Paul raet olsem: “Bikos long law mi dae. Mi dae long wei wea mi finis for followim law. Datwan hem for mi savve laef for worshipim God.”—Gal. 2:19.

Wanem Paul raetem lo hia hem join witim main point wea hem laek for teachim lo olketa kongregeson lo Galatia. Samfala man lo there talem olketa Christian for olketa sev olketa mas followim Law blo Moses, especially for man mas circumcise. Samfala Christian start for agree witim wanem olketa hia teachim. Bat Paul savve God no expectim olketa Christian for mas circumcise. Hem storyim hao olketa teaching hia no stret, and hem encouragem olketa Christian for showimaot faith lo ransom sakrifaes blo Jesus Christ.—Gal. 2:4; 5:2.

Bible talem taem man hem dae hem nating savve lo eni samting bikos laef blo hem finis nao. (Eklesiastes 9:5) So taem Paul sei: “Bikos lo law mi dae,” hem minim Paul finis for followim Law blo Moses. And taem hem sei hem “laef for worshipim God” hem minim hem garem faith lo ransom sakrifaes blo Jesus.

Paul sei “bikos lo law” hem “laef for worshipim God.” Hao nao olsem? Bifor hem storyim datwan, hem sei “man wea garem faith long Christ Jesus nomoa hem raeteous long tingting bilong God, no man wea followim law.” (Gal. 2:16) Paul explainim lo olketa Christian lo Galatia why God givim datfala Law. Hem sei: “Law hem for showimaot olketa rong samting wea pipol duim go kasem taem wea datfala pikinini hem kam wea hem kasem datfala promis.” (Gal. 3:19) Law showimaot klia no eniwan fit for followim evri samting wea Law talem bikos iumi sin, and iumi needim ransom sakrifaes blo Jesus. So Law helpem olketa Jew for luksavve olketa needim “datfala pikinini” wea hem nao Jesus, for dae for olketa. Taem olketa showimaot faith lo Jesus Christ, lo tingting blo God olketa raeteous. (Gal. 3:24) From Paul showimaot faith lo Jesus hem kamap raeteous lo tingting blo God. Dastawe Paul savve sei “bikos lo law mi dae” and mi kamap “laef for worshipim God.” Nomata Paul finis for followim law hem stap anda lo God.

Paul storyim sem subject taem hem raetem leta for olketa Christian wea stap lo Rome. Hem sei: “Iumi free from Law bikos hem no garem paoa ovarem iumi nao.” (Rome 7:6) Lo disfala scripture and lo Galatia 2:19, Paul no storyim hem bae dae from hem no keepim Law and datwan mekem hem for sin. Bat hem sei hem free from Law, and Law no garem paoa ovarem hem and olketa nara Christian. From olketa garem faith lo ransom, olketa free from datfala law.