1, 2. Wanem nao iumi wanwan mas sure long hem? (Lukim piksa long start bilong study.)

OLSEM iumi storyim finis long lastfala study, Satan sei Jehovah no garem raet for rulim olketa man. Hem sei Jehovah hem nogud ruler and olketa man bae barava hapi sapos olketa rulim olketa seleva. Waswe, samting wea Satan talem hem tru? Tingim sapos olketa man rulim olketa seleva and stap laef for olowe. Waswe, bae olketa hapi winim sapos God rulim olketa? Waswe long iu, bae iu hapi sapos iu bae laef for olowe and no stap anda long rul bilong God?

² Olketa kwestin hia man seleva nao bae ansarem. Iumi evriwan mas ting raonem gud olketa kwestin hia. Taem iumi duim olsem, bae iumi sure Jehovah nomoa garem raet for rul, and iumi fit for sapotim rul bilong hem. Iumi sure long datwan bikos iumi readim long Bible. Iumi bae storyim wanem Bible talem abaotem wei wea Jehovah nomoa garem raet for rulim full universe.

3. Why nao Jehovah hem garem raet for rulim full universe?

³ Jehovah nomoa garem raet for rulim full universe bikos hem olmaeti God and Creator. (1 Chron. 29:11; Acts 4:24) Long  wanfala vision abaotem heven, 144,000 wea bae rul witim Christ olketa sei: “Jehovah, wea iu nao God bilong mifala and wea iu garem bigfala paoa, iu nao fit for kasem glory and for evriwan mekhae long iu bikos iu wakem evri samting, and evri samting hem stap bikos hem nao wanem iu laekem.” (Rev. 4:11) Jehovah wakem evri samting, so hem garem raet for rul ovarem evriwan long heven and long earth.

4. Why nao wei wea man savve disaedem samting seleva no minim hem garem raet for againstim God?

⁴ Satan hem no creatim eni samting. So hem no garem raet for rulim universe. Satan and Adam and Eve olketa bighed and againstim rul bilong Jehovah. (Jer. 10:23) Waswe, wei wea olketa free for disaedem samting seleva givim olketa raet for againstim rul bilong Jehovah? Nomoa. Wei wea man savve disaedem samting seleva hem givim hem raet for chusim and disaedem samting. Bat hem no garem raet for againstim Jehovah, wea hem nao Creator. Tru nao, wei for againstim God hem showimaot iumi no iusim gud wei wea iumi free for disaedem samting seleva. Iumi olketa man needim Jehovah for leadim and rulim iumi.

5. Why nao olketa instruction wea kam from Jehovah hem barava stret?

⁵ Tingim nara samting wea showimaot Jehovah hem garem raet for rul. Hem iusim wei wea hem garem paoa for rul long barava stretfala wei. Hem sei: “Mi nao Jehovah, mi showimaot love, mi raeteous, and mi duim olketa samting wea stret long earth, and mi hapi tumas long olketa samting hia.” (Jer. 9:24) Jehovah no needim law wea olketa man markem for helpem hem disaedem stret samting. Bat hem nao markem standard for wanem hem stret. Olketa law wea hem givim for olketa man for followim hem barava stret. Man wea raetem psalm hem sei: “Justice and raeteous wei hem faondeson long throne bilong iu.” So evri law, principle, and olketa instruction wea kam from Jehovah hem barava stret. (Ps. 89:14; 119:128) Satan sei Jehovah hem nogud Ruler. Bat Satan no savve stretem olketa problem long disfala world.

6. Wanem nao nara samting wea showimaot Jehovah nomoa garem raet for rul?

⁶ Narafala samting wea showimaot Jehovah hem garem raet for rul hem bikos hem garem savve and wisdom for lukaftarem full universe. Iumi savve long diswan from hem givim paoa long Son bilong hem for healim olketa difren kaen sik wea olketa doctor no savve finisim. (Matt. 4:23, 24; Mark 5:25-29) Nomata iumi ting long olketa samting hia olsem olketa mirakol, bat long Jehovah, diswan hem no mirakol bikos hem savve gud long body bilong iumi and hem savve hao for mekem body bilong iumi for kamap gud moa. And tu, hem savve mekem olketa wea dae for laef bak, and hem bae stopem olketa natural disaster for no happen.

7. Why nao Jehovah nomoa hem wise winim eniwan long disfala world?

⁷ Disfala world wea Satan rulim no garem peace, nomata insaed long wanfala kantri or midolwan olketa nara kantri. Jehovah nomoa garem wisdom for mekem full world garem peace. (Isa. 2:3, 4; 54:13) Iumi garem sem tingting olsem aposol Paul wea sei: “Olketa blessing, wisdom, and savve bilong God barava big tumas! Hem hard for iumi barava minim olketa judgment bilong God and olketa wei bilong hem!”—Rome 11:33.

8. Hao nao tingting bilong iu abaotem wei bilong Jehovah for rul?

⁸ Bible storyim Jehovah nomoa hem garem raet for rul. Hem storyim tu hem barava gudfala Ruler bikos hem showimaot love  taem hem rulim olketa man. Taem iumi tingim hao hem “God wea showimaot mercy and hem kaen tumas, hem no savve kros kwiktaem, hem garem bigfala love, and hem evritaem duim wanem hem talem,” datwan helpem iumi for fren gud witim hem. (Ex. 34:6) God respectim and tinghae long iumi. Hem lukaftarem iumi gud. Satan sei Jehovah hem holem bak olketa gudfala samting from olketa wea worshipim Hem, bat datwan hem no tru. God givim kam spesol Son bilong hem for dae for iumi mekem iumi garem hope for kasem laef olowe.—Readim Psalm 84:11; Rome 8:32.

9. Wanem nao showimaot God hem interest long iumi wanwan?

⁹ Jehovah lovem pipol bilong hem olsem wanfala grup. Bat hem barava interest long each wan long olketa. Tingim samting wea happen long taem bilong olketa Israelite. For samting olsem thri handred year, Jehovah iusim olketa judge for leadim olketa, and helpem olketa for winim olketa enemy bilong olketa. Nomata long olketa taem hia, Jehovah still interest long man wanwan. Wanfala long olketa hia hem wanfala woman, wea nem bilong hem Ruth. Hem no wanfala woman long Israel. Hem lusim staka samting long laef bilong hem mekem hem savve worshipim Jehovah. Jehovah rewardim hem and hem marit and hem garem wanfala pikinini boy. And tu, Messiah hem kam from famili laen bilong disfala pikinini. Then Jehovah mek sure laef story bilong Ruth hem stap insaed wanfala buk long Bible, wea hem nao Bible buk Ruth. Tingim feeling bilong Ruth, taem hem bae laef bak and hem savve long olketa samting hia.—Ruth 4:13; Matt. 1:5, 16.

10. Why nao iumi sei Jehovah hem no wanfala raf ruler?

¹⁰ Jehovah hem no wanfala raf ruler. Olketa wea obeyim hem olketa hapi and olketa free. (2 Cor. 3:17) David sei olsem abaotem Jehovah: “Evriwan savve lukim glory bilong hem, olketa nambawan samting abaotem hem, strong and wei for hapi hem long ples wea hem stap.” (1 Chron. 16:7, 27) Ethan wea raetem disfala psalm hem sei: “Jehovah, olketa pipol wea praisem iu olketa hapi. Olketa wakabaot followim laet wea kam from iu. Long full day olketa hapi long nem bilong iu, and raeteous wei bilong iu hem mekhae long olketa.”—Ps. 89:15, 16.

11. Wanem nao savve mekem iumi for sure wei wea Jehovah hem rul hem barava gud?

¹¹ Wei for evritaem ting raonem olketa gud samting wea Jehovah duim for iumi, savve mekem iumi sure wei wea hem rul hem barava gud. Iumi bae garem tingting olsem man wea raetem psalm wea sei: “For stap wanfala day long courtyard bilong iu hem gud winim for stap wan thousand day long nara ples!” (Ps. 84:10) Jehovah nao wakem iumi so hem savve long samting wea bae mekem iumi hapi. Hem kaen tumas and hem givim iumi staka gud samting. Eni samting wea Jehovah laekem iumi for duim hem for helpem iumi. Nomata sapos iumi mas mekem samfala sakrifaes, bae iumi evritaem hapi sapos iumi obeyim Jehovah.—Readim Isaiah 48:17.

12. Why nao iumi sapotim rul bilong Jehovah?

¹² Bible storyim samfala bae bighed and againstim rul bilong Jehovah bihaen long wan thousand year wea Christ hem rul. (Rev. 20:7, 8) Wanem nao bae mekem olketa for duim datwan? Long datfala taem, Satan bae trae for mekem pipol duim samting wea showim olketa tingim olketa seleva. Hem nao samting wea hem savve duim evritaem. Hem bae trae for mekem pipol tingse olketa savve laef olowe nomata olketa no obeyim Jehovah. Bat datwan hem no tru. Hem gud for iumi tingim disfala kwestin: ‘Waswe, bae mi bilivim kaen laea tingting olsem?’ Sapos iumi barava lovem Jehovah and iumi sure  hem gudfala ruler, and hem garem raet for rulim universe, iumi bae barava les long kaen laea tingting olsem. Iumi bae laek for stap anda long rul bilong Jehovah bikos hem showimaot love taem hem rulim iumi olketa man.

13. Hao nao wei for followim example bilong God showimaot iumi sapotim rul bilong hem?

¹³ Olsem iumi storyim finis, Jehovah hem garem raet for rul, and wei wea hem rul hem barava gud. Hem fitim for iumi barava sapotim rul bilong hem. Iumi duim olsem taem iumi faithful long Jehovah and followim example bilong hem. Taem iumi traem best bilong iumi for duim samting wea followim tingting bilong Jehovah, iumi showimaot iumi tinghae and sapotim rul bilong hem.—Readim Ephesus 5:1, 2.

14. Hao nao olketa elder and olketa famili hed savve followim example bilong Jehovah?

¹⁴ Iumi lanem insaed long Bible hao Jehovah hem evritaem showimaot love taem hem iusim paoa bilong hem for rul. Olketa famili hed and olketa elder wea tinghae long rul bilong Jehovah bae followim example bilong hem. Olketa bae no raf or bossim olketa wea stap anda long olketa. Aposol Paul traem best bilong hem for followim example bilong God and Son bilong hem. (1 Cor. 11:1) Hem no mekem olketa narawan feel nogud, or forcem olketa for duim stret samting. Bat hem encouragem olketa for duim stret samting. (Rome 12:1; Eph. 4:1; Philem. 8-10) Datwan showimaot Paul followim example bilong Jehovah. Taem iumi showimaot love long olketa narawan, iumi sapotim rul bilong Jehovah.

15. Hao nao wei for respectim olketa wea leadim iumi showimaot iumi sapotim rul bilong Jehovah?

¹⁵ Iumi sapotim rul bilong Jehovah tu taem iumi respectim and waka tugeta witim olketa wea leadim iumi. Nomata sapos iumi no barava minim gud or agree witim wanfala disison wea olketa mekem, iumi laek for  gohed sapotim olketa. Pipol long world no garem kaen wei olsem, bat iumi wea sapotim rul bilong Jehovah iumi laek for stap anda long rul bilong hem. (Eph. 5:22, 23; 6:1-3; Heb. 13:17) And iumi savve hapi bikos God hem evritaem laekem iumi for kasem gud samting.

16. Hao nao olketa disison wea iumi mekem savve showimaot iumi sapotim rul bilong God?

¹⁶ Olketa disison wea iumi mekem tu savve showimaot sapos iumi sapotim rul bilong God. Jehovah no putim law for evri samting wea iumi duim. Bat hem talemaot tingting bilong hem abaotem olketa samting hia, and diswan helpem iumi for savve wanem iumi shud duim. Olsem example, Jehovah no mekem list bilong olketa kaleko wea iumi shud werem or no werem. Bat hem talem iumi for werem kaleko wea fitim and wea showimaot respect. (1 Tim. 2:9, 10) Hem laekem iumi for ting raonem hao olketa disison wea iumi mekem savve affectim olketa narawan. (1 Cor. 10:31-33) Taem iumi mekem olketa disison followim tingting bilong Jehovah, datwan showimaot iumi tinghae and sapotim rul bilong hem.

17, 18. Wanem nao hasband and waef savve duim for showimaot tufala sapotim rul bilong Jehovah?

¹⁷ Tingim wanfala samting wea hasband and waef savve duim for sapotim rul bilong Jehovah. Tufala wea marit maet kasem samfala hard taem wea tufala no expectim. Maet tufala kasem samfala big problem long marit bilong tufala. Taem tufala ting raonem hao Jehovah deal witim nation bilong Israel bifor, datwan savve helpem tufala. Jehovah sei hem olsem hasband for datfala nation bilong Israel. (Isa. 54:5; 62:4) Staka taem nao olketa Israelite mekem Jehovah feel nogud. Datwan hem olsem wanfala marit wea kasem olketa problem. Nomata olsem, Jehovah no kwiktaem lusim olketa Israelite. Bat hem evritaem forgivim olketa and duim wanem hem promisim.—Readim Psalm 106:43-45.

¹⁸ Olketa hasband and waef wea lovem Jehovah bae traem best for followim example bilong hem. Nomata olketa kasem problem insaed long marit, hem no stret for finisim marit long wei wea no followim Bible. Olketa savve promis wea tufala mekem front long Jehovah hem wanfala serious samting, and Jehovah laekem hasband and waef for stap tugeta for olowe. Sapos wanfala long tufala hem durong, datwan nomoa hem reason from Bible for divorce and for marit moa. (Matt. 19:5, 6, 9) Taem olketa Christian waka hard for mekem marit bilong olketa gohed gud, datwan showimaot olketa sapotim rul bilong Jehovah.

19. Wanem nao iumi shud duim taem iumi mekem wanfala mistek?

¹⁹ Iumi evriwan no perfect and samfala taem iumi duim samting wea mekem Jehovah no hapi. Hem savve long datwan, dastawe hem provaedem ransom sakrifaes bilong Christ for iumi. So taem iumi duim wanfala mistek, iumi shud askem Jehovah for forgivim iumi. (1 John 2:1, 2) Nomata iumi feel nogud long samting wea iumi duim, iumi shud traem best for lane from datwan. Iumi laek for fren gud witim Jehovah bikos hem savve forgivim iumi, and strongim iumi for gohed worshipim hem.—Ps. 103:3.

20. Wanem nao iumi savve duim distaem for sapotim rul bilong Jehovah?

²⁰ Long niu world, evriwan bae stap anda long rul bilong Jehovah and lane abaotem olketa wei bilong hem. (Isa. 11:9) Distaem tu iumi savve lane abaotem olketa wei bilong Jehovah and wanem hem laekem iumi for duim. Klosap nao evriwan bae luksavve God nomoa hem garem raet for rul. So iumi laek for gohed sapotim rul bilong Jehovah distaem, long wei for obeyim hem, faithful for worshipim hem, and traem best bilong iumi for followim example bilong hem.