Mi born lo 1935 lo Darlaston taon, wea hem insaed lo wanfala region lo England wea olketa kolem lo Black Country bikos lo blak smoke blo staka factory wea stap lo there. Taem mi foa years, Olketa Jehovah’s Witness studyim Bible witim parents blo mi. Taem mi samting olsem 14 years, mi start for luksavve wanem mi lanem lo Bible hem truth and gogo lo 1952 taem mi 16 years, mi baptaes.

Lo semtaem, mi start for waka lo wanfala big factory wea wakem olketa hand tul and spare part blo trak. Mi kasem training for duim important waka lo office blo datfala factory, and mi barava enjoyim datwan.

Bat taem wanfala circuit overseer askem mi for lukaftarem Kongregeson Buk Study lo kongregeson blo mi lo Willenhall, mi luksavve mi need for mekem wanfala barava important disison. Lo datfala taem mi attendim tufala kongregeson. Lo olketa midol week meeting, mi attendim Bromsgrove Kongregeson klosap lo ples wea mi waka, wea hem samting olsem 32 kilometer from haos blo mifala. And taem mi go bak lo haos lo olketa weekend, mi attendim kongregeson lo Willenhall.

From mi laek for sapotim organization blo Jehovah, mi disaed for conductim datfala Kongregeson Buk Study, nomata mi mas lusim waka wea mi enjoyim. From mi willing for followim direction blo Jehovah lo datfala taem, mi duim staka samting lo laef wea mi barava enjoyim.

Taem mi attendim Bromsgrove Kongregeson, mi meetim Anne, wanfala naesbola sista wea barava lovem Jehovah. Mitufala marit lo 1957, and bihaen datwan mifala kasem staka naes privilege, olsem for regular pioneer, spesol pioneer, duim circuit waka, and waka lo Bethel. Mi and Anne duim staka samting tugeta wea mekem mitufala hapi.

Lo 1966 mitufala hapi tumas for attendim mek-42 class blo Gilead. Mifala kasem assignment for go lo Malawi lo Africa, and pipol lo there barava kaen and welkamim narawan. Lo datfala taem mifala no tingim hao bae mifala stap lo there for short taem nomoa.

Mitufala arrive lo Malawi lo February 1, 1967. Lo first month, mifala duim languis course, and bihaen datwan mifala startim distrik waka. Mifala garem wanfala jeep wea mifala tingse bae hem fit for go lo eni raf road and for akrosim olketa deep river. Batawea jeep hia stragol, nomata for akrosim smol stream nomoa. Mifala savve stap lo olketa leaf haos, and lo taem blo rain mifala mas putim blak plastic andanit lo ruf for stopem rain for kam insaed. Hem tru, missionary waka hem no isi firstaem, bat mifala barava enjoyim!

Lo April, mi luksavve hao mifala klosap for kasem hard taem from gavman. Lo radio mi herem wanfala speech blo Doctor Hastings Banda, president blo Malawi. Hem sei Olketa Jehovah’s Witness no peim tax and olketa kosim olketa problem for gavman, bat datwan no tru. Mifala savve gavman no hapi lo mifala bikos mifala neutral and no peim political party membership card.

Lo September, mifala readim lo niuspepa hao president hem accusim olketa brata and sei olketa kosim trabol evriwea. Lo wanfala meeting blo olketa bigman lo gavman, hem announcem hao gavman redi for banim religion blo Olketa Jehovah’s Witness. Olketa duim datwan lo October 20, 1967. No longtaem bihaen, olketa police and olketa from immigration kam for klosim daon branch and for deportim olketa missionary.

Olketa putim mitufala lo prison for thrifala day and then deportim mitufala lo Mauritius, wanfala kantri wea anda lo Britain. Bat olketa lo Mauritius no letem mifala olketa missionary for stap. So mifala kasem assignment for go lo Rhodesia (Zimbabwe distaem). Taem mifala kasem border, wanfala immigration officer les lo mitufala and no letem mifala for go insaed kantri. Hem sei: “Olketa deportim iufala from Malawi, then olketa no  letem iufala for stay lo Mauritius, and then iutufala tingse iutufala fit for stap lo hia!” Anne start for krae nao bikos luk olsem no eniwan acceptim mitufala! Lo datfala taem mi laek go bak stret lo hom blo mifala lo England nao. Gogo, immigration letem mifala for stay lo branch for wanfala naet bat olketa sei mitufala mas kam bak for lukim olketa lo next morning. Mitufala taed fogud bat mitufala weit and trustim Jehovah for helpem mitufala. Lo next aftanun mifala sapraes bikos immigration letem mitufala for stap lo Zimbabwe olsem visitor. Mi no savve forgetim feeling blo mi lo datfala day. Mi barava sure Jehovah hem directim laef blo mitufala.

Lo Zimbabwe branch, mi kasem assignment for waka lo Service Department and lukaftarem Malawi and Mozambique. Olketa brata and sista lo Malawi kasem bigfala persecution. Wanfala waka wea mi duim hem for transleitim olketa report wea olketa circuit overseer lo Malawi sendem kam. Wanfala naet mi waka leit for completim wanfala report, and mi krae taem mi read abaotem barava nogud persecution wea olketa brata and sista lo there kasem. * Bat mi kasem encouragement tu from strongfala faith wea olketa garem and from olketa no givap.​—2 Cor. 6:4, 5.

Mifala waka hard for mek sure olketa brata and sista lo Malawi and olketa wea ranawe go lo Mozambique kasem olketa Bible pablikeson. Team wea transleitim Chichewa languis, wea hem nao main languis blo olketa lo Malawi, muv go lo farm blo wanfala brata lo Zimbabwe. Datfala brata wakem olketa haos and office for olketa. Datwan mekem olketa savve gohed for duim important waka for transleitim olketa Bible pablikeson.

Mifala mekem arrangement for olketa circuit overseer lo Malawi for attendim distrik convention lo Zimbabwe lo Chichewa languis. Lo there, olketa kasem olketa convention tok aotlaen. Taem olketa go bak lo Malawi, olketa duim best blo olketa for storyim information hia witim olketa brata and sista. Wanfala year, taem olketa circuit overseer kam lo Zimbabwe, mifala organizem wanfala Kingdom Ministry Skul for strongim olketa faithful brata hia.

Lo February 1975, mi go visitim olketa Witness wea ranawe from Malawi and wea stap lo olketa refugee camp lo Mozambique. Olketa brata and sista hia followim evri niu direction wea kam from organization, olsem for garem body of elders. Olketa elder hia mek sure olketa brata and sista kasem olketa pablik tok, storyim text evriday and duim Wastaoa study, and for garem olketa assembly tu. Olketa organizem olketa camp hia olsem olketa convention department, olsem for duim klining, distributim kaikai, and garem olketa security. Mi lukim hao Jehovah blessim hard waka blo olketa faithful brata hia, and datwan barava encouragem mi.

Lo samting olsem 1979, Zambia branch start for lukaftarem Malawi. Nomata olsem, mi evritaem tingim and prea for olketa brata and sista lo Malawi, and staka narawan tu duim datwan. From mi wanfala Branch Komiti member lo Zimbabwe branch, samfala taem mi meet witim olketa brata from world hedquarter witim samfala nara brata from Malawi, South Africa, and Zambia. Evritaem mifala meet, mifala trae for tingim wat moa mifala savve duim for helpem olketa brata hia.

Gogo, persecution wea kasem olketa brata and sista lo Malawi hem katdaon, and samfala wea ranawe from kantri kam bak lo Malawi. Olketa kantri wea stap klosap lo Malawi start for letem olketa Witness for preach and for garem moa olketa meeting. Mozambique duim sem samting tu lo 1991. Bat mifala laek savve, ‘Wat taem nao Olketa Jehovah’s Witness lo Malawi bae free moa?’

Gogo, lo 1993 gavman blo Malawi aotem ban lo Olketa Jehovah’s Witness. Wanday, mi story lo wanfala missionary wea askem mi, “Hao, bae iu go bak moa lo Malawi enitaem?” Lo datfala taem mi 59 years, so mi sei “Mi olo nao, so bae hem  hard!” Bat lo sem day nomoa, mifala kasem wanfala fax message from Governing Body wea askem mifala for go bak lo there.

Disfala disison hem barava no isi for mitufala, bikos mitufala enjoyim tumas assignment blo mifala lo Zimbabwe. Mifala garem staka fren, and hapi for stap lo there. Governing Body kaen lo mifala and sei mifala savve disaed for stap lo Zimbabwe sapos mifala laekem. So mifala savve disaed followim tingting blo mifala for stap lo there. Bat mi tingim hao Abraham and Sarah wea olo finis lusim naes hom blo tufala and obeyim direction blo Jehovah.​—Jenesis 12:1-5.

Mifala disaed for followim direction wea mifala kasem from organization blo Jehovah and mifala go bak lo Malawi lo February 1, 1995, wea lo datfala sem date mitufala arrive lo Malawi 28 year bifor. Organization markem mi and nara tufala brata for kamap Branch Komiti lo Malawi, and mifala start for organizem moa waka blo Olketa Jehovah’s Witness lo there.

Mifala hapi for lukim hao Jehovah blessim preaching waka lo Malawi! Namba blo olketa pablisa hem increase kwiktaem from 30,000 lo 1993, and lo 1998 hem winim 42,000. * Governing Body appruvim plan for wakem wanfala niu branch for lukaftarem bigfala waka wea gohed. Mifala baem wanfala pis land wea hem 2 hectare lo Lilongwe, and olketa assignim mi for waka lo construction komiti.

Lo May 2001, Brata Guy Pierce blo Governing Body givim dedication tok for datfala niu branch office. Winim 2,000 brata and sista from Malawi attendim datfala dedication, and staka lo olketa baptaes for winim 40 year finis. Olketa faithful brata and sista hia deal witim barava nogud persecution wea gohed for staka year. Olketa no garem staka material samting bat olketa garem strongfala faith and fren gud witim Jehovah. Olketa hapi tumas for tour insaed niu Bethel blo olketa. And olketa gohed for singim olketa Kingdom song followim stael blo olketa for singsing wea mekem datfala full program hem barava spesol. Olketa samting hia pruvim Jehovah blessim olketa wea no givap taem olketa kasem hard taem.

Bihaen olketa wakem finis datfala branch, mi hapi tumas for kasem assignment for dedicatem olketa niu Kingdom Hall. Olketa kongregeson lo  Malawi kasem gud samting from datfala arrangement blo organization for kwiktaem buildim olketa Kingdom Hall lo olketa poor kantri. Bifor datwan, ples wea samfala kongregeson iusim for meeting olketa iusim stik blo eucalyptus tree for post blo olketa and grass mat for kavarem ruf blo olketa. And tu, olketa wakem olketa stul for sidaon from mud. Bihaen, olketa brata waka hard for beikem olketa brik lo wanfala oven wea barava hot, mekem olketa savve iusim for wakem olketa niu Kingdom Hall. Bat olketa still laek for iusim olketa stul bikos hem fitim staka pipol for sidaon lo hem!

Mi hapi tu for lukim hao Jehovah helpem olketa brata and sista for kamap olketa mature Christian. Mi barava tinghae lo olketa young brata lo Africa wea willing for help, and wea lanem staka samting from training wea kam from organization blo Jehovah. From datwan, olketa fit for kasem moa responsibility for duim samfala waka lo Bethel and lo olketa kongregeson. Olketa appointim tu olketa niu circuit overseer, and olketa hia barava strongim olketa kongregeson. Staka lo olketa brata hia wea marit disaed for no garem pikinini yet bat for duim moa samting for Jehovah nomata pipol or famili putim pressure lo olketa for garem pikinini.

Bihaen mifala stap lo Africa for 52 year, mi garem samfala health problem. Governing Body hem appruvim recommendation blo Branch Komiti lo Malawi for mifala reassign lo Britain Bethel. Mifala sorre for lusim assignment wea mifala enjoyim tumas, bat nomata mitufala olo, Bethel famili lo Britain branch barava lukaftarem mifala gud.

Mi sure from mi willing for followim direction blo Jehovah, datwan hem best disison wea mi mekem lo laef blo mi. If mi disaed for waka for selen, maet mi no enjoyim laef blo mi. Jehovah evritaem savve lo wanem mi needim for ‘stretem road blo mi.’ (Provebs 3:5, 6) Taem mi young, mi interest tumas for savve hao nao wanfala big company hem waka. Bat organization blo Jehovah givim mi wanfala waka wea mi barava enjoyim go moa. For iusim laef blo mi for worshipim Jehovah, hem samting wea mi bin enjoyim and bae mi gohed for enjoyim.