BIBLE fulap witim staka toktok wea showimaot feeling blo olketa “man wea olsem iumi.” (Jas. 5:17) Olsem example, iumi minim feeling blo aposol Paul wea sei olsem lo Rome 7:21-24: “Taem mi laek duim samting wea stret, tingting for duim samting wea nogud tu hem stap. . . . Mi ia, mi iusles man nomoa!” Disfala toktok barava encouragem iumi bikos iumi tu stragol for deal witim wei wea iumi no perfect.

Paul showimaot hem garem olketa nara feeling tu. Lo Galatia 2:20, hem storyim hao hem barava sure Jesus ‘lovem hem and hem dae for sevem hem!’ Waswe, iumi tu garem sem feeling olsem? Maet samfala taem iumi no feel olsem.

Sapos iumi stragol for deal witim feeling for ting daonem iumiseleva bikos lo olketa sin wea iumi duim bifor, maet hem hard for bilivim Jehovah lovem and forgivim iumi, and tu, maet hem hard tumas for iumi ting ransom sakrifaes blo Jesus hem present for iumi wanwan. Waswe, Jesus really laekem iumi for ting ransom hem for iumi wanwan? Sapos olsem, wanem nao helpem iumi for ting olsem? Bae iumi story raonem tufala kwestin hia.

Tru nao, Jesus laekem iumi for ting lo sakrifaes blo hem olsem present for iumi wanwan. Hao nao iumi sure lo datwan? Piksarem lo mind blo iu samting wea Luke 23:39-43 storyim. Tingim man wea olketa nilam lo post saed lo Jesus. Man hia talemaot hem guilty lo rong wea hem duim. Masbi datfala crime hem serious tumas, dastawe olketa nilam hem lo post, wea hem nao panis for kaen criminal olsem. From hem wari tumas abaotem wanem nao bae happen, hem begim Jesus olsem: “Jesus, plis, iu tingim mi taem iu King.”

Wanem nao Jesus duim? Tingim pain wea Jesus garem taem hem tanem hed blo hem for luk lo datfala man. Nomata Jesus feelim bigfala pain, hem smile and comfortim datfala man. Hem sei: “Mi talem iu tru samting, iu bae stap witim mi long Paradaes.” Fitim nomoa for Jesus sei, Son blo man hem kam ‘for givim laef bilong hem, for baem bak staka pipol.’ (Matt. 20:28) Bat iu lukim tu hao Jesus showimaot lo kaenfala wei hao datfala sakrifaes hem really for datfala man? Hem iusim disfala toktok “iu” and “mi.” And Jesus gohed iusim sem kaen toktok olsem taem hem talem datfala man hao hem bae stap lo paradaes lo earth.

For sure, Jesus laekem datfala man for luksavve hao sakrifaes wea hem redi for givim hem wanfala present for datfala man. Sapos Jesus ting olsem abaotem datfala criminal wea no garem chance for servem God, for sure hem bae garem sem tingting abaotem wanfala Christian wea baptaes and wea gohed for servem God. Wanem nao savve helpem iumi for bilivim dat sakrifaes blo Jesus hem for iumi wanwan nomata iumi bin duim sin bifor?

Ministry blo Paul affectim hao hem ting lo sakrifaes blo Jesus. Hao nao olsem? Hem sei: “Mi  thankiu long Lord bilong iumi Christ Jesus wea givim paoa long mi. Mi thankiu bikos long tingting bilong hem mi faithful dastawe hem givim mi wanfala waka for duim, nomata long bifor mi tok spoelem God, mi spoelem pipol bilong hem, and mi nating showimaot respect.” (1 Tim. 1:12-14) From Paul kasem datfala assignment, datwan comfortim hem bikos hem luksavve Jesus showimaot mercy, love, and trustim hem. Olsem tu, Jesus trustim iumi dastawe hem givim iumi assignment for preach. (Matt. 28:19, 20) Hao, iu garem tu sem kaen feeling olsem aposol Paul?

Albert, wea disfellowship for samting olsem 34 year and hem just kam bak lo Jehovah, hem sei: “Mi no savve forgetim olketa sin wea mi duim bifor. Bat taem mi duim ministry, mi garem sem feeling olsem aposol Paul hao Jesus givim mi disfala waka. Datwan encouragem mi and helpem mi for no ting daonem miseleva, bat mi hapi lo laef blo mi and future blo mi.”—Sams 51:3.

Allan, wea bifor hem wanfala nogud criminal wea raf tumas, hem sei: “Mi still tingim yet olketa nogud samting wea mi duim lo pipol. Samfala taem mi feel sorre tumas. Bat mi barava thankiu lo Jehovah bikos hem letem mi for storyim gud nius lo olketa narawan, nomata mi man wea sin. Taem mi lukim pipol laek herem gud nius, mi tingim wei wea Jehovah hem barava gud and showimaot love. Mi feel dat Jehovah iusim mi for helpem olketa narawan wea stragol for lusim olketa nogud wei olsem mi tu bifor.”

Taem iumi duim ministry datwan helpem iumi for iusim strong blo iumi for duim and tingim olketa gud samting. Hem mekem iumi for luksavve Jesus showimaot mercy, love, and hem trustim iumi.

Go kasem taem wea disfala nogud world blo Satan bae finis, maet heart blo iumi mekem iumi feel guilty bikos lo olketa nogud samting wea iumi duim bifor. Wanem nao savve helpem iumi for faet againstim olketa feeling olsem?

Jean, wea staka taem hem mas deal witim feeling for guilty bikos hem garem dabol laef taem hem young, hem sei: “Mi laekem datfala toktok ‘God hem savve gud long iumi winim iumiseleva.’” (1 John 3:19, 20) Olsem Jean, iumi tu kasem comfort taem iumi savve lo tingting blo Jehovah and Jesus abaotem wei wea iumi sin. Tingim tufala nao provaedem datfala ransom, wea hem no for pipol wea perfect bat hem for olketa wea sin and repent.—1 Tim. 1:15.

Taem iumi prea and ting raonem hao Jesus deal witim olketa man wea no perfect and taem iumi duim best blo iumi lo ministry wea hem assignim lo iumi, datwan helpem iumi for barava sure ransom hem really for iumi wanwan. Taem olsem, iumi olsem Paul wea sei, Jesus ‘lovem mi and dae for sevem mi.’