1. Olsem 3 John 3, 4 storyim, wanem nao savve mekem iumi for hapi?

MASBI aposol John barava hapi tumas taem hem herem dat olketa wea hem bin helpem for savve lo truth, olketa gohed faithful for servem Jehovah. Olketa feisim staka problem, and John waka hard for strongim faith blo olketa faithful Christian hia wea hem ting lo olketa olsem pikinini blo hem. Iumi tu savve hapi tumas taem wanfala pikinini blo iumi or wanfala spiritual pikinini blo iumi, hem dedicatem hemseleva lo Jehovah and gohed for servem hem.—Readim 3 John 3, 4.

2. Wat nao goal blo thrifala leta wea John raetem?

² Lo 98 C.E., luk olsem John stap lo Ephesus or maet klosap lo Ephesus. Maet hem muv lo there bihaen hem release from prison lo island blo Patmos. Lo datfala taem, Holy spirit blo Jehovah muvim hem for raetem thrifala leta. Goal blo olketa leta hia hem for encouragem olketa faithful Christian for gohed strongim faith blo olketa lo Jesus and for gohed wakabaot followim wei blo truth.

3. Olketa wanem kwestin nao bae iumi ansarem?

³ Evri aposol dae finis and John nomoa hem last wan, and hem wari tumas abaotem hao olketa false teacher affectim kongregeson. * (1 John 2:18, 19, 26) Olketa apostate hia sei olketa savve lo God, bat olketa nating obeyim Jehovah. Bae iumi story raonem kaonsel wea John givim. Taem iumi story raonem, bae iumi ansarem thrifala kwestin: Wanem nao hem minim for wakabaot followim wei blo truth? Wat nao samfala challenge wea iumi feisim? And hao nao iumi savve helpem each other for iumi gohed followim wei blo truth?

4. Olsem 1 John 2:3-6 and 2 John 4, 6 storyim, wanem nao hem minim for wakabaot followim wei blo truth?

⁴ For wakabaot followim wei blo truth, iumi need for savve lo truth wea stap insaed lo Word blo God, Bible. And tu, iumi mas barava “obeyim olketa law” blo Jehovah. (Readim 1 John 2:3-6; 2 John 4, 6.) Jesus showim perfect example lo wei for obeyim Jehovah. So wanfala important wei for iumi obeyim Jehovah hem for barava followim example blo Jesus.—John 8:29; 1 Pet. 2:21.

5. Wanem nao iumi mas barava bilivim?

⁵ For gohed wakabaot followim wei blo truth, iumi mas barava bilivim dat Jehovah hem God blo truth, and evri samting wea hem talem insaed lo Word blo hem Bible hem tru. And iumi mas barava bilivim tu dat Jesus hem nao Messiah wea God promisim. Staka distaem daotem dat Jesus nao anointed King blo Kingdom blo God. John talem hao “staka man for laea stap,” wea savve laea lo olketa wea no redi for defendim truth abaotem Jehovah and Jesus. (2 John 7-11) John raet olsem: “Man wea sei Jesus hem no Christ hem laea.” (1 John 2:22) For no eniwan laea lo iumi, only samting for iumi duim, hem for studyim Bible. Datwan nomoa bae helpem iumi for savve lo Jehovah and Jesus. (John 17:3) And datwan nomoa bae helpem iumi for barava bilivim dat wanem iumi lanem hem nao truth.

6. Wanem nao wanfala challenge wea olketa young Witness feisim?

⁶ Evri Witness blo Jehovah mas careful for no letem olketa teaching and idea blo man for laea lo olketa. (1 John 2:26) Olketa young Witness nao mas barava careful lo disfala trap. Alexia, * wanfala sista blo France wea 25 years old, hem sei: “Taem mi young, mi savve tingting tumas abaotem olketa teaching blo world, olsem teaching blo evolution and olketa idea blo olketa man. Samfala taem, olketa idea and teaching blo olketa hem here gud lo mi. Bat mi feel dat hem no stret for mi just lisin lo wanem olketa teachim mi lo skul and no givim chance lo Jehovah for storyim saed blo hem.” Alexia disaed for studyim buk Life—How Did It Get Here? By Evolution or by Creation? Insaed tu-thri week nomoa, evri daot blo hem lus nao. Alexia sei: “Mi pruvim lo miseleva hao Bible nao hem tru.  And mi luksavve dat wei for followim olketa standard blo hem, bae mekem mi hapi and garem peace.”

7. Wanem kaen pressure nao iumi mas againstim, and why nao olsem?

⁷ Evri Witness, nomata olketa young or old, mas no letem pressure from world for mekem olketa garem dabol laef. John talem hao iumi hard for wakabaot lo truth and lo semtaem duim samting wea no stret. (1 John 1:6) Sapos iumi laekem God for hapi lo iumi distaem and lo future, iumi need for tingim hao evri samting wea iumi duim hem no haed. Jehovah savve lukim evri samting wea iumi duim, so no eni sin hem haed.—Heb. 4:13.

8. Wanem nao iumi mas rejectim?

⁸ Iumi mas rejectim hao pipol lo world ting lo sin. Aposol John raet olsem: “Sapos iumi sei: ‘Iumi no garem sin,’ iumi laea long iumiseleva.” (1 John 1:8) Lo taem blo John, staka apostate sei man savve chus for duim sin and hem savve gohed fren witim God. Distaem tu, staka pipol garem sem tingting olsem. Staka sei olketa biliv lo God, bat olketa no agree witim tingting blo Jehovah abaotem sin, especially saed lo sex. Lo tingting blo pipol, wei for homosexual or olketa narafala wei for duim sex wea Jehovah ting lo hem olsem wanfala sin, olketa sei hem laef blo man wanwan or hem samting wea man seleva nao bae disaedem.

9. Hao nao olketa young wan kasem gud samting taem olketa strong for followim wanem olketa bilivim lo Bible?

⁹ Especially olketa young Witness savve kasem pressure from olketa classmate or waka mate for garem sem tingting olsem olketa abaotem olketa samting wea no stret. Hem nao samting wea happen lo Aleksandar. Hem sei: “Samfala gele lo skul trae for putim pressure lo mi for duim sex witim olketa. Olketa sei from mi no garem gelfren, masbi mi wanfala homosexual.” Sapos iu feisim semkaen  test, tingim hao taem iu gohed for followim wanem iu bilivim lo Bible, iu bae protectim health blo iu, wei wea iu respectim iuseleva, feeling blo iu, and wei wea iu fren witim Jehovah. And each taem wea iu winim olketa test hia, hem bae moa isi for iu duim samting wea stret. Tingim tu, hao tingting blo disfala world abaotem sex hem kam from Satan. So taem iu strong for againstim wanem disfala world tingim, iu winim Satan.—1 John 2:14.

10. Hao nao 1 John 1:9 helpem iumi for servem Jehovah witim klin konsens?

¹⁰ Iumi luksavve dat Jehovah nao garem raet for talem sapos wanem man duim hem wanfala sin. And iumi duim best blo iumi for no duim eni sin. Bat taem iumi sin, iumi storyim lo Jehovah thru lo prea. (Readim 1 John 1:9.) And sapos iumi duim wanfala serious sin, iumi savve askem help blo olketa elder wea Jehovah appointim for lukaftarem iumi. (Jas. 5:14-16) Bat iumi shud no letem feeling for guilty for winim iumi. Why nao olsem? Bikos Dadi blo iumi wea barava lovem iumi hem provaedem ransom sakrifaes blo Son blo hem for mekem wei for iumi kasem forgiveness for olketa sin blo iumi. Taem Jehovah sei hem bae forgivim olketa wea repent, hem minim hem forgivim olketa nao. So no eni samting shud stopem iumi for gohed servem Jehovah witim klin konsens.—1 John 2:1, 2, 12; 3:19, 20.

11. Hao nao iumi savve protectim mind blo iumi from teaching wea savve spoelem faith blo iumi?

¹¹ Iumi mas rejectim olketa teaching blo olketa apostate. From taem wea Christian kongregeson start, Devil hem iusim pipol for mekem olketa faithful servant blo God for daot. Bikos lo datwan, hem important for iumi luksavve lo wanem hem tru and wanem hem no tru. * Olketa enemy blo iumi savve  iusim Internet or social media for trae for mekem iumi no trustim Jehovah and for no lovem olketa brata and sista blo iumi. Bat remember, hu nao bihaenem olketa laea olsem, and then iumi mas rejectim olketa laea hia!—1 John 4:1, 6; Rev. 12:9.

12. Why nao iumi need for strongim wei wea iumi tinghae lo olketa truth wea iumi lanem finis?

¹² For helpem iumi strong for againstim olketa attak blo Satan, iumi need for strongim wei wea iumi trustim Jesus and garem faith lo wei wea Jehovah iusim hem for duim waka blo hem. And tu, iumi need for trustim nomoa pipol wea Jehovah iusim for leadim iumi distaem. (Matt. 24:45-47) Iumi savve mekem trust blo iumi hem kamap strong taem iumi evritaem studyim Word blo God. Then faith blo iumi bae olsem wanfala tree wea garem rut wea go deep insaed lo graon. Paul tu iusim sem example for strongim point blo hem taem hem raet for olketa lo Colossae kongregeson. Hem sei: “From iufala biliv finis long Lord bilong iumi Christ Jesus, gohed for wan mind witim hem. Olsem iufala lanem finis, faith wea iufala garem long Christ mas mekem iufala strong olsem wanfala tree wea rut bilong hem stap deep insaed long graon.” (Col. 2:6, 7) Sapos wanfala Christian hem strongim faith blo hemseleva bae hard for Satan or olketa narawan wea followim hem for duim eni samting wea bae mekem hem wikdaon.—2 John 8, 9.

13. Wanem nao iumi expectim, and why nao olsem?

¹³ Iumi expectim hao disfala world bae heitim iumi. (1 John 3:13) John remindim iumi hao “full world hem stap long paoa bilong Satan.” (1 John 5:19) Taem iumi gogo for end blo disfala world, Satan hem barava kros fogud. (Rev. 12:12) Hem attakim iumi thru lo wei for iusim olketa samting olsem wei for durong or olketa laea blo olketa apostate. Bat nara wei wea hem attakim iumi hem thru lo persecution. Satan savve short taem nomoa stap for hem trae stopem preaching waka blo iumi or for spoelem faith blo iumi. So iumi no sapraes taem iumi lukim olketa kantri restrictim or banim waka blo iumi. Nomata olsem, olketa brata and sista blo iumi lo olketa kantri olsem olketa gohed and no givap. Olketa gohed for pruvim hao nomata wanem Satan duim lo iumi, iumi savve win!

14. Wanem nao wanfala wei wea iumi savve helpem olketa brata and sista blo iumi for gohed followim wei blo truth?

¹⁴ For helpem olketa brata and sista blo iumi for gohed followim wei blo truth, iumi need for kaen lo each other. (1 John 3:10, 11, 16-18) Iumi need for showimaot love no just lo gud taem nomoa bat taem problem kamap tu. Olsem example, waswe, iu savve lo samwan wea lusim samwan wea olketa lovem lo dae and wea needim iu for comfortim olketa or helpem olketa lo narafala wei? Or waswe, iu herem wanfala brata or sista wea natural disaster kasem olketa and olketa needim help blo iu for buildim bak moa haos or Kingdom Hall blo olketa? Iumi showimaot iumi kaen and barava lovem olketa brata and sista blo iumi, no lo wanem iumi talem nomoa bat lo wanem iumi duim for helpem olketa.

15. Olsem 1 John 4:7, 8 storyim, wanem nao iumi need for duim?

¹⁵ Iumi followim example blo Dadi blo iumi wea lovem iumi taem iumi showimaot love lo each other. (Readim 1 John 4:7, 8.) Wanfala important wei for iumi showimaot love hem for forgivim narawan. Olsem example, maet samwan mekem iumi feel nogud bat then hem sei sorre. Iumi showimaot love taem  iumi forgivim hem and forgetim wanem hem duim. (Col. 3:13) Wanfala brata wea nem blo hem Aldo feisim kaen situation olsem taem hem herem wanfala brata wea hem respectim, hem talem samting wea mekem hem feel nogud. Aldo sei: “Mi prea staka taem for Jehovah helpem mi for no garem negative tingting abaotem brata blo mi.” Bat Aldo duim nara samting tu. Hem disaed for askem datfala brata for tufala waka tugeta lo ministry. Taem tufala waka tugeta, Aldo explainim feel nogud blo hem. Aldo sei: “Taem brata hia herem hao mi feel nogud lo toktok wea hem talem, hem sei sorre. From voice blo hem, mi heresavve hem regret lo wanem hem talem. From datwan mitufala kamap fren moa and mitufala forgetim go nao evri samting.”

16-17. Wanem nao iumi shud disaed strong for duim?

¹⁶ Aposol John barava lovem and wari abaotem olketa brata and sista blo hem, especially spiritual saed blo olketa, and diswan showaot lo thrifala leta wea hem raetem. Iumi barava hapi tumas for savve olketa man and woman wea bae rul witim Christ olketa tu olsem John!—1 John 2:27.

¹⁷ Hem gud for iumi followim information wea iumi bin story raonem. Iumi laek gohed strong for followim wei blo truth, for obeyim Jehovah lo evri samting lo laef. Gohed studyim Bible and barava trustim. Strongim faith blo iumi lo Jesus. Rejectim olketa idea blo olketa man and olketa teaching blo olketa apostate. Againstim pressure wea bae mekem iumi for garem dabol laef and for duim sin. Followim olketa haefala standard blo Jehovah saed lo wanem hem stret. And iumi gohed for strongim olketa brata and sista taem iumi forgivim olketa wea mekem iumi feel nogud and helpem olketa wea garem need. Then, nomata wanem iumi feisim, bae iumi gohed strong for wakabaot followim wei blo truth.