1. Wat nao iumi minim taem iumi iusim datfala toktok “truth”?

“HAO nao iu kasem truth?” “Waswe, iu growap lo truth?” “Hao long nao iu stap lo truth?” Maet samfala askem iu diskaen kwestin bifor, or maet iu nao askem kwestin olsem lo olketa. Taem iumi iusim datfala toktok “truth,” wanem nao iumi minim? Staka taem iumi iusim datwan for minim, wanem iumi bilivim, hao iumi worship, and laef blo iumi olsem wanfala Christian. Pipol wea insaed “lo truth” savve lo wanem Bible teachim, and olketa followim Bible principle. From datwan, olketa kamap free from olketa false teaching blo religion and olketa gohed hapi nomata olketa stap insaed world blo Satan.—John 8:32.

2. Olsem John 13:34, 35 storyim, wanem nao first samting wea maet mekem samwan laekem truth?

² Wanem nao mekem iu laek for kam lo truth? Maet hem gudfala wei blo pipol blo Jehovah. (1 Pet. 2:12) Or maet hem love wea olketa showimaot. Staka lukim datwan lo first meeting wea olketa attendim, and datfala love muvim olketa winim wanem olketa herem lo datfala meeting, hem samting wea olketa no savve forgetim. Iumi no sapraes lo datwan bikos Jesus talem finis hao pipol bae luksavve lo olketa disaepol blo hem from love wea olketa garem for each other. (Readim John 13:34, 35.) Bat for mekem faith blo iumi strong, iumi needim moa samting winim datwan.

3. Wanem nao savve happen sapos faith blo iumi lo God hem depend nomoa lo love wea olketa brata and sista showimaot?

³ Faith blo iumi no just depend lo love wea Jesus sei pipol blo God bae garem. Why nao olsem? Waswe sapos nara brata or sista, maet wanfala elder or pioneer, hem duim serious sin? Or waswe sapos wanfala brata or sista duim samting wea mekem iu feel nogud? Or maet samwan kamap apostate and sei wanem iumi bilivim hem no tru. Sapos samting olsem happen, waswe,  bae iu stambol and stop for worshipim Jehovah nao? Point nao hem olsem: Sapos faith blo iu lo God hem depend nomoa lo wanem olketa narawan duim, and hem no bikos iu fren gud witim God, bae faith blo iu hem no strong. Faith blo iu hem olsem wanfala haos, iu shud no wakem nomoa lo olketa material wea no strong, olsem olketa feeling and tingting blo iu nomoa, bat iu need for wakem lo olketa strong material olsem olketa tru teaching and gudfala tingting. Iu need for pruvim lo iuseleva hao Bible teachim iumi truth abaotem Jehovah.—Rome 12:2.

4. Olsem Matthew 13:3-6, 20, 21 storyim, wanem nao samfala duim taem faith blo olketa kasem test?

⁴ Jesus sei samfala bae “hapi for kasem” truth, bat faith blo olketa bae wikdaon taem olketa kasem test. (Readim Matthew 13:3-6, 20, 21.) Maet olketa no luksavve hao taem olketa followim Jesus, bae olketa kasem tu olketa challenge and hard taem. (Matt. 16:24) Or maet olketa tingse taem olketa kamap wanfala Christian, laef blo olketa bae no garem eni problem, bae olketa kasem olketa blessing nomoa. Bat lo disfala world wea no perfect, iumi bae kasem olketa challenge tu. Laef savve change and datwan savve mekem iumi for lusim hapi blo iumi.—Sams 6:6; Eklesiastes 9:11.

5. Hao nao staka brata and sista blo iumi gohed for showimaot olketa barava sure dat wanem olketa bilivim hem nao truth?

⁵ Staka lo olketa brata and sista blo iumi showimaot olketa barava sure dat wanem olketa bilivim hem nao truth. Why nao iumi sei olsem? Bikos faith blo olketa no savve wikdaon nomata taem wanfala brata or sista mekem olketa feel nogud or duim samting wea no followim wei blo wanfala Christian. (Sams 119:165) Each taem wea olketa kasem test, faith blo olketa hem kamap moa strong. (Jas. 1:2-4) Hao nao iu savve mekem grow diskaen strong faith?

6. Faith blo olketa disaepol lo first century hem depend lo wanem samting?

⁶ Olketa disaepol lo first century buildim faith blo olketa lo samting wea Bible teachim and lo olketa samting wea Jesus teachim, wea hem nao truth wea iumi “kasem from datfala gud nius.” (Gal. 2:5) Disfala truth hem nao evri samting iumi lanem olsem wanfala Christian, wea insaed diswan, hem ransom sakrifaes blo Jesus and resurrection blo hem. Aposol Paul hem barava sure dat olketa teaching hia hem tru. Why nao olsem? Bikos hem iusim olketa Scripture “for pruvim Christ hem mas safa and laef bak moa.” (Acts 17:2, 3) Olketa disaepol lo first century acceptim olketa teaching hia and olketa depend lo holy spirit blo God for helpem olketa for minim gud Bible. Olketa seleva duim research for pruvim hao olketa teaching hia kam for Word blo God. (Acts 17:11, 12; Heb. 5:14) Faith blo olketa hem no depend lo tingting and feeling blo olketa nomoa, and olketa no just servem Jehovah bikos olketa feel hapi taem olketa associate witim olketa brata and sista. Bat, faith blo olketa hem strong bikos lo stretfala savve wea olketa kasem abaotem God.—Col. 1:9, 10.

7. Hao nao faith blo iumi lo olketa truth lo Bible savve helpem iumi?

⁷ Olketa truth wea stap lo Bible hem no savve change. (Sams 119:160) Olsem example, nomata sapos wanfala brata or sista mekem iumi feel nogud or duim wanfala serious sin, datwan no changem olketa truth insaed Bible. And olketa truth hia no savve change tu nomata taem iumi kasem olketa hard taem. So datwan minim iumi need for barava savve gud lo wanem Bible teachim and mas barava bilivim dat hem tru. Olsem hao wanfala anka savve helpem wanfala boat for gohed stedy lo taem blo big  wind, taem iumi buildim strong faith lo olketa tru teaching lo Bible bae iumi savve gohed stedy nomata taem iumi kasem olketa test. Hao nao iu savve strongim wei wea iu bilivim dat wanem iu lanem hem nao truth?

8. Olsem 2 Timothy 3:14, 15 showimaot, wanem nao mekem Timothy barava sure dat wanem hem bilivim hem nao truth?

⁸ Timothy barava sure dat wanem hem bilivim hem truth. Wanem nao mekem hem for barava sure lo datwan? (Readim 2 Timothy 3:14, 15.) Mami and granmami blo hem teachim hem olketa “Holy Raeting.” Bat iu sure hemseleva tu spendem staka taem and strong for studyim olketa raeting hia. Datwan barava helpem hem for bilivim hao olketa raeting hia hem tru. Bihaen datwan, Timothy, mami, and granmami blo hem, olketa kamap Christian. For sure, Timothy barava tinghae lo love wea olketa disaepol blo Jesus showimaot, and hem barava laek for associate witim olketa brata and sista and for lukaftarem olketa. (Phil. 2:19, 20) Nomata olsem, faith blo hem no depend lo feeling blo hem for olketa narawan, bat hem depend lo olketa tru information wea helpem hem for kam klos lo Jehovah. Iu tu mas studyim Bible and pruvim lo iuseleva dat wanem Bible teachim abaotem Jehovah hem tru.

9. Wanem nao thrifala main truth wea iu need for pruvim lo iuseleva?

⁹ First samting iu need for duim hem for pruvim lo iuseleva thrifala main truth. First, iu need for sure dat Jehovah God hem nao creatim evri samting. (Ex. 3:14, 15, NW; Heb. 3:4; Rev. 4:11) Mek-tu, iu mas pruvim lo iuseleva dat Bible hem toktok blo God for iumi olketa man. (2 Tim. 3:16, 17) And mek-thri, iu need for barava sure dat Jehovah garem pipol blo hem wea organize and worshipim hem anda lo direction blo Jesus Christ, and hao Olketa Jehovah’s Witness nao datfala organization. (Aesaea 43:10-12; John 14:6; Acts 15:14) For pruvim lo iuseleva olketa main truth hia, hem no minim bae iu mas savve lo evri samting abaotem Bible. Goal blo iu hem for iu iusim “gudfala tingting” wea iu garem for pruvim lo  iuseleva dat wanem iu bilivim hem nao truth.—Rome 12:1.

10. Witim wei for savve lo truth, wanem moa iumi need for duim?

¹⁰ Bihaen iu pruvim seleva thrifala main truth abaotem God, Bible, and pipol blo Hem, iu need for iusim olketa Scripture for pruvim olketa truth hia lo narawan. Why nao olsem? Bikos main responsibility blo iumi olketa Christian hem for teachim olketa truth hia lo olketa wea willing for lisin lo iumi. * (1 Tim. 4:16) And taem iumi trae for helpem olketa narawan bilivim olketa truth, datwan strongim wei wea iumiseleva tu bilivim olketa truth hia.

11. Wanem example nao aposol Paul showimaot taem hem teach?

¹¹ Taem aposol Paul teachim pipol, hem “iusim Law bilong Moses and samting wea olketa profet raetem for story gud abaotem Jesus.” (Acts 28:23) Hao nao iumi savve followim example blo Paul taem iumi teachim truth lo olketa narawan? Iumi no just storyim nomoa wanem Bible talem, bat iumi mas helpem olketa Bible student blo iumi for iusim olketa Scripture for pruvim wanem olketa lanem from Bible mekem olketa savve kam klos lo Jehovah. Iumi laekem olketa for acceptim truth, no just bikos olketa respectim iumi, bat bikos olketa pruvim lo olketa seleva dat wanem olketa lanem hem truth abaotem God wea barava lovem iumi.

12-13. Hao nao olketa parents savve helpem pikinini blo olketa gohed strong lo truth?

¹² For sure, iufala parents laekem pikinini blo iufala for stap lo truth. Iu maet feel dat sapos olketa garem gudfala association lo kongregeson, olketa bae gohed gud lo spiritual wei. Bat, for helpem pikinini blo iu for barava sure dat wanem olketa bilivim hem nao truth, olketa need for duim moa samting winim wei for garem olketa gudfala frens. Olketa need for fren gud witim God and for pruvim lo olketa seleva dat wanem Bible teachim hem nao truth.

¹³ Sapos olketa parents laek for teachim truth abaotem God lo olketa pikinini blo olketa, olketa seleva mas showimaot example lo wei for studyim gud Bible. Olketa mas markem taem for ting raonem gud wanem olketa lanem. Sapos olsem, olketa bae fit for teachim pikinini blo olketa for duim sem samting. Lo sem wei wea olketa savve teachim wanfala Bible student, olketa need for teachim pikinini for iusim olketa Bible study tul blo iumi. Taem olsem, olketa bae helpem pikinini blo olketa for tinghae lo Jehovah and for tinghae lo datfala “wakaman wea faithful and wise” wea hem iusim for givim kam spiritual kaikai. (Matt. 24:45-47) Iufala parents, no just teachim nomoa  olketa main truth blo Bible lo pikinini blo iu. Helpem olketa for garem strong faith thru lo wei for teachim olketa abaotem olketa deep spiritual truth, bat duim lo wei wea fitim age and savve blo olketa.—1 Cor. 2:10.

14. Why nao iumi shud studyim olketa Bible profesi? (Lukim tu box “ Waswe, Iu Savve Explainim Olketa Bible Profesi Hia?”)

¹⁴ Olketa Bible profesi hem important part lo toktok blo God wea helpem iumi for garem strong faith lo Jehovah. Olketa wanem Bible profesi nao strongim faith blo iu? Maet iu tingim olketa profesi abaotem “olketa last day.” (2 Tim. 3:1-5; Matt. 24:3, 7) Bat wat nao olketa nara profesi wea fulfill wea savve strongim faith blo iu? Olsem example, waswe, iu savve explainim hao olketa profesi lo Daniel chapter 2 or Daniel chapter 11 hem fulfill finis and hao hem gohed fulfill distaem? * Taem faith blo iu hem garem strong faondeson lo Bible, bae hem no savve seksek. Tingim example blo olketa brata blo iumi wea safa from bigfala persecution lo Germany lo World War II. Nomata olketa no barava minim gud olketa Bible profesi abaotem olketa last day, olketa garem strong faith lo Word blo God.

15-17. Hao nao wei for studyim Bible helpem olketa brata and sista taem olketa feisim persecution from olketa Nazi?

¹⁵ Taem Nazi hem rulim Germany, olketa sendem staka thousand brata and sista blo iumi lo olketa concentration camp. Hitler and SS Chief Heinrich Himmler heitim olketa Jehovah’s Witness. Wanfala sista storyim hao Himmler hem tok olsem lo wanfala grup blo olketa sista blo iumi lo wanfala concentration camp, hem sei: “Maet Jehovah blo iufala hem rul lo heven, bat hia lo earth mifala nao rulim! Bae mifala showim iufala hu nao strong, iufala or mifala!” Wanem nao helpem pipol blo Jehovah for gohed faithful?

¹⁶ Olketa Bible Student hia savve Kingdom blo God hem start for rul lo 1914. Olketa no sapraes lo bigfala persecution wea olketa feisim.  Nomata olsem, pipol blo Jehovah barava bilivim dat no eni gavman blo man savve stopem plan blo Jehovah for fulfill. Hard tumas for Hitler finisim tru worship or setim ap wanfala gavman wea winim Kingdom blo God. Olketa brata and sista blo iumi barava bilivim dat gogo rul blo Hitler bae finis.

¹⁷ Samting wea olketa brata and sista blo iumi bilivim lo datfala taem hem kamap tru. Datfala rul blo Nazi hem finis, and Heinrich Himmler, datfala man wea sei “hia lo earth mifala nao rulim,” hem mas ran for laef blo hem. Taem hem ranawe, hem meetim Brata Lübke, wea hem prisoner bifor and Himmler luksavve dat hem wanfala lo olketa Bible Student. Himmler luksavve dat hem barava fail nao, and hem ask olsem lo Brata Lübke: “So, Bible Student, bae hao nao ia?” Brata Lübke, explainim lo Himmler hao Olketa Jehovah’s Witness savve finis dat rul blo Nazi bae finis and olketa Witness bae kamap free. Himmler, wea bin toktok tumas againstim olketa Jehovah’s Witness, hem kwaet nao. Gogo bihaen, hem suisaed. Wat nao point? Taem iumi studyim Bible, and olketa Bible profesi, datwan bae mekem faith blo iumi lo God hem kamap strong and mekem iumi stand strong taem iumi feisim olketa test.—2 Pet. 1:19-21.

18. Olsem iumi lukim lo John 6:67, 68, why nao iumi need for garem “stretfala savve and gudfala tingting” wea Paul storyim?

¹⁸ Each wan lo iumi shud showimaot love, wea hem nao mark blo olketa tru Christian. Bat iumi need for garem tu “stretfala savve and gudfala tingting.” (Phil. 1:9) Sapos nomoa, “enikaen teaching bilong pipol wea laea and trikim narawan” bae isi tumas for affectim iumi, insaed diswan hem laea teaching blo apostate. (Eph. 4:14) Lo first century C.E., staka lo olketa disaepol blo Jesus stop for followim hem, bat aposol Peter talem hao hem barava bilivim dat ‘toktok blo Jesus nomoa savve mekem man laef olowe.’ (Readim John 6:67, 68.) Nomata lo datfala taem Peter no minim gud staka samting wea Jesus storyim, hem gohed faithful bikos hem luksavve lo truth abaotem Christ. Iu tu savve strongim wei wea iu barava bilivim wanem Bible teachim. Sapos iu duim datwan, bae faith blo iu strong nomata wanem nao bae happen, and tu bae hem helpem iu for strongim wei wea iu trustim olketa narawan.—2 John 1, 2.