Waswe, iu readim olketa Wastaoa magasin wea iumi kasem no longtaem go nomoa and ting raonem samting wea iu readim? Sapos olsem, trae for ansarem olketa kwestin hia:

Wanem nao fofala samting iumi savve duim mekem singsing bilong iumi kamap gud?

Iumi savve standap stret and holemap songbuk. Iumi shud brith long stretfala wei. Taem iumi openem gud mouth and sing big, bae iumi savve singsing laod go moa.—w17.11, p. 5.

Wanem nao iumi lanem from olketa ples wea olketa taon for stap sef stap long hem and olketa road wea go long there?

Sixfala taon for stap sef olketa stap long olketa difren ples, and olketa wakem gud olketa road for go long olketa taon hia. Hem isi for man savve kwiktaem kasem long there for stap sef.—w17.11, p. 14.

Why nao ransom wea God givim thru long Jesus hem wanfala nambawan present wea iumi kasem?

Ransom mekem iumi savve kasem wanem iumi barava laekem, wea hem nao for laef olowe, and hem openem wei for iumi kamap free from sin and dae. From God barava lovem olketa pikinini bilong Adam, hem provaedem Jesus for dae for iumi taem iumi sin yet.—wp17.6, p. 6-7.

Hao nao Sams 118:22 hem join witim resurrection bilong Jesus?

Olketa rejectim Jesus olsem Messiah and killim hem dae. Bat for mekem hem kamap main ston long kona, hem mas resurrect.—w17.12, p. 9-10.

Waswe, laen bilong Messiah mas kam from olketa wea garem raet olsem firstborn nomoa?

Samfala taem laen bilong Jesus hem kam from laen bilong firstborn son. Bat, David hem no firstborn son bilong Jesse, nomata olsem, Messiah kam from laen bilong David.—w17.12, p. 14-15.

Wanem nao samfala gud advaes insaed long Bible saed long health?

Law sei, pipol wea garem sik mas stap difren from olketa narawan. Pipol mas wasim gud hand bilong olketa bihaen olketa tasim wanfala dead body. Hem sei tu pipol mas garem proper ples for toilet. Olketa mas circumcisem baby boy long mek-eit day bihaen hem born, bikos long datfala taem nao blood bilong hem strong and waka gud.—wp18.1, p. 7.

Why nao wanfala Christian fit for lovem hemseleva bat no ova tumas?

Iumi mas lovem narawan long sem wei wea iumi lovem iumiseleva. (Mark 12:31) Olketa hasband mas “lovem waef bilong olketa long sem wei wea olketa lovem body bilong olketa seleva.” (Eph. 5:28) Bat sapos man ova tumas for lovem hemseleva, datwan savve spoelem hem.—w18.01, p. 23.

Wanem nao iumi savve duim for gohed strong long spiritual wei?

Iumi need for studyim gud Bible, ting raonem wanem iumi readim and followim wanem iumi lanem. Iumi mas letem holy spirit affectim mind and heart bilong iumi and willing for acceptim help from olketa narawan.—w18.02, p. 26.

Why nao iumi no fit for trustim astrology and pipol wea sei olketa savve long future?

Staka reason stap, bat main reason hem bikos Bible heitim tufala wei hia.—wp18.2, p. 4-5.

Hao nao iumi shud ting long wei for acceptim wanfala invitation for go kaikai long haos bilong samwan?

Sapos iumi acceptim invitation, iumi mas duim wanem iumi promisim. (Sams 15:4) Iumi mas no change mind sapos no eni gudfala reason for duim datwan. Maet man wea invaetem iumi hem waka hard for redyim kaikai.—w18.03, p. 18.

Wanem nao olketa man wea lead savve lanem from example bilong Timothy?

Timothy barava tingim pipol and hem putim Kingdom firstaem. Hem waka hard for Jehovah and hem duim wanem hem lanem. Hem gohed trainim hemseleva and hem depend long holy spirit bilong Jehovah. Olketa elder and olketa narawan tu savve followim example bilong hem.—w18.04, p. 13-14.