1. Wat nao Jehovah duim no longtaem bihaen Adam and Eve sin? (Jenesis 3:15)

 NO LONGTAEM bihaen Adam and Eve sin, Jehovah talem wanfala important profesi wea givim hope lo olketa pikinini blo Adam. Datfala profesi hem stap lo Jenesis 3:15.​—Readim.

2. Why nao disfala profesi hem spesol?

² Datfala profesi hem stap lo first buk lo Bible, bat wanem evri nara buk lo Bible storyim hem join witim datfala profesi. Toktok blo Jenesis 3:15 hem olsem glue wea holem tugeta olketa page blo wanfala buk bikos datfala profesi hem joinim tugeta wanem evri buk lo Bible storyim for kamap wanfala message. Datfala message nao hem hao God bae sendem samwan wea bae sevem iumi and distroem Satan and evriwan wea followim hem. * Datwan hem blessing for evriwan wea lovem Jehovah.

3. Wat nao bae iumi storyim lo disfala article?

³ Lo disfala article bae iumi ansarem thrifala kwestin hia abaotem profesi lo Jenesis 3:15: Hu nao olketa wea insaed disfala profesi? Hao nao disfala profesi hem kamap tru? And hao nao disfala profesi helpem iumi?

4. Hu nao “datfala snek,” and hao nao iumi savve?

⁴ Profesi lo Jenesis 3:14, 15 storyim wanfala “snek,” “pikinini” blo datfala snek, wanfala “woman,” and “pikinini” blo datfala woman. Bible helpem iumi for luksavve hu nao  olketa hia piksarem. * Firstaem, bae iumi storyim hu nao datfala “snek.” Sapos hem wanfala real snek, hard for hem minim toktok wea Jehovah talem lo garden blo Eden. So snek wea Jehovah story lo hem, hem mas samwan wea garem tingting. Hu nao datwan? Revelation 12:9 talem klia hao “datfala snek bilong bifor kam,” hem nao Satan. Bat hu nao pikinini blo datfala snek?

5. Hu nao pikinini blo datfala snek piksarem?

⁵ Samfala taem Bible iusim datfala toktok “pikinini” for minim olketa wea followim tingting and wei blo samwan, wea datwan mekem olketa for olsem pikinini blo hem. So pikinini blo datfala snek hem piksarem olketa angel wea no faithful and olketa man wea followim tingting and wei blo Satan, wea againstim God and pipol blo Hem. So olketa angel hia nao hem olketa angel wea lusim assignment blo olketa lo heven lo taem blo Noah, and olketa nogud pipol wea wei blo olketa hem olsem dadi blo olketa Satan.​—Jenesis 6:1, 2; John 8:44; 1 John 5:19; Jude 6.

6. Why nao datfala “woman” hem no piksarem Eve?

⁶ Distaem bae iumi storyim hu nao “woman” wea Jenesis 3:15 storyim hem piksarem. Datfala woman hem no Eve bikos profesi sei pikinini blo datfala woman bae “brekem” hed blo datfala snek. Olsem iumi just storyim, snek hia piksarem Satan, and no eni pikinini blo Eve wea no perfect bae garem paoa for distroem hem. So hu nao bae distroem Satan?

7. Olsem Revelation 12:1, 2, 5, 10 showimaot, hu nao datfala woman wea Jenesis 3:15 storyim?

⁷ Last buk lo Bible storyim hu nao datfala woman wea Jenesis 3:15 storyim.  (Readim Revelation 12:1, 2, 5, 10.) Datfala woman hem no wanfala woman lo earth. Scripture sei moon stap andanit lo leg blo hem and twelvfala star stap lo hed blo hem olsem wanfala kraon. Hem bornem wanfala spesol pikinini, wea hem nao Kingdom blo God wea stap lo heven. So datfala woman hem mas stap lo heven tu. Woman hia piksarem organization blo Jehovah lo heven wea hem nao olketa faithful angel blo Jehovah.​—Gal. 4:26.

8. Hu nao pikinini blo datfala woman hem piksarem, and wat taem nao hem kamap datfala pikinini? (Jenesis 22:15-17; Genesis 22:18, NWT)

⁸ Bible helpem iumi tu for luksavve hu nao pikinini blo datfala woman. Datfala pikinini mas kam from laen blo Abraham. (Jenesis 22:15-17; Readim Genesis 22: 18. *) Olsem datfala profesi talem, Jesus hem kam from laen blo datfala faithful man Abraham. (Luke 3:23, 34) Bat datfala pikinini hem mas garem bigfala paoa mekem hem fit for finisim Satan. So taem Jesus hem kasem 30 year, God anointim hem witim holy spirit. Lo datfala taem nao Jesus kamap pikinini blo datfala woman. (Gal. 3:16) Bihaen Jesus dae and go bak lo heven, God “mekhae long hem and givim glory long hem” and givim hem “paoa . . . ovarem evri samting long heven and earth.” And tu, God givim hem paoa for “finisim evri samting wea Devil hem duim.”​—Heb. 2:7; Matt. 28:18; 1 John 3:8.

9-10. (a) Hu nao olketa narawan wea pikinini blo datfala woman hem piksarem, and wat taem nao olketa kamap datfala pikinini? (b) Wat nao next samting wea iumi bae storyim?

⁹ Datfala pikinini hem piksarem tu olketa narawan. Paul showimaot hu nao olketa hia taem hem story lo olketa anointed Christian wea Jew and wea no Jew. Hem sei: “Sapos iufala bilong Christ, iufala nao pikinini bilong Abraham, wea bae kasem samting wea God promisim.” (Gal. 3:28, 29) Taem Jehovah anointim wanfala Christian witim holy spirit, hem kamap pikinini blo datfala woman tu. So pikinini blo datfala woman hem piksarem Jesus Christ and 144,000 wea rul witim hem lo Kingdom. (Rev. 14:1) Evriwan lo olketa hia followim wei and tingting blo Dadi blo olketa, Jehovah God.

¹⁰ Distaem iumi savve lo hu nao olketa wea Jenesis 3:15 storyim, olketa piksarem. Next samting bae iumi storyim hem wanem Jehovah duim for fulfillim disfala profesi and hao datfala profesi hem helpem iumi distaem.

11. Wat nao disfala profesi minim taem hem sei datfala snek bae baetem bihaen lo foot blo pikinini blo datfala woman?

¹¹ Profesi lo Jenesis 3:15 sei datfala snek bae baetem “bihaen long [foot]” blo pikinini blo datfala woman. Satan duim diswan taem hem iusim olketa Jew and olketa lo Rome for killim dae Son blo hem. (Luke 23:13, 20-24) Taem eniwan garem garekil bihaen lo foot blo hem bae hem hard for wakabaot. Olsem tu, taem Jesus hem dae hem no savve duim eni samting for tu-thri day.—Matt. 16:21.

12. Hao nao bae Jesus brekem hed blo datfala snek, and wat taem nao bae hem duim datwan?

¹² For disfala profesi lo Jenesis 3:15 kamap tru, Jesus mas laef bak. Why nao olsem? Bikos profesi sei datfala pikinini bae brekem hed blo datfala snek. Dastawe bihaen lo mek-thri day wea Jesus dae  God resurrectim hem, and hem kamap wanfala spirit wea no savve dae moa. Lo taem wea God markem, Jesus bae finisim Satan. (Heb. 2:14) Christ and olketa wea rul witim hem bae finisim pikinini blo datfala snek, wea hem nao olketa enemy blo God.​—Rev. 17:14; 20:4, 10. *

13. From disfala profesi kamap tru, wanem gud samting nao iumi kasem from datwan?

¹³ Sapos iu worshipim God distaem, iu kasem gud samting from disfala profesi. Taem Jesus kam lo earth, hem barava followim wei blo Dadi blo hem. (John 14:9) So taem iumi lane abaotem hem, bae iumi savve lo Jehovah God and lovem hem. Iumi kasem gud samting tu from olketa teaching and direction blo Jesus from hem nao leadim kongregeson distaem. Hem teachim iumi lo wanem for duim for mekem Jehovah hapi. And bikos datfala snek baetem bihaen lo foot blo Jesus, wea minim hem dae, iumi evriwan kasem gud samting from datwan. Hao nao dae blo Jesus helpem iumi? Bihaen Jehovah resurrectim Jesus, Jehovah acceptim perfect sakrifaes blo Son blo hem, wea “mekem iumi klin from evri sin bilong iumi.”​—1 John 1:7.

14. Hao nao iumi savve datfala profesi wea Jehovah talem lo Eden bae hem tek taem bifor hem kamap tru?

¹⁴ Wanem Jehovah talem lo datfala profesi lo Eden showimaot bae hem tek taem for datfala profesi hem kamap tru. Bae hem tek taem for datfala woman garem pikinini, for Satan hipimap olketa follower blo hem, and for tufala grup hia heitim each other. Hem important for minim disfala profesi bikos hem warnim iumi hao world wea Satan kontrolem bae heitim pipol blo Jehovah. Lo taem blo Jesus, hem tu warnim olketa disaepol blo hem abaotem datwan. (Mark 13:13; John 17:14) Iumi lukim datfala part blo profesi hem kamap tru, especially insaed 100 year wea go pas. Why nao iumi sei olsem?

15. Why nao world blo Satan barava heitim iumi distaem, bat why nao iumi shud no fraetem Satan?

¹⁵ No longtaem bihaen Jesus kamap King lo Kingdom lo 1914, olketa aotem Satan from heven. Distaem hem stap lo earth and hem luksavve hem garem short taem nomoa. (Rev. 12:9, 12) Bat Satan no weit nomoa for taem wea hem bae distroe. From hem kros tumas hem attakim pipol blo God. (Rev. 12:13, 17) Dastawe world blo Satan barava heitim iumi. Nomata olsem, iumi shud no fraetem Satan and olketa follower blo hem. Bat iumi savve garem sem tingting olsem aposol Paul wea sei: “Sapos God hem saedem iumi, no eniwan savve againstim iumi.” (Rome 8:31) Iumi savve trustim Jehovah bikos iumi lukim hao staka samting wea Jenesis 3:15 profesi abaotem hem kamap tru.

16-18. Wanem gud samting nao Curtis, Ursula, and Jessica kasem from olketa minim Jenesis 3:15?

¹⁶ Promis blo Jehovah lo Jenesis 3:15 savve helpem iumi for deal witim eni hard taem wea kasem iumi. Curtis, wanfala missionary lo Guam, hem sei: “Samfala samting wea happen lo laef blo mi mekem hem no isi for mi gohed faithful lo Jehovah. Bat taem mi ting raonem profesi lo Jenesis 3:15, datwan helpem mi for gohed trustim Jehovah.” Curtis luk forward lo  taem wea Jehovah bae finisim evri nogud samting wea kasem iumi.

¹⁷ Ursula, wanfala sista lo Bavaria hem sei hao taem hem minim Jenesis 3:15, datwan helpem hem for sure Bible hem kam from God. Hem lukim hao evri nara profesi lo Bible hem join witim disfala profesi, and hem barava tinghae lo datwan. Hem sei tu: “Taem mi lanem hao Jehovah stretawe duim samting for mekem iumi garem hope, datwan mekem mi lovem hem tumas.”

¹⁸ Jessica, wanfala sista from Micronesia, hem sei: “Mi tingim hao mi barava hapi taem mi luksavve mi faendem truth! Mi luksavve profesi lo Jenesis 3:15 hem gohed for kamap tru. Datfala profesi helpem mi for tingim hao Jehovah no laekem iumi for kasem olketa nogud samting wea kasem iumi distaem. Datfala profesi helpem mi tu for sure hao from mi worshipim Jehovah hem mekem laef blo mi gud distaem and bae mi kasem gudfala laef lo future tu.”

19. Why nao iumi sure last part blo datfala profesi bae kamap tru?

¹⁹ Olsem iumi lanem lo disfala article, Jenesis 3:15 hem gohed for fulfill kam kasem distaem. Iumi luksavve hu nao pikinini blo datfala woman and hu nao pikinini blo datfala snek. Jesus, wea hem nao pikinini blo datfala woman, hem kamap gud bihaen datfala snek baetem bihaen foot blo hem, and distaem hem wanfala King wea no savve dae. And klosap nao Jehovah bae finis for chusim olketa wea bae rul witim Jesus lo heven, wea olketa tu pikinini blo datfala woman. From first part blo datfala profesi hem kamap tru finis, iumi sure datfala last part, wea sei Jesus bae brekem hed blo datfala snek, bae kamap tru tu. Iumi bae hapi tumas taem Jesus distroem Satan! Go kasem datfala taem, iumi mas no givap. Iumi savve trustim hao God bae iusim pikinini blo datfala woman for mekem “evri nation lo earth” for kasem staka blessing.​—Gen. 22:18, NWT.