STUDY ARTICLE 23
“Mifala Laekem Nem Bilong Iu for Holy”
“Lod [Jehovah], bae olketa pipol i save long biknem blong yu [for] olowe.”—SAMS 135:13.
SONG 10 Praisem God Bilong Iumi, Jehovah!
WANEM IUMI BAE STORYIM *
1-2. Olketa wanem topic nao olketa Jehovah’s Witness interest lo hem?
TUFALA barava important situation nao iumi feisim distaem. Wanfala hem abaotem rul blo God, and mek-tu, hem for kliarem nem blo hem from blame. Iumi olketa Jehovah’s Witness interest tumas for storyim olketa topic hia. Bat, iumi shud no ting lo tufala topic hia olsem tufala separate samting, really, rul blo God and wei for mekem nem blo hem holy hem barava join tugeta.
2 Iumi evriwan luksavve nem blo God mas klia from blame. Iumi lanem tu hao iumi need for pruvim dat rul blo Jehovah nao hem best wan. Tufala samting hia evriwan hem important.
3. Wanem nao insaed datfala nem Jehovah?
3 Tru nao, evri samting wea Jehovah duim hem join witim nem blo hem, and insaed diswan hem wei blo hem for rul. So sapos iumi sei disfala problem abaotem wei for kliarem nem blo Jehovah from blame hem important, datwan minim hem important tu for pruvim dat rul blo Jehovah hem best wan. Hao Jehovah rul olsem olmaeti King hem barava join witim nem blo hem.—Lukim box “ Olketa Samting wea Join Witim Wanfala Big Problem wea Kamap.”
4. Wanem nao Sams 135:13 talem abaotem nem blo God, and olketa wanem kwestin nao bae iumi ansarem lo disfala study?
4 Datfala nem Jehovah hem barava spesol. (Readim Sams 135:13.) Why nao datfala nem hem barava important? Wanem laea nao kamap wea spoelem nem blo God lo firstaem? Hao nao God mekem datfala nem for kamap holy? And hao nao iumi savve help for defendim nem blo hem? Bae iumi ansarem olketa kwestin hia.
WANFALA NEM HEM BARAVA IMPORTANT
5. Taem iumi herem hao nem blo God mas kamap holy, wanem nao maet iumi tingim?
5 “Mifala laekem nem bilong iu for holy.” (Matt. 6:9) Datwan nao main samting wea Jesus sei iumi shud prea for hem. Bat wanem nao disfala toktok blo Jesus minim? For mekem samting kamap holy, hem minim for mekem hem klin or pure. Bat samfala maet ting, ‘Nem blo God hem holy, pure, and klin finis, so why nao hem need for kamap holy?’ For ansarem datwan, iumi need for tingim wanem nao hem minim for garem wanfala nem.
6. Why nao nem hem barava important?
6 Wanfala nem hem no just wanfala word wea olketa raetem or talem nomoa. Bible sei: “Gudfala [nem], hemi gud moa winim nambawan oel wea hemi barava smel naes tumas.” (Provebs 22:1; Eklesiastes 7:1) Why nao nem hem barava important? Bikos nem blo man hem join witim hao olketa narawan ting lo hem. So hao olketa raetem wanfala nem or hao olketa talem, hem no really important, samting wea barava important nao hem wanem olketa narawan tingim taem olketa lukim or herem datfala nem.
7. Hao nao pipol spoelem nem blo God?
7 Taem pipol laea abaotem Jehovah, datwan mekem pipol ting lo hem olsem wanfala nogud man. Taem olketa duim datwan, olketa spoelem nem blo hem. Firstaem wea datwan happen, hem lo start lo history blo olketa man. Tingim wanem iumi savve lanem from samting wea happen.
FIRST LAEA WEA SPOELEM NEM BLO GOD
8. Wat nao Adam and Eve savve lo hem, and olketa wanem kwestin nao kamap?
8 Adam and Eve savve lo nem blo Jehovah, and tufala savve lo staka tru samting abaotem hem. Tufala savve hem nao Creator, Man wea givim laef lo tufala, wea givim Paradaes olsem hom for tufala, and wea givim perfect partner lo Adam. (Jenesis 1:26-28; 2:18) Bat waswe, tufala gohed iusim perfect mind wea tufala garem for ting raonem evri samting wea Jehovah duim for tufala? Waswe, tufala gohed for strongim wei wea tufala lovem and tinghae lo Jehovah? Ansa blo olketa kwestin hia showaot klia taem enemy blo God testim tufala.
9. Olsem Jenesis 2:16, 17 and 3:1-5 storyim, wanem nao Jehovah talem lo Adam and Eve, and hao nao Satan twistim datwan?
9 Readim Jenesis 2:16, 17 and 3:1-5. Satan mekem for luk olsem wanfala snek hem toktok, then hem askem wanfala kwestin lo Eve: ‘Waswe, hemi tru wea God hemi bin talem yutufala fo no kaikaim frut blong evri tri long gaden ya?’ Insaed datfala kwestin hem garem wanfala laea wea hem olsem poison wea man no savve lukim. Really, God talem tufala for kaikaim evri tree lo garden, bat wanfala tree nomoa tufala shud no kaikaim. Staka difren tree nao stap wea Adam and Eve savve kaikaim frut blo hem. (Jenesis 2:9) Tru nao, Jehovah barava kaen tumas. Wanfala tree nomoa God tambuim tufala for kaikaim. So kwestin blo Satan hem twistim tru samting wea Jehovah talem. Satan mekem for hem luk olsem Jehovah hem selfish. Maet Eve ting olsem, ‘Waswe, God holem bak samfala gud samting from mi?’
10. Lo wanem wei nao Satan barava tok spoelem nem blo God, and wanem nao kamaot from datwan?
10 Taem Satan askem datfala kwestin, Eve still ting lo Jehovah olsem ruler blo hem. Taem hem ansarem Satan, hem barava talem evri toktok wea God talem hem. And Eve talem tu hao tufala mas no tasim datfala tree. Eve savve finis lo warning blo God, wea sei sapos tufala disobey bae tufala dae. Bat Satan sei: “Hemi no tru ya, yutufala no save dae.” (Jenesis 3:2-4) Lo datfala taem, Satan no haedem moa laea blo hem. Hem barava tok spoelem nem blo God, hem olsem hem talem Eve dat Jehovah hem man for laea. Datfala taem nao Satan kamap devil, wea datwan minim man for laea for spoelem narawan. Hem laea lo Eve, and Eve bilivim hem. (1 Tim. 2:14) Eve barava trustim Satan winim Jehovah. Datwan mekem Eve for mekem wanfala barava rong disison. Hem disaed for no obeyim Jehovah. Hem kaikaim nao frut blo datfala tree wea Jehovah tambuim. Bihaen, Eve givim samfala lo Adam tu.—Jenesis 3:6.
11. Wanem nao Adam and Eve shud duim, bat wat nao tufala fail for duim?
11 Tingim firstaem wanem Eve shud talem lo Satan. Tingim sapos hem sei: “Mi no savve hu nao iu, bat mi savve lo Dadi blo mi Jehovah, and mi lovem and trustim hem. Hem givim mitufala Adam evriting wea mitufala garem. Iu tingse iu hu ia, mekem iu talem nogud samting abaotem hem? Go nao!” Tingim hao Jehovah bae barava hapi tumas for herem dota blo hem talem toktok olsem wea showimaot hem lovem and sapotim hem! (Provebs 27:11.) Bat Eve nating faithful for sapotim Jehovah, and Adam tu olsem. From tufala no lovem Dadi blo tufala, Adam and Eve nating defendim nem blo God from wei wea Satan laea for spoelem hem.
12. Hao nao Satan mekem Eve for daot, and wanem nao Adam and Eve fail for duim?
12 Olsem iumi savve, Satan mekem Eve start for garem daot. Satan mekem Eve for kwestinim sapos God wea nem blo hem Jehovah, hem garem gudfala wei. Adam and Eve fail for defendim nem blo Jehovah and hu nao hem. Datwan mekem hem isi for tufala followim idea blo Satan for againstim Dadi blo tufala. Distaem tu Satan iusim olketa sem teknik. Hem spoelem nem blo God taem hem talem olketa laea abaotem Jehovah. Pipol wea bilivim laea blo Satan bae isi tumas for againstim raeteous rul blo Jehovah.
JEHOVAH MEKEM NEM BLO HEM KAMAP HOLY
13. Hao nao Esikiel 36:23 mekhae lo main message blo Bible?
13 Waswe, Jehovah acceptim nomoa wei wea olketa tok spoelem hem? Nomoa, hem duim samting for defendim hemseleva! Full Bible storyim hao Jehovah gohed for duim samting for kliarem nem blo hem from wei wea olketa tok spoelem lo Eden. (Jenesis 3:15) Tru samting nao, main message blo Bible hem abaotem hao Jehovah bae mekem nem blo hem kamap holy thru lo kingdom wea son blo hem rulim, and hem bae mekem peace and wei for raeteous for kamap moa lo earth. Bible garem information wea helpem iumi for minim hao Jehovah gohed for mekem nem blo hem kamap holy.—Readim Esikiel 36:23
14. Hao nao wei wea Jehovah deal witim samting wea happen lo Eden hem mekem nem blo hem holy?
14 Satan barava waka hard for stopem plan blo Jehovah. Bat evritaem hem nating win. Bible showimaot wanem Jehovah hem bin duim, and datwan pruvim hao no eniwan moa hem olsem Jehovah God. Hem tru, Jehovah barava feel nogud lo wei wea Satan and olketa wea saed witim hem olketa againstim hem. (Sams 78:40) Nomata olsem, hem deal witim datfala challenge lo wei wea showimaot hem wise, patient, and followim justice. Hem showimaot tu bigfala paoa blo hem lo staka difren wei. And winim evri narafala wei hia, love blo hem barava showaot lo evri samting wea hem duim. (1 John 4:8) Jehovah hem evritaem duim samting for mekem nem blo hem kamap holy.
Satan laea lo Eve abaotem Jehovah, and insaed lo staka handred year wea go pas Devil hem gohed for laea for spoelem God (Paragraf 9-10, 15 storyim diswan) *
15. Hao nao Satan laea abaotem nem blo God distaem, and wanem nao kamaot from datwan?
15 Satan still talem olketa laea wea spoelem nem blo God distaem. Olketa laea blo hem mekem pipol daotem sapos God garem paoa, justice, wisdom, and love. Olsem example, Satan trae for mekem pipol bilivim dat Jehovah hem no Creator. And nomata sapos pipol bilivim dat God hem stap, Satan bae trae for mekem olketa for bilivim hao God and olketa standard blo hem strict tumas and no stret. And tu, hem teachim hao Jehovah hem wanfala God wea raf and no tingim pipol, dastawe hem bonem pipol lo hellfire. Taem pipol bilivim olketa laea olsem, bae olketa rejectim raeteous rul blo Jehovah. Go kasem taem wea Satan bae finis, hem bae gohed for laea lo pipol abaotem God and hem bae laek for spoelem iu tu. Waswe, hem bae win?
WANEM IU SAVVE DUIM FOR HELP LO DISFALA BIG PROBLEM
16. Wanem nao iu savve duim wea Adam and Eve fail for duim?
16 Jehovah letem olketa man wea no perfect for share lo waka for mekem nem blo hem kamap holy. Iu savve duim wanem Adam and Eve fail for duim. Nomata iu stap lo disfala world wea fulap witim pipol wea laea and tok spoelem nem blo Jehovah, iu garem chance for sapotim Jehovah and storyim truth abaotem wei wea hem holy, raeteous, gud, and showimaot love. (Aesaea 29:23) Iu savve sapotim rul blo hem. Iu savve talemaot hao wei blo hem for rul nomoa hem stret and hao datfala rul nomoa bae mekem evri samting wea hem creatim for kasem peace and hapi.—Sams 37:9, 37; 146:5, 6, 10.
17. Hao nao Jesus helpem pipol for savve lo nem blo Dadi blo hem?
17 Taem iumi defendim nem blo Jehovah, iumi followim example blo Jesus Christ. (John 17:26) Jesus helpem pipol for savve lo nem blo Dadi blo hem taem hem iusim datfala nem and taem hem showimaot klia hu nao Jehovah. Olsem example, hem talem samting wea barava difren from olketa Pharisee wea mekem Jehovah for luk olsem hem raf, strict tumas, hard for fren witim, and no savve forgive. Jesus helpem pipol for savve Dadi blo hem kaen, patient, showimaot love, and savve forgive. And samting wea Jesus duim evriday, hem barava showimaot evri wei blo Dadi blo hem, diswan helpem tu pipol for savve lo Jehovah.—John 14:9.
18. Hao nao iumi savve aotem olketa laea wea pipol talem abaotem Jehovah?
18 Olsem Jesus, iumi savve sharem savve wea iumi garem abaotem Jehovah lo olketa narawan taem iumi teachim hao God hem kaen and lovem pipol. Taem iumi duim olsem, iumi aotem olketa laea wea pipol talem abaotem Jehovah. Iumi mekem nem blo Jehovah kamap holy lo mind and heart blo pipol. Iumi savve followim tu example blo Jehovah. Iumi savve duim datwan nomata iumi no perfect. (Eph. 5:1, 2) Taem samting iumi talem and duim hem showimaot olketa wei blo Jehovah, iumi help for mekem nem blo hem kamap holy. Iumi kliarem nem blo Jehovah from blame taem iumi helpem pipol for kamap free from olketa rong idea wea olketa garem abaotem God. * Iumi pruvim tu hao nomata olketa man no perfect olketa savve gohed faithful.—Job 27:5.
Iumi laek helpem Bible student blo iumi for savve dat Jehovah hem man wea kaen and showimaot love (Paragraf 18-19 storyim diswan) *
19. Hao nao Aesaea 63:7 savve helpem iumi for luksavve lo main goal blo iumi taem iumi teach?
19 Tingim nara important samting wea iumi savve duim. Taem iumi teachim truth from Bible lo olketa narawan, staka taem iumi mekhae lo rul blo God, hao Jehovah nomoa garem raet for rulim full universe, and datwan hem barava tru. Bat, taem iumi teachim olketa law blo God, main goal blo iumi hem for helpem pipol for lovem Dadi blo iumi Jehovah, and for faithful lo hem. For duim datwan, iumi need for mekhae lo olketa gudfala wei blo Jehovah thru lo wei for storyim wanem kaen Man nao hem. (Readim Aesaea 63:7.) Sapos iumi teach lo wei olsem, iumi bae helpem olketa narawan for lovem Jehovah and for obeyim hem bikos olketa laek for faithful lo hem.
20. Wanem nao bae iumi storyim lo next study?
20 So hao nao iumi savve mek sure wei blo iumi and wanem iumi teachim hem mekem olketa narawan for tinghae lo nem blo Jehovah and mekem olketa laek for servem hem? Lo next study bae iumi ansarem datfala kwestin.
SONG 2 Nem Bilong Iu Hem Jehovah
^ par. 5 Wanfala big problem kamap wea affectim evri man and angel. Wanem nao datwan? Why nao datfala problem hem big samting tumas, and hao nao iumi tu insaed datwan? Ansa blo olketa kwestin hia and olketa nara kwestin wea kamap, bae helpem iumi for strongim wei wea iumi fren witim Jehovah.
^ par. 18 Samfala taem, olketa pablikeson blo iumi teachim hao no eniwan hem kwestinim raet blo Jehovah for garem datfala nem, so iumi no need for kliarem or [vindicate-im] datfala nem. Bat lo 2017 annual meeting, olketa storyim klia disfala point. Chairman hem sei: “For tok stret, hem no rong for iumi prea for nem blo Jehovah for mas klia from blame, bikos really, iumi need for kliarem nem blo Jehovah from blame.”—Lukim January 2018 program lo jw.org®. Go lo LIBRARY > JW BROADCASTING®.
^ par. 62 PIKSA: Devil tok spoelem God, hem talem Eve dat God hem man for laea. Insaed staka handred year wea go pas, Satan mekhae lo staka false idea, olsem teaching wea sei God hem raf and ino hem nao creatim iumi olketa man.
^ par. 64 PIKSA: Wanfala brata conductim Bible study, and hem mekhae lo olketa gudfala wei wea God garem.
