1. Hao nao iumi shud ting lo privilege for prea?

 JEHOVAH wea hem wakem heven and earth givim iumi wanfala spesol privilege, wea hem nao for prea lo hem. Tingim, iumi savve storyim feeling blo iumi lo Jehovah lo enitaem and lo eni languis. And iumi no need for mekem eni appointment for duim datwan. Iumi savve prea lo Jehovah nomata iumi stap lo hospital or lo prison, and iumi sure hem bae lisin lo iumi. Iumi barava tinghae lo datfala nambawan privilege.

2. Hao nao King David showimaot hem tinghae lo privilege for prea?

² King David tinghae lo privilege for prea. Hem sei: “Mi laekem yu fo hapi long prea blong mi olsem wea yu hapi long smok blong insens wea prist hemi bonem go long yu.” (Sams 141:1, 2) Lo taem blo David, olketa priest preparem gud incense wea olketa bonem lo worship blo olketa for Jehovah. (Eksodas 30:34, 35) Taem David storyim incense, datwan showimaot hem laek for tingting gud firstaem abaotem wanem for talem taem hem prea lo Jehovah. Olsem David, iumi tu laekem Jehovah for hapi lo olketa prea blo iumi.

3. Why nao iumi shud showimaot respect taem iumi prea?

³ Taem iumi prea lo Jehovah, iumi shud showimaot bigfala respect. Tingim olketa barava spesol vision wea Isaiah, Ezekiel, Daniel, and John lukim. Olketa vision hia difren, bat evriwan showimaot hao Jehovah hem King wea garem bigfala paoa and glory. Isaiah “lukim Jehovah sidaon lo wanfala throne wea hae tumas.” (Isa. 6:1-3, NWT)  Ezekiel lukim Jehovah sidaon lo chariot, wea ‘laet hem saen bikfala raonem wea luknaes tumas olsem olketa kala blong renbo.’ (Esikiel 1:26-28) Daniel lukim “datfala Man from taem bifor kam” hem werem white kaleko, and flame blo fire kamaot from throne blo hem. (Dan. 7:9, 10, NWT) John tu lukim Jehovah sidaon lo throne wea wanfala rainbow wea luk olsem emerald ston stap raonem. (Rev. 4:2-4) Taem iumi ting raonem bigfala glory blo Jehovah, datwan mekem iumi for tingim hao prea hem nambawan privilege and hao hem important for showimaot respect taem iumi prea. Bat wat nao iumi shud prea abaotem?

4. Wat nao iumi savve lanem from olketa samting wea Jesus prea firstaem abaotem lo Matthew 6:9, 10 lo datfala Lord’s Prea?

⁴ Readim Matthew 6:9, 10. Lo Sermon lo Maunten, Jesus teachim olketa disaepol for prea for olketa samting wea God hapi lo hem. Bihaen Jesus sei “iufala mas prea long wei olsem,” Jesus prea firstaem abaotem olketa important samting wea join witim plan blo Jehovah. Hem prea for nem blo God for holy. Hem prea for Kingdom blo God for kam wea bae distroem olketa wea againstim God. Hem prea tu for God duim olketa gud samting lo earth and for olketa man. Taem iumi prea abaotem olketa samting olsem, datwan showimaot wanem God laekem hem important lo iumi.

5. Waswe, hem stret for prea for olketa samting wea iumi needim?

⁵ Lo next part blo datfala prea, Jesus showimaot hem stret for prea for olketa samting wea iumi needim. Iumi savve askem Jehovah for givim iumi kaikai each day, forgivim sin blo iumi, helpem iumi for no foldaon lo eni temptation, and for sevem iumi from Satan. (Matt. 6:11-13) Taem iumi askem Jehovah for olketa samting hia, iumi showimaot iumi depend lo hem for helpem iumi and iumi laek for mekem hem hapi.

6. Waswe, iumi savve prea nomoa for olketa samting wea insaed lo datfala Lord’s Prea? Explainim kam.

⁶ Jesus no laekem iumi for prea nomoa for olketa samting wea insaed lo  datfala Lord’s prea. Lo olketa nara prea blo Jesus, hem prea abaotem olketa samting wea hem warim lo datfala taem. (Matt. 26:39, 42; John 17:1-26) Iumi savve prea abaotem eni samting wea iumi wari abaotem. Taem iumi need for disaedem samting, iumi savve askem Jehovah for helpem iumi for mekem wise disison. (Sams 119:33, 34) Taem iumi kasem wanfala hard assignment, askem Jehovah for wisdom mekem iumi duim gud datwan. (Provebs 2:6) Parents savve prea for olketa pikinini blo olketa, olketa pikinini savve prea for parents blo olketa, and iumi evriwan shud prea for olketa Bible study blo iumi and pipol wea iumi preach lo olketa. Bat taem iumi prea, iumi shud no askem Jehovah for helpem iumi nomoa.

7. Why nao iumi shud praisem Jehovah lo olketa prea blo iumi?

⁷ Jehovah barava fit for kasem praise, so iumi shud praisem hem insaed lo olketa prea blo iumi tu. Jehovah hem “gud tumas” and hem “fogivim olketa sin” blo iumi. Hem showimaot mercy, kaen, no savve kros kwiktaem, and lovem and faithful lo iumi. (Sams 86:5, 15) Iumi garem staka gud reason for praisem Jehovah from hem garem olketa gudfala wei and duim staka gud samting for iumi.

8. Wat nao samfala samting wea iumi savve thankiu lo Jehovah for hem? (Sams 104:12-15, 24)

⁸ Iumi laek for thankiu lo Jehovah tu for olketa nambawan samting wea hem provaedem for iumi. For example, iumi savve talem thankiu for olketa flaoa wea kala blo olketa luk naes tumas, staka difren kaikai wea teist naes, and olketa naes fren blo iumi. Jehovah nao provaedem olketa samting hia and staka nara samting for mekem iumi hapi. (Readim Sams 104:12-15, 24.) Hem barava important tu for thankiu lo Jehovah for staka spiritual kaikai wea hem provaedem for iumi and nambawan hope blo iumi for future.

9. Wat nao savve helpem iumi for no forget for thankiu lo Jehovah? (1 Thessalonica 5:17, 18)

⁹ Hem isi for forget for thankiu lo Jehovah for evri samting wea hem duim for iumi. For iumi no forget, iumi savve raetem list lo olketa samting wea iumi laek  for askem, then bihaen chekim list hia for lukim hao Jehovah ansarem olketa prea blo iumi. Then prea lo hem for talem thankiu for datwan. (Readim 1 Thessalonica 5:17, 18.) Tingim, iumi hapi taem narawan talem thankiu lo iumi. Olsem tu, taem iumi talem thankiu lo Jehovah insaed prea blo iumi, datwan mekem hem hapi. (Col. 3:15) Bat wat nao nara samting wea hem important for thankiu lo God for hem?

10. Olsem 1 Peter 2:21 storyim, why nao iumi shud thankiu lo Jehovah for sendem kam Jesus lo earth?

¹⁰ Readim 1 Peter 2:21. Iumi shud thankiu lo Jehovah for sendem kam spesol Son blo hem for teachim iumi. Taem iumi study abaotem laef blo Jesus, iumi lanem staka samting abaotem Jehovah and hao for mekem hem hapi. Sapos iumi showimaot faith lo ransom sakrifaes blo Jesus, iumi savve fren gud witim Jehovah.​—Rome 5:1.

11. Why nao iumi prea lo Jehovah lo nem blo Jesus?

¹¹ Iumi hapi iumi savve talem olketa prea lo Jehovah lo nem blo Jesus, bikos only thru lo hem Jehovah bae givim iumi wanem iumi ask for hem. Jehovah lisin and ansarem olketa prea wea iumi askem lo nem blo Jesus. Jesus sei: “Bae mi duim eni samting wea iufala askem long nem bilong mi. Bae mi duim diswan for Son hem mekhae long Dadi long heven.”​—John 14:13, 14.

12. Wat nao nara reason iumi garem for thankiu lo Jehovah for Son blo hem?

¹² Jehovah forgivim olketa sin blo iumi bikos lo ransom sakrifaes blo Jesus. Bible sei Jesus hem “hae priest” blo iumi, and “hem sidaon long raet saed long throne bilong God long heven.” (Heb. 8:1) Jesus hem stap witim Dadi lo heven “for helpem iumi.” (1 John 2:1) Iumi thankiu lo Jehovah from hem givim iumi Hae Priest wea minim olketa wik point blo iumi, and wea hem savve “askem God for helpem iumi”! (Rome 8:34; Heb. 4:15) From iumi no perfect iumi bae no fit for prea lo Jehovah sapos Jesus no peim datfala ransom sakrifaes. Iumi luksavve Jehovah duim big samting for iumi taem hem givim kam Son blo hem for dae for iumi, and iumi barava tinghae lo datwan!

13. Lo naet bifor Jesus dae, wat nao hem duim wea showim hem lovem olketa disaepol?

¹³ Lo naet bifor Jesus dae, hem prea for olketa disaepol and askem Dadi blo hem for “lukaftarem olketa mekem Satan no spoelem olketa.” (John 17:15) Datwan showim Jesus lovem olketa tumas! Nomata Jesus savve hem klosap for dae, hem still tingim olketa disaepol blo hem.

14. Hao nao iumi savve showim iumi barava lovem olketa brata and sista?

¹⁴ Iumi laek for followim example blo Jesus wea no tingim hemseleva nomoa. So iumi laek for prea evritaem for olketa brata and sista. Taem iumi duim datwan, iumi obeyim komand blo Jesus for lovem each other, and iumi showim Jehovah iumi barava lovem olketa brata and sista. (John 13:34) Hem gud for prea for olketa bikos Bible sei “prea bilong man wea raeteous hem garem paoa and hem savve barava helpem pipol.”​—Jas. 5:16.

15. Why nao olketa brata and sista needim iumi for prea for olketa?

¹⁵ Olketa brata and sista blo iumi needim  iumi for prea for olketa bikos olketa feisim staka hard samting. Iumi savve askem Jehovah for helpem olketa for deal witim sik, natural disaster, war, persecution and other nara hard samting. Iumi savve prea tu for olketa brata and sista wea waka hard for duim relief waka. Maet iumi savve lo samfala lo olketa brata and sista hia. Bae hem gud for talem nem blo olketa lo prea blo iumi. Taem iumi askem Jehovah for helpem olketa for no givap, datwan showimaot iumi lovem olketa.

16. Why nao iumi shud prea for olketa wea lead lo kongregeson?

¹⁶ Olketa wea lead lo kongregeson and organization blo Jehovah tinghae lo iumi taem iumi prea for olketa, and olketa prea hia helpem olketa tu. Aposol Paul luksavve lo datwan. Hem sei: “Prea tu for mi savve story gud, mekem mi no fraet for story taem mi talemaot datfala holy secret abaotem gud nius.” (Eph. 6:19) Distaem tu iumi garem staka brata wea waka hard for lead lo kongregeson. Iumi showimaot iumi lovem olketa taem iumi askem Jehovah for blessim waka blo olketa.

17-18. Wat nao samfala taem wea iumi bae prea on behalf lo olketa narawan, and wat nao iumi shud tingim?

¹⁷ Samfala taem iumi bae prea on behalf lo olketa narawan. For example, maet wanfala sista invaetem nara sista for kam lo Bible study blo hem and askem hem for prea. Sapos datfala sista no savve gud lo Bible study hia, maet hem laek for prea lo end blo study. Datwan bae helpem hem for savve wanem for storyim lo prea wea bae helpem datfala Bible study.

¹⁸ Maet olketa brata prea lo meeting for field service or lo start or end blo kongregeson meeting. Olketa brata wea garem datfala privilege shud tingim datfala prea hem no for kaonselem kongregeson or for mekem announcement. Taem wea olketa markem for song and prea lo kongregeson meeting hem faev minute nomoa, so brata shud no talem “plande toktok” taem hem prea, especially lo start blo meeting.​—Matt. 6:7.

19. Wat nao bae helpem iumi for redi for day blo Jehovah?

¹⁹ Prea hem shud barava important samting lo laef blo iumi bikos day blo Jehovah for judgem pipol hem klosap. Jesus sei: “So iufala mas gohed for redi and barava prea strong evritaem mekem iufala savve ranawe from olketa samting hia wea bae happen.” (Luke 21:36) Sapos iumi prea evritaem, datwan bae helpem iumi for garem strongfala faith and iumi bae redi for datfala day blo God.

20. Wat nao bae mekem prea blo iumi for olsem incense wea smel naes?

²⁰ Wanem nao iumi storyim lo disfala article? Iumi storyim hao prea hem wanfala privilege and iumi barava tinghae lo datwan. Iumi storyim tu hao olketa main samting wea iumi shud prea abaotem hem olketa samting wea join witim plan blo Jehovah. Iumi shud talem thankiu for Son blo God and olketa gud samting wea Kingdom blo hem bae duim, and iumi prea for olketa brata and sista tu. And iumi savve askem God for need blo iumi, and for helpem iumi lo spiritual wei. Taem iumi tingting gud firstaem abaotem wanem for prea abaotem, iumi showimaot iumi tinghae lo nambawan privilege for prea. Olsem incense wea smel naes, olketa prea blo iumi bae mekem Jehovah hapi.​—Provebs 15:8.