1. Wanem nao savve happen sapos pipol laek winim narawan?

STAKA pipol laek winim narawan, nomata datwan savve spoelem man wea olketa laek for winim. Olsem example, samfala bisnisman savve duim samting for spoelem bisnis blo narawan, mekem bisnis blo olketa seleva gohed gud. Samfala wea ranran lo resis min for bangam narawan mekem hem foldaon, and olketa seleva nao for winim resis. Lo samfala kantri, olketa student lo skul savve cheat lo exam mekem olketa go lo best university. Olketa Christian savve datkaen wei hem “nogud samting wea man laek for duim.” (Gal. 5:19-21) Nomata olsem, maet samfala lo kongregeson trae winim narawan and evritaem storyim hao samfala gud winim narawan. Sapos samfala duim olsem, datwan savve mekem kongregeson for no wan mind.

2. Wanem nao bae iumi storyim lo disfala study?

² Lo disfala study, iumi bae storyim tufala nogud wei wea savve mekem iumi for laek winim olketa brata and sista. Bae iumi storyim tu samfala lo bifor wea faithful for worshipim Jehovah wea no trae for winim narawan. Bat firstaem bae iumi storyim olketa samting wea bae helpem iumi for lukluk lo iumiseleva.

3. Olketa wanem kwestin nao hem gud for ting raonem?

³ Samfala taem hem gud for iumi lukluk gud lo iumiseleva. Iumi savve duim olsem taem iumi ting raonem olketa kwestin hia: ‘Waswe, hem mekem mi feel gud taem mi duim samting wea winim narawan? Waswe, mi duim waka  lo kongregeson bikos mi laek for showimaot mi gud winim olketa narawan, or from mi laek for mekem Jehovah hapi?’ Why nao iumi shud ting raonem olketa kwestin hia? Bae iumi storyim wanem Bible talem.

4. Olsem Galatia 6:3, 4 storyim, why nao iumi shud no comparem iumiseleva witim olketa narawan?

⁴ Bible sei for no comparem iumiseleva witim olketa narawan. (Readim Galatia 6:3, 4.) Why nao olsem? Sapos iumi tingse iumi gud winim olketa brata and sista, datwan savve mekem iumi praod. Bat sapos iumi tingse olketa brata and sista gud winim iumi, datwan savve mekem iumi ting daonem iumiseleva. Hem no wise sapos iumi tinghae lo iumiseleva or ting daonem iumiseleva. (Rome 12:3) Katerina * wanfala sista lo Greece sei: “Lo bifor mi comparem miseleva witim olketa wea luk naes winim mi, savve gud hao for preach, and garem staka fren. Datwan mekem mi for ting daonem miseleva.” Hem gud for tingim hao Jehovah leadim iumi kam lo hem bikos iumi garem gudfala heart and willing for lisin lo Son blo hem, and no bikos iumi luk naes tumas, savve story gud, or from staka pipol laekem iumi.—John 6:44; 1 Cor. 1:26-31.

5. Wanem nao iumi lanem from samting wea happen lo Hyun?

⁵ Nara kwestin for iumi tingim hem olsem, ‘Waswe, olketa brata and sista ting lo mi olsem man wea stap gud witim olketa narawan or man for raoa?’ Tingim samting wea happen lo Hyun, wanfala elder lo South Korea. Lo bifor hem tingse samfala nara elder trae for gud winim hem. Hem sei, “Staka taem mi no hapi lo wanem olketa brata hia talem and duim, and mi storyim datwan lo narawan. Hem mekem kongregeson for no wan mind.” Samfala brata helpem Hyun for stretem tingting blo hem. From Hyun duim datwan, distaem hem waka gud tugeta witim olketa nara elder. Sapos iumi no stap gud witim samwan and luksavve iumi evritaem tok daonem hem lo olketa nara brata and sista, hem gud for kwiktaem stretem datwan.

6. Olsem Galatia 5:26 storyim, olketa wanem nogud wei nao savve mekem man for laek winim narawan?

⁶ Readim Galatia 5:26. Wanem nao maet mekem samwan for laek winim narawan? Maet from hem praod. Samwan wea praod savve tingim and mekhae lo hemseleva. Nara samting, maet hem jealous. Samwan wea jealous bae laek garem samting wea narawan garem, and maet hem no laekem datfala man for garem tu. Man wea jealous lo narawan bae gogo hem heitim man hia. So iumi mas waka hard for no praod or jealous!

7. Storyim tokpiksa wea showimaot nogud samting wea bae happen sapos man praod or jealous.

⁷ Iumi savve comparem man wea praod or jealous witim olketa dirty samting wea go insaed fuel blo plane. Maet plane savve tek off, bat olketa dirty samting hia savve blokem olketa fuel pipe wea mekem plane no garem inaf paoa for landing and plane bae crash. Lo sem wei tu, sapos man wea worshipim Jehovah kamap praod or jealous bae gogo hem spoelem hemseleva. (Provebs 16:18) Bae hem stop for worshipim Jehovah and maet olketa narawan tu kasem nogud samting  from datwan. Wanem nao bae helpem iumi for no praod or jealous?

8. Wanem nao savve helpem iumi for no praod?

⁸ Samting wea savve helpem iumi for no praod hem for followim kaonsel blo aposol Paul for olketa lo Philippi. Hem sei: “Iufala mas no laek raoa olowe and mas no praod, bat iufala mas hambol and ting long narawan olsem hem winim iufala.” (Phil. 2:3) Iumi savve followim disfala kaonsel taem iumi no laek for winim narawan. Sapos samwan garem savve winim iumi, iumi tinghae lo datwan and hapi lo wanem hem duim, especially sapos hem iusim savve blo hem for waka blo Jehovah. Sapos hem tu followim advaes blo Paul, bae hem tinghae lo waka wea iumi duim lo kongregeson. Gud samting wea kamaot from datwan nao evriwan lo kongregeson bae stap gud tugeta and wan mind.

9. Wanem nao savve helpem iumi for no jealous?

⁹ Iumi bae no jealous lo narawan sapos iumi luksavve iumi no savve gud hao for duim samfala samting. Sapos iumi hambol, bae iumi no trae for winim narawan, bat bae iumi laek for lane from olketa wea garem savve winim iumi. Olsem example, sapos wanfala brata savve tumas hao for duim pablik tok, iumi savve askem hem for samfala idea lo hao for duim gud wanfala tok. Sapos wanfala sista savve tumas hao for kuki, maet hem gud for askem hem for showim iumi samfala teknik. And sapos wanfala young wan faendem hem hard for garem olketa fren, maet hem gud for hem askem advaes from samwan wea garem olketa fren. Sapos iumi willing for askem advaes bae iumi savve hao for duim olketa samting and no jealous lo narawan.

10. Storyim samting wea happen lo Gideon.

¹⁰ Tingim samting wea happen lo Gideon wea kam from tribe blo Manasseh and olketa man from tribe blo Ephraim. Gideon and 300 soldia blo hem fit for tinghae lo olketa seleva from Jehovah helpem  olketa for winim faet. Olketa from tribe blo Ephraim go lukim Gideon no for praisem hem, bat for raoa witim hem. Luk olsem olketa feel nogud lo Gideon bikos hem no askem olketa firstaem for join insaed datfala faet againstim olketa blo Midian. Olketa tingse Gideon no showimaot respect lo tribe blo olketa, bat olketa no tingim hao Gideon faet for mekhae lo nem blo Jehovah and for protectim pipol blo Hem.​—Jajis 8:1.

11. Wanem nao Gideon talem lo olketa man from tribe blo Ephraim?

¹¹ Gideon sei lo olketa man from tribe blo Ephraim: “Disfala samting wea mifala duim hemi smol nomoa.” Then hem storyim samting wea olketa duim wea Jehovah blessim tu. Bihaen hem storyim datwan, olketa “no kros” nao. (Jajis 8:2, 3) From Gideon hem hambol, datwan mekem evriwan for stap gud tugeta.

12. Wanem nao iumi lanem from olketa lo tribe blo Ephraim and Gideon?

¹² Wanem nao iumi lanem from datfala story? Samting wea olketa lo tribe blo Ephraim duim mekem iumi luksavve hem important for mekhae lo Jehovah and no for pipol tinghae lo iumi. Olketa hed blo famili and olketa elder savve lanem samting from Gideon tu. Sapos samwan feel nogud lo wanem olketa duim, trae for minim why hem kros and praisem hem for gud samting hem duim. Nomata man wea kros lo olketa hia nao hem rong, olketa need for hambol. Hem important for stap gud witim olketa brata and sista, and no for pruvim iumi nao stret.

13. Hao nao Hannah deal witim hard samting wea hem kasem?

¹³ Narafala example hem Hannah. Hem maritim Elkanah, wanfala Levite wea barava lovem hem. Bat Elkanah garem tu nara waef wea nem blo hem Peninnah. Elkanah lovem Hannah winim Peninnah. Nomata olsem, “Penina hemi garem olketa pikinini, bat Hana hemi no garem.” Bikos lo datwan, “oltaem Penina hemi gohed fo mekful long [Hannah] fo mekem hem filnogud.” Hao nao datwan affectim Hannah? Bible sei: “Hemi gohed fo krae, an hemi les long kaikai.” (Fas Samuel 1:2, 6, 7) Nomata olsem, Bible no storyim sapos Hannah trae for changem bak nogud samting lo Peninnah. Hannah storyim evri samting lo Jehovah and trustim Jehovah for helpem hem. Bat waswe, Peninnah hem change and start for kaen lo Hannah? Bible no talem, bat iumi savve Hannah hem hapi moa.​—Fas Samuel 1:9-10, 18.

14. Wanem nao iumi lanem from example blo Hannah?

¹⁴ Wanem nao iumi savve lanem from  example blo Hannah? Sapos samwan trae for winim iumi, no raoa witim hem. No changem bak nogud samting wea hem duim lo iumi, bat trae for mek peace witim hem. (Rome 12:17-21) Nomata sapos hem no laek for duim datwan, bae iumi hapi from iumi traem.

15. Wanem nao Apollos and Paul semsem lo hem?

¹⁵ Iumi savve lane tu from example blo disaepol Apollos and aposol Paul. Tufala evriwan savve gud lo olketa Scripture, savve gud hao for teach, and helpem staka pipol for kamap disaepol. Nomata olsem, tufala no garem eni reason for laek winim each other.

16. Wanem kaen man nao Apollos?

¹⁶ Apollos hem kam “from Alexandria.” Lo first century, Alexandria hem bigfala taon wea pipol savve kasem hae education. Luk olsem Apollos savve tumas for story and “hem savve gud tu long olketa Holy Raeting.” (Acts 18:24) Taem Apollos go for helpem kongregeson lo Corinth, samfala lo there showimaot olketa tinghae lo hem winim Paul and olketa nara brata. (1 Cor. 1:12, 13) Waswe, olketa garem datkaen tingting bikos Apollos sei hem winim olketa hia? Iumi sure Apollos no duim olsem. Bihaen Apollos lusim Corinth, Paul talem hem for go bak lo there. (1 Cor. 16:12) Paul bae no duim datwan sapos hem tingse Apollos duim samting for mekem kongregeson tinghae lo hem winim Paul and olketa nara brata. Paul luksavve Apollos iusim savve blo hem for preachim gud nius and for strongim olketa brata and sista. Apollos hem man wea hambol. Olsem example, Bible no sei hem feel nogud taem Aquila and Priscilla  “helpem hem for minim gud moa teaching bilong God.”​—Acts 18:24-28.

17. Hao nao Paul helpem olketa lo Corinth for no mekhae lo eni brata?

¹⁷ Aposol Paul savve lo gudfala waka wea Apollos hem duim, bat hem no laek for trae winim Apollos. Kaonsel wea Paul raetem for olketa lo Corinth helpem iumi for luksavve Paul hem hambol and no tinghae lo hemseleva. Hem no laekem olketa for sei “Mi followim Paul,” bat hem laekem olketa for mekhae lo Jehovah and Jesus Christ.​—1 Cor. 3:3-6.

18. Olsem 1 Corinth 4:6, 7 storyim, wanem nao iumi lanem from example blo Apollos and Paul?

¹⁸ Wanem nao iumi lanem from example blo Apollos and Paul? Maet iumi waka hard for preachim gud nius and helpem staka for kamap disaepol, bat iumi luksavve Jehovah nao helpem iumi. Nara samting wea iumi lanem from Apollos and Paul, hem hao olketa wea garem bigfala responsibility lo kongregeson shud no laekem olketa brata and sista for mekhae lo olketa. Iumi tinghae tumas lo olketa elder and ministerial servant wea iusim Bible for helpem iumi, and no mekhae lo tingting blo olketa seleva bat mekhae lo example blo Jesus.​—Readim 1 Corinth 4:6, 7.

19. Wanem nao iumi laek for duim lo kongregeson? (Lukim box “ No Trae for Winim Narawan.”)

¹⁹ God givim iumi savve for duim olketa difren samting lo kongregeson. Iumi savve iusim datwan for “helpem narawan.” (1 Pet. 4:10) Maet iumi tingse wanem iumi duim hem smol nomoa. Bat evri samting iumi duim, nomata hem smol, savve helpem kongregeson for stap gud tugeta. Iumi no laek for trae winim narawan, bat iumi laek for stap gud and wan mind witim evriwan lo kongregeson.​—Eph. 4:3.