1, 2. (a) Why nao hem important for hol strong long Jehovah? (b) Wanem nao bae iumi storyim long disfala study?

HEM barava important for hol strong long Jehovah, bikos no eniwan moa hem garem paoa, wisdom, or love olsem hem. Hu long iumi nao bae no laek for saedem hem? (Sams 96:4-6) Nomata olsem, samfala wea worshipim Jehovah no showimaot olketa saedem hem taem samfala samting kamap.

² Long disfala study, bae iumi storyim example bilong samfala wea sei olketa saedem Jehovah bat long semtaem olketa duim samting wea Jehovah heitim. Olketa important leson iumi lanem from story bilong olketa hia savve helpem iumi for gohed faithful long Jehovah.

3. Why nao Jehovah laek for helpem Cain, and wanem nao Hem talem long Cain?

³ Tingim example bilong Cain. Hem no laek for worshipim eni nara god bat Jehovah nomoa. Bat Jehovah no acceptim worship bilong Cain bikos hem lukim nogud tingting wea stap long heart  bilong Cain. (1 John 3:12) Jehovah laek for helpem Cain dastawe hem tok olsem: “Sapos wei blong yu hemi stret, bae ae blong yu hemi jes luk hapi. Bat bikos wei blong yu hemi no stret, disfala nogud wei ya hemi olsem wanfala wael animol wea hemi stap kolsap long yu an hemi redi fo spoelem yu. Disfala nogud wei ya hemi laekem tumas fo winim yu ya, bat yu mas winim hem.” (Jenesis 4:6, 7) Hem olsem Jehovah sei long Cain: “Sapos iu repent and iu saedem mi, bae mi tu saedem iu.”

4. Wanem nao Cain duim taem hem garem chance for saedem Jehovah?

⁴ Sapos Cain stretem bak tingting bilong hem Jehovah bae acceptim worship bilong hem. Bat Cain no laek acceptim datfala kaonsel. Rong tingting and wei wea hem selfish mekem hem for duim nogud samting. (Jas. 1:14, 15) Taem Cain hem young, maet no enitaem hem tingim hao hem bae againstim Jehovah. Bat gogo, from hem no laek followim warning bilong God, hem againstim God and killim dae brata bilong hem!

5. Wanem kaen tingting nao savve mekem Jehovah for no hapi long iumi?

⁵ Olsem Cain, wanfala Christian maet tingse hem worshipim Jehovah nomata hem duim samting wea Jehovah no laekem. (Jude 11) Olsem example, maet hem barava strong for duim ministry and attendim olketa Christian meeting evritaem. Bat long semtaem hem letem feeling for durong, greedy, or maet feeling for heitim nara brata or sista for kontrolem tingting bilong hem. (1 John 2:15-17; 3:15) Kaen tingting olsem savve leadim man for duim sin. Maet olketa narawan no luksavve long tingting and wei bilong iumi, bat Jehovah lukim evri samting and hem savve sapos iumi no saedem hem witim full heart bilong iumi.—Readim Jeremaea 17:9, 10.

6. Hao nao Jehovah helpem iumi for “winim” olketa feeling bilong iumi for laek duim nogud samting?

⁶ Nomata iumi duim olketa mistek, Jehovah no kwiktaem givap for helpem iumi. Taem iumi start for go difren from Jehovah, hem encouragem iumi olsem: “Kambaek long mi, bae mi kambaek moa long yufala.” (Malakae 3:7) Taem iumi stragol for winim olketa wik point bilong iumi, Jehovah laekem iumi for stand strong and no duim olketa nogud samting. (Aesaea 55:7) Sapos iumi duim datwan, hem bae sapotim and strongim iumi mekem iumi “winim” olketa feeling bilong iumi for laek duim nogud samting.—Jenesis 4:7.

7. Hao nao gogo Solomon lusim wei wea hem fren witim Jehovah?

⁷ Iumi savve lanem staka samting from example bilong King Solomon. Taem Solomon hem young, hem luk long Jehovah for leadim hem. God mekem hem for barava wise and givim hem important waka for buildim datfala nambawan temple long Jerusalem. Bat Solomon lusim wei wea hem fren witim Jehovah. (Fas Kings 3:12; 11:1, 2) Law bilong God stopem king bilong Israel for tekem staka woman, bikos bae olketa woman hia changem tingting bilong hem. (Diutronomi 17:17) Solomon no obey, hem maritim 700 woman, and hem tekem nara 300 woman moa. (Fas Kings 11:3) And tu, Solomon no obeyim law bilong God bikos hem maritim olketa woman wea no Israelite and olketa worshipim olketa false god.—Diutronomi 7:3, 4.

8. Wanem nao Solomon duim wea showimaot hem no tinghae long Jehovah?

⁸ Isisi Solomon no tinghae long olketa law bilong Jehovah and gogo diswan mekem hem duim olketa barava nogud samting. Solomon buildim wanfala altar for datfala woman god, Ashtoreth, and nara altar for datfala laea god, Chemosh. Then hem join witim olketa waef bilong hem for worshipim olketa laea god hia. And tu, Solomon buildim olketa altar hia long wanfala maunten wea  stap barava front long Jerusalem, wea datfala temple bilong Jehovah hem stap! (Fas Kings 11:5-8; Mektu Kings 23:13) Maet Solomon laea long hemseleva and tingse sapos hem gohed for givim olketa sakrifaes long temple, bae Jehovah no tingim nomoa olketa nogud samting wea hem duim.

9. Wanem nao happen taem Solomon no followim olketa warning bilong God?

⁹ Bat hard for Jehovah ting smol long sin wea man duim. Bible sei: “[Jehovah], God blong pipol blong Israel, hemi kam long Solomon tufala taem finis, an hemi bin tokstrong long hem fo no wosipim olketa narafala god. Bat wea, Solomon hemi no obeim hem an hemi tanem tingting blong hem goaot from [Jehovah]. So [Jeohvah] hemi kros tumas long hem.” From datwan, Jehovah no hapi long hem and no sapotim hem. And tu, hem no letem olketa pikinini bilong Solomon for rul ovarem full nation bilong Israel, and olketa gohed kasem staka nogud samting bihaen.—Fas Kings 11:9-13.

10. Wanem nao savve spoelem wei wea iumi fren witim Jehovah?

¹⁰ Olsem story bilong Solomon, wanfala main samting wea savve spoelem iumi long spiritual wei hem nao wei for fren witim olketa wea no luksavve or no respectim olketa standard bilong Jehovah. Maet samfala long olketa, hem olketa brata and sista insaed kongregeson wea wik long spiritual wei. Olketa narawan maet olketa relative, neiba, pipol long ples iumi waka, or olketa skulfren wea no worshipim Jehovah. Sapos iumi fren witim olketa wea no followim standard bilong Jehovah, gogo olketa bae spoelem wei wea iumi fren witim Jehovah.

11. Wanem nao bae helpem iumi for chusim hu nao bae iumi fren witim?

¹¹ Readim 1 Corinth 15:33. Staka pipol garem samfala gud wei, and staka wea no insaed kongregeson olketa no duim olketa nogud samting. Maet iu savve long samfala pipol olsem, bat waswe, datwan minim hem gud nomoa for iumi fren witim olketa? Askem iuseleva, ‘Hao nao wei wea mi fren witim olketa hem affectim wei wea mi fren witim Jehovah? Waswe, bae olketa strongim wei wea mi fren witim Jehovah? Wanem nao stap insaed heart bilong olketa? Waswe, story bilong olketa hem abaotem olketa latest stael, selen, niu technology, hapitaem, or wei for aftarem olketa material samting? Waswe, olketa evritaem tok daonem olketa narawan or iusim olketa dirty toktok for mekfani?’ Jesus hem sei: “Samting wea man tingting tumas abaotem nao bae hem storyim.” (Matt. 12:34) Sapos iu luksavve olketa fren bilong iu spoelem wei wea iu fren witim Jehovah, iu need for kwiktaem duim samting for no spendem tumas taem witim olketa, and tu, maet iu mas stop evribit for fren witim olketa.—Provebs 13:20.

12. (a) Wanem nao Jehovah talem olketa Israelite no longtaem bihaen olketa lusim Egypt? (b) Wanem nao olketa Israelite talem taem God askem olketa for worshipim hem nomoa?

¹² Iumi savve lane tu from story bilong olketa Israelite bihaen Jehovah mekem olketa kamap free from Egypt. Olketa Israelite hipap botom long Maunt Sinai. Then Jehovah showaot long olketa long mirakol wei. Olketa lukim wanfala dark cloud, and Jehovah mekem thunder, laetning, smoke and olketa herem wanfala saond olsem wanfala horn. (Eksodas 19:16-19) Then olketa herem Jehovah tok olsem, “mi barava les fo yufala tinghevi long eni narafala god moa.” Hem promisim olketa hao hem bae faithful long olketa wea lovem hem and obeyim olketa komandment bilong hem. (Readim Eksodas 20:1-6.) Hem olsem Jehovah tok olsem long pipol bilong hem, “Sapos iufala saedem mi, mi bae saedem iufala.” Sapos iu long there, hao nao bae iu feel taem iu herem Jehovah tok olsem? For sure, iu bae feel olsem hao olketa Israelite feel. Bible storyim hao evriwan ansa wantaem and tok olsem: “Mifala promis fo duim nao evrisamting wea [Jehovah] hemi talem.” (Eksodas 24:3) Bat gogo, wanfala samting happen wea testim faithful fasin bilong olketa.

13. Wanem nao testim faithful fasin bilong olketa Israelite?

¹³ Olketa Israelite fraet taem olketa lukim dark cloud, laetning, and olketa nara spesol saen from God. So olketa talem Moses for go story for olketa witim Jehovah long Maunt Sinai. (Eksodas 20:18-21) Moses stap antap long datfala maunten for longtaem. And olketa Israelite stap seleva long wilderness and leader wea olketa trustim hem no stap witim olketa. Luk olsem, faith bilong olketa Israelite hem strong nomoa taem Moses stap witim olketa. From datwan, olketa Israelite barava wari so olketa askem Aaron olsem: “Wanem nao hemi hapen long Mosis, disfala man hu hemi bin lidim yumi kamaot from Ijip ya? Maet samting nogud hemi hapen long hem nao. So mifala laekem yu fo wakem wanfala god fo yumi, mekem hemi save lidim yumi moa.”—Eksodas 32:1, 2.

14. Wanem tingting wea no stret nao olketa Israelite garem, and wanem nao Jehovah duim?

¹⁴ Olketa Israelite savve finis wei for worshipim idol hem wanfala serious sin bikos datwan againstim Jehovah. (Eksodas 20:3-5) Bat no longtaem bihaen nomoa, olketa worshipim wanfala gold buluka! Nomata olketa no obeyim komand bilong Jehovah, olketa laea long olketa seleva and olketa tingse Jehovah still saedem olketa. And Aaron sei datwan hem “wanfala fist fo tinghae long [Jehovah].” Wanem nao tingting bilong Jehovah abaotem datwan? Hem barava feel nogud. Jehovah talem Moses hao olketa Israelite olketa “kamap nogud tumas” and “olketa lusim finis wei wea [Hem] bin talem olketa fo falom.” Jehovah “barava kros” long olketa and hem ting for finisim datfala full nation bilong Israel.—Eksodas 32:5-10.

15, 16. Hao nao Moses and Aaron showimaot olketa strong for saedem Jehovah? (Lukim piksa long start bilong study.)

¹⁵ Bat Jehovah disaed for no finisim olketa Israelite. Wei wea hem showimaot mercy givim chance long olketa faithful servant bilong hem for strong for saedem hem. (Eksodas 32:14) Bihaen Moses lukim olketa Israelite gohed for shout, singsing, and dance front long datfala idol, hem pisisim datfala gold buluka gogo hem kamap paoda nao. Then Moses sei: “Evriwan hu i stap yet long saet blong [Jehovah], mas kam long hia!” So olketa Levite go and saedem Moses.—Eksodas 32:17-20, 26.

¹⁶ Aaron repent and joinim olketa Levite for saedem Jehovah nomata hem nao wakem datfala gold buluka. Olketa faithful wan hia no just saedem Jehovah nomoa bat olketa  separatem olketa seleva from olketa hia wea duim sin. Datwan wise samting for duim. Long datfala day, staka thousand Israelite nao dae bikos olketa worshipim idol. Bat olketa wea saedem Jehovah olketa laef and Jehovah promis for blessim olketa.—Eksodas 32:27-29.

17. Wanem nao iumi lanem from toktok bilong Paul abaotem datfala gold buluka?

¹⁷ Wanem nao iumi lanem from datfala story? Aposol Paul sei: “Olketa samting hia hem for teachim iumi, mekem iumi no . . . worshipim idol tu olsem samfala long olketa duim. [Olketa example hia] teachim iumi, and hem stap long olketa Holy Raeting for warnim iumi wea stap long disfala taem wea world hem klosap for finis. So man wea tingse hem standap strong mas keakea nogud hem foldaon.” (1 Cor. 10:6, 7, 11, 12) Olsem Paul storyim, olketa wea worshipim Jehovah tu savve duim olketa nogud samting. Taem olketa duim nogud samting, maet olketa tingse olketa still fren witim Jehovah. Bat wei for laek fren witim Jehovah or sei iumi faithful long hem, no minim Jehovah acceptim worship bilong iumi.—1 Cor. 10:1-5.

18. Wanem nao savve mekem iumi for isisi lusim Jehovah, and wanem nao savve kamaot from datwan?

¹⁸ Long sem wei wea olketa Israelite wari taem Moses no kam daon kwiktaem from Maunt Sinai, olketa Christian distaem maet wari from bigfala day bilong Jehovah and niu world hem no kam kwiktaem. Maet iumi start for daotem olketa promis hia and tingse hem longtaem tumas or maet iumi tingse hem laea promis nomoa. Kaen tingting olsem savve leadim iumi for duim samting wea iumiseleva laekem winim wei for duim samting wea Jehovah laekem. Isisi iumi start for lusim Jehovah and duim olketa samting wea, sapos iumi strong long spiritual wei, bae iumi no savve duim.

19. Wanem nao iumi shud tingim evritaem, and why nao hem important?

¹⁹ Iumi shud evritaem tingim hao Jehovah laekem iumi for obeyim hem from heart and worshipim hem nomoa. (Eksodas 20:5) Sapos iumi duim samting wea Jehovah no laekem datwan minim iumi duim samting wea Satan laekem, and datwan bae spoelem iumi. Paul sei: “Hem nating fitim for iufala drink long kap bilong Jehovah and long semtaem drink long kap bilong olketa demon. Hem nating fitim for iufala kaikai long ‘tebol bilong Jehovah’ and long semtaem kaikai long tebol bilong olketa demon tu.”—1 Cor. 10:21.

20. Hao nao Jehovah savve helpem iumi nomata iumi duim mistek?

²⁰ Iumi savve lanem sem samting from story bilong Cain, Solomon, and olketa Israelite long Maunt Sinai. Olketa hia garem chance for “repent and changem wei” bilong olketa. (Acts 3:19) Tru nao, Jehovah hem no kwiktaem for givap long pipol bilong hem wea duim mistek. Tingim wei wea Jehovah forgivim Aaron. Distaem tu, iumi savve kasem olketa warning from Jehovah thru long olketa story insaed Bible, olketa Bible pablikeson, or advaes from olketa nara brata and sista. Taem iumi followim olketa warning hia, iumi sure Jehovah bae showimaot mercy long iumi.

21. Wanem nao iumi shud duim taem eni samting testim faithful fasin bilong iumi for Jehovah?

²¹ Wei wea Jehovah kaen hem join witim plan bilong hem. (2 Cor. 6:1) Datwan givim iumi chance for “heitim evri samting wea God no laekem, and for heitim wanem pipol long disfala world laekem.” (Readim Titus 2:11-14.) Iumi bae feisim samfala samting wea bae testim faithful fasin bilong iumi long Jehovah. Nomata olsem, iumi laek “for faithful long God taem iumi stap long disfala world.” Iumi laek for evritaem stand strong for saedem Jehovah, God wea iumi shud fraetem, worshipim, and hol strong long hem!—Diutronomi 10:20.