Olketa verse hia storyim naenfala fasin wea Christian savve garem: ‘Love, hapi, peace, patient, kaen, duim gudfala samting, faith, hambol, and kontrolem seleva.’ Bat, diswan no minim hem nomoa olketa fasin wea spirit blo God savve helpem iumi for garem.

Lukim wanem aposol Paul talem bifor hem storyim olketa wei blo spirit, hem sei: “Olketa nogud samting wea man laek for duim . . . hem nao wei for durong, wei for no klin, nating shame for duim rong samting, worshipim idol, samting wea join witim devildevil, for enemy long narawan, faet, no trustim man, kros, raoa, wei for divaed, wei for followim wanfala man, jealous, wei for drunk, olketa wild party, and olketa kaen samting olsem.” (Gal. 5:19-21) Taem Paul iusim disfala toktok, datwan showimaot staka nara nogud wei stap, olsem olketa wea hem storyim lo Colossae 3:5. Lo sem wei tu, bihaen hem storyim olketa gudfala wei, hem sei: “No eni law hem tambuim olketa [kaen] samting hia.” So Paul no storyim evri fasin wea holy spirit savve helpem iumi for garem.

Iumi savve lukim diswan taem iumi comparem list blo olketa wei blo holy spirit witim toktok wea Paul raetem for kongregeson lo Ephesus, wea sei: “Evri samting wea gud and wea raeteous and stret hem kamaot from datfala laet.” (Eph. 5: 8, 9) Yes, “evri samting wea gud” and raeteous and stret hem part lo “datfala laet,” bat hem part lo olketa wei blo spirit tu.

And tu, Paul encouragem Timothy for “duim samting wea stret, for lovem God, garem faith, garem love, no givap, and for hambol,” wea hem sixfala nambawan fasin. (1 Tim. 6:11) Only thrifala lo olketa fasin hia nomoa (faith, love, and hambol) hem part lo datfala list blo olketa wei blo holy spirit. Nomata olsem, Timothy savve hem bae needim help blo holy spirit for mekem grow olketa nara fasin wea Paul storyim, olsem wei for duim samting wea stret, for lovem God, and wei for no givap.—Lukim tu Colossae 3:12; 2 Peter 1:5-7.

So, Galatia 5:22, 23 hem no listim evri fasin wea wanfala Christian savve garem. Spirit blo God savve helpem iumi for mekem grow naenfala wei blo holy spirit. Bat staka wei moa stap wea iumi need for mekem grow for iumi kamap wanfala mature Christian and “garem niufala wei wea fitim wanem God hem laekem and wea datwan hem barava raeteous and faithful.”—Eph. 4:24.