim olketa aposol blo hem and hao hem story lo olketa.
11. Hao nao Jesus treatim olketa aposol blo hem?
11 Jesus treatim olketa aposol lo wei wea kaen and showimaot respect. No enitaem hem raf or bossim olketa. Nomata hem Lord and Masta blo olketa, no enitaem Jesus iusim authority blo hem for pruvim dat hem nao boss. Instead, hem hambol and duim samting for helpem olketa. (John 13:12-17) Hem sei olsem lo olketa disaepol: “Lane from mi, bikos mi no savve raf and mi hambol. Wei for duim olsem bae strongim iufala.” (Matt. 11:28-30) Tingim hao Jesus no raf and hem hambol. For hambol hem no minim dat man hem wik. Bat hem showim dat hem strong for kontrolem hemseleva. If eniwan duim samting wea mekem hem feel nogud, hem no kros and hem kontrolem feeling blo hem.
12. Hao nao Jesus hem story lo olketa narawan?
12 Jesus talem toktok for comfortim and strongim olketa narawan. Hem no tok raf lo olketa disaepol blo hem. (Luke 8:47, 48) Nomata olketa wea againstim hem tok spoelem hem and trae for mekem hem kros, “hem no tok spoelem olketa.” (1 Pet. 2:21-23) Samfala taem, Jesus chus for kwaet nomoa winim wei for talem ansa wea raf. (Matt. 27:12-14) Datwan hem best example for olketa Christian hasband!
13. Olsem Matthew 19:4-6 storyim, wat nao hem minim for hasband “stap olowe” witim waef blo hem? (Lukim tu piksa.)
13 Jesus talem olketa hasband for gohed faithful lo waef blo olketa. Hem quotem toktok blo Dadi blo hem, wea sei olketa hasband shud “stap olowe” witim waef blo olketa. (Readim Matthew 19:4-6.) Greek word wea olketa transleitim “stap olowe” hem minim for “gluem tugeta.” So datwan minim love blo hasband and waef hem shud strong olsem tufala samting wea olketa gluem tugeta. If tufala trae for aotem datfala glue hem bae barava damagem tufala evriwan. Hasband wea garem strong love olsem for waef bae barava rejectim eni samting wea join witim pornography. Hem bae kwiktaem luk difren, and “no lukim iusles samting.” (Ps. 119:37) Hem olsem hem mekem agreement witim eye blo hem for no lukluk lo eni difren woman lo wei for garem rong tingting.—Job 31:1.
Wanfala hasband wea faithful rejectim wei for lukluk lo pornography (Lukim paragraf 13) g
14. Wat nao hasband wea abusim waef blo hem need for duim for stretem bak frenship blo hem witim Jehovah and waef?
14 Wanfala hasband wea abusim waef blo hem lo physical wei or lo toktok, need for duim samting for stretem bak frenship blo hem witim Jehovah and waef blo hem. Wat nao hem need for duim? First, hem mas luksavve diswan hem serious problem. No eni samting haed from eye blo Jehovah. (Ps. 44:21; Eccl. 12:14; Heb. 4:13) Second, hem mas stop for abusim waef and changem wei blo hem. (Prov. 28:13) Third, hem mas tok sorre lo waef and lo Jehovah and askem forgiveness blo tufala. (Acts 3:19) Hem shud barava begim Jehovah for helpem hem for laek change and kontrolem tingting, toktok, and wat hem duim. (Ps. 51:10-12; 2 Cor. 10:5; Phil. 2:13) Mek-fo, hem mas duim samting followim prea blo hem and heitim evri wei for duim violence and for tok nogud. (Ps. 97:10) Mek-faev, hem mas kwiktaem askem help from olketa loving shepherd lo kongregeson. (Jas. 5:14-16) Mek-six, hem need for garem wanfala plan wea bae helpem hem for avoidim evri wei olsem lo future. Hasband wea lukluk lo pornography shud duim sem samting tu. Jehovah bae blessim wei wea hem waka hard for changem olketa wei blo hem. (Ps. 37:5) Bat, hem no inaf for hasband just changem wei blo hem for no showimaot respect. Hem need for lane hao for showim respect lo waef blo hem. Hao nao hem savve duim datwan?
HAO FOR RESPECTIM WAEF BLO IU
15. Hao nao hasband savve showim love for waef blo hem?
15 Showim love. Samfala brata wea garem hapi marit, duim samting evriday for showim hem lovem waef blo hem. (1 John 3:18) Hasband savve duim samfala simpol samting for showim love blo hem, olsem for holem hand blo waef or for hagem hem. Hem maet sendem text message and sei “Mi missim iu” or ask “Hao nao day blo iu?” Maet samfala taem, hem savve raetem wanfala short note for talem dat hem lovem hem. Taem hasband duim olketa samting olsem, hem showim respect lo waef blo hem and strongim marit blo tufala.
16. Why nao hasband shud praisem waef blo hem?
16 Showim iu appreciatim waef. Hasband wea respectim waef blo hem bae strongim and encouragem hem. Wanfala wei, hem taem hasband remember for showim dat hem appreciatim evri samting wea waef duim for sapotim hem. (Col. 3:15) Taem hasband praisem waef, datwan savve tasim heart blo waef. Hem bae feel sef, and feelim love and respect blo hasband.—Prov. 31:28.
17. Hao nao hasband savve showim respect lo waef blo hem?
17 Mas kaen and showimaot respect. Hasband wea lovem waef blo hem bae respectim tingting blo waef and kea abaotem feeling blo hem. Hem ting lo waef olsem spesol present from Jehovah. (Prov. 18:22; 31:10) From datwan, hem kaen and treatim hem witim respect, nomata lo private laef blo tufala. Hem bae no forcem waef for duim sex lo wei wea waef no acceptim, wea no showim respect lo waef, or wea againstim konsens blo waef. f Hasband bae no laek for duim tu samting wea bae spoelem konsens blo hemseleva front lo Jehovah.—Acts 24:16.
18. Wat nao hasband shud disaed strong for duim? (Lukim tu box “ Fofala Wei for Hasband Showimaot Respect”)
18 Olketa hasband, iufala savve sure dat Jehovah lukim and appreciatim wei wea iufala traem best for respectim waef lo evri samting wea iufala duim lo laef. Disaed strong for no duim olketa samting wea no showimaot respect lo waef, bat mas kaen, showimaot respect, and lovem hem. Taem iu duim datwan, iu showim dat iu lovem and tinghae lo waef. Respectim waef blo iu, and datwan bae protectim barava important frenship wea iu garem, hem nao frenship blo iu witim Jehovah.—Ps. 25:14.
SONG 131 “Samting wea God Joinim Finis”
a Hasband shud readim datfala article “Hao, Iu Treatim Olketa Woman Olsem Jehovah?” lo Wastaoa blo January 2024.
b Olketa victim blo domestic abuse savve kasem helpem from datfala article “Help for Victims of Domestic Abuse” lo sekson “More Topics” article series lo jw.org and lo JW Library®.
c MINING BLO WANFALA TOKTOK: “Tok nogud” hem minim for talem toktok wea abusim narawan, includim wei for kolem samwan lo olketa nem wea no showimaot respect, tok raf, and for evritaem tok daonem samwan. Eni toktok wea spoelem samwan, no showim respect, or daonem man, hem abuse.
d Lukim lo jw.org and lo JW Library datfala article “Pornography Can Shatter Your Marriage.”
e Wanfala waef wea hasband blo hem lukluk lo pornography, savve kasem help from article “Taem Marit Partner Interest for Lukim Pornography” lo Wastaoa blo August 2023.
f Bible no storyim detail abaotem wat nao hem klin or no klin saed lo sex between hasband and waef. Wanfala Christian couple mas disaed seleva for mekem olketa disison wea honorim Jehovah, mekem each other hapi, and for garem klin konsens. Staka taem, wanfala couple no discussim wat tufala duim lo private laef blo tufala witim olketa narawan.
g PIKSA: Olketa workmate wea no Witness trae for mekem wanfala brata for lukluk lo olketa pornography magasin.
