1. Why nao hem fitim for iumi sei Jehovah nao ownim evri samting? (Lukim piksa long start bilong study.)

EVRI samting hem bilong Jehovah! Hem ownim “heven wetem evrisamting long hem, an wol wetem evrisamting long hem.” (Diutronomi 10:14; Rev. 4:11) So iumi evri man, iumi bilong Jehovah, bikos hem nao creatim evri samting. (Sams 100:3) Nomata olsem, start kam from bifor yet, God evritaem chusim samfala pipol for kamap spesol pipol bilong hem.

2. Long Bible, hu nao Jehovah ting long olketa olsem spesol pipol bilong hem?

² Olsem example, Sams 135 storyim hao Jehovah chusim olketa faithful Israelite bifor for kamap spesol “pipol blong hem.” (Sams 135, 4) And tu, buk bilong Hosea profesi abaotem hao samfala pipol wea no Israelite bae kamap pipol bilong Jehovah. (Hos. 2:23, NW) Profesi bilong Hosea fulfill taem Jehovah chusim samfala wea no Jew for garem chance for rul witim Christ long heven. (Acts 10:45; Rome 9:23-26) From olketa hia kasem holy spirit, olketa wanfala “holy nation.” Jehovah ting long olketa olsem ‘spesol pipol bilong hem.’ (1 Pet. 2:9, 10) Bat waswe, long staka faithful Christian distaem wea garem hope for laef long earth? Jehovah sei olketa tu pipol bilong hem wea hem chusim.—Aesaea 65:21, 22.

3. (a) Hu nao olketa wea garem privilege olsem spesol pipol bilong Jehovah distaem? (b) Wanem nao bae iumi storyim long disfala study?

 ³ Distaem datfala “smol sekson bilong olketa sheepsheep,” wea garem hope for heven, and “olketa nara sheepsheep,” wea garem hope for disfala earth, olketa “wanfala sekson nomoa” wea Jehovah ting long olketa olsem spesol pipol bilong hem. (Luke 12:32; John 10:16) Tru nao, iumi barava laek for showimaot iumi tinghae long Jehovah from hem ting long iumi olsem spesol pipol bilong hem. Long disfala study bae iumi storyim wanem iumi savve duim for showimaot iumi tinghae long wei wea Jehovah givim iumi disfala spesol privilege.

4. Hao nao iumi showimaot thankiu long Jehovah from hem letem iumi for fren witim hem, and hao nao Jesus duim sem samting?

⁴ Iumi showimaot iumi tinghae long Jehovah taem iumi dedicatem laef bilong iumi long hem. Taem iumi baptaes long wata, iumi showimaot long pablik hao iumi bilong Jehovah and iumi willing for obeyim hem. (Heb. 12:9) Jesus duim sem samting taem hem baptaes, hem olsem hem sei long Jehovah: “God, mi long hia nao, mi redi nao fo duim wanem yu laekem mi fo duim.” (Sams 40:7, 8) Nomata Jesus kam from wanfala nation wea dedicate finis long Jehovah, hem givim hemseleva for duim wanem Jehovah laekem.

5, 6. (a) Hao nao Jehovah feel taem Jesus baptaes? (b) Storyim tokpiksa wea showimaot Jehovah tinghae long dedication bilong iumi.

⁵ Hao nao Jehovah feel taem Jesus baptaes? Bible sei: “Stretawe bihaen Jesus hem go anda long wata and hem standap moa, skae hem open, and John lukim spirit bilong God wea olsem wanfala kurukuru kam daon antap long Jesus. And tu, wanfala toktok from skae hem sei: ‘Diswan nao Son bilong mi wea mi lovem and wea mi hapi long hem.’” (Matt. 3:16, 17) Nomata Jesus hem bilong God finis, Jehovah hapi for lukim Jesus willing for givim laef bilong hem for worshipim Hem nomoa. Long sem wei tu, Jehovah hapi taem iumi dedicatem laef bilong iumi long hem, and hem bae blessim iumi.—Sams 149:4.

⁶ Tingim disfala tokpiksa: Wanfala dadi garem garden wea staka naes frut tree grow insaed. Wantaem, smol gele bilong hem harvestim samfala frut from datfala garden and givim for dadi bilong hem. Frut wea gele hia givim, hem samting wea dadi ownim finis, iaman? Nomata olsem, dadi mas barava hapi tumas taem gele bilong hem givim datfala frut from hem savve datwan showimaot gele bilong hem lovem hem. Dadi hia bae tinghae tumas long datfala frut winim olketa nara frut wea stap yet long garden bilong hem. Long sem wei tu, Jehovah barava hapi tumas taem iumi willing for givim laef bilong iumi for worshipim hem nomoa.—Eksodas 34:14.

7. Hao nao Malachi helpem iumi for minim feeling bilong Jehovah abaotem olketa wea willing for worshipim hem?

⁷ Readim Malakae 3:16. Sapos iu no dedicate and baptaes yet, ting raonem why hem barava important for iu duim datwan. Tru nao, Jehovah nao ownim evri samting, so taem laef bilong iu start, iu bilong hem finis. Bat sapos iu disaed for sapotim rul bilong Jehovah and showimaot iu dedicate long hem for duim wanem hem laekem, datwan nao bae mekem hem barava hapi tumas. (Provebs 23:15) Jehovah savve long olketa wea willing for worshipim hem, and hem raetem nem bilong olketa insaed buk bilong hem for rememberim olketa man.

8, 9. Wanem nao Jehovah laekem olketa wea nem bilong olketa insaed buk for rememberim man for mas duim?

⁸ For nem bilong iumi gohed stap insaed  datfala buk bilong Jehovah for rememberim man, iumi mas duim samting. Malachi sei iumi mas ‘tinghevi long hem,’ wea minim iumi mas worshipim Jehovah and tinghae long nem bilong hem. Sapos iumi worshipim or mekhae long man or eni nara samting, bae Jehovah aotem nem bilong iumi from datfala buk bilong laef.—Eksodas 32:33; Sams 69:28.

⁹ So hem no inaf for iumi promis for duim wanem Jehovah laekem and for baptaes. Tufala samting hia iumi duim wantaem nomoa, bat wei wea iumi worshipim Jehovah hem mas samting wea iumi duim evriday long laef bilong iumi. So evriday iumi mas gohed for showimaot iumi obeyim hem and iumi mas duim datwan for full laef bilong iumi.—1 Pet. 4:1, 2.

10. Wanem nao showimaot klia olketa wea worshipim Jehovah olketa difren from olketa wea no worshipim hem?

¹⁰ Long study bifor diswan, iumi lane abaotem story bilong Cain, Solomon, and olketa Israelite. Olketa sei olketa worshipim Jehovah nomoa, bat samting wea olketa duim showimaot olketa nating duim datwan. Olketa example hia showimaot pipol bilong Jehovah mas barava showimaot klia hao olketa lovem samting wea stret and heitim nogud samting. (Rome 12:9) Dastawe, bihaen Malachi storyim datfala buk for rememberim man, Jehovah sei, “Bae yufala luksave wea olketa stretfala pipol hu i obeim mi i barava deferen from olketa nogud pipol hu i nating obeim mi.”—Malakae 3:18.

11. Why nao hem shud isi for evriwan luksavve iumi worshipim Jehovah nomoa?

¹¹ Nara wei wea showimaot iumi tinghae long Jehovah from hem chusim iumi for kamap pipol bilong hem, hem nao for kamap strong long spiritual wei. Diswan mas showaot klia “mekem evriwan lukim.” (1 Tim. 4:15; Matt. 5:16) Askem iuseleva: ‘Waswe olketa narawan luksavve mi barava faithful long Jehovah? Waswe, mi iusim gud chance wea mi garem for talemaot mi wanfala Jehovah’s Witness?’ Jehovah bae sorre tumas sapos hem lukim hao iumi hol bak for talem olketa narawan hao iumi bilong hem.—Sams 119:46; readim Mark 8:38.

12, 13. Wanem nao samfala duim wea mekem hem no isi for narawan luksavve Olketa Jehovah’s Witness?

 ¹² Sorre samting nao, samfala Witness followim “tingting bilong pipol long disfala world,” so olketa no showimaot klia wei wea olketa difren from pipol wea no worshipim God. (1 Cor. 2:12) Datfala tingting bilong world mekem pipol for duim “samting wea body laekem.” (Eph. 2:3) Olsem example, nomata iumi kasem staka kaonsel saed long diswan finis, samfala gohed for laek werem kaleko and garem lukluk wea no showimaot respect. Nomata taem olketa go long meeting, olketa werem kaleko wea taet and wea showim body. Or olketa katem hair and staelem hair long wei wea ova tumas. (1 Tim. 2:9, 10) From datwan, taem olketa stap midolwan staka pipol, maet hem hard for iumi luksavve hu nao bilong Jehovah and hu nao “fren witim world.”—Jas. 4:4.

¹³ And tu, samfala nara samting wea samfala Witness duim showimaot olketa no barava rejectim world. Olsem example, wei wea olketa dance and samting olketa duim long olketa hapitaem no fitim wanfala Christian. Olketa postim olketa photo and koment long social media wea showimaot olketa no spiritual man. Maet olketa no duim yet eni serious sin wea bae mekem olketa fit for kasem discipline from olketa elder long kongregeson, bat nogud wei bilong olketa savve spoelem olketa nara brata and sista wea traem best for stap difren from disfala world.—Readim 1 Peter 2:11, 12.

14. Wanem nao iumi mas duim for protectim spesol wei wea iumi fren witim Jehovah?

¹⁴ World duim staka samting for mekhae long ‘samting wea body and eye bilong man laekem, witim tu wei for man show-off witim samting wea hem garem.’ (1 John 2:16) Bat, from iumi bilong Jehovah iumi barava “heitim evri samting wea God no laekem, and for heitim wanem pipol long disfala world laekem. Hem teachim iumi tu for garem gudfala tingting, for duim samting wea stret, and for faithful long God taem iumi stap long disfala world.” (Titus 2:12) So toktok bilong iumi, wei bilong iumi for kaikai and drink, lukluk and kaleko bilong iumi, waka bilong iumi, shud showaot klia iumi bilong Jehovah.—Readim 1 Corinth 10:31, 32.

15. Why nao iumi shud kaen and showimaot love long olketa brata and sista?

¹⁵ Taem iumi tinghae long wei wea iumi fren witim Jehovah hem bae showaot long hao iumi fren witim olketa brata and sista. Olketa tu bilong Jehovah. Sapos iumi no forgetim datwan, iumi bae evritaem kaen and showimaot love long olketa brata bilong iumi. (1 Thess. 5:15) Jesus sei olsem long olketa disaepol: “Sapos iufala lovem iufala evriwan, pipol bae savve iufala olketa disaepol bilong mi.”—John 13:35.

16. Wanem nao iumi lanem from Law bilong Moses abaotem love wea Jehovah garem for olketa pipol bilong hem?

¹⁶ Iumi bae storyim wanfala example for helpem iumi minim hao iumi shud treatim olketa narawan long kongregeson. Evri samting wea olketa iusim insaed temple bilong Jehovah, olketa mas iusim for tru worship nomoa. Law bilong Moses storyim hao for lukaftarem olketa samting hia wea olketa iusim insaed temple, and sapos man no followim olketa instruction for lukaftarem, hem mas dae. (Nambas 1:50-51) Sapos Jehovah tinghae and lukaftarem olketa samting hia wea no garem laef, diswan minim olketa faithful pipol bilong hem wea dedicate long hem, olketa moa important winim olketa samting hia. Taem Jehovah story long olketa pipol bilong hem, hem sei: “Sapos eniwan spoelem iu, hem olsem hem tasim insaed eye bilong mi.”—Zech. 2:8, NW.

17. Olketa wanem samting nao Jehovah savve long hem taem hem lukluk kam long iumi?

¹⁷ Malachi sei taem pipol bilong Jehovah story, hem “herem evrisamting wea olketa talem.” (Malakae 3:16) Tru nao, Jehovah “savve gud long olketa bilong hem.” (2 Tim. 2:19) Hem barava savve gud long evri samting wea iumi duim and talem. (Heb. 4:13) Jehovah savve finis taem iumi no kaen long olketa brata and sista bilong iumi. Taem iumi kaen, willing for givim samting, welkamim narawan, and forgivim narawan, iumi sure Jehovah lukim evri samting hia.—Heb. 13:16; 1 Pet. 4:8, 9.

18. Hao nao iumi savve showimaot iumi tinghae long wei wea iumi kamap pipol bilong Jehovah?

¹⁸ Tru nao, iumi laek for showimaot long Jehovah hao iumi barava tinghae long wei wea iumi kamap pipol bilong hem. Taem iumi dedicatem laef bilong iumi long hem datwan hem barava wise disison. Nomata iumi “stap midolwan long olketa nogud pipol wea sin,” iumi laekem pipol for ting long iumi olsem iumi “no garem blame and no guilty.” And iumi laek “shaen olsem laet insaed long disfala world.” (Phil. 2:15) So iumi laek disaed strong for againstim olketa nogud samting. (Jas. 4:7) And iumi lovem and respectim olketa brata and sista bilong iumi, bikos iumi luksavve olketa tu bilong Jehovah.—Rome 12:10.

19. Hao nao Jehovah blessim olketa pipol bilong hem?

¹⁹ Bible sei: “[Jehovah] bae hemi no lusim olketa pipol blong hem.” (Sams 94:14) Diswan mekem iumi barava sure hao nomata eni samting happen, Jehovah bae no lusim iumi. Nomata sapos iumi dae, Jehovah bae no forgetim iumi. (Rome 8:38, 39) Bible sei: “Sapos iumi laef, iumi laef for Jehovah, and sapos iumi dae, iumi dae for Jehovah. So nomata sapos iumi laef or iumi dae, iumi bilong Jehovah.” (Rome 14:8) Iumi barava luk forward long datfala taem wea Jehovah bae resurrectim olketa faithful fren bilong hem wea dae finis. (Matt. 22:32) Distaem tu iumi kasem staka blessing from hem. Olsem Bible talem, “[Jehovah] nao hemi God blong olketa. . . . Olketa pipol wea God hemi siusim fo kamap olketa pipol blong hem, olketa ya nao i hapi.”—Sams 33:12.