1-2. (a) Olsem komand blo Jesus wea stap lo Matthew 28:18-20 showimaot, wanem nao main goal blo Christian kongregeson? (b) Olketa wanem kwestin nao bae iumi storyim lo disfala study?

OLKETA aposol mas barava hapi taem olketa hipap lo wanfala maunten. Bihaen Jesus resurrect, hem talem olketa disaepol blo hem for go meetim hem lo datfala ples. (Matt. 28:16) Maet lo datfala taem nao hem meet witim “winim 500 brata.” (1 Cor. 15:6) Why nao Jesus askem olketa disaepol for kam meetim hem? Bikos hem laek for givim wanfala spesol assignment lo olketa. Hem sei: “Iufala go and teachim pipol long evri kantri for kamap disaepol bilong mi.”—Readim Matthew 28:18-20.

² Olketa disaepol wea stap taem Jesus talem datfala toktok, olketa kamap part lo Christian kongregeson lo first century. Main goal blo datfala Christian kongregeson hem nao for teachim staka pipol for kamap disaepol blo Christ. * Distaem, staka thousand kongregeson blo olketa tru Christian stap evriwea lo world, and main goal blo olketa hem semsem olsem olketa Christian lo first century. Lo disfala study, bae iumi story raonem fofala kwestin: Why nao wei for teachim pipol for kamap disaepol hem barava important? Wanem nao iumi savve duim for helpem pipol kamap disaepol? Waswe, evri Christian savve share insaed disfala waka for teachim pipol for kamap disaepol? And why nao iumi need for patient taem iumi duim disfala waka?

3. Olsem John 14:6 and 17:3 storyim, why nao wei for teachim pipol for kamap disaepol hem important?

³ Why nao wei for teachim pipol for kamap disaepol hem barava important? Bikos sapos iu wanfala disaepol bae iu savve kamap fren blo God. And tu, olketa wea followim Christ savve garem gudfala laef distaem and olketa garem hope for laef olowe lo future. (Readim John 14:6; 17:3.) Hem tru, Jesus givim iumi important responsibility, bat datwan no minim iumi duim seleva. Aposol Paul raet olsem abaotem hemseleva and olketa wea waka witim hem: “Mifala waka tugeta witim God.” (1 Cor. 3:9) Datwan hem nambawan privilege wea Jehovah and Jesus givim lo iumi nomata iumi no perfect!

4. Wanem nao iumi savve lanem from experience blo Ivan and Matilde?

⁴ Wei for teachim pipol for kamap disaepol savve mekem iumi barava hapi. Tingim example blo Ivan and waef blo hem Matilde lo Colombia. Tufala preach lo wanfala young man wea nem blo hem Davier, wea sei: “Mi laek for changem laef blo mi bat hem hard tumas.” Davier hem wanfala boxer. Hem savve drunk tumas, tekem drug, and stap witim gelfren blo hem Erika. Ivan sei: “Mifala start for visitim hem lo vilij blo hem wea stap farawe, for kasem hem mifala mas raedem baesikol for staka hour lo road wea mud tumas. From Davier changem wei blo hem, datwan muvim Erika for laek study.” Gogo, Davier stop for boxing, tekem drug, and drink tumas. And tu, hem maritim Erika. Matilde sei: “Taem Davier and Erika baptaes lo 2016, mifala tingim bak datfala toktok wea Davier talem, ‘Mi laek for changem laef blo mi bat hem hard tumas.’ Mitufala Ivan hapi tumas gogo mitufala krae nao.” Tru nao, iumi barava hapi taem iumi helpem pipol for kamap disaepol blo Christ.

5. Wanem nao first samting wea iumi savve duim for helpem pipol for kamap disaepol?

⁵ First samting, hem for go “lukaotem” olketa wea garem heart wea laek for lane abaotem Jehovah. (Matt. 10:11) Iumi showimaot iumi olketa Witness blo Jehovah taem iumi story abaotem Hem lo evriwan wea iumi meetim. Iumi showimaot iumi olketa tru Christian taem iumi followim komand blo Christ for preach.

6. Wanem nao savve helpem iumi for duim gud ministry?

⁶ Samfala pipol wea iumi meetim barava laek for lane abaotem Bible, bat staka narawan maet luk olsem olketa no interest. Maet iumi nao mas duim samting for mekem olketa interest. For iumi duim gud ministry, iumi mas barava prepare gud. Chusim olketa subject wea pipol wea iumi meetim bae interest lo hem. Then tingim hao nao for startim storyim for fitim datfala topic.

7. Hao nao iu savve startim story witim samwan, and why nao iu tingse hem important for lisin and respectim olketa?

⁷ Olsem example, maet iu savve askem haosholder: “Staka problem wea iumi feisim distaem hem affectim pipol evriwea lo world, hao nao lukluk blo iu lo olketa samting hia? Iu tingse sapos full world garem wanfala gavman nomoa, bae datwan savve finisim evri problem hia?” Then story witim hem abaotem Daniel 2:44. Or iu savve askem samwan, “Wanem nao savve helpem iumi for teachim olketa pikinini for garem gudfala wei? Mi laek for herem tingting blo  iu.” Then story witim hem abaotem Diutronomi 6:6, 7. Nomata wanem kaen subject nao iu chusim, ting abaotem pipol wea bae lisin lo iu. Ting raonem hao samting wea Bible really teachim bae barava helpem olketa. Taem iu story witim olketa, hem important for lisin and respectim tingting blo olketa. Taem iu duim olsem, iu bae minim wanem nao tingting blo olketa and olketa bae laek for lisin lo iu.

8. Why nao iumi mas gohed duim olketa return visit?

⁸ Bifor samwan bae acceptim Bible study, iu maet need for barava waka hard for duim olketa return visit. Why nao olsem? Bikos maet hem no stap taem iumi go bak for visitim hem. And tu, iu maet need for go bak tu-thri taem bifor haosholder feel free and bae willing for acceptim wanfala Bible study. Tingim, sapos iumi laekem wanfala flaoa for grow gud, iumi need for watarem evritaem. Olsem tu, for helpem samwan for mekem grow love blo hem for Jehovah and Christ, iumi mas evritaem storyim Bible witim hem.

9-10. Why nao iumi savve sei evri Christian nao share for helpem samwan wea garem honest heart for kamap disaepol?

⁹ Evri Christian share for helpem samwan wea garem honest heart for kamap disaepol. Iumi olsem olketa wea waka hard for faendem wanfala smol pikinini wea lus. Why nao iumi sei olsem? Tingim samting wea really happen lo wanfala smol boy wea thri years nomoa wea lus from haos blo hem. Samting olsem 500 pipol nao lukaotem datfala smol boy. Gogo, bihaen samting olsem 20 hour, wanfala lo olketa faendem hem lo wanfala field wea olketa plantim corn. Datfala volunteer no laek acceptim wei wea pipol sei hem  nao faendem datfala boy. Hem sei: “Staka handred pipol nao share lo disfala waka for faendem disfala smol boy.”

¹⁰ Staka pipol nao olsem datfala smol boy wea lus, olketa no garem hope and olketa needim help. (Eph. 2:12) Winim eit million pipol nao share lo disfala waka for faendem olketa. Maet iuseleva no faendem eni Bible study. Bat maet olketa nara pablisa wea iufala waka tugeta lo datfala territory nao faendem samwan wea laek for lanem truth wea stap insaed Bible. Taem wanfala brata or sista faendem samwan wea laek for kamap disaepol blo Christ, evriwan wea share insaed disfala waka garem gudfala reason for hapi.

11. Nomata sapos iu no garem eni study, wanem nao iu savve duim for helpem samwan kamap disaepol?

¹¹ Nomata sapos iu no conductim wanfala Bible study distaem, iu savve helpem samwan for kamap disaepol. Olsem example, iu savve welkamim olketa niu wan and helpem olketa taem olketa kam lo Kingdom Hall. Taem iu duim olsem, iu helpem olketa for luksavve hao iumi olketa tru Christian bikos iumi showimaot love. (John 13:34, 35) Taem iu givim olketa koment lo meeting, nomata sapos hem short nomoa, datwan bae helpem olketa niu wan for lane hao for givim olketa ansa wea kam from heart and wea showimaot respect. Iu savve waka tu witim wanfala niufala pablisa lo ministry, and helpem hem for iusim Bible taem hem story witim pipol. Taem olsem, iu gohed for teachim hem for followim example blo Christ.—Luke 10:25-28.

12. Waswe, iu needim spesol savve for helpem samwan kamap disaepol? Explainim kam

¹² Iumi shud no tingse iumi needim spesol savve mekem iumi fit for teachim olketa narawan for kamap disaepol blo Jesus. Why nao olsem? Tingim example blo Faustina, wea stap lo Bolivia. Taem hem meetim olketa Jehovah’s Witness, hem no savve hao for read. Distaem hem savve lelebet hao for read. Hem baptaes and hem laekem tumas for teachim olketa narawan. Evri week hem savve conductim faevfala Bible study. Nomata Faustina no savve read gud olsem staka lo olketa Bible study blo hem, bat hem helpem sixfala pipol finis for baptaes.—Luke 10:21.

13. Nomata sapos iumi busy tumas, wanem nao samfala blessing wea iumi savve enjoyim taem iumi helpem pipol for kamap disaepol?

¹³ Staka brata and sista barava busy bikos olketa garem staka important responsibility. Nomata olsem, olketa markem taem for conductim olketa Bible study, and datwan mekem olketa hapi. Tingim example blo Melanie lo Alaska. Hem wanfala singol mami wea gele  blo hem eit years. Hem waka full-taem and lukaftarem dadi blo hem wea garem cancer. Melanie nomoa only witness lo datfala taon. Hem savve prea lo Jehovah for strongim hem for gohed preach nomata weather hem cold tumas bikos hem barava laek for faendem eni Bible study. Gogo hem meetim Sara, wea barava hapi for savve dat God garem wanfala nem. Bihaen lelebet taem, Sara acceptim wanfala Bible study. Melanie sei: “Lo olketa Friday evening, nomata mi barava taed, mi and gele blo mi kasem gud samting taem mitufala go for conductim datfala study. Mifala enjoyim tumas for duim research for faendem ansa for olketa kwestin blo Sara, and mifala hapi for lukim hao hem kamap fren blo Jehovah.” Sara hem no fraet nomata olketa againstim hem, hem lusim church blo hem, and hem baptaes.

14. (a) Hao nao wei for helpem man kamap disaepol hem olsem wei for fishing? (b) Hao nao toktok blo Paul lo 2 Timothy 4:1, 2 savve helpem iu?

¹⁴ Nomata maet luk olsem pipol no interest, iu mas no givap for faendem samwan wea maet laek for kamap wanfala disaepol. Tingim, Jesus sei wei for faendem disaepol hem olsem wei for fishing. Olketa man for fishing savve spendem staka hour bifor olketa savve kasem eni fish. Staka taem olketa mas fishing lo midol naet or early lo morning, and samfala taem olketa mas go farawe for faendem olketa fish. (Luke 5:5) Olsem tu, samfala brata and sista mas patient for spendem staka hour for duim ministry lo olketa difren taem and ples. Why nao olsem? Datwan hem for garem chance for meetim  pipol. Olketa wea waka hard for duim olsem, staka taem bae meetim pipol wea interest lo message blo iumi. Hao sapos iu trae for preach lo taem and ples wea isi for iu meetim pipol?—Readim 2 Timothy 4:1, 2.

15. Why nao iumi need for patient taem iumi conductim wanfala Bible study?

¹⁵ Why nao iumi need for patient taem iumi conductim wanfala Bible study? Wanfala reason hem bikos iumi laek helpem Bible student blo iumi for savve and lovem olketa Bible teaching. Iumi need for helpem Bible student blo iumi for savve abaotem and lovem man wea givim kam Bible, Jehovah. Iumi laek for teachim Bible student abaotem wanem Jesus laekem olketa disaepol blo hem for duim, and tu, iumi need for helpem hem for savve hao for followim wanem hem lanem. Taem hem stragol for followim olketa Bible principle, iumi mas patient for helpem hem. Samfala kwiktaem for changem tingting and wei blo olketa insaed tu-thri month nomoa, bat samfala savve tek longtaem.

16. Wanem nao iumi savve lanem from experience blo Raúl?

¹⁶ Wanfala missionary lo Peru, garem wanfala experience wea showimaot why hem gud for patient. Missionary hia sei: “Mi studyim tufala buk witim Bible student blo mi Raúl. Bat hem still feisim samfala challenge lo laef blo hem. Hem and waef savve raoa olowe, hem savve tok swear, and olketa pikinini faendem hem hard for respectim hem. Hem evritaem kam lo meeting, so mi gohed for visitim hem and helpem hem and famili blo hem. Gogo, winim thrifala year bihaen, hem fit for baptaes.”

17. Wanem nao bae iumi story raonem lo next study?

¹⁷ Jesus talem iumi for “go and teachim pipol long evri kantri for kamap disaepol.” For fulfillim disfala komand, staka taem iumi savve story witim pipol wea tingting blo olketa hem barava difren from iumi, insaed diswan hem olketa wea no garem eni religion or wea no bilivim God hem stap. Lo next study, bae iumi story raonem hao for iumi storyim gud nius lo kaen pipol olsem.