1. Hao nao iumi savve followim example blo Dadi blo iumi Jehovah?

JEHOVAH lovem iumi tumas. (John 3:16) Iumi laek for followim example blo hem. Dastawe, iumi trae for showimaot iumi “sorre witim olketa wea safa, lovem olketa brata, tingim and kaen long narawan,” especially olketa wea iumi “garem sem biliv.” (1 Pet. 3:8; Gal. 6:10) Taem wanfala brata or sista insaed spiritual famili blo iumi hem feisim eni challenge wea mekem hem stress, iumi laek for helpem hem.

2. Wanem nao bae iumi storyim lo disfala study?

² Evriwan wea laek for part lo spiritual famili blo Jehovah bae feisim olketa hard taem wea savve kosim stress. (Mark 10:29, 30) Iumi expectim bae iumi deal witim samfala hard taem moa taem end hem kakam klosap. Hao nao iumi savve helpem each other? Bae iumi storyim wanem iumi savve lanem from olketa story lo Bible abaotem Lot, Job, and Naomi. Iumi bae storyim tu samfala hard taem wea olketa brata and sista feisim distaem, and hao iumi savve helpem olketa for deal witim olketa problem wea olketa feisim.

3. Olsem 2 Peter 2:7, 8 storyim, wanem nogud disison nao Lot mekem, and wanem nao kamaot from datwan?

³ Lot mekem wanfala nogud disison taem hem chus for go stap witim pipol lo Sodom wea wei blo olketa barava nogud tumas. (Readim 2 Peter 2:7, 8.) Datfala ples hem barava luk naes, bat Lot kasem olketa nogud samting from disison blo hem for go stap lo there. (Jenesis 13:8-13; 14:12) Luk olsem from waef blo Lot laekem tumas datfala city, or maet hem garem olketa fren lo there, datwan mekem hem for no obeyim Jehovah. Taem fire and salfa foldaon from skae and distroem datfala full area, hem lusim laef blo hem. And tingim tufala gele blo Lot,  tufala engage finis witim tufala man blo Sodom, and tufala man hia tu dae. Lot lusim evri samting wea hem garem, and samting wea nogud go moa, hem lusim tu waef blo hem. (Jenesis 19:12-14, 17, 26) Taem hem kasem evri hard samting hia, waswe Jehovah lusim Lot? Nomoa, Jehovah barava patient witim Lot.

4. Wanem nao pruvim Jehovah hem barava patient witim Lot? (Lukim piksa lo kava.)

⁴ Nomata Lot nao chus for stap lo Sodom, Jehovah barava tingim hem and sendem olketa angel for go sevem hem and famili blo hem. Bat, winim wei for stretawe obeyim warning blo olketa angel for lusim Sodom, Lot gohed for delay. Olketa angel grabim hand blo hem and helpem hem and famili blo hem for ranawe from datfala city. (Jenesis 19:15, 16) Olketa angel talem hem for ranawe go lo olketa maunten. Bat winim wei for Lot obeyim Jehovah, hem ask for go lo nara taon wea stap klosap. (Jenesis 19:17-20) Jehovah hem patient for lisin lo Lot and letem hem for go lo datfala taon. Bat gogo Lot fraet for stap lo there tu, so hem muv go lo olketa maunten, wea hem nomoa sem ples wea Jehovah talem finis for hem go stap. (Jenesis 19:30) Jehovah barava patient witim Lot! Hao nao iumi savve followim example blo Jehovah?

5-6. Taem iumi followim example blo Jehovah, hao nao iumi savve followim wanem 1 Thessalonica 5:14 hem talem?

⁵ Olsem Lot, maet wanfala brata or sista insaed spiritual famili blo iumi, mekem wanfala nogud disison wea kosim problem for hemseleva. Sapos samting olsem happen, wanem nao iumi bae duim? Maet iumi bae laek for sei, ‘samting wea hem plantim datwan nao hem harvestim.’ Datwan hem tru. (Gal. 6:7) Nomata olsem, iumi no laek for talem datwan. Bat, iumi laek for followim hao Jehovah hem helpem Lot. Wanem nao iumi savve duim?

⁶ Jehovah sendem olketa angel, no for warnim Lot nomoa bat for helpem hem for ranawe from nogud samting wea bae kasem Sodom. Olsem tu, iumi maet need for warnim brata blo iumi sapos iumi luksavve hem start for duim samting wea bae mekem hem kasem trabol. Bat, iumi maet need for helpem hem tu. Nomata sapos hem no kwiktaem for followim kaonsel wea hem kasem from Bible, iumi need for patient. Iumi savve olsem tufala angel wea helpem Lot. Winim wei for givap and no laek helpem brata blo iumi, iumi shud trae faendem eni wei for helpem hem. (1 John 3:18) Olsem taem iumi holem hand blo samwan for helpem hem, maet iumi need for duim samting for helpem brata blo iumi for followim olketa gudfala advaes wea hem kasem.—Readim 1 Thessalonica 5:14.

7. Hao nao iumi savve followim example blo Jehovah lo hao hem ting lo Lot?

⁷ Hem isi for Jehovah tingim nomoa olketa mistek blo Lot, bat hem no duim olsem. Jehovah muvim aposol Peter for talem hao Lot hem wanfala raeteous man. Iumi barava hapi bikos Jehovah no savve lukluk lo olketa mistek blo iumi! (Sams 130:1-3) Waswe, iumi ting lo olketa brata blo iumi olsem hao Jehovah ting lo Lot? Sapos iumi ting lo olketa gud samting abaotem olketa brata and sista blo iumi, datwan bae helpem iumi for patient witim olketa. Taem olsem, bae hem moa isi for olketa acceptim help wea iumi laek givim.

8. Wanem nao wei for kaen and sorre lo narawan bae muvim iumi for duim?

⁸ Samting wea kasem Job hem no olsem Lot. Wei wea Job safa, hem no bikos lo eni nogud disison wea hem mekem. Hem kasem staka hard samting, hem lusim evri samting wea hem ownim, hem lusim position wea hem  garem lo community, and hem kasem wanfala barava nogud sik. And samting wea worse go moa, hem and waef blo hem mas deal witim dae blo evri pikinini blo tufala. And tu, thrifala fren blo hem accusim hem. Wanem nao wanfala reason why thrifala laea fren blo hem nating kaen and sorre lo hem? Olketa lukim nomoa samting wea kasem hem, bat olketa no really minim wanem nao happen. From datwan, olketa kwiktaem tingse Job duim samting wea no stret and olketa barava judgem hem. Hao nao iumi savve careful for no duim kaen mistek olsem? Hem gud for luksavve Jehovah nomoa savve lo evri samting wea kasem samwan. Lisin gud lo wanem man wea safa hem storyim. And tu, winim wei for lisin nomoa, trae for minim feeling blo hem. Datwan bae helpem iu for duim samting wea showimaot iu minim feeling blo olketa brata and sista blo iu.

9. Sapos iumi kaen and sorre lo narawan, wanem nao iumi bae no duim, and why nao olsem?

⁹ Wei for kaen and sorre lo narawan bae mekem iumi for no spredim olketa nogud gossip abaotem problem wea olketa narawan feisim. Man wea gossip hem no strongim kongregeson, bat hem mekem kongregeson wikdaon. (Provebs 20:19; Rome 14:19) Hem no garem gudfala tingting and hem no kaen, and olketa toktok blo hem savve katem man wea safa finis. (Provebs 12:18; Eph. 4:31, 32) Hem gud for tingim olketa gudfala wei blo brata or sista blo iumi and ting raonem hao iumi savve helpem hem for deal witim hard samting wea kasem hem!

10. Olketa toktok wea stap lo Job 6:2, 3 hem teachim iumi lo wanem samting?

¹⁰ Readim Job 6:2, 3. Samfala taem, Job talem toktok wea no fitim. Bat bihaen, hem sei samfala toktok wea hem talem hem no  stret. (Job 42:6) Olsem Job, taem man hem deal witim problem wea mekem hem stress, maet hem talem samfala toktok wea hem no fitim and bihaen hem luksavve hem shud no talem datwan. Wanem nao iumi bae duim? Winim wei for iumi feel nogud lo hem, iumi shud kaen lo hem. Iumi mas remember, hem no plan blo Jehovah for iumi garem olketa problem and stress wea iumi feisim distaem. So dastawe, iumi savve minim taem wanfala faithful servant blo Jehovah hem garem bigfala stress, hem savve talem olketa toktok wea hem no stret. Nomata sapos hem talem olketa samting wea no stret abaotem Jehovah or abaotem iumi, iumi no kwiktaem kros lo hem or judgem hem bikos lo wanem hem talem.—Provebs 19:11.

11. Hao nao olketa elder savve followim example blo Elihu taem olketa givim kaonsel?

¹¹ Samfala taem, man wea gohed for deal witim wanfala problem wea mekem hem stress hem need for kasem samfala kaonsel for helpem or stretem hem. (Gal. 6:1) Hao nao olketa elder bae deal witim datwan? Olketa shud followim example blo Elihu, wea barava tingim Job and lisin lo hem. (Job 33:6, 7) Elihu hem minim gud firstaem tingting blo Job bifor hem givim kaonsel lo hem. Olketa elder wea followim example blo Elihu, olketa traem best for lisin and minim situation blo man bifor olketa savve givim kaonsel. Taem olsem, kaonsel wea olketa givim bae kasem heart blo man wea lisin lo olketa.

12. Hao nao dae blo hasband and tufala boy blo Naomi hem affectim hem?

¹² Naomi hem wanfala faithful woman wea lovem Jehovah. Bat bihaen hasband and tufala boy blo hem dae, hem laek for changem nem blo hem for kamap “Mara,” wea minim “Sorre.” (Rut 1:3, 5, 20, 21) Ruth wea hem dota-in-law blo Naomi gohed for stap witim hem taem hem feisim olketa hard taem. Ruth no just duim olketa samting for helpem Naomi, bat hem story kaen lo hem tu. Ruth showimaot hem lovem and sapotim Naomi taem hem talem olketa naesfala toktok wea kam from heart.—Rut 1:16, 17.

13. Why nao olketa wea lusim marit partner lo dae needim sapot blo iumi?

¹³ Taem wanfala brata or sista lo spiritual famili blo iumi hem lusim marit partner lo dae, hem needim sapot blo iumi. Wanfala hasband and waef, tufala olsem tufala tree wea grow tugeta. Taem tufala tree hia gohed grow, rut blo tufala tree hia join tugeta. So taem wanfala tree hem dae, datwan affectim tu nara tree. Olsem tu, taem wanfala marit partner hem dae, datwan bae barava affectim feeling blo partner wea laef. Paula, * wea seke nomoa hasband blo hem dae, hem sei: “Laef blo mi barava change evribit, and mi feel olsem mi no wei nao. Mi lusim best fren blo mi. Mi savve story witim hasband blo mi abaotem evri samting. Mitufala savve hapi tugeta, and hem sapotim mi taem mi feisim olketa hard taem. Hem evritaem lisin lo mi taem mi storyim olketa problem blo mi. Dae blo hem mekem mi feel olsem mi lusim nara haf blo mi.”

14-15. Hao nao iumi savve comfortim samwan wea marit partner blo hem dae?

¹⁴ Hao nao iumi savve comfortim samwan wea marit partner blo hem dae? First samting iumi shud duim, hem for story lo hem, nomata maet datwan no isi or iumi no savve wanem for talem. Paula wea iumi storyim finis, hem sei: “Mi luksavve dae hem samting wea pipol faendem hem hard for deal witim. Maet olketa wari nogud olketa talem eni toktok wea no  fitim. Bat, taem man no talem eni toktok datwan nao hem worse.” Samwan wea sorre hem no expectim staka toktok from iumi. Paula hem sei moa: “Mi barava tinghae taem olketa fren talem olketa smol toktok olsem, ‘Sorre tumas nao.’”

¹⁵ William, wea waef blo hem dae lelebet longtaem go finis, hem sei: “Mi barava tinghae taem olketa narawan storyim olketa gud samting wea waef blo mi duim, diswan encouragem mi bikos mi luksavve evriwan lovem and respectim hem. Datwan hem barava helpem mi tumas. Olketa toktok wea olketa talem hem comfortim mi, bikos waef blo mi hem barava spesol lo mi and hem bin part lo laef blo mi.” Nara widow wea nem blo hem Bianca, hem sei: “Mi kasem comfort from olketa narawan taem olketa prea witim mi and readim wan or tufala Scripture. Olketa story abaotem hasband blo mi, and olketa lisin taem mi storyim hem lo olketa, datwan hem barava helpem mi.”

16. (a) Wanem nao iumi need for duim for man wea lusim samwan wea hem lovem lo dae? (b) Olsem James 1:27 storyim, wanem responsibility nao iumi garem?

¹⁶ Olsem hao Ruth barava sapotim Naomi, iumi tu need for gohed for sapotim man wea lusim samwan wea olketa lovem lo dae. Paula, wea iumi storyim finis, hem sei, “Stretawe bihaen hasband blo mi dae, mi kasem staka sapot from olketa narawan. Bat bihaen samfala taem go pas, evriwan start for busy moa lo normal laef blo olketa. Bat for miseleva, laef hem barava difren nao. Sapos olketa narawan luksavve samwan wea sorre hem needim sapot insaed lo olketa month or year bihaen  lo datfala dae, datwan savve barava help.” Hem tru, evriwan no semsem. Samfala savve kwiktaem change for deal witim samting wea happen. Bat for narawan, evritaem hem duim samting wea hem and partner savve duim tugeta bifor, bae hem ting bak and sorre. Hao pipol deal witim sorre hem difren. Iumi mas remember hao Jehovah hem givim iumi disfala privilege and responsibility for lukaftarem olketa wea marit partner blo olketa dae.—Readim James 1:27.

17. Why nao olketa wea marit partner lusim olketa needim sapot blo iumi?

¹⁷ Samfala hasband or waef mas deal witim bigfala sorre and stress wea kamap taem partner lusim olketa. Joyce wea hasband blo hem lusim hem and tekem nara woman, hem sei: “Pain wea kasem mi bikos lo datfala divorce, hem winim sapos hasband blo mi dae. Sapos hem dae from wanfala accident or sik, datwan hem samting wea hem no chus for duim. Bat, taem hasband blo mi hem chus for lusim mi. Mi feel hem mek shame lo mi and mi iusles nomoa.”

18. Wanem nao iumi savve duim for helpem samwan wea no garem nao eni marit partner?

¹⁸ Taem iumi duim lelebet samting for showimaot iumi kaen lo samwan wea no garem nao marit partner, bae hem luksavve iumi lovem hem. From distaem hem stap seleva, hem barava needim olketa gudfala fren. (Provebs 17:17) Wanem nao iu savve duim for showimaot iu gud fren blo hem? Iu savve invaetem hem for kam kaikai lo haos. And iu savve spendem taem witim hem for duim samfala samting and for waka tugeta lo ministry. Nara samting wea iu savve duim, hem for invaetem hem samfala taem for joinim famili worship. Sapos iu duim olsem, Jehovah bae hapi bikos hem “kolsap long olketa pipol wea i sore tumas” and hem lukaftarem olketa widow.—Sams 34:18; 68:5.

19. Taem iumi tingim samting wea 1 Peter 3:8 talem, wanem nao iumi disaed strong for duim?

¹⁹ Klosap nao, Kingdom blo God bae rulim earth and evri trabol wea kamap distaem bae finis nao. Iumi barava luk forward for datfala taem wea “evrisamting wea hemi hapen bifoa, bae pipol i fogetem finis nao.” (Aesaea 65:16, 17) Go kasem datfala taem, iumi mas gohed for sapotim each other and thru lo toktok blo iumi and wanem iumi duim, iumi showimaot iumi lovem evriwan insaed lo spiritual famili blo iumi.—Readim 1 Peter 3:8.