Jesus teachim pipol for stap gud witim each other. Bat wantaem, hem sei lo olketa aposol: ‘No tingse mi kam for mekem evriwan long earth stap long peace. Mi kam for mekem pipol no stap gud tugeta. Mi kam for mekem son againstim dadi, dota hem againstim mami, and dota-in-law againstim mami-in-law.’ (Matt. 10:34, 35) Wat nao disfala toktok blo Jesus minim?

Jesus no laek for mekem olketa famili member for no stap gud tugeta, bat hem savve olketa teaching blo hem bae divaedem samfala famili. So olketa wea laek for followim teaching blo Christ and redi for baptaes, need for savve samfala insaed famili bae no hapi lo disison wea olketa mekem. If hasband or waef, or narawan insaed famili againstim olketa, datwan savve mekem hem no isi for gohed followim wanem olketa lanem lo Bible.

Bible encouragem olketa Christian for “stap gud witim olketa narawan.” (Rome 12:18) Bat olketa teaching blo Jesus savve mekem samfala famili for “no stap gud tugeta.” Diswan savve happen taem wanfala insaed famili followim olketa teaching blo Christ, bat olketa narawan againstim olketa teaching hia. Sapos datwan happen, olketa hia bae kamap olsem “enemy” blo hem.​—Matt. 10:36.

Maet iumi stap witim olketa relative wea no insaed truth and samfala taem iumi need for disaed sapos iumi bae mekem Jehovah and Jesus hapi, or olketa relative. For example, maet olketa relative wea no insaed truth forcem iumi for celebratem Christmas. So hu nao bae iumi laek for mekem hem hapi? Jesus sei: “Man wea lovem tumas dadi or mami winim mi, no fit for disaepol bilong mi.” (Matt. 10:37) Jesus no minim iumi mas stop for lovem parents blo iumi. Jesus showimaot hao nomata olketa lo famili no laekem iumi for worshipim Jehovah iumi bae gohed for lovem olketa, bat iumi luksavve hem barava important for obeyim Jehovah.

Iumi savve sorre tumas taem olketa insaed famili againstim iumi. Bat iumi mas tingim disfala toktok blo Jesus: “Eniwan wea no willing for karem sem post wea mi karem and followim mi, hem no fit for disaepol bilong mi.” (Matt. 10:38) Diswan minim from iumi wanfala Christian, iumi mas acceptim hao samfala lo famili maet againstim iumi. Bat iumi hope from iumi showimaot gudfala wei, datwan bae helpem olketa famili member hia for changem tingting blo olketa and laek for lanem truth.​—1 Pet. 3:1, 2.