1. Wanem nao Jehovah duim for each wan lo iumi?

JEHOVAH leadim each wan lo iumi kam lo hem. (John 6:44) Datwan minim taem Jehovah lukluk lo heart blo evriwan, hem lukim gud samting lo heart blo iumi and hem luksavve iumi savve fren witim hem. (Fas Kronikols 28:9) Diswan showimaot Jehovah savve lo iumi, minim iumi, and hem lovem iumi. Iumi barava tinghae lo datwan!

2. Hao nao Jesus showimaot Jehovah lovem evriwan lo kongregeson?

² Jehovah lovem iu and evri nara brata and sista lo kongregeson. Jesus mekhae lo diswan taem hem comparem Jehovah witim wanfala shepherd. Sapos shepherd garem 100 sheepsheep and wanfala hem lus, wanem nao bae hem duim? Hem bae “leavim nara 99 sheepsheep antap long maunten and go lukaotem datwan wea lus.” Taem shepherd faendem sheepsheep wea lus, bae hem no kros, bat bae hem barava hapi. Wanem nao iumi lanem? Evriwan lo kongregeson hem important lo Jehovah. Jesus sei Dadi blo hem “no laekem eniwan long olketa disaepol hia for lus.”—Matt. 18:12-14.

3. Wanem nao bae iumi storyim lo disfala study?

³ Iumi no laek for mekem olketa brata or sista for stambol. Wanem nao bae helpem iumi for no duim datwan? And wanem nao iumi savve duim sapos samwan mekem iumi feel nogud? Bae iumi ansarem olketa kwestin hia lo disfala study. Bat firstaem bae iumi story abaotem hu nao olketa disaepol wea Matthew chapter 18 storyim.

4. Hu nao olketa disaepol wea Matthew 18:10 storyim?

⁴ Olketa disaepol hia hem minim evriwan wea followim Jesus. Nomata wanem nao age blo olketa, Jesus sei olketa mas garem wei blo “smol pikinini,” wea minim olketa laekem Jesus for teachim olketa. (Matt. 18:3) So nomata iumi kam from difren ples and garem difren culture, wei and tingting, iumi evriwan showimaot faith lo Christ, and Jesus barava lovem iumi.—John 1:12.

5. Hao nao Jehovah hem feel taem samwan treatim iumi nogud or mekem iumi stambol?

⁵ Jehovah lovem evriwan wea followim Jesus. Iumi savve comparem datwan witim hao parents lovem pikinini. Olketa laek for protectim pikinini bikos hem no strong, and hem no garem savve olsem bigman. Olketa parents savve feel nogud sapos olketa lukim samwan treatim nogud pikinini. Olsem tu, Jehovah laek for protectim iumi, and hem savve feel nogud sapos hem lukim samwan treatim iumi nogud or mekem eniwan wea worshipim hem for stambol!—Aesaea 63:9.

6. Olsem 1 Corinth 1:26-29 storyim, hao nao pipol lo world ting lo olketa disaepol blo Jesus?

⁶ Wanem nao nara wei olketa disaepol blo Jesus olsem “smol pikinini”? Pipol lo world interest lo olketa wea rich, garem bignem, or hae position, bat olketa tingse iumi no important, olsem iumi smol pikinini. (Readim 1 Corinth 1:26-29.) Bat Jehovah no garem datkaen tingting abaotem pipol blo hem.

7. Hao nao iumi shud ting lo olketa brata and sista?

⁷ Jehovah lovem evriwan wea worshipim hem, nomata olketa wea just kam insaed lo truth or olketa wea stap lo truth for staka year finis. Iumi tu shud lovem evri brata and sista lo kongregeson, no samfala nomoa. (1 Pet. 2:17) Iumi laek for tingim and protectim olketa brata and sista blo iumi. Sapos iumi luksavve iumi mekem samwan feel nogud, iumi shud no tingse datwan wari blo hem and act olsem no eni samting hem happen. Maet wanem nao samfala reason olketa brata and sista savve feel nogud lo samting iumi talem or duim? Samfala ting daonem olketa seleva from olketa growap lo famili wea narawan savve tok daonem olketa. And samfala wea niu lo truth no savve hao for deal witim wik point blo olketa lo kongregeson. Nomata wanem nao reason brata or sista feel nogud, from iumi luksavve hem feel nogud lo iumi, iumi mas trae for stretem datwan. Bat sapos hem wei blo iumi for kwiktaem feel nogud lo narawan iumi shud waka hard for changem datwan. Sapos iumi duim olsem, iumi bae hapi and fren gud witim olketa narawan.

8. Hao nao tingting blo olketa Jew affectim tingting blo olketa disaepol blo Jesus?

⁸ Why nao lo Matthew 18:10 Jesus talem olketa disaepol blo hem for “no les” lo olketa nara disaepol? Bikos olketa showimaot olketa laek for winim narawan taem olketa sei: “Hu nao man wea important winim olketa narawan long Kingdom bilong God?” (Matt. 18:1) Lo datfala taem, olketa Jew barava tinghae lo man wea garem hae position. Wanfala savveman sei: “Olketa laekem tumas for garem hae position and for pipol respectim and mekhae lo olketa.”

9. Wanem nao olketa disaepol blo Jesus mas duim?

 ⁹ Jesus savve hem wei blo olketa Jew for laek winim narawan, so olketa disaepol mas waka hard for aotem datkaen tingting. Jesus sei: “Man wea tingse hem bigman long iufala, hem mas olsem lastborn long iufala, and man wea hem leader bilong iufala mas olsem man for helpem iufala.” (Luke 22:26) So Jesus showimaot iumi shud “ting long narawan olsem hem winim [iumi].” (Phil. 2:3) Taem iumi garem datkaen tingting, bae iumi no ting daonem narawan and mekem hem stambol.

10. Wanem kaonsel blo Paul nao hem important for ting raonem?

¹⁰ Evri brata and sista gud winim iumi lo samfala samting. Bae iumi luksavve lo datwan taem iumi tingim olketa gudfala wei blo olketa. Hem important for ting raonem disfala kaonsel wea aposol Paul talem for olketa lo Corinth: “Wanem nao mekem iu gud winim narawan? Evri samting wea iu garem, God nao givim long iu. Sapos olsem, hao nao iu tok praod and sei no eniwan givim iu olketa samting hia?” (1 Cor. 4:7) So iumi shud no laekem pipol for mekhae lo iumi or tingse iumi gud winim narawan. Olsem example, sapos brata savve tumas for givim naes tok or sista savve tumas for startim olketa Bible study, olketa shud mekhae lo Jehovah.

11. Wanem nao iumi lanem from tokpiksa blo Jesus abaotem king and wakaman blo hem?

¹¹ Bihaen Jesus talem olketa disaepol for no les lo olketa narawan, hem storyim tokpiksa abaotem king and wakaman blo hem. King talem wakaman hia for no changem bak bigfala kaon wea hem no fit for peim bak. Bat then datfala wakaman forcem nara wakaman for peim bak smol selen wea hem kaonem. Bihaen datwan, king putim wakaman wea no showimaot mercy lo prison. Wanem nao iumi lanem from datfala tokpiksa? Jesus sei: “So Dadi bilong mi long heven bae duim olsem long iufala tu sapos iufala no barava forgivim brata bilong iufala.”—Matt. 18:21-35.

12. Wanem nao savve happen sapos iumi no forgivim narawan?

¹² Hao nao samting wea datfala wakaman duim affectim olketa narawan? First samting, mek-tu wakaman safa bikos first wakaman “talem olketa for putim hem long prison go kasem taem hem changem bak kaon bilong hem.” Mek-tu samting, “taem olketa nara wakaman lukim diswan, olketa barava feel nogud.” Samting wea iumi duim tu savve affectim olketa narawan. Taem samwan treatim iumi nogud, wanem nao savve happen sapos iumi no forgivim hem? First samting, maet hem sorre from iumi no kaen and les for story lo hem. Mek-tu samting, from olketa brata and sista lukim iumi les lo hem, bae olketa feel nogud.

13. Wanem nao iumi lanem from example blo wanfala pioneer?

¹³ Taem iumi forgivim olketa brata and sista bae olketa and iumi tu savve kasem gud samting. Tingim example blo pioneer sista wea nem blo hem Crystal. Hem wiki lo nara sista lo kongregeson. Crystal sei: “Toktok blo sista hia savve mekem mi barava feel nogud. Mi no laek for waka witim hem lo preaching waka, and gogo mi no enjoyim ministry.” Nomata Crystal garem gudfala reason for feel nogud, hem no laek for kros lo sista hia. So Crystal readim article lo Wastaoa blo October 15,  1999 wea garem title “Forgive From Heart Bilong Iu.” Hem followim kaonsel lo datfala article and hem forgivim sista hia. Crystal sei: “Bihaen mi forgivim hem, mi start for hapi moa and mi enjoyim ministry. Mi luksavve evri brata and sista gohed waka lo wik point blo olketa and Jehovah forgivim iumi evriday.”

14. Olsem Matthew 18:21, 22 storyim, wanem nao maet hem no isi for aposol Peter duim, and wanem nao iumi lanem from samting Jesus talem Peter?

¹⁴ Iumi shud forgivim narawan, bat samfala taem hem no isi. Maet hem no isi for aposol Peter tu. (Readim Matthew 18:21, 22.) Wanem nao savve helpem iumi for forgivim narawan? First samting, tingim hao Jehovah hem barava willing for forgivim iumi. (Matt. 18:32, 33) And Jehovah forgivim iumi nomata iumi no fit for kasem datwan. (Sams 103:8-10) Iumi luksavve tu, from “God lovem iumi . . . iumi mas lovem iumi evriwan.” So iumi mas forgivim narawan, bikos datwan showimaot iumi lovem olketa brata and sista. (1 John 4:11) Mek-tu samting, tingim gud samting wea bae kamaot from iumi forgivim narawan. Bae man wea iumi forgivim no wikdaon, bae kongregeson stap gud tugeta, bae iumi gohed fren gud witim Jehovah, and iumi tu bae hapi. (2 Cor. 2:7; Col. 3:14) Last samting wea bae helpem iumi for forgivim narawan, hem for prea lo Jehovah. Askem hem for no letem Satan for spoelem wan mind lo kongregeson. (Eph. 4:26, 27) Iumi needim Jehovah for helpem iumi for forgivim narawan.

15. Wanem nao Colossae 3:13 sei iumi mas duim sapos brata or sista mekem iumi feel nogud?

¹⁵ Hao sapos wanfala brata or sista duim samting wea mekem iumi feel nogud?  Wanem nao iumi bae duim? Trae for stretem datwan. Prea lo Jehovah and askem hem for helpem datfala brata or sista. And askem Jehovah for helpem iumi tingim olketa gudfala wei wea Jehovah lukim lo datfala brata or sista. (Luke 6:28) Sapos iumi gohed for tingim wanem datfala brata or sista duim, then hem gud for go story witim hem. Tingim, staka taem olketa brata and sista no min for mekem iumi feel nogud. (Matt. 5:23, 24; 1 Cor. 13:7) Bat hao sapos hem no laek mek peace? Bible sei for “evritaem forgivim” narawan. (Readim Colossae 3:13.) Barava important samting nao, hem for no gohed kros lo brata or sista blo iumi from datwan savve spoelem hao iumi fren witim Jehovah. From iumi barava lovem Jehovah, bae iumi no letem narawan for mekem iumi stambol.—Sams 119:165.

16. Wanem nao each wan lo iumi mas duim?

¹⁶ Iumi wan mind for worshipim Jehovah and iumi hapi for insaed “wanfala sekson” wea stap anda lo wanfala shepherd! (John 10:16) Datfala buk Organized to Do Jehovah’s Will, lo page 165 sei: “Iumi kasem gud samting taem iumi garem wan mind, so each wan lo iumi mas waka hard for wan mind.” Dastawe “iumi laek followim example blo Jehovah wea lukluk for olketa gudfala wei blo olketa brata and sista.” Jehovah lovem evriwan wea followim Jesus, and hem laekem iumi for duim sem samting. Waswe, hem nao hao iu ting lo olketa brata and sista? Sapos olsem, Jehovah lukim and tinghae lo wanem iu duim for helpem olketa wea followim Jesus.—Matt. 10:42.

17. Wanem nao iumi mas no duim?

¹⁷ From iumi lovem olketa brata and sista, iumi no laek for “duim eni samting wea savve mekem wanfala brata for sin” or for stambol. (Rome 14:13) Iumi ting lo olketa brata and sista olsem olketa winim iumi, and iumi laek for barava forgivim olketa. Iumi no laek letem olketa narawan for mekem iumi stambol. Bat iumi laek for “traem best for stap gud witim nara pipol and duim olketa samting wea savve strongim narawan.”—Rome 14:19.