1-2. Hao nao toktok blo Jehovah lo Aesaea 65:16, 17 encouragem iumi for no givap?

“NO GIVAP!” hem theme blo regional convention lo 2017. Datfala convention helpem iumi for savve hao for deal witim olketa hard samting wea iumi kasem. Nomata hem fofala year finis, iumi gohed deal witim olketa hard samting lo disfala nogud world.

² Wanem hard samting nao iu deal witim? Maet samwan lo famili or wanfala fren hem dae, or maet iu kasem bigfala sik. Samfala olo nao, and olketa narawan kasem natural disaster, persecution, or war. Iumi evriwan kasem hard taem tu bikos lo coronavirus. Iumi luk forward lo taem wea evri samting hia bae finis and bae iumi no tingim moa!—Readim Aesaea 65:16, 17.

3. Wanem nao iumi mas duim distaem, and why nao olsem?

³ Laef lo disfala world hem no isi, and maet bae hem hard go moa. (Matt. 24:21) Nomata olsem, iumi mas no givap. Why nao olsem? Bikos Jesus sei: “Sapos iufala no givap, bae iufala sevem laef bilong iufala.” (Luke 21:19) Taem iumi ting raonem hao olketa narawan deal witim olketa hard samting olsem iumi and no givap, datwan bae strongim iumi.

4. Why nao iumi savve sei Jehovah showimaot nambawan example for deal witim olketa nogud samting?

⁴ Hu nao showimaot nambawan example for deal witim olketa nogud samting? Jehovah God. Waswe, iu sapraes lo datwan? Maet olsem, bat tingim diswan: Satan nao kontrolem disfala world dastawe staka nogud samting gohed  for happen. Jehovah garem paoa for finisim datwan enitaem nomoa, bat hem weitim taem wea hem markem. (Rome 9:22) So hem gohed deal witim staka nogud samting go kasem datfala taem. Bae iumi storyim naenfala lo olketa samting hia.

5. Hao nao staka spoelem nem blo God, and wanem nao tingting blo iu abaotem datwan?

⁵ Staka spoelem nem blo God. Jehovah laekem evriwan for tinghae lo nem blo hem. (Aesaea 42:8) Bat for winim six thousand year pipol barava spoelem nem blo hem. (Sams 74:10, 18, 23) Datwan start lo garden blo Eden taem Devil (wea nem hia minim “samwan wea tok spoelem narawan”) sei God stopem Adam and Eve for duim samting wea bae mekem tufala hapi. (Jenesis 3:1-5) Start kam lo datfala taem, Satan gohed for mekem pipol tingse Jehovah stopem olketa for kasem wanem olketa barava needim. Jesus feel nogud lo olketa wea spoelem nem blo Dadi blo hem. Dastawe hem teachim olketa disaepol for prea olsem: “Dadi bilong mifala long heven, mifala laekem nem bilong iu for holy.”—Matt. 6:9.

6. Why nao Jehovah givim taem for olketa man rulim olketa seleva?

⁶ Staka againstim rul blo God. Jehovah nao fit for rulim olketa lo heven and lo earth and rul blo hem barava stret. (Rev. 4:11) Satan trae for mekem olketa angel and pipol for tingse God hem no fit for rul. Bat hem bae tek taem for pruvim Jehovah nomoa fit for rul. So Jehovah givim taem for olketa man rulim olketa seleva bat olketa showimaot olketa nating fit for rul. (Jeremaea 10:23) God hem patient for longtaem witim olketa wea againstim rul blo hem, bat datwan showimaot klia hem nomoa fit for rul. Evriwan bae luksavve Kingdom blo God nomoa savve mekem full world garem peace and for evriwan stap gud.

7. Hu nao bighed againstim Jehovah, and wanem nao bae Jehovah duim for stretem datwan?

⁷ Samfala lo famili blo Jehovah bighed. Taem Jehovah wakem olketa angel, Adam, and Eve, evriwan perfect. Bat then datfala bighed angel Satan (wea nem hia minim “samwan wea againstim narawan”) againstim Jehovah, and hem mekem Adam and Eve tu for againstim Jehovah. Satan mekem staka angel for duim sem samting. (Jude 6) Olketa narawan tu againstim God, olsem olketa Israelite wea againstim hem and start for worshipim olketa laea god. (Aesaea 63:8, 10) Jehovah barava feel sorre lo wanem olketa Israelite duim. Nomata olsem, hem bae gohed deal witim bighed pipol go kasem taem hem finisim olketa. Then, Jehovah and evriwan wea faithful for worshipim hem bae hapi from olketa no need for deal witim nogud wei blo olketa hia!

8-9. Wanem nao samfala laea blo Satan abaotem Jehovah, and wanem nao iumi savve duim for showimaot olketa no tru?

⁸ Satan laea abaotem Jehovah. Satan laea for sei Job and olketa narawan worshipim Jehovah bikos Jehovah blessim olketa. (Job 1:8-11; 2:3-5) Satan gohed for accusim olketa wea worshipim Jehovah kam kasem distaem. (Rev. 12:10) From iumi gohed faithful lo Jehovah bikos iumi lovem hem and no givap taem iumi kasem hard taem, datwan showimaot samting wea Satan talem hem no tru. Jehovah bae blessim iumi olsem hem blessim Job from iumi no givap.—Jas. 5:11.

 ⁹ Satan iusim olketa bigman blo religion for mekem pipol tingse Jehovah nao kosim pipol for safa. Olketa savve sei taem wanfala pikinini dae, God tekem pikinini hia from hem needim nara angel moa lo heven. Datwan no tru and iumi savve hard for Jehovah duim olsem! Nomata taem iumi sik or samwan iumi lovem hem dae, bae iumi hard for blamem God. Iumi savve lo future Jehovah bae healim evriwan wea sik and resurrectim olketa wea dae. Iumi laek for talem evriwan wea willing for lisin hao Jehovah lovem iumi evriwan. From iumi duim olsem, diswan showimaot wanem Satan talem abaotem Jehovah hem no tru.—Provebs 27:11.

10. Wanem nao Sams 22:23, 24 showimaot abaotem Jehovah?

¹⁰ Olketa wea Jehovah lovem safa. Jehovah hem God wea tingim pipol. Hem no laek for lukim iumi safa from pipol persecutim iumi, iumi sik, or iumi duim samting wea no stret bikos iumi no perfect. (Readim Sams 22:23, 24.) Jehovah luksavve iumi safa and hem laek for duim samting for stretem datwan. (Comparem Eksodas 3:7, 8; Aesaea 63:9.) Klosap nao Jehovah bae “draem evri tias long eye bilong [iumi]. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”—Rev. 21:4.

11. Wanem nao Jehovah missim abaotem olketa fren blo hem wea dae?

¹¹ Staka fren blo Jehovah dae. Jehovah luk forward for lukim moa olketa faithful man and woman wea dae! (Job 14:15) Masbi Jehovah barava missim fren blo hem Abraham. (Jas. 2:23) And hem mas missim tu hao hem savve story witim Moses. (Eksodas 33:11) Masbi hem luk  forward for herem moa olketa song blo David and narawan wea raetem olketa song for praisem hem! (Sams 104:33) Jehovah no forgetim olketa hia nomata olketa dae finis. (Aesaea 49:15) Hem rememberim evri samting abaotem olketa. Lo tingting blo Jehovah, hem olsem olketa hia “laef nomoa.” (Luke 20:38) Klosap nao Jehovah bae mekem olketa laef bak, and olketa bae worshipim and prea lo hem moa. Olketa samting hia savve comfortim iumi sapos samwan wea iumi lovem hem dae.

12. Wanem nao Jehovah no hapi lo hem distaem?

¹² Nogud pipol spoelem olketa narawan. Taem Satan, Adam, and Eve bighed lo Eden, Jehovah savve gogo evri samting bae kamap nogud. Hem heitim olketa nogud samting wea pipol duim distaem. Hem barava tingim olketa wea no garem eniwan for protectim olketa, olsem olketa pikinini wea no garem dadi and mami and olketa widow. (Sekaraea 7:9, 10) And Jehovah nating hapi taem hem lukim pipol treatim nogud olketa wea worshipim hem and putim olketa lo prison. Jehovah lovem and tingim evriwan wea deal witim olketa hard samting hia.

13. Hao nao wei blo pipol distaem, and hao nao God bae stretem datwan?

¹³ Durong kamap big. God wakem olketa man for garem olketa naesfala wei blo hem, bat Satan laekem pipol for duim olketa rabis samting. Lo taem blo Noah, God lukim wei blo pipol “kamap nogud tumas” and hem “filnogud tumas” lo olketa samting hia. (Jenesis 6:5, 6, 11) Waswe lo wei blo pipol distaem? Hem nogud tumas! Satan hem hapi taem pipol durong, olsem for man and woman durong, man sleep witim man, and woman sleep witim woman tu! (Eph. 4:18, 19) Satan barava hapi tu sapos olketa wea worshipim Jehovah duim serious sin. Klosap nao Jehovah bae finisim pipol wea durong wea no laek for change.

14. Wanem nao pipol duim lo olketa animal and lo disfala earth?

¹⁴ Pipol spoelem earth. Olsem iumi storyim finis, pipol mekem olketa narawan for safa, bat olketa spoelem earth tu and no lukaftarem olketa animal olsem Jehovah talem. (Eklesiastes 8:9; Jenesis 1:28) Samfala savveman sei from pipol spoelem earth, bihaen tu-thri year nomoa samting olsem wan million difren kaen plant, animal, fish, and bird bae nomoa nao. Dastawe pipol barava warim wanem bae happen lo disfala earth! Gud samting nao, Jehovah promis for “finisim olketa wea spoelem earth” and hem bae mekem earth kamap paradaes.—Rev. 11:18; Aesaea 35:1.

15-16. Wanem nao mekem iumi willing for deal witim olketa nogud samting olsem Jehovah? Storyim tokpiksa.

¹⁵ Olsem iumi storyim finis, Jehovah deal witim olketa nogud samting for staka thousand year. (Lukim box “ Olketa Nogud Samting wea Jehovah Deal Witim.”) Jehovah fit for finisim disfala nogud world enitaem nomoa, bat from hem patient gud samting kamaot from datwan! Tingim disfala tokpiksa. Doctor talem wanfala hasband and waef blo hem wea babule, baby hem sik and taem hem born bae hem no isi for lukaftarem and gogo bae hem dae. Nomata hem bigfala waka for lukaftarem hem, tufala hapi tumas for garem baby hia. From tufala lovem hem,  tufala willing for duim eni samting for lukaftarem hem.

¹⁶ Olsem tu, evriwan wea kam from laen blo Adam and Eve no perfect taem olketa born. Nomata olsem, Jehovah lovem and lukaftarem olketa. (1 John 4:19) Bat hem no olsem parents lo datfala tokpiksa, bikos hem savve finisim evri nogud samting wea kasem iumi. Hem markem finis taem for duim datwan. (Matt. 24:36) From iumi lovem Jehovah, iumi tu shud gohed deal witim olketa samting hia olsem hem duim.

17. Hao nao example blo Jesus wea Hebrew 12:2, 3 storyim helpem iumi for deal witim olketa hard samting?

¹⁷ Jesus followim example blo Dadi blo hem wea showimaot nambawan example lo hao for deal witim olketa nogud samting. Jesus no givap nomata pipol tok spoelem hem, mek shame lo hem, and gogo hem dae lo post for iumi. (Readim Hebrew 12:2, 3.) Example blo Jehovah for deal witim olketa nogud samting barava helpem Jesus for gohed faithful and no givap. Iumi tu savve followim example blo Jehovah.

18. Hao nao 2 Peter 3:9 helpem iumi for minim why Jehovah no finisim yet nogud pipol?

¹⁸ Readim 2 Peter 3:9. Jehovah savve lo best taem for finisim disfala nogud world. From hem no finisim yet nogud pipol, datwan givim taem for staka pipol lane abaotem hem, and distaem wanfala big crowd lo staka million pipol worshipim hem. Olketa hia barava hapi from Jehovah hem patient for longtaem, and datwan givim chance for olketa born, lane for lovem hem, and dedicate lo hem. Disison blo Jehovah for patient mekem staka million pipol for garem chance for enjoyim laef lo niu world!

19. Wanem nao iumi need for duim, and wanem reward nao bae iumi kasem?

¹⁹ Jehovah hem gohed for hapi nomata hem deal witim olketa nogud samting wea Satan duim. (1 Tim. 1:11) Iumi laek for gohed hapi olsem Jehovah, taem iumi weitim hem for mekhae lo nem blo hem, for showimaot hem nao fit for rul, for finisim nogud pipol, and finisim evri nogud samting. Jehovah gohed for deal witim olketa nogud samting, and iumi laek for duim olsem tu. Sapos olsem, bae iumi kasem reward for laef olowe olsem disfala scripture talem: “Man wea no givap long olketa hard taem wea kasem hem bae hem hapi, bikos Jehovah bae hapi long hem and givim long hem datfala reward wea hem promis for givim long olketa wea gohed for lovem hem.”—Jas. 1:12.