IUMI barava sure Jehovah gohed for leadim pipol blo hem and provaed for olketa lo spiritual wei lo olketa “last days” distaem. (2 Tim. 3:1) Bat each wan lo iumi need for duim samting. Iumi savve comparem situation blo iumi witim olketa Israelite lo wilderness. Olketa mas duim samting taem olketa herem olketa krae blo trumpet.

Jehovah talem Moses for wakem tufala trumpet from silver “fo kolem kam olketa pipol, an fo mekem saen taem [olketa] mekredi fo muv go long narafala ples.” (Nambas 10:2) Olketa priest savve blowim trumpet lo olketa difren wei for talem pipol wanem for duim. (Nambas 10:3-8) Distaem, pipol blo God kasem direction lo staka difren wei. Bae iumi storyim thrifala wei wea iumi kasem direction wea olsem olketa krae blo trumpet lo bifor. Thrifala wei hia nao, hem taem pipol blo God distaem kasem invitation for go lo olketa big hipap, taem olketa appointed overseer kasem training, and taem samfala change kamap lo olketa theocratic arrangement blo evri kongregeson.

Taem Jehovah laekem evri pipol for hipap tugeta lo front gate lo east saed blo tabernacle, priest bae blowim tufala trumpet evriwan. (Nambas 10:3) Evri tribe, wea camp raonem datfala tabernacle lo fofala grup herem datfala saond. Luk olsem olketa wea camp klosap lo datfala gate bae kwiktaem nomoa olketa arrive. Olketa narawan wea stap lelebet farawe maet needim lelebet taem for kam kasem datfala ples. Nomata olketa stap klosap or farawe, Jehovah laekem evriwan for hipap and kasem gud samting.

Distaem, iumi no hipap lo wanfala tabernacle, bat iumi kasem invitation for go lo olketa hipap blo pipol blo God. Samfala lo olketa hipap hia nao hem olketa regional convention and olketa nara spesol program, lo olketa program olsem iumi savve kasem olketa important information and direction. Evriwea lo world, pipol blo Jehovah enjoyim sem program. So olketa wea acceptim invitation for attendim olketa hipap olsem, olketa part lo wanfala grup wea hapi tumas. Samfala mas travel farawe winim olketa narawan. Bat olketa wea go sei dat olketa barava kasem gud samting from datwan.

Waswe lo olketa isolated grup wea stap farawe from olketa big hipap? From iumi garem technology distaem, olketa hia tu savve kasem gud samting from sem program, and olketa feel olsem olketa part lo olketa bigfala hipap hia. Olsem example, lo wanfala visit blo hedquarter representative, branch lo Benin connectim program for olketa lo Arlit, Niger, wanfala mining taon lo Sahara Desert. Lo datfala taem, 21 brata and sista witim olketa narawan wea interest nao hipap. Nomata  olketa stap farawe, olketa feel olsem olketa part lo 44,131 wea hipap. Wanfala brata raet olsem: “From botom lo heart blo mifala, mifala thankiu tumas for kasem disfala program. Hem mekem mifala savve dat iufala lovem mifala tumas.”

Taem olketa Israelite priest blowim wanfala trumpet nomoa, only olketa chief, wea hed ovarem olketa thousand nomoa bae kam lo tent blo meeting. (Nambas 10:4) Olketa bae kasem information and training from Moses. Datwan bae helpem olketa for duim gud responsibility blo olketa lo each tribe. Sapos iu nao wanfala lo olketa chief hia, waswe, bae iu no traem best for attend and kasem gud samting from datfala meeting?

Distaem, olketa kongregeson elder olketa no waka olsem “chief,” and olketa no bossim sheepsheep blo God wea olketa lukaftarem. (1 Pet. 5:1-3) Bat olketa barava traem best blo olketa for lukaftarem olketa sheepsheep. Dastawe olketa savve hapi for acceptim invitation for kasem samfala training moa, olsem for attendim Kingdom Ministry Skul. Lo each session, olketa elder lanem hao for barava duim gud olketa waka lo kongregeson. Olketa training hia helpem olketa elder and evriwan wea olketa lukaftarem for fren gud witim Jehovah. Nomata iu no savve attendim wanfala lo olketa skul hia, for sure iu gohed for kasem staka gud samting from olketa wea attendim datfala skul.

Lo samfala taem, olketa priest bae gohed blowim trumpet lo wei wea datfala saond bae hae and low. Disfala saond hem minim Jehovah laekem full camp for muv. (Nambas 10:5, 6) Taem datfala camp muv olketa barava organize gud, bat hem wanfala big waka tu. Samfala taem maet samfala Israelite no mas hapi for muv. Why nao olsem?

Maet samfala feel datfala disison for muv hem kamap staka taem tumas and lo taem wea olketa no expectim. Samfala taem datfala cloud bae stap from evening kasem morning nomoa. And lo olketa nara taem, maet datfala cloud bae stap for tufala day, wanfala month, or winim datwan. (Nambas 9:21, 22) And haomas taem nao datfala camp hem muv? Nambas chapter 33 storyim samting olsem 40 taems wea olketa Israelite mas muvim camp blo olketa.

Samfala taem, olketa maet camp lo ples wea shade. Taem olsem olketa hapi bikos datfala wilderness hem wanfala big drae area wea hot tumas. (Diutronomi 1:19) So datwan maet mekem hem no isi for olketa laek muv bikos next ples wea olketa bae muv lo hem maet hem no mas gud.

Taem olketa tribe start for lusim wanfala ples, samfala maet faendem hem hard for patient for taem blo olketa for muv. Evriwan herem krae blo datfala trumpet, bat no evriwan bae go lo semtaem. Datfala saond wea hae and low hem minim first grup blo olketa tribe wea stap lo east olketa shud go nao, wea hem nao Judah, Issachar, and Zebulun. (Nambas 2:3-7; 10:5, 6) Bihaen olketa go, olketa priest blowim moa trumpet for mek-tu grup wea hem thrifala tribe wea camp lo south. Then olketa priest bae gohed duim sem samting go kasem taem evriwan lusim ples.

Taem organization blo Jehovah mekem samfala change maet iu faendem hem no isi for acceptim. Maet iu tingse olketa change hia wea iu no expectim hem staka tumas. Or maet iu laekem olketa arrangement wea stap bifor and iu no laekem hem for change. Nomata wanem reason nao iu garem, iu maet faendem hem hard for gohed patient taem datfala change kamap, and hem tek taem for iu getius lo hem. Nomata olsem, sapos iumi gohed duim wanem iumi savve iumi shud duim, iumi bae lukim hao Jehovah blessim iumi.

Lo taem blo Moses, Jehovah gaedem staka million man, woman, and pikinini for go thru lo wilderness. Sapos hem no duim datwan, olketa bae no laef. Distaem, iumi gohed laef lo spiritual wei bikos Jehovah hem gaedem iumi. Hem helpem iumi for gohed strong! So, iumi evriwan laek for disaed strong for olsem olketa faithful Israelite bifor for gohed obeyim olketa didifren krae blo olketa trumpet!