1. For fitim wanem Colossae 2:4, 8 talem, lo wanem wei nao Satan hem trapim mind blo iumi?

SATAN laekem iumi for againstim Jehovah. For kasem datfala goal, Satan trae for duim samting wea bae affectim tingting blo iumi. Hem trae for trapim mind blo iumi for mekem iumi duim wanem hem laekem. Hem iusim olketa samting wea iumi laekem for trae tanem tingting blo iumi or laea lo iumi mekem iumi followim hem.—Readim Colossae 2:4, 8.

2-3. (a) Why nao iumi shud ting raonem warning wea stap lo Colossae 2:8? (b) Wanem nao bae iumi storyim lo disfala study?

² Waswe, hem isi nomoa for Satan laea lo iumi distaem? Ia, hem savve duim! Tingim hao warning wea Paul talem lo Colossae 2:8 hem no for pipol wea no worshipim God. Hem raetem for olketa Christian wea kasem anointing from holy spirit. (Col. 1:2, 5) Hem isi nomoa for olketa Christian lo datfala taem foldaon lo trap blo Satan, and distaem hem isi go moa for datwan happen lo iumi. (1 Cor. 10:12) Why nao olsem? Olketa torowem kam daon Satan lo disfala earth, and hem barava traem best for laea lo olketa faithful servant blo Jehovah. (Rev. 12:9, 12, 17) And tu, iumi stap lo taem wea wei blo olketa nogud man and olketa man for laea kamap worse go moa.—2 Tim. 3:1, 13.

³ Lo disfala study, iumi bae storyim hao Satan iusim olketa laea tingting blo man for trapim iumi. Iumi bae lane for luksavve lo thrifala “kleva trik” blo hem. (Eph. 6:11) Then lo next study, iumi bae storyim hao for aotem eni nogud tingting blo Satan wea maet affectim iumi. Bat firstaem, bae iumi storyim wanem iumi savve lanem from hao Satan hem trikim olketa Israelite bihaen olketa go insaed lo Promis Land.

4-6. Olsem Diutronomi 11:10-15 storyim, wanem change nao kamap saed lo hao olketa Israelite duim farming lo Promis Land?

⁴ Satan kleva tumas taem hem trae for trikim olketa Israelite for worshipim idol. Wanem nao hem duim? Hem luksavve olketa Israelite mas waka for provaedem kaikai for olketa seleva, so hem iusim datwan for mekem olketa duim wanem hem laekem. Taem olketa Israelite go insaed lo Promis Land, olketa mas lanem olketa niu wei for plantim kaikai. Taem olketa stap lo Egypt, olketa Israelite iusim wata from Nile River for watarem garden blo olketa. Bat lo Promis Land, no eni big river stap klosap so for watarem garden hem depend nomoa lo season blo rain and dew wea savve tuwetem graon. (Readim Diutronomi 11:10-15; Aesaea 18:4, 5) Dastawe, olketa Israelite mas lanem olketa niufala wei for duim farming. Bat hem bae no isi bikos staka wea savve gud hao for plantim garden olketa dae finis taem olketa lo wilderness.

⁵ Jehovah explainim lo olketa Israelite hao laef lo Promis Land bae hem difren so wei wea olketa duim samting bae hem change tu. Then hem talem disfala warning wea maet luk olsem hem nating join witim wei for duim farming. Hem sei: “Yufala mas lukaot gudfala, nogud samfala man laea lo yufala, an pulum yufala fo baodaon an wosipim olketa narafala god.” (Diutronomi 11:16, 17) Why nao Jehovah warnim olketa abaotem wei for worshipim olketa laea god and lo semtaem hem storyim niufala wei for duim farming?

⁶ Jehovah luksavve bae olketa Israelite laek askem samfala teknik lo hao for duim farming from pipol wea stap raonem olketa wea no worshipim Jehovah. Hem tru, olketa  pipol hia savve hao for duim farming lo datfala ples, and olketa Israelite savve lanem samfala gud idea from olketa, bat wanfala danger stap. From olketa farmer lo Canaan worshipim Baal, datwan affectim tingting blo olketa saed lo farming. Olketa tingse Baal nao ownim skae and givim kam rain. Jehovah no laekem pipol blo hem for bilivim kaen laea olsem. Nomata olsem, staka taem olketa Israelite chus for worshipim Baal. (Nambas 25:3, 5; Jajis 2:13; Fas Kings 18:18) Distaem bae iumi lukim hao Satan win for trapim olketa Israelite.

7. Wanem nao testim faith blo olketa Israelite taem olketa kasem Promis Land?

⁷ First teknik Satan iusim, hem nao disfala normal feeling for laekem olketa samting, olsem for laekem rain for watarem garden. Evri year, klosap lo end lo April go kasem September hem no savve rain tumas lo Promis Land. Laef blo pipol and garden blo olketa hem depend lo rain season wea savve start lo October. Satan laea lo olketa Israelite for mekem olketa tingse olketa mas followim kastom blo pipol lo datfala ples mekem olketa garem gudfala laef. Pipol hia bilivim olketa mas duim samfala samting saed lo worship, mekem olketa god blo olketa hapi and givim kam rain wea olketa needim. So olketa wea no garem faith lo Jehovah, duim olketa samting for mekhae lo datfala false god Baal from olketa tingse hem nao only wei for olketa savve kasem rain.

8. Wanem nao mek-tu teknik wea Satan iusim? Explainim kam.

⁸ Mek-tu teknik Satan iusim, hem nao disfala feeling for laekem sex. Pipol wea worshipim olketa false god savve duim olketa rabis samting saed lo sex olsem part lo worship blo olketa. Insaed diswan, olketa garem olketa man and woman wea savve jury lo temple blo olketa. Wei for homosexual and olketa nara kaen wei for duim sex, hem kamap samting wea olketa acceptim and hem kamap normal. (Diutronomi 23:17, 18; Fas Kings 14:24) Olketa pipol hia bilivim dat wei for duim sex olsem part lo worship blo olketa bae muvim god blo olketa for mekem evriting lo land blo olketa for grow gud. Kaen worship olsem wea join witim sex hem switim tingting blo staka Israelite, and datwan mekem olketa for worshipim olketa false god. For tok stret, Satan barava trapim olketa nao.

9. Olsem Hosia 2:16, 17 talem, hao nao Satan mekem olketa Israelite for no luksavve lo Jehovah?

⁹ Mek-thri teknik Satan iusim, hem nao for mekem olketa Israelite konfius abaotem hu nao Jehovah. Lo taem blo profet Jeremiah, Jehovah talemaot hao olketa false profet mekem olketa Israelite for forgetim datfala nem Jehovah bikos lo datfala “god Baal.” (Jeremaea 23:27) Luk olsem, pipol blo God start for no iusim nao nem blo Jehovah, bat olketa changem datfala nem go lo Baal, wea minim “Owner” or “Masta.” Diswan mekem olketa Israelite for konfius lo hu nao Jehovah and hu nao Baal. Taem olsem, hem isi nao for olketa mixim worship blo Jehovah and Baal.—Readim Hosia 2:16, 17 and footnote.

10. Olketa wanem teknik nao Satan hem iusim distaem?

¹⁰ Satan iusim olketa sem teknik tu distaem. Hem trikim pipol thru lo olketa normal feeling for laekem olketa samting, feeling for laekem sex, and wei for konfius abaotem hu nao Jehovah. Distaem bae iumi storyim datfala mek-thri teknik wea Satan iusim.

11. Hao nao Satan mekem pipol konfius abaotem hu nao Jehovah?

 ¹¹ Satan mekem pipol konfius abaotem hu nao Jehovah. Bihaen olketa aposol blo Jesus dae, samfala wea ting lo olketa seleva olsem Christian start for spredim olketa laea teaching. (Acts 20:29, 30; 2 Thess. 2:3) Olketa apostate hia start for mekem pipol konfius abaotem hu nao trufala God. Olsem example, olketa stop for iusim nem blo God insaed Bible and changem witim olketa nara title olsem “Lord.” Taem olketa aotem nem blo God and changem witim “Lord,” datwan mekem hem hard for olketa wea readim Bible for luksavve Jehovah difren from olketa nara “lord” wea Bible storyim. (1 Cor. 8:5) And tu, olketa iusim “Lord” for Jesus and Jehovah, so datwan mekem hem hard for pipol luksavve hao Jehovah and Jesus tufala no semsem, and tufala garem difren position. (John 17:3) Kaen wei for konfius olsem, hem mekem datfala teaching blo Trinity for kamap, bat datfala teaching hem no kam from Bible. From datwan, pipol no minim hu nao God and tingse hem hard for savve lo hem. Bat datwan hem wanfala laea!—Acts 17:27.

12. Wanem nao false religion mekhae lo hem, and olsem Rome 1:28-31 hem explainim, wanem nao kamaot from datwan?

¹² Satan iusim feeling for laekem sex. Lo taem blo olketa Israelite, Satan iusim false religion for mekhae lo sex. Distaem hem duim sem samting tu. False religion acceptim nomoa eni kaen wei for duim sex, and tu, hem sei diswan hem normal samting nomoa. From diswan, olketa wea sei olketa worshipim God nating followim olketa kliafala standard blo God saed lo fasin. Lo leta blo aposol Paul for olketa lo Rome, hem storyim wanem nao kamaot from wei for no followim standard blo God. (Readim Rome 1:28-31.) Samfala lo olketa “rabis samting” wea Paul storyim hem nao evrikaen wei for duim sex wea no stret, insaed diswan hem wei for homosexual. (Rome 1:24-27, 32; Rev. 2:20) Hem barava important for iumi obeyim olketa klia teaching wea stap insaed lo Bible!

13. Wanem nao narafala teknik wea Satan iusim?

¹³ Satan iusim olketa normal feeling for laekem olketa samting. Wanfala normal samting wea iumi evriwan laekem hem nao for lanem hao for waka, mekem iumi savve provaed  for iumiseleva and famili. (1 Tim. 5:8) Staka taem, wei for go lo skul and study hard bae helpem man for duim datwan. Bat iumi mas careful. Lo staka kantri, olketa skul no just teachim man hao for duim samting, bat olketa teachim tu staka difren kaen idea or tingting blo olketa man. Olsem example, olketa savve encouragem olketa student for daotem sapos God hem stap and for no tinghae lo Bible. Olketa savve sei laef hem start from evolution, and man shud bilivim datwan bikos hem nao wanem olketa wea garem big savve olketa bilivim. (Rome 1:21-23) Olketa teaching olsem barava againstim ‘wisdom blo God.’—1 Cor. 1:19-21; 3:18-20.

14. Olketa tingting and idea blo man encouragem wanem samting?

¹⁴ Olketa tingting and idea blo man encouragem wei for againstim or rejectim olketa raeteous standard blo Jehovah. Hem no helpem iumi for garem olketa wei blo holy spirit, bat hem mekem iumi followim “olketa nogud samting wea man laek for duim.” (Gal. 5:19-23) Olketa kaen tingting hia mekem pipol for praod and bikos lo datwan olketa “tingim olketa seleva nomoa.” (2 Tim. 3:2-4) Olketa wei hia barava opposite lo wei for hambol wea hem nao wanem God hem laekem pipol blo hem for garem. (Mektu Samuel 22:28) Samfala brata and sista wea gogo lo university letem tingting and idea blo man for affectim olketa and olketa start for acceptim tingting blo disfala world winim wei for followim tingting blo Jehovah. Bae iumi story raonem wanfala example lo datwan.

15-16. Wanem nao iumi savve lanem from experience blo wanfala sista?

¹⁵ Wanfala sista wea insaed full-taem service  for winim 15 year hem sei: “From mi baptaes finis mi herem and read abaotem olketa danger blo wei for go lo university, bat mi no ting raonem olketa warning hia. Mi tingse olketa kaonsel hia hem no for mi.” Gogo, olketa wanem challenge nao hem mas deal witim? Hem sei: “Wei for studyim olketa course blo mi hem tekem staka taem and strong blo mi, gogo mi no garem taem for story gud lo Jehovah olsem mi duim bifor, bikos mi barava taed mi no savve storyim Bible witim olketa narawan tu, and mi no prepare gud tu for olketa meeting. Bat gud samting nao, taem mi luksavve hae education wea mi busy tumas lo hem, hem spoelem wei wea mi fren witim Jehovah mi disaed for stopem datwan. And hem nao wanem mi duim.”

¹⁶ Hao nao hae education hia affectim tingting blo disfala sista? Hem sei: “Sorre samting nao education wea mi chusim hem mekem mi for ting daonem olketa narawan, especially olketa brata and sista, and mi expectim olketa for duim samting winim wanem olketa fit for duim, and mi no laek for stap tugeta witim olketa. Hem tek longtaem for lusim kaen tingting olsem. Wanem hem happen lo mi lo datfala taem hem showimaot hem barava danger for no followim olketa warning wea iumi kasem from Jehovah and organization blo hem. Jehovah savve gud lo mi winim miseleva, so mi shud lisin lo hem and bae mi no kasem olketa nogud samting olsem.”

17. (a) Wanem nao iumi mas disaed strong for duim? (b) Wanem nao bae iumi storyim lo next study?

¹⁷ Iumi mas disaed strong for no letem olketa iusles toktok and tingting blo pipol lo world blo Satan for trapim iumi. Iumi mas no letem olketa teknik blo Satan for laea lo iumi. (1 Cor. 3:18; 2 Cor. 2:11) No letem Satan for mekem iu konfius abaotem hu nao Jehovah. Followim olketa haefala standard blo Jehovah evritaem. And no letem Satan for trikim iu for no tinghevi lo advaes wea kam from Jehovah. Bat waswe sapos iu luksavve disfala world hem affectim finis tingting blo iu? Next study bae helpem iumi for savve hao for iusim Bible for aotem olketa wei blo iumi and tingting wea stap strong tumas lo mind blo iumi.—2 Cor. 10:4, 5.