WANFALA sista wea nem blo hem Lisa * sei: “Samting wea mi laekem tumas abaotem olketa brata and sista hem hao olketa savve kaen tumas.” Lisa sei datwan nao mekem hem interest lo truth. Anne, nara sista talem sem samting. Hem sei: “Firstaem mi no interest tumas lo wanem olketa Witness teachim, bat mi tinghae lo hao olketa kaen lo mi.” Distaem tufala sista hia barava laek for readim Bible and ting raonem, bat firstaem samting wea mekem tufala for interest lo truth hem from olketa Witness kaen lo tufala.

Hao nao iumi savve kaen lo narawan? Bae iumi storyim tufala wei wea iumi savve duim datwan. First wan, hem for story kaen lo pipol, and mek-tu, hem for duim samting for helpem olketa. Then bae iumi storyim hu nao iumi shud kaen lo olketa.

Gudfala waef wea Proverbs chapter 31 storyim, hem story kaen. (Prov. 31:26, NWT) Hem no tok raf and hem talem olketa gudfala toktok. Olketa hasband and dadi tu shud story kaen. Olketa parents savve taem olketa tok raf and no tok kaen, datwan savve mekem pikinini feel nogud and bae hem no laek followim wanem olketa talem. Taem olketa parents story kaen lo pikinini, bae hem isi for pikinini herem and obeyim olketa.

Nomata iumi parents or nomoa, wat nao bae helpem iumi for story kaen? First part lo Proverbs 31:26 (NWT) helpem iumi for savve lo datwan. Hem sei: “Hem savve talem olketa wise toktok.” So hem important for chusim gud toktok wea iumi bae talem and talem lo kaenfala wei. Bae hem gud for tingim: ‘Waswe, toktok blo mi bae mekem narawan feel nogud, or bae hem mekem hem hapi?’ (Provebs 15:1) So hem wise for tingting gud firstaem bifor iumi talem samting.

Nara scripture lo Proverbs sei: “Nogud toktok kat olsem sap naef.” (Provebs 12:18) Taem iumi tingim hao toktok blo iumi savve affectim narawan, datwan bae helpem iumi for kontrolem toktok blo iumi. From iumi laek kaen lo narawan, bae iumi no laek for talem toktok wea bae spoelem feeling blo samwan or tok raf lo olketa. (Eph. 4:31, 32) Bae iumi laek for talem olketa kaenfala toktok lo naesfala wei. Jehovah showimaot example lo diswan taem hem iusim wanfala angel for story lo Elijah taem hem fraet. Datfala angel story lo kwaet and kaenfala wei. (1 Ki. 19:12, NWT) Bat from iumi laek for kaen lo narawan, hem gud for duim samting for helpem pipol tu. Hao nao for duim datwan?

Iumi followim wei blo Jehovah taem iumi story kaen and duim samting for helpem narawan. (Eph. 4:32; 5:1, 2) Lisa, wea iumi storyim firstaem, storyim wanem olketa Witness duim for helpem  hem and famili blo hem. Hem sei: “Taem seknomoa famili blo mifala mas muv aot from haos wea mifala stap insaed, tufala hasband and waef lo kongregeson tekem taem off from waka for helpem mifala pakim olketa samting blo mifala. Lo datfala taem, mi no even start for study yet!” From olketa hia kaen lo Lisa hem laek for savve go moa lo truth.

Anne, wea iumi storyim lo start blo article, hem tu tinghae lo hao olketa Witness kaen lo hem. Hem sei: “Mi faendem hard for trustim pipol, bikos staka pipol lo world no honest. Firstaem mi meetim olketa Witness, mi no trustim olketa, and mi no sure why olketa laek for kam lukim mi evritaem. Bat from sista wea teachim mi abaotem Bible hem barava kaen, datwan mekem mi for trustim hem. Gogo, mi start for interest lo wanem hem teachim mi from Bible.”

Tingim hao Lisa and Anne tinghae lo hao samfala brata and sista insaed kongregeson kaen tumas and duim staka samting for helpem tufala. Datwan mekem tufala start for trustim Jehovah  and pipol blo hem, and laek for lane abaotem Jehovah.

Lo samfala culture hem normal samting for pipol smile or for story kaen narawan. Datwan hem gud samting. Bat hem no inaf for iumi kaen lo narawan bikos lo culture blo iumi or hem wei blo iumi nomoa. Iumi need for followim wei blo God for kaen tu.—Comparem Acts 28:2.

Holy spirit blo God nao savve mekem man for followim wei blo God for kaen. (Gal. 5:22, 23) So iumi need for letem holy spirit affectim tingting blo iumi and wanem iumi duim. Iumi laek for followim example blo Jehovah and Jesus for kaen and tingim narawan. From iumi lovem Jehovah and olketa pipol, iumi laek for kaen lo narawan and no just duim datwan followim culture blo iumi. God bae hapi lo iumi from iumi laek for kaen lo narawan.

Maet hem isi for kaen and for tinghae lo olketa wea kaen lo iumi or olketa wea iumi savve lo olketa. (Mektu Samuel 2:6; Col. 3:15) Bat waswe, iumi shud kaen lo samwan wea no kaen lo iumi?

Tingim diswan: Jehovah hem nambawan example for iumi bikos hem kaen tumas lo pipol. Bible helpem iumi for luksavve why hem important for iumi kaen lo evriwan. Datfala toktok “kaen tumas” hem kamap staka taem lo olketa Christian Greek Scripture. Hao nao God showimaot hem kaen lo pipol?

Jehovah showimaot hem kaen lo evri pipol from hem givim olketa wanem olketa needim for gohed stap laef. (Matt. 5:45) Nomata staka pipol no savve yet lo Jehovah, hem duim samting wea showimaot hem kaen lo iumi evriwan. (Eph. 2:4, 5, 8) For example, hem givim spesol Son blo hem for dae for evri pipol. Aposol Paul sei Jehovah provaedem datfala ransom from “hem kaen tumas.” (Eph. 1:7) Nara samting, nomata iumi sin and duim olketa samting wea mekem Jehovah sorre, hem gohed for teachim iumi. Bible sei toktok and olketa teaching blo hem olsem “smolfala ren” bikos hem helpem iumi. (Diutronomi 32:2) Iumi no fit for changem bak evri gud samting wea hem duim for iumi. And iumi savve sapos Jehovah hem no kaen lo iumi, bae iumi no garem eni hope for future.​—Comparem 1 Peter 1:13.

Iumi barava tinghae lo hao Jehovah kaen tumas lo iumi. So iumi no laek for kaen nomoa lo samfala pipol, bat iumi laek for followim wei blo Jehovah for evritaem kaen lo narawan. (1 Thess. 5:15) Olsem wanfala fire wea mekem man warm lo wanfala cold day, taem iumi kaen lo olketa workmate, skulmate, and olketa nara pipol, datwan savve helpem and encouragem olketa.

Tingim samfala lo famili blo iu or samfala lo kongregeson wea iumi savve story kaen lo olketa, and duim samting for helpem olketa. Maet samwan lo kongregeson needim iumi for helpem hem for klinim haos or raonem area blo hem or for peim samting for hem lo stoa. And tu, iumi savve helpem samwan wea iumi meetim lo ministry wea needim help.

So iumi laek for followim wei blo Jehovah for evritaem story kaen lo narawan, and duim samting for helpem olketa.