Pruv showimaot Jesus kamap Hae Priest taem hem baptaes lo 29 C.E. Wat nao datfala pruv? Taem Jesus baptaes, hem sakrifaesim hemseleva antap lo altar blo God. Datwan minim hem givim hemseleva for duim wanem God “laekem.” (Gal. 1:4; Heb. 10:5-10) From datfala tokpiksa altar hem start lo taem wea Jesus baptaes, datwan minim datfala spiritual temple tu hem start lo datfala taem. Datfala spiritual temple piksarem arrangement blo Jehovah for pure worship wea faondeson blo hem nao datfala ransom. Datfala altar hem wanfala main part lo datfala spiritual temple.—Matt. 3:16, 17; Heb. 5:4-6.

Taem datfala spiritual temple start, wanfala hae priest hem need for waka insaed. Jehovah anointim Jesus witim “holy spirit and paoa” for duim datfala waka. (Acts 10:37, 38; Mark 1:9-11) Bat, hao nao iumi sure Jesus kasem appointment olsem Hae Priest bifor hem dae and resurrect? Wanfala main reason why iumi sure lo datwan hem bikos lo example blo Aaron and olketa narawan wea serve olsem hae priest anda lo Law blo Moses.

Law blo Moses sei only hae priest nomoa savve go insaed lo Most Holy blo tabernacle, and bihaen, hem go lo Most Holy blo temple. Wanfala curtain nao hem separatem rum blo Most Holy from rum wea olketa kolem Holy. Hae priest hem only go thru lo curtain lo Atonement day. (Heb. 9:1-3, 6, 7) Aaron and olketa narawan wea kamap hae priest bihaen lo hem, olketa mas kasem anointing bifor olketa savve go thru lo datfala really curtain wea stap lo tabernacle. Lo sem wei, Jesus tu hem mas kasem anointing olsem Hae Priest blo spiritual temple blo Jehovah bifor hem dae and go lo heven wea datwan hem olsem hem go thru lo datfala curtain wea piksarem body blo hem. (Heb. 10:20) Dastawe, taem aposol Paul story abaotem Jesus, hem sei hem kam olsem wanfala “hae priest” and then hem go thru lo datfala tent wea olketa man no wakem, and hem go insaed lo heven.”—Heb. 9:11, 24.

Taem wea datfala niu covenant hem kamap legal and taem wea hem start, tufala evriwan kamap lo semtaem nomoa. Why nao iumi sei olsem? Bikos taem Jesus go ap lo heven and offerim perfect laef blo hem for iumi, thrifala samting nao mas happen for mekem datfala covenant kamap legal. Thrifala samting hia tu hem startim datfala niu covenant. Wanem nao thrifala samting hia?

First samting, Jesus go front lo Jehovah. Next samting, Jesus offerim price blo datfala sakrifaes lo Jehovah. And then last samting, Jehovah acceptim price blo blood blo Jesus. Sapos thrifala samting hia no kamap, hard for disfala niu covenant start waka.

Bible no talem barava taem wea Jehovah acceptim datfala price blo sakrifaes blo Jesus. So hem hard tu for iumi talem barava taem wea datfala niu covenant hem kamap legal and hem start. Bat iumi savve Jesus go ap lo heven tenfala day bifor Pentecost. (Acts 1:3) And insaed lo datfala short taem, hem givim price lo sakrifaes blo hem lo Jehovah and Jehovah acceptim datwan. (Heb. 9:12) Pruv wea showimaot datfala niu covenant hem start hem showaot klia lo Pentecost. (Acts 2:1-4, 32, 33) Lo datfala taem hem klia hao datfala niu covenant hem start finis and hem gohed waka.

Main point nao, datfala niu covenant hem kamap legal and hem start bihaen Jehovah acceptim price blo blood blo Jesus. And datfala covenant hem gohed for waka and Jesus nao Hae Priest and Mediator.—Heb. 7:25; 8:1-3, 6; 9:13-15.