1. Wat nao tru samting wea King Solomon talem lo Eklesiastes 7:20?

 KING Solomon sei: “No eni stretfala man hemi stap long disfala wol, No eniwan hemi stret fogud an hemi no mekem sin.” (Eklesiastes 7:20) Datwan hem barava tru bikos iumi evriwan sin. (1 John 1:8) So iumi needim God and olketa narawan tu for forgivim iumi.

2. Hao nao feeling blo iu taem wanfala gud fren forgivim iu?

² Maet iu duim wanfala samting wea mekem gud fren blo iu for feel nogud. From iu laek stretem datwan, iu sei sorre lo fren blo iu. Masbi taem fren blo iu hem willing for forgivim iu, datwan mekem iu for no wari moa, and iu hapi tu!

3. Wat nao bae iumi storyim lo disfala article?

³ Iumi laekem Jehovah for hem gud fren blo iumi, bat samfala taem iumi duim or talem samting wea mekem hem feel nogud. Hao nao iumi savve sure Jehovah hem willing for forgivim iumi? Why nao taem Jehovah forgivim samwan hem difren from taem pipol forgivim each other? And hu nao savve kasem forgiveness from God?

4. Why nao iumi savve sure Jehovah hem willing for forgivim pipol?

⁴ Bible talem iumi hao Jehovah laekem tumas for forgivim pipol. Lo Maunt Sinai, Jehovah iusim wanfala angel for story lo Moses abaotem olketa wei blo Hem. Hem sei: “Mi [Jehovah] nao mi God. Oltaem mi save sore long pipol, an mi kaen tumas long olketa. Mi no save kros kuiktaem, an oltaem mi gohed fo lavem pipol blong mi an tinghevi  tumas long olketa. . . . Mi save fogivim olketa sapos olketa duim olketa ravis samting, o agensim mi, o mekem enikaen sin.” (Eksodas 34:6, 7) Jehovah kaen and showimaot mercy lo pipol and hem laekem tumas for forgivim olketa wea repent from sin blo olketa.​—Nehemaea 9:17; Sams 86:15.

5. Olsem Sams 103:13, 14 storyim, from Jehovah savve gud lo iumi, wat nao hem laek for duim?

⁵ From Jehovah creatim iumi, hem savve lo evri samting abaotem iumi and abaotem evri nara pipol lo earth tu. (Sams 139:15-17) Hem luksavve sapos iumi tekem samfala nogud wei from parents blo iumi. And tu, hem savve lo evri samting wea happen lo laef blo iumi. From Jehovah savve lo olketa samting hia, datwan helpem hem for showimaot mercy and laek for forgivim olketa sin blo iumi.​—Sams 78:39; readim Sams 103:13, 14.

6. Wat nao Jehovah duim wea showimaot hem laekem tumas for forgivim iumi?

⁶ Jehovah duim samting wea showimaot hem laekem tumas for forgivim iumi. Hem savve hao samting wea Adam duim nao hem mekem iumi evriwan sin and dae. (Rome 5:12) Iumi no fit for duim eni samting for sevem iumiseleva or olketa narawan from sin and dae. (Sams 49:7-9) Bat from God lovem and sorre lo iumi, hem duim samting for sevem iumi. Wat nao hem duim? John 3:16 storyim hao Jehovah sendem kam spesol Son blo hem for dae for iumi. (Matt. 20:28; Rome 5:19) Jesus dae for iumi evriwan mekem eniwan wea showimaot faith lo hem savve kasem laef. (Heb. 2:9) Jehovah mas barava sorre tumas for lukim pipol mek shame lo Son blo hem and killim hem dae! Hard for Jehovah sendem kam Son blo hem for dae for iumi sapos hem no laek forgivim iumi.

7. Hu nao samfala wea Bible storyim wea Jehovah forgivim olketa?

⁷ Bible storyim staka pipol wea Jehovah willing for forgivim olketa. (Eph. 4:32) Maet iu tingim King Manasseh wea duim olketa barava nogud samting and sin againstim Jehovah. Hem worshipim olketa false god and encouragem olketa  narawan for duim sem samting. Hem sakrifaesim tu olketa pikinini blo hem for olketa false god. Hem even tekem wanfala idol and putim lo holy temple blo Jehovah. Bible sei: “[Manasseh] duim plande samting wea hemi barava nogud tumas long ae blong [Jehovah], so hemi mekem [Jehovah] fo kros tumas.” (Mektu Kronikols 33:2-7) Nomata olsem, taem Manasseh barava sorre and repent, Jehovah willing for forgivim hem, and letem hem for rul moa. (Mektu Kronikols 33:12, 13) Narawan wea iu maet tingim tu hem King David wea duim samfala bigfala sin, olsem hem duim adultery and killim man dae. Bat taem David luksavve lo sin blo hem and barava sorre and repent, Jehovah forgivim hem tu. (Mektu Samuel 12:9, 10, 13, 14) So iumi savve sure Jehovah laekem tumas for forgivim iumi. And distaem bae iumi storyim hao taem Jehovah forgivim samwan hem difren from taem pipol forgivim each other.

8. Why nao iumi savve sei Jehovah hem best Judge?

⁸ Jehovah nao hem Judge blo evriwan lo earth. (Jenesis 18:25) Wanfala gud judge mas savve gud lo law. Jehovah savve gud lo olketa law blo hem bikos hem nao givim olketa law hia for iumi followim. (Isa. 33:22, NWT) Jehovah savve sapos samting hem stret or nomoa winim eni narawan. Wat moa wanfala gud judge need for duim? Hem mas savve lo evri samting abaotem wanfala kot case bifor hem judgem datwan. So Jehovah nao best Judge bikos hem savve lo evri samting wea happen.

9. Wat nao helpem Jehovah for disaed sapos hem bae forgivim iumi or nomoa?

⁹ No eni judge lo earth hem olsem Jehovah wea savve lo evri samting abaotem wanfala nogud samting wea happen. (Jenesis 18:20, 21, Sams 90:8) Pipol savve judge followim wanem olketa lukim and herem nomoa. Bat Jehovah hem minim reason why pipol duim olketa samting. Hem savve lo wanem hem happen lo laef blo iumi, hao iumi growap, savve wea iumi garem, and hem luksavve lo feeling and tingting blo iumi. Jehovah savve lukim tu wat nao insaed lo heart blo iumi. Hem luksavve why iumi duim olketa samting. Jehovah lukim evri samting. (Heb. 4:13) From Jehovah savve lo evri samting wea happen, hem fit for forgivim iumi.

10. Why nao iumi savve sei olketa judgment blo Jehovah hem evritaem stret and fair? (Diutronomi 32:4)

¹⁰ Olketa judgment blo Jehovah hem evritaem stret and fair. Bae hem no forgivim samwan bikos hem luk naes, hem rich, garem hae position, or from hem garem bigfala savve. (Fas Samuel 16:7; Jas. 2:1-4) Pipol no savve bribem Jehovah or forcem hem for duim samting. (Mektu Kronikols 19:7) Nomata samwan hem fren blo Jehovah or nomoa, hem no letem datwan affectim disison blo hem. (Eksodas 34:7) Jehovah hem best Judge bikos hem minim evri samting abaotem iumi and samting wea happen lo iumi.​—Readim Diutronomi 32:4.

11. Why nao taem Jehovah forgivim samwan hem difren from hao pipol forgivim each other?

¹¹ Olketa man wea raetem olketa Hebrew Scripture luksavve hao taem Jehovah forgivim samwan hem difren from hao pipol savve forgivim each other.  Wanfala buk sei, lo Hebrew languis olketa iusim wanfala word wea “fitim nomoa for storyim hao God forgivim samwan wea sin, bat olketa bae no iusim datfala sem word for storyim hao samwan forgivim mistek blo narawan.” Jehovah nomoa garem raet for barava forgivim samwan wea repent. Taem Jehovah forgivim iumi, wat nao datwan minim?

12-13. (a) Wanem gud samting nao iumi savve kasem bihaen Jehovah forgivim iumi? (b) Hao nao bae Jehovah ting lo sin wea iumi duim bihaen hem forgivim iumi?

¹² Taem iumi luksavve Jehovah hem forgivim iumi, datwan “strongim” iumi bikos iumi bae garem peace lo mind and gudfala konsens. Datwan hem samting wea Jehovah nomoa savve givim iumi. (Acts 3:19) Taem Jehovah forgivim iumi, iumi savve fren moa witim hem, and hem olsem iumi nating duim eni sin.

¹³ Bihaen Jehovah forgivim iumi, bae hem no accusim iumi or panisim iumi moa for datfala sin. (Aesaea 43:25; Jeremaea 31:34) Hem olsem Jehovah putim sin blo iumi farawe from hem, “olsem ples wea san hemi kamap hemi farawe from ples wea san hemi godaon.” * (Sams 103:12) Diswan mekem iumi tinghae tumas lo hao Jehovah forgivim iumi. (Sams 130:4) Bat hu nao savve kasem forgiveness from Jehovah?

14. Wat nao iumi lanem finis abaotem forgiveness blo Jehovah?

¹⁴ Olsem iumi lanem finis, Jehovah savve forgivim iumi nomata iumi duim bigfala sin. And iumi lanem tu hao Jehovah savve disaedem sapos bae hem forgivim iumi or nomoa, bikos hem savve gud lo iumi from hem wakem iumi, givim iumi olketa law, and hem Judge blo iumi. Bat wat nao Jehovah bae tingim bifor hem disaed for forgivim iumi?

15. Wat nao wanfala samting wea Jehovah bae tingim abaotem samwan wea duim sin? (Luke 12:47, 48)

¹⁵ Wanfala samting wea Jehovah bae tingim, hem sapos samwan wea duim sin hem min for duim datwan or nomoa.  Jesus helpem iumi for minim datwan lo Luke 12:47, 48. (Readim.) Scripture hia showimaot samwan wea min for duim samting wea Jehovah no hapi lo hem, datwan hem bigfala sin and maet Jehovah bae no forgivim hem. (Mark 3:29; John 9:41) Bat hao sapos iumi nao duim samting wea iumi savve nomoa hem rong? Waswe, eni chance stap for Jehovah forgivim iumi? Maet hem savve forgivim iumi bikos hem bae tingim nara samting moa saed lo datwan.

16. Wat nao hem minim for repent, and why nao iumi mas repent?

¹⁶ Nara samting wea Jehovah savve tingim hem sapos datfala man wea hem sin hem barava repent. Wat nao hem minim for repent? Taem samwan repent hem minim “hem changem tingting, plan, or wei blo hem.” Hem minim tu hem barava sorre lo olketa nogud samting wea hem duim, and hem sorre tu from hem no duim stret samting wea hem shud duim. And tu, samwan wea repent hem sorre from hem luksavve hem wik lo spiritual wei, dastawe gogo hem duim samting wea no stret. Tingim hao King Manasseh and King David duim olketa bigfala sin, bat Jehovah forgivim tufala bikos tufala barava repent. (Fas Kings 14:8) So Jehovah bae forgivim iumi sapos iumi showimaot iumi barava repent. Nomata iumi sorre from sin wea iumi duim, iumi need for duim nara samting, * and Jehovah tingim datwan tu. Distaem bae iumi storyim datwan.

17. Wanem nao hem minim for changem wei blo iumi, and hao nao datwan bae helpem iumi for no duim moa datfala sin? (Aesaea 55:7)

¹⁷ Nara samting wea Jehovah tingim hem sapos man wea duim sin hem changem wei blo hem. Datwan minim man mas stop for duim olketa nogud samting, and start for duim olketa samting wea Jehovah laekem. (Readim Aesaea 55:7.) Hem mas changem tingting blo hem tu mekem hem followim tingting blo Jehovah.  (Rome 12:2; Eph. 4:23) So hem mas disaed strong for lusim olketa nogud tingting and wei blo hem. (Col. 3:7-10) Jehovah bae forgivim iumi and mekem iumi klin from olketa sin blo iumi sapos iumi showimaot faith lo sakrifaes blo Christ. Bikos lo datfala sakrifaes Jehovah bae forgivim iumi taem hem lukim iumi waka hard for changem olketa nogud wei blo iumi.—1 John 1:7.

18. Lo disfala article, wat nao iumi lanem abaotem forgiveness blo Jehovah?

¹⁸ Iumi storyim moa samfala main point blo disfala article. Iumi lanem hao Jehovah barava willing for forgivim iumi. Hao nao iumi savve lo datwan? First samting, iumi lanem hao Jehovah laekem tumas for forgivim iumi. Mek-tu samting, hem savve gud lo evri samting abaotem iumi and wanem hem happen lo laef blo iumi, so hem fit for luksavve sapos iumi barava repent. And mek-thri samting, taem Jehovah forgivim iumi, hem bae no tingim moa datfala sin wea iumi duim, and hem olsem iumi nating duim eni sin. Datwan bae helpem iumi for garem gudfala konsens and iumi savve fren bak moa witim hem.

19. Why nao iumi savve hapi, nomata iumi no perfect and gohed for duim olketa mistek?

¹⁹ Hem tru, from iumi no perfect, bae iumi gohed for duim olketa mistek. Bat iumi savve kasem encouragement from toktok insaed lo Insight on the Scriptures, Volume 2, page 771, wea sei: “Jehovah luksavve pipol blo hem no perfect and hem showimaot mercy lo olketa. So nomata olketa gohed duim olketa mistek from olketa no perfect, olketa no need for barava ting daonem olketa seleva. (Sams 103:8-14; 130:3) Olketa savve hapi from olketa gohed traem best for duim wanem God laekem. (Php 4:4-6; 1Jo 3:19-22).” Datwan barava encouragem iumi!

20. Wat nao bae iumi storyim lo next article?

²⁰ Iumi tinghae lo Jehovah from hem willing for forgivim iumi taem iumi sorre and repent from olketa sin blo iumi. Bat hao nao iumi savve followim example blo Jehovah for forgivim olketa narawan? Hao nao forgiveness blo iumi hem semsem witim forgiveness blo Jehovah, bat hao nao hem difren tu? Why nao hem important for iumi savve lo datwan? Bae iumi kasem ansa for olketa kwestin hia lo next article.