“STAKA samting nao stap for harvestim, bat no staka wakaman stap for duim datwan. So askem man wea ownim planteison for sendem go olketa wakaman for harvestim planteison bilong hem.” (Luke 10:2) Jesus talem diswan winim 2,000 year go finis, bat hem barava fitim samting wea happen distaem long Myanmar. Why nao olsem? Long Myanmar, 4,200 pablisa nomoa preachim gud nius long samting olsem 55 million pipol long there.

Bat Jehovah, “man wea ownim planteison,” hem muvim staka handred brata and sista from difren kantri for go and help for duim harvest waka long disfala kantri long Southeast Asia. Why nao olketa willing for lusim hom bilong olketa? Wanem nao helpem olketa for muv go long datfala ples? And olketa wanem blessing nao olketa kasem distaem? Bae iumi story raonem.

Wanfala pioneer brata long Japan, Kazuhiro, hem garem sik epilepsy, and wantaem hem hafded, so olketa tekem hem go long hospital. Doctor talem hem for no draevem car for tufala year. Kazuhiro seke for herem datwan. Hem ting olsem: ‘Mi laekem tumas for gohed pioneer bat hao nao bae mi duim datwan?’ Hem prea strong long Jehovah and askem hem for mekem wei for hem gohed for pioneer.

Kazuhiro sei: “Wanfala month bihaen, fren bilong mi wea pioneer long Myanmar herem samting wea kasem mi. Hem ringim mi and sei: ‘Long Myanmar main transport nao bas. Sapos iu kam long hia bae iu savve gohed nomoa long ministry and bae iu no need for iusim car!’ Mi askem doctor bilong mi sapos mi fit for go long Myanmar nomata mi sik. Mi sapraes from datfala doctor sei: ‘Wanfala doctor bilong epilepsy hem visit kam long Japan from Myanmar distaem. Bae mi askem hem for meetim iu mekem sapos enitaem disfala sik kasem iu moa, hem nao bae treatim iu.’ Taem mi herem samting wea doctor talem, mi ting Jehovah ansarem prea bilong mi.”

Stretawe, Kazuhiro sendem e-mail long Myanmar branch office and talem olketa hao hem and waef bilong hem laek for kam pioneer long there. Faevfala day bihaen nomoa, branch raet kam and sei, “Kam, mifala needim staka pioneer!” Kazuhiro and waef bilong hem Mari, salem tufala car bilong tufala, and baem visa and plane ticket bilong tufala. Distaem tufala hapi for pioneer witim saen languis grup long Mandalay. Kazuhiro sei: “Disfala experience strongim faith bilong mifala long promis bilong God long Sams 37:5 wea sei: ‘Yu mas givim ful laef blong yu long  [Jehovah], an yu mas trastem hem, nao bae hemi helpem yu.’”

Long 2014, Olketa Jehovah’s Witness long Myanmar garem wanfala spesol convention. Samfala brata and sista from olketa difren kantri kam attend. Wanfala hem, Monique, sista from United States, wea 34 year. Hem sei: “Bihaen mi kam bak from datfala convention, mi prea long Jehovah abaotem next samting wea mi shud duim. And tu, mi story long parents bilong mi abaotem olketa spiritual goal bilong mi. Mifala agree hem gud for mi go bak long Myanmar, bat mi prea staka taem and hem tek taem lelebet bifor mi disaed for duim datwan.” Monique storyim why nao olsem.

“Jesus encouragem olketa wea followim hem for ting raonem sapos olketa garem inaf selen for duim wanfala samting. So mi askem miseleva: ‘Waswe, mi garem inaf selen for muv go? Waswe, mi savve faendem waka for sapotim miseleva long datfala kantri wea bae no tekem tumas taem bilong mi?’” Hem sei: “Mi luksavve mi no garem inaf selen yet for muv go long datfala farawe ples.” So gogo, hao nao hem fit for muv go long there?—Luke 14:28.

Monique sei: “Wanday boss bilong mi ask for story witim mi. Mi wari nogud olketa bae finisim mi from waka. Bat really boss laek for thankiu for gudfala waka bilong mi. Then hem talem mi olketa bae givim mi bonus. Datfala selen barava kasem amount wea mi needim for peim olketa kaon bilong mi mekem mi free for go!”

Start long December 2014, Monique pioneer long Myanmar. Hao nao hem feel abaotem wei wea hem serve long ples wea needim pioneer? Hem sei: “Mi hapi tumas for stap long hia. Mi garem thrifala Bible study. Wanfala student bilong mi hem 67 year. Evritaem mi kasem hem, hem smile and hagem mi. Taem hem lanem hao nem bilong God hem Jehovah, hem barava krae. Hem sei: ‘Diswan nao firstaem for mi herem nem bilong God hem Jehovah. Iu barava young winim mi, bat iu teachim mi barava important samting winim eni nara samting wea mi need for lanem.’ Taem olsem, mi tu krae. Olketa experience olsem diswan mekem mi barava feel satisfae from mi duim disfala waka for serve long ples wea garem need.” No longtaem go nomoa, Monique kasem privilege for attendim Skul for Olketa Kingdom Evangelizer.

Nara samting wea helpem samfala for disaed for go long Myanmar, hem nao 2013 Yearbook of Jehovah’s Witnesses wea storyim datfala kantri. Li, wanfala sista wea winim 30 year, hem stap long wanfala kantri long Southeast Asia. Hem waka full-taem, bat taem hem readim datfala Yearbook datwan mekem hem laek for pioneer long Myanmar. Hem sei: “Long 2014 taem mi attendim spesol convention long Yangon, mi meetim wanfala pioneer couple long Chinese grup long Myanmar. From mi savve story long Chinese languis, mi disaed for muv long Myanmar for sapotim Chinese grup. Mi joinim Monique, and mitufala go stap long Mandalay. Jehovah barava blessim mitufala thru long wei wea mitufala faendem part-taem waka for teach long wanfala skul, and wanfala apartment for stap long hem klosap long datfala skul. Nomata weather hot and samfala samting no isi, mi barava enjoyim pioneer waka long hia. Pipol long Myanmar garem simpol laef, gudfala wei, and willing for lisin long gud nius. Mi hapi for lukim hao Jehovah mekem preaching waka long hia barava grow fast. Mi barava sure Jehovah hem laekem mi for stap long hia long Mandalay.”

Samfala wea disaed for serve long olketa ples wea garem need, luksavve Jehovah ansarem prea bilong olketa. Tingim example bilong Jumpei, wea hem 37 year, and waef bilong hem Nao, wea 35 year. Firstaem, tufala serve long saen languis kongregeson long Japan. Why nao tufala muv go long Myanmar? Jumpei sei: “Mi and waef bilong mi garem goal for help long eni  ples wea garem bigfala need. Wanfala brata from saen languis kongregeson bilong mifala hem muv go long Myanmar. So nomata mitufala garem lelebet selen nomoa, long May 2010 mitufala tu muv go long there. Olketa brata and sista long Myanmar barava welkamim mifala.” Hao nao hem feel abaotem preaching waka long saen languis long Myanmar? Hem sei: “Staka interest. Taem mifala showim olketa saen languis video, olketa wea earpas sapraes tumas. Mifala hapi tumas from mifala kam duim waka bilong Jehovah long hia!”

Wanem nao Jumpei and Nao duim saed long selen? Hem sei: “Bihaen thrifala year, lelebet selen wea mitufala garem hem klosap for finis and hem no fitim nao for mifala peim rent for narafala year. Mi and waef bilong mi prea staka taem from heart. Seknomoa, mitufala kasem leta from branch office for mitufala waka olsem temporary spesol pioneer! Taem mitufala trustim Jehovah, mitufala barava lukim hao no enitaem Jehovah lusim mitufala. Hem barava lukaftarem mitufala long evri samting.” No longtaem go nomoa, Jumpei and Nao tu attendim Skul for Olketa Kingdom Evangelizer.

Simone, wanfala brata from Italy, wea 43 year, and waef bilong hem, Anna, wea 37 year wea kam from New Zealand, muv go long Myanmar tu. Wanem nao mekem tufala go long there? Anna sei: “Olketa story insaed 2013 Yearbook abaotem Myanmar nao mekem mitufala laek go.” Simone sei: “Hem wanfala nambawan privilege for stap long Myanmar. Laef bilong mitufala long hia barava simpol, so mitufala garem moa taem for duim waka bilong Jehovah. Mifala hapi for lukim wei wea Jehovah barava lukaftarem mitufala taem mitufala serve long ples wea garem bigfala need.” (Sams 121:5) Anna sei: “Mi barava hapi winim enitaem bifor. Mitufala garem simpol laef. Mitufala spendem moa taem tugeta and barava fren gud. Mitufala garem tu olketa niu fren wea mifala feel klos long olketa. Pipol long hia no les long olketa Witness, and staka barava interest long gud nius!” Wanem nao showimaot datwan?

Anna sei: “Wantaem, mi witness long wanfala university student long market and mi arrange for meetim hem moa. Long datfala taem, hem tekem kam wanfala fren bilong hem. Narataem, hem tekem kam samfala nara fren bilong hem. Bihaen, hem leadim kam samfala fren moa. Distaem mi study witim faevfala fren bilong hem.” Simone sei: “Pipol long hia barava kaen and laek for savve long staka samting. Staka pipol interest for savve long gud nius. Mitufala no garem inaf taem for study witim evriwan wea interest.”

Bat wanem nao nara samting wea samfala duim bifor olketa mekem disison for go long Myanmar? Mizuho, from Japan, hem sei: “For longtaem mi and hasband bilong mi Sachio, laek for go serve long eni kantri wea garem bigfala need, bat mitufala no savve wea for go long hem. Bihaen mitufala readim 2013 Yearbook abaotem olketa naes experience long Myanmar, datwan mekem mitufala start for ting raonem sapos  mitufala fit for go serve long there.” Sachio sei tu: “Mitufala disaed for go wan week long Yangon, wea hem barava big taon long Myanmar, for go lukim hao nao laef long there. Datfala gogo mekem mitufala sure mitufala shud muv long Myanmar.”

Rodney, and waef bilong hem Jane, wea tufala winim 50 year, and boy bilong tufala, Jordan, and gele bilong tufala, Danica, olketa from Australia, and olketa go serve long Myanmar long 2010. Rodney sei: “Mifala hapi for lukim pipol long hia barava laek for lane abaotem God. Mi laek for talem olketa nara famili hao hem barava gud for go serve long kaen ples olsem Myanmar.” Why nao hem tok olsem? Hem sei: “Mi hapi from taem mifala kam long Myanmar datwan helpem famili bilong mi for fren gud witim Jehovah. Distaem staka young wan busy long mobile, car, waka bilong olketa, and samfala nara samting moa. Bat tufala pikinini bilong mitufala busy for lanem olketa niu toktok long languis for iusim long ministry. And tu, tufala gohed lane for story gud witim pipol wea no savve long Bible and for givim koment long meeting. And, tufala iusim taem bilong tufala for duim olketa nara spiritual samting wea tufala enjoyim.”

Oliver, wanfala brata wea 37 year from United States, hem explainim why hem gud for man go serve long nara ples. Hem sei: “Mi kasem staka blessing taem mi duim waka bilong Jehovah long ples wea no hom bilong mi. Hem mekem mi for trustim Jehovah bae helpem mi long eni hard taem wea mi kasem. Taem mi waka tugeta witim olketa wea mi no savve long olketa bat mifala evriwan garem sem biliv, hem helpem mi for luksavve Kingdom bilong God important winim eni nara samting long world.” Distaem, Oliver and waef bilong hem Anna, gohed for preach long pipol wea story long Chinese languis.

Trazel, wanfala sista wea 52 year from Australia, hem serve long Myanmar start long 2004. Hem sei: “Mi laek for encouragem olketa brata and sista for muv go long ples wea garem need, sapos olketa fit for duim datwan. Mi luksavve sapos man willing for go serve long nara ples, Jehovah bae blessim waka bilong hem. Mi no expectim hao laef bilong mi bae olsem. Mi barava hapi and satisfae witim laef bilong mi distaem.”

Maet story bilong olketa brata and sista hia abaotem feeling bilong olketa taem olketa muv go long Myanmar, bae encouragem iu for tingim sapos iu fit for go helpem olketa wea laek lanem truth long olketa ples wea garem need. Olketa wea serve long Myanmar gohed for sei: “Plis, kam long Myanmar and helpem mifala!”