STUDY ARTICLE 25
‘Bae Miseleva Nao Lukaotem Olketa Sheepsheep blo Mi’
“Bae mi seleva nao mi lukaotem olketa sipsip blong mi wea i lus olobaot, an lukaftarem olketa.”—ESIKIEL 34:11.
SONG 105 “God Hem Love”
WANEM IUMI BAE STORYIM *
1. Lo wanem wei nao Jehovah olsem wanfala mami wea susum baby blo hem?
“WASWE, yufala tingse woman save fogetem nomoa bebi blong hem wea hemi susum?” Jehovah askem datfala kwestin lo taem blo profet Isaiah. God talem pipol blo hem: “Nomata sapos wanfala woman hemi save fogetem pikinini blong hem, bat mi no save fogetem yufala.” (Aesaea 49:15) Staka taem God no comparem hemseleva witim wanfala mami. Bat lo disfala story hem duim datwan. Jehovah iusim klos feeling wea wanfala mami and pikinini blo hem savve garem for each other for storyim klos feeling wea hem garem for olketa servant blo hem. Staka mami garem sem feeling olsem wanfala sista wea nem blo hem Jasmin, wea sei: “Taem iu susum baby blo iu, iu garem wanfala spesol wei for klos witim hem wea bae stap for olowe.”
2. Hao nao feeling blo Jehovah taem wanfala lo olketa pikinini blo hem isisi go farawe from hem?
2 Jehovah savve taem wanfala lo olketa pikinini blo hem stop for attendim olketa meeting or for duim preaching waka. So tingim, Jehovah mas barava sorre tumas taem staka thousand servant blo hem olketa kamap inactive * each year.
3. Wanem nao Jehovah laekem?
3 Staka brata and sista hia wea inactive, gogo olketa kam bak moa lo kongregeson and iumi hapi tumas lo datwan! Jehovah laekem tumas for olketa hia kam bak, and iumi tu feel olsem. (1 Pet. 2:25) Hao nao iumi savve helpem olketa? Bifor iumi ansarem datfala kwestin, hem gud for iumi savve why nao samfala stop for attendim olketa meeting and share lo ministry.
WHY NAO SAMFALA STOP FOR SERVEM JEHOVAH?
4. Hao nao waka for selen hem affectim samfala?
4 Samfala savve busy tumas lo waka blo olketa for selen. Hung, * wanfala brata wea stap lo Southeast Asia, hem sei: “Mi spendem staka taem and strong blo mi for waka for selen. Mi laea lo miseleva and tingse sapos mi garem staka material samting datwan bae helpem mi for servem Jehovah. So mi waka for staka hour moa. Mi start for missim olketa meeting, then gogo mi stop nao for attendim olketa meeting. Hao Satan designim disfala world hem for mekem man for isisi go farawe from God.”
5. Taem staka problem kasem wanfala sista, hao nao datwan affectim hem?
5 Samfala brata and sista kasem staka bigfala problem wea mekem olketa for wikdaon. Anne wea hem from Britain, hem garem faevfala pikinini. Hem sei: “Wanfala pikinini blo mi hem born disable. Then wanfala lo olketa gele blo mi hem disfellowship and wanfala son blo mi hem start for mental. Mi barava sorre tumas, gogo mi stop for attendim olketa meeting and preaching. Gogo, mi kamap inactive nao.” Iumi barava sorre lo wanem hem happen lo Anne and famili blo hem and olketa narawan wea feisim olketa kaen challenge olsem!
6. Hao nao wei for no followim Colossae 3:13 savve mekem samwan for isisi go farawe from pipol blo Jehovah?
6 Readim Colossae 3:13. Samfala maet feel nogud bikos lo samting wea wanfala brata or sista lo kongregeson duim. Aposol Paul luksavve samfala taem iumi maet garem stretfala reason for “feel nogud” lo wanfala brata or sista. Maet olketa treatim iumi nogud. Sapos iumi no careful, gogo maet iumi bae gohed for kros lo olketa. Kaen wei for feel nogud olsem maet gogo mekem samwan for isisi go farawe from pipol blo Jehovah. Tingim experience blo Pablo, wanfala brata lo South America. Samwan accusim hem lo rong samting wea hem nating duim, and bikos lo datwan hem lusim nao olketa privilege blo hem lo kongregeson. Wanem nao hem duim? Pablo sei: “Mi barava kros tumas, and isisi, mi lusim nao kongregeson.”
7. Hao nao guilty konsens savve affectim samwan?
7 Maet guilty konsens savve mekem samwan wea bin brekem law blo Jehovah for feel olsem hem no fitim nao for God lovem hem. Nomata sapos hem repent and kasem mercy, maet hem feel olsem hem no fitim nao for part lo kongregeson blo God. Wanfala brata wea nem blo hem Francisco hem feel olsem tu. Hem sei: “Mi kasem kaonsel bikos mi durong. Firstaem, mi gohed for attendim meeting, bat gogo mi start for feel sorre tumas and feel olsem mi no fit for stap midolwan pipol blo Jehovah. Konsens blo mi gohed for pokem mi, and mi barava tingse Jehovah no forgivim mi. Gogo, mi stop for go lo meeting and preaching.” Hao nao tingting blo iu abaotem olketa brata and sista wea feisim olketa problem wea iumi just storyim kam? Waswe, iu feel sorre lo olketa? And samting wea moa important, hao nao feeling blo Jehovah abaotem olketa?
JEHOVAH LOVEM OLKETA SHEEPSHEEP BLO HEM
Wanfala Israelite shepherd barava kea for sheepsheep blo hem wea bin lus (Paragraf 8-9 storyim diswan) *
8. Waswe, Jehovah forgetim olketa wea bin servem hem? Explainim.
8 Jehovah no savve forgetim olketa wea bin servem hem bat wea stop for associate witim pipol blo hem for lelebet taem. And tu, hem no forgetim waka wea olketa bin duim for hem. (Heb. 6:10) Profet Isaiah raet abaotem wanfala barava naes tokpiksa wea showimaot hao Jehovah hem kea for pipol blo hem. Hem sei: “Hemi lukaftarem gudfala olketa pipol blong hem, olsem wanfala man hu hemi lukaftarem olketa sipsip blong hem. Ya, hemi olsem man hu hemi karim olketa smolwan long am blong hem.” (Aesaea 40:11) Hao nao datfala Nambawan Shepherd feel taem hem lukim wanfala lo olketa sheepsheep blo hem lus? Jesus showimaot feeling blo Jehovah taem hem ask olsem lo olketa disaepol blo hem: “Hao nao tingting bilong iufala? Sapos wanfala man hem garem 100 sheepsheep bat wanfala hem lus, bae hem mas leavim nara 99 sheepsheep antap long maunten and go lukaotem datwan wea lus, iaman? Hem hapi from hem garem 99 sheepsheep, bat sapos hem faendem moa datfala sheepsheep wea lus, bae hem barava hapi tumas nao.”—Matt. 18:12, 13.
9. Lo Bible, hao nao olketa shepherd savve treatim sheepsheep blo olketa? (Lukim piksa lo kava.)
9 Why nao hem stret for sei Jehovah hem olsem wanfala shepherd? Bikos lo bifor olketa gud shepherd savve barava lukaftarem sheepsheep blo olketa. Olsem example, for David protectim olketa sheepsheep blo hem, hem faetem wanfala lion and wanfala bear. (Fas Samuel 17:34, 35) Wanfala gud shepherd bae luksavve sapos wanfala sheepsheep blo hem lus. (John 10:3, 14) Wanfala shepherd olsem bae lusim 99 sheepsheep blo hem lo wanfala sef ples or askem olketa nara shepherd for lukaftarem olketa, and bae hem go lukaotem nao datwan wea lus. Jesus iusim datfala tokpiksa for teachim iumi wanfala important point, hem nao: “Dadi bilong mi long heven bae no laekem eniwan long olketa disaepol hia for lus.”—Matt. 18:14.
Wanfala shepherd lo Israel bifor lukaftarem sheepsheep blo hem wea lus (Paragraf 9 storyim diswan)
JEHOVAH LUKAOTEM SHEEPSHEEP BLO HEM
10. Olsem Esikiel 34:11-16 storyim, wanem nao Jehovah promis for duim for olketa sheepsheep blo hem wea lus?
10 Jehovah lovem each wan lo iumi, insaed diswan hem olketa sheepsheep wea lus. Thru lo profet Ezekiel, God promisim dat hem bae lukaotem olketa sheepsheep blo hem wea lus, and helpem olketa for kamap gud moa lo spiritual wei. And hem storyim tu olketa samting wea hem bae duim for sevem olketa, wea datwan semsem tu witim wanem olketa Israelite savve duim bifor for faendem eni sheepsheep blo olketa wea lus. (Readim Esikiel 34:11-16.) First samting, shepherd bae go for lukaotem sheepsheep blo hem, wea diswan needim taem and strong. Then, sapos hem faendem datfala sheepsheep wea lus, hem bae tekem kam bak. And tu, sapos datfala sheepsheep hem garekil or hangre, datfala shepherd bae lukaftarem gud datfala animal wea wik, hem bae bandagem olketa garekil blo hem, karem hem, and feedim hem. Olketa elder, wea “lukaftarem olketa sheepsheep bilong God” olketa need for followim sem idea for helpem eniwan wea lusim kongregeson. (1 Pet. 5:2, 3) Olketa elder bae lukaotem olketa, helpem olketa for kam bak lo kongregeson, and showimaot olketa lovem olketa hia taem olketa provaedem sapot wea olketa needim lo spiritual wei. *
11. Wanem nao wanfala gud shepherd luksavve lo hem?
11 Wanfala gudfala shepherd luksavve hao sheepsheep hem savve lus. And sapos wanfala lo olketa sheepsheep blo hem go difren, datfala shepherd bae no raf lo hem. Tingim example wea God showimaot taem hem helpem samfala lo olketa servant blo hem wea start for go farawe from hem.
12. Hao nao Jehovah deal witim Jonah?
12 Profet Jonah ranawe from assignment blo hem. Nomata olsem, Jehovah no kwiktaem for givap lo Jonah. Olsem wanfala gud shepherd, Jehovah sevem hem and helpem hem for kasem bak strong wea hem needim for fulfillim assignment blo hem. (Jona 2:7; 3:1, 2) Bihaen, God iusim wanfala botol-gourd plant for helpem Jonah luksavve lo hao important nao laef blo pipol. (Jona 4:10, 11) Wanem nao leson? Olketa elder mas no kwiktaem for givap lo olketa wea inactive. Bat olketa elder trae for minim wanem nao mekem wanfala sheepsheep for go difren. And taem datfala sheepsheep kam bak lo Jehovah, olketa elder gohed for showimaot olketa lovem and tingim hem.
13. Wanem nao iumi lanem from wei wea Jehovah deal witim man wea raetem Sams 73?
13 Man wea raetem Sams 73 hem feel discourage taem hem lukim hao pipol wea wicked luk olsem olketa garem gud laef. Hem kwestinim wei wea man savve kasem gud samting sapos hem duim will blo God. (Sams 73:12, 13a, 16) Hao nao tingting blo Jehovah abaotem datwan? Hem no judgem datfala man. Bat hem laekem toktok blo man hia for stap insaed lo Bible. Gogo, datfala man wea raetem psalm hem luksavve hao wei for fren gud witim Jehovah hem winim eni nara samting lo laef. (Sams 73:23, 24, 26, 28) Wanem nao leson? Olketa elder shud no kwiktaem for judgem eniwan wea start for daotem dat man savve kasem gud samting from wei for servem Jehovah. Winim wei for judgem olketa, olketa elder mas trae for luksavve why nao samwan talem or duim wanfala samting. Taem olketa elder duim olsem, olketa bae luksavve wanem encouragement from Bible nao fitim need blo olketa.
14. Why nao Elijah needim help, and hao nao Jehovah duim datwan?
14 Profet Elijah ranawe from Queen Jezebel. (Fas Kings 19:1-3) Hem ting dat no eni narawan moa serve olsem profet for Jehovah, and hem feel olsem waka wea hem duim hem iusles nomoa. Elijah feel sorre tumas gogo hem laek for dae nomoa. (Fas Kings 19:4, 10) Winim wei for judgem Elijah, Jehovah helpem hem for luksavve hao ino hemseleva nomoa stap, and hem shud trustim paoa blo God, and staka waka stap yet for hem duim. Jehovah lisin taem Elijah talemaot olketa wari blo hem, and givim hem olketa niu assignment. (Fas Kings 19:11-16, 18) Wanem nao leson? Iumi evriwan, especially olketa elder, shud treatim gud olketa sheepsheep blo Jehovah. Nomata sapos wanfala brata or sista talemaot kros blo hem, or hem talemaot hem feel dat hem no fit for kasem mercy blo Jehovah, olketa elder bae lisin taem hem talemaot wanem lo heart blo hem. Then olketa bae trae for helpem datfala sheepsheep wea lus for luksavve dat Jehovah lovem hem tumas.
HAO NAO IUMI SHUD TING LO OLKETA SHEEPSHEEP BLO GOD WEA LUS?
15. Olsem John 6:39 storyim, hao nao Jesus ting lo sheepsheep blo Dadi blo hem?
15 Hao nao Jehovah laekem iumi for ting lo olketa sheepsheep blo hem wea lus? Jesus showimaot example for iumi. Hem savve dat evri sheepsheep blo Jehovah hem spesol lo eye blo God, so Jesus duim best blo hem for helpem ‘pipol blo Israel, wea olsem olketa sheepsheep wea lus’ for kam bak lo Jehovah. (Matt. 15:24; Luke 19:9, 10) From Jesus hem nambawan shepherd, hem duim best blo hem tu for mek sure no eni sheepsheep blo Jehovah hem lus.—Readim John 6:39.
16-17. Hao nao olketa elder shud feel abaotem wei for helpem olketa wea go difren? (Lukim box “ Feeling blo Sheepsheep wea Lus.”)
16 Aposol Paul encouragem olketa elder lo kongregeson lo Ephesus for followim example blo Jesus. Hem sei: “Iufala tu mas waka for helpem olketa wea wik, and tingim disfala toktok bilong Lord Jesus, ‘Man wea givim samting hem barava hapi winim man wea kasem samting.’” (Acts 20:17, 35) Diswan showimaot olketa elder distaem tu garem spesol responsibility lo diswan. Salvador, wanfala elder lo Spain sei: “Taem mi tingim wei wea Jehovah barava kea for olketa sheepsheep blo hem wea lus, datwan muvim mi for duim best blo mi for helpem olketa. From mi wanfala shepherd, mi barava sure Jehovah laekem mi for lukaftarem olketa hia.”
17 Evriwan wea disfala study storyim wea isisi go farawe from Jehovah, olketa kasem help for kam bak lo hem. Tuday, staka moa lo olketa wea bin lusim kongregeson, olketa tu barava laek for kam bak. Lo next study, bae iumi story raonem olketa samting wea iumi savve duim for helpem olketa kam bak lo Jehovah.
SONG 139 Tingim Taem wea Evri Samting Hem Niu
^ par. 5 Why nao samfala wea faithful for servem Jehovah for staka year finis olketa isisi lusim kongregeson? Hao nao God ting lo olketa? Disfala study article bae ansarem olketa kwestin hia. And tu, bae iumi storyim wanem iumi savve lanem from wei wea Jehovah helpem samfala lo Bible wea start for isisi go difren from hem.
^ par. 2 MINING BLO WANFALA TOKTOK: Wanfala inactive pablisa hem samwan wea no duim eni preaching waka and no givim field service report for sixfala month or winim datwan. Nomata olsem, olketa inactive wan hia still brata and sista blo iumi, and iumi lovem olketa.
^ par. 4 Mifala changem samfala nem.
^ par. 10 Next study bae storyim wanem olketa elder savve duim for followim olketa idea hia.
^ par. 60 PIKSA: Taem wanfala Israelite shepherd hem wari abaotem sheepsheep blo hem wea lus, hem bae go lukaotem and helpem hem for kam bak. Olketa shepherd distaem tu duim sem samting.
^ par. 64 PIKSA: Taem wanfala inactive sista insaed wanfala bas and hem weit for go, hem lukim tufala Witness wea hapi for duim pablik witnessing.
