HEM wei blo olketa Israelite for givim contribution for sapotim tru worship. Bat lo taem blo Jesus olketa Jew mas peim staka difren kaen tax, and datwan hem bigfala hevi for olketa.

For sapotim waka lo tabernacle and temple, each man wea winim 20 years mas peim tax for temple evri year wea hem tufala drachma coin. Lo first century, olketa iusim datfala selen for olketa sakrifaes and for keepim gud temple wea Herod buildim bak. Samfala Jew askem Peter sapos Jesus peim tufala drachma hia. Jesus willing for peim datfala tax bikos hem talem Peter wea for faendem silver coin for peim tax for hem and for Peter.—Matt. 17:24-27.

Nara samting, olketa Jew givim wan tenth lo wages (tithe) and wan tenth lo kaikai wea olketa growim. (Levitikas 27:30-32; Nambas 18:26-28) Olketa bigman blo Jew religion forcem olketa for mas givim wan tenth lo evri vegetable, nomata smol samting olsem “mint and dill and cumin.” Jesus no sei hem rong for givim tithe bat hem sei olketa Pharisee ova tumas lo wanem olketa askem.—Matt. 23:23.

Lo first century, olketa blo Rome rulim olketa Jew, so olketa mas peim tax lo olketa tu. Wanfala tax hia hem for land wea olketa Jew ownim, and olketa savve peim selen or givim nara samting. Olketa divaedem price blo land lo 4 or 5 for wakemaot haomas olketa shud peim. Olketa Jew mas peim nara tax lo king. Olketa Pharisee askem Jesus abaotem datfala tax, and Jesus sei hem stret for peim. Hem sei: “Givim go bak long King samting wea hem bilong King, and givim go bak long God samting wea hem bilong God.”—Matt. 22:15-22.

Pipol mas peim tax tu lo eni samting wea olketa kasem from or sendem lo nara ples. Gavman tekem selen hia lo wharf, taon, market, or border wea garem bridge or road.

Olketa wea gavman blo Rome rulim mas peim staka tax. Tacitus, wea raet abaotem history blo Rome sei taem King Tiberius rul lo first century, “olketa lo Syria and Judæa askem gavman for daonem olketa tax bikos hem tumas nao.”

Nara samting wea mekem hem hard for pipol hem from olketa mas peim extra selen lo olketa wea kolektem tax. Man wea peim bigfala selen bae kasem datfala waka for kolektem tax. Then hem bae peim olketa narawan for go kolektem olketa tax. Evriwan hia laek for mek profit from disfala waka. Luk olsem Zacchaeus garem olketa wakaman wea kolektem tax for hem. (Luke 19:1, 2) Dastawe pipol no laekem disfala arrangement and les lo olketa wea kam kolektem tax.