1. Wanem change nao kamap lo olketa year wea go pas?

FOR staka thousand year, big haf blo pipol lo world olketa garem religion. Bat insaed olketa year wea just go pas, wanfala big change kamap. Staka pipol start for ting lo olketa seleva olsem pipol wea no garem religion. And lo samfala kantri, klosap evriwan nao olketa sei olketa no interest lo religion. *—Matt. 24:12.

2. Why nao maet staka pipol no interest lo eni religion?

² Why nao staka pipol sei olketa no interest lo religion? * Samfala maet busy for aftarem wanem olketa laekem or warim tumas staka samting. (Luke 8:14) Samfala chus for no biliv lo God. Olketa narawan bilivim God bat tingse religion fitim olketa lo bifor nomoa and hem no mek sense and no stret witim science. Maet olketa fren, teacher, or pipol wea story lo nius sei laef start from evolution, and maet no eniwan talem olketa eni gud reason why olketa shud biliv lo God. Nara reason why pipol les, hem bikos olketa bigman blo religion greedy for selen and paoa. And lo samfala kantri, gavman stopem tu religion for duim samfala samting.

3. Wanem nao goal blo disfala study?

³ Jesus expectim iumi for “teachim pipol long evri kantri for kamap disaepol.” (Matt. 28:19) Hao nao iumi savve helpem pipol wea no interest lo religion for lane for lovem God and kamap disaepol blo Christ? Iumi mas luksavve hao pipol ting lo message blo iumi, hem maet depend lo wea olketa kam from.  Olsem example, tingting blo pipol from Europe hem difren from olketa lo Asia. Why? Lo Europe, pipol savve lelebet abaotem Bible and hao God creatim evri samting. Bat lo Asia, big haf lo pipol no savve eni samting abaotem Bible or maet olketa savve lelebet nomoa, and maet olketa no bilivim eni Creator stap. Goal blo disfala study, hem for helpem iumi kasem heart blo evriwan wea iumi meetim lo ministry, nomata wea nao olketa kam from.

4. Why nao iumi mas garem positive tingting?

⁴ Garem Positive Tingting. Evri year, staka pipol wea no interest lo religion olketa kamap Jehovah’s Witness. Bifor olketa kamap Witness, samfala lo olketa garem finis olketa gudfala wei bat olketa no laekem wei wea olketa religion savve laea tumas. Olketa narawan, no garem gudfala wei and olketa mas lusim olketa rabis wei blo olketa. Iumi barava sure Jehovah bae helpem iumi for faendem “evriwan wea showimaot olketa laekem laef olowe.”—Acts 13:48; 1 Tim. 2:3, 4.

5. Staka taem, wanem nao savve mekem pipol acceptim message blo iumi?

⁵ Mas Kaen and Garem Wei for Luksavve. Staka taem, pipol acceptim message blo iumi no bikos lo wanem iumi talem bat bikos lo hao iumi talem. Olketa hapi sapos iumi kaen, garem wei for luksavve, and showimaot iumi really interest lo olketa. Iumi no forcem olketa for herem tingting blo iumi. Bat, iumi mas trae for minim tingting blo olketa abaotem religion. Olsem example, samfala no laek for story abaotem religion witim samwan wea olketa no savve lo hem. Olketa narawan tingse wei for askem tingting blo olketa abaotem God hem no showimaot respect. And tu, samfala maet feel shame taem pipol lukim olketa readim Bible, especially witim olketa Jehovah’s Witness. Nomata wanem, iumi mas trae for minim feeling blo olketa.—2 Tim. 2:24.

6. Hao nao Paul change for fitim difren kaen pipol, and hao nao iumi savve followim example blo hem?

⁶ Taem iumi luksavve samwan no mas feel gud sapos iumi iusim olketa toktok olsem “Bible,” “creation,” “God,” or “religion,” wanem nao iumi savve duim? Iumi savve followim example blo Paul and changem hao iumi story. Taem Paul story lo olketa Jew, hem iusim olketa Scripture. Bat, taem hem story witim olketa Greek lo Areopagus, hem no sei toktok wea hem talem hem kam from Bible. (Acts 17:2, 3, 22-31) Hao nao iumi savve followim example blo Paul? Sapos iumi meetim man wea no acceptim Bible, maet hem gud for no talem hem hao story blo iumi hem kam from Bible. Sapos iu luksavve samwan no feel gud for iu readim Bible witim hem lo ples wea pipol savve lukim hem, trae showim hem olketa scripture lo wei wea olketa narawan bae no luksavve wanem nao iutufala duim. Wanfala wei hem for iusim mobile or tablet blo iu.

7. Olsem 1 Corinth 9:20-23 storyim, wanem nao iumi savve duim for followim example blo Paul?

⁷ Mas Lisin and Trae for Minim. Taem iumi meetim pipol, trae for luksavve hao nao laef blo pipol hem affectim hao olketa ting lo olketa samting. (Provebs 20:5) Tingim moa example blo Paul. Hem growap witim olketa Jew. So for sure hem mas changem hao hem preach taem hem story lo olketa Gentile bikos olketa maet savve lelebet nomoa or olketa no savve eni samting abaotem Jehovah and olketa Scripture. For helpem iumi minim gud tingting and feeling blo pipol lo territory blo iumi, maet iumi need for duim samfala research or askem samfala lo kongregeson wea garem experience.—Readim 1 Corinth 9:20-23.

8. Wanem nao wanfala wei for startim story abaotem Bible?

 ⁸ Goal blo iumi hem for ‘lukaotem olketa man wea fit.’ (Matt. 10:11) For duim datwan, iumi mas askem pipol for talem tingting blo olketa and then lisin gud. Wanfala brata lo England savve askem pipol abaotem hao man savve hapi lo marit, hao for teachim pikinini, or hao for deal witim wei wea pipol no followim justice. Bihaen hem herem wanem olketa talem, hem savve sei: “Hao nao tingting blo iu lo disfala advaes wea olketa raetem winim 2,000 year go finis?” Then hem no talem disfala word “Bible,” bat hem showim olketa scripture wea hem redyim finis insaed phone blo hem.

9. Hao nao maet iumi savve helpem pipol wea no savve interest for story abaotem God?

⁹ Iumi savve kasem heart blo pipol wea no interest for story abaotem God taem iumi story abaotem samting wea olketa interest lo hem. Olsem example, staka pipol interest lo nature. So maet iumi savve sei: “Maet iu savve hao olketa scientist copyim design blo staka samting wea stap lo nature. Olsem example, olketa studyim ear and then olketa designim microphone, and olketa studyim eye then olketa designim camera. So lo tingting blo iu wanem nao nature? Waswe, iu ting hem wanfala spesol paoa, hem wanfala man, or hem eni nara samting?” Bihaen iumi herem wanem hem talem, iumi savve sei: “Olsem iumi lukim, olketa engineer lane from olketa design blo ear and eye, bat maet datwan mekem iumi ting, really hu nao olketa lane from? Mi interest lo samting wea wanfala poem wea olketa raetem bifor hem sei: ‘Man wea wakem ear, waswe hem no savve herehere? Man wea wakem eye, waswe hem no savve lukluk? . . . Hem nao Man wea givim savve lo pipol!’ Diswan hem samting wea samfala scientist bilivim tu.” (Ps. 94:9, 10, NW) Then iumi savve showim hem video from jw.org^® wea stap lo “Interviews and Experiences” lo sekson wea storyim “Viewpoints on the Origin of Life.” (Go lo PUBLICATIONS > VIDEOS.) Or iumi savve givim olketa datfala brochure Was Life Created? or nara brochure The Origin of Life—Five Questions Worth Asking.

10. Hao nao iumi savve startim story witim samwan wea no interest for story abaotem God?

¹⁰ Staka pipol laek garem hapi future. Bat, staka tingse earth bae distroe or no fitim for pipol stap lo hem. Wanfala traveling overseer lo Norway sei staka taem pipol wea no  interest for story abaotem God, olketa willing for story abaotem wanem hem happen lo world distaem. Bihaen hem hello, hem savve sei: “Hao nao tingting blo iu abaotem future blo iumi? Hu nao iu tingse hem fit for helpem iumi, waswe hem olketa politician, scientist, or eniwan moa?” Bihaen hem lisin lo hem, hem readim or storyim eni scripture abaotem hao for garem gud future. Samfala pipol interest taem olketa herem promis lo Bible hao disfala earth bae stap for olowe and hao gud pipol bae stap insaed for olowe.—Sams 37:29; Eklesiastes 1:4.

11. Why nao iumi shud traem olketa difren wei for startim story, and hao nao iumi savve followim example blo Paul, wea stap lo Rome 1:14-16?

¹¹ Hem gud for garem tu-thri difren wei for startim story witim pipol wea iumi meetim. Why? Bikos evri man no semsem. Story wea wanfala man laek herem maet narawan bae les lo hem. Samfala maet hapi for story abaotem God or Bible, bat maet olketa narawan bae interest sapos iumi storyim difren samting firstaem. Bat nomata wanem, iumi shud iusim evri chance wea iumi garem for story lo evri difren kaen pipol. (Readim Rome 1:14-16.) Bat samting wea iumi mas gohed tingim, hem hao Jehovah nao man wea bae mekem datfala truth for grow insaed heart blo olketa wea lovem samting wea stret.—1 Cor. 3:6, 7.

12. Hao nao iumi savve story witim pipol from olketa Asian kantri wea no ting raonem sapos Creator hem stap?

¹² Evriwea lo world, staka pablisa meetim pipol from olketa Asian kantri, samfala kam from kantri wea gavman stopem olketa religion for duim samfala samting. Lo staka kantri lo Asia, staka pipol no really ting raonem sapos Creator hem stap or nomoa. Samfala interest for lanem olketa niu samting so olketa acceptim Bible study, bat olketa narawan savve hol bak. So hao nao bae iumi kasem olketa? Samfala pablisa wea savve gud hao for duim ministry savve startim story lo wei for story difren firstaem, showimaot interest lo pipol, and then sapos hem fitim, pablisa savve storyim hao taem hem followim wanfala Bible principle, datwan helpem hem for garem gud laef.

13. Wanem nao savve helpem pipol for interest for lanem Bible? (Lukim piksa lo kava.)

¹³ Samting wea mekem staka pipol interest, hem taem olketa lukim hao wisdom insaed Bible savve helpem olketa. (Eklesiastes 7:12) Lo New York, wanfala sista wea savve visitim pipol wea story lo Mandarin languis, hem sei: “Mi interest lo pipol and lisin lo olketa. Sapos mi savve samwan just muv kam, mi savve ask: ‘Hao nao iu faendem laef lo hia? Waswe, iu faendem waka nao? Waswe, pipol lo hia treatim iu gud?’” Samfala taem diswan savve openem wei for storyim wanfala Bible teaching. Then sapos hem fitim, hem savve sei: “Iu ting wanem nao savve helpem iumi for stap gud witim pipol? Mi laek showim iu disfala proverb lo Bible wea sei: ‘Wei for startim raoa hem olsem taem man openem ples wea wata fulap lo hem and then wata bosta kamaot; so bifor raoa hem start iu go nao.’ Waswe, iu ting disfala advaes savve helpem iumi for deal witim narawan?” (Prov. 17:14, NW) Wei for story olsem, savve helpem iumi for luksavve sapos man laek lanem moa samting.

14. Hao nao wanfala brata lo wanfala kantri lo Far East helpem pipol wea sei olketa no biliv lo God?

¹⁴ Waswe lo olketa wea sei olketa no biliv lo God? Lo wanfala kantri lo Far East, wanfala brata wea savve preach lo pipol wea no interest lo religion, sei: “Staka taem, sapos pipol lo hia sei, ‘Mi no biliv lo God,’ really olketa  minim olketa no bilivim olketa kastom god blo olketa. So mi savve sei, hem tru, staka lo olketa god hia man nomoa wakem bat olketa hia no really god. Mi readim Jeremiah 16:20, NW, wea sei: ‘Waswe, man savve wakem olketa god for hemseleva nomata olketa hia no really god?’ Then mi ask: ‘Hao nao bae iumi luksavve lo wanfala really god and god wea man nomoa wakem?’ Mi lisin gud lo hem, then mi readim Isaiah 41:23, NW, wea sei: ‘Talem mi wanem nao bae happen lo future mekem mifala luksavve iufala olketa god.’ Then mi showim example lo hao Jehovah talem samting wea kamap lo future.”

15. Wanem nao iumi savve lanem from example blo wanfala brata lo East Asia?

¹⁵ Wanfala brata lo East Asia iusim disfala idea taem hem duim return visit. Hem sei: “Mi savve showim samfala example blo wisdom lo Bible, olketa Bible profesi wea fulfill, and olketa law wea kontrolem universe. Then mi showim hao evri samting hia pruvim wanfala wise Creator hem stap. Taem samwan start for bilivim hao wanfala God maet stap, then mi showim hem wanem Bible talem abaotem Jehovah.”

16. Olsem Hebrew 11:6 storyim, why nao olketa Bible study need for garem faith lo God and Bible, and hao nao iumi savve helpem olketa for garem datwan?

¹⁶ Taem iumi duim Bible study witim olketa wea no bin joinim eni religion, iumi mas evritaem helpem olketa for bilivim hao God hem stap. (Readim Hebrew 11:6.) And iumi need for strongim faith blo olketa lo Bible. Diswan minim iumi maet need for repeatim samfala point staka taem. Each taem iumi duim study, iumi need for pruvim hao Bible hem Word blo God. Diswan maet minim iumi need for iusim lelebet taem for storyim olketa Bible profesi wea fulfill, hao Bible agree witim science and history, or hao Bible savve helpem iumi.

17. Hao nao love wea iu garem for pipol savve affectim olketa?

¹⁷ Iumi helpem pipol for kamap disaepol blo Christ taem iumi showimaot love lo olketa, nomata olketa garem religion or nomoa. (1 Cor. 13:1) Taem iumi teachim olketa, main goal hem for showim lo olketa hao God lovem iumi and laekem iumi tu for lovem hem. Evri year staka thousand pipol wea interest lelebet nomoa or no interest lo religion, olketa baptaes bikos olketa lane for lovem God. So iumi mas garem positive tingting and showimaot iumi interest lo evri difren kaen pipol. Lisin taem olketa story. Trae for minim olketa. And thru lo gudfala example blo iu, teachim olketa for kamap disaepol blo Christ.