Jehovah laekem tufala wea bae marit for hapi and stap tugeta for olowe. (Matt. 19:4-6) Sapos iu laek for marit, hao nao iu savve faendem gudfala hasband or waef? Jehovah wakem iumi, so hem savve lo wanem bae helpem iumi for faendem samwan for maritim. So sapos iumi followim olketa Bible principle, datwan bae barava helpem iumi. Tingim samfala principle hia.

samting, iumi need for luksavve lo wei blo iumi olketa man. Bible sei: “Heart blo man savve laea lo hem and laekem tumas nogud samting.” (Jer. 17:9, NW) Taem samwan start for interest lo narawan, hem bae kwiktaem garem strongfala feeling for hem and maet no savve tingting stret. Olketa wea disaed for marit bikos lo feeling nomoa, bae no hapi lo marit. (Provebs 28:26) Taem tufala no savve gud lo each other yet, hem no wise for talem strongfala feeling lo each other and mekem olketa plan for future.

Nara Bible principle hem lo Proverbs 22:3, NW. Hem sei: “Man wea wise bae lukim trabol and go lo sef ples. Man wea no garem savve, hem gohed lo trabol and kasem nogud samting.” Why nao maet hem no wise for iusim olketa dating website for faendem samwan for frenim? Samfala wea frenim samwan lo kaen website olsem, gogo olketa faendaot hem laea lo olketa. And tu, samfala wea olketa frenim trikim olketa and tekem selen blo olketa. Samfala wea duim olketa nogud samting hia laea for sei olketa Jehovah’s Witness.

Nara samting for savve abaotem olketa dating website hia hem hao olketa iusim computer program for wakemaot hu nao bae fitim narawan. No eni pruv stap wea showimaot datwan hem waka gud. So waswe, hem wise for trustim computer program olsem for faendem gudfala hasband or waef? Iumi savve trustim olketa Bible principle wea kam from Jehovah for helpem iumi.—Provebs 1:7; 3:5-7.

Nara principle lo Provebs 14:15 hem sei: “Man no garem save, bae biliv long enisamting. Man garem gudfala save, bae hemi tingim wei fo falom.” Bifor iu disaed for maritim samwan, hem important for savve gud lo hem firstaem. Bat maet hem hard  for duim datwan lo dating website. Nomata iu readim information abaotem each other lo website and textim each other staka taem, datwan no minim bae iufala savve gud lo each other. Bihaen samfala duim olketa samting hia olketa tingse olketa faendem nao samwan wea olketa bae maritim. Bat taem olketa meetim hem, olketa sapraes lo wanem olketa faendemaot.

Man wea raetem wanfala psalm sei: “Mi nating laek fo joenem olketa nogud pipol. An mi nating laek fo fren wetem olketa hu i save laea tumas.” (Sams 26:4) Staka no talem tru information abaotem olketa seleva lo dating website bikos olketa laekem samwan for frenim olketa. Olketa haedem nogud wei blo olketa taem olketa story or sendem text message lo narawan. So hem important for ting raonem olketa kwestin hia: Nomata samwan maet sei hem Jehovah’s Witness, waswe, hem baptaes, hem fren gud witim Jehovah, hem samwan wea kongregeson respectim, and hem garem olketa gudfala wei? (1 Cor. 15:33; 2 Tim. 2:20, 21) And sapos hem bin marit, waswe, hem free for marit distaem followim olketa Bible principle? Hem important for iu savve lo ansa blo olketa kwestin hia, bat bae iu laek for herem datwan from olketa nara Witness wea savve gud lo hem tu. (Provebs 15:22) And tu, brata or sista wea faithful lo Jehovah bae nating ting for maritim samwan wea no worship Jehovah.—2 Cor. 6:14; 1 Cor. 7:39.

Olketa samting wea iumi storyim finis showimaot maet hem no wise for iusim olketa dating website for frenim samwan. So hao nao iu savve meetim wanfala naes brata or sista for frenim? Taem iumi start for go moa lo olketa meeting lo Kingdom Hall, garem olketa assembly, convention, and olketa nara spiritual program hem gudfala ples for faendem samwan for frenim.

Taem iumi no savve hipap tugeta lo olketa spiritual program hia olsem from coronavirus, iumi iusim Zoom for attendim olketa meeting. Datwan hem chance for savve lo olketa brata and sista wea no marit. Lo olketa meeting, iumi savve herem tok and koment blo olketa. (1 Tim. 6:11, 12) Then bihaen lo meeting, maet iumi savve story witim each other lo breakout room. Samfala brata and sista iusim Zoom or Whatsapp for hipap witim olketa brata and sista for hapitaem. Iumi savve lukluk lo hao samwan wea iumi interest lo hem deal witim olketa narawan, and lo taem olsem bae iumi luksavve tu lo wei blo hem. (1 Pet. 3:4) Gogo, taem iutufala start for savve gud lo each other iufala savve faendaot sapos iufala garem olketa sem goal, and bae start for luksavve sapos iufala fitim each other.

Taem iumi lukaotem samwan for maritim and followim olketa Bible principle, maet iu savve sei: “Taem yu faendem woman [or man] fo maritim, yu faendem wanfala gudfala samting ya. Hemi wanfala blesing.”—Provebs 18:22.