1. Wanem nao samfala brata and sista maet fraetem or wari abaotem?

 TINGIM example blo samfala brata and sista wea fraet or warim samfala samting. Nestor and waef blo hem, María, laek for go helpem kongregeson wea needim moa pablisa. * Bat tufala luksavve sapos tufala duim datwan, maet tufala no garem evri samting wea tufala laekem. So Nestor and María wari nogud datwan bae mekem tufala for no hapi. Tingim tu Biniam. Taem hem kamap Jehovah’s Witness hem stap lo wanfala kantri wea gavman againstim waka blo iumi, so hem luksavve maet enitaem hem bae kasem persecution. Datwan mekem hem for fraet. Bat hem warim tu hao famili blo hem bae ting lo hem taem olketa faendaot hem kamap Witness. Nara example hem Valérie. Hem faendaot hem garem cancer, bat staka doctor no willing for duim operation lo hem bikos hem no acceptim blood from hem followim wanem Bible talem. So hem wari nogud hem bae dae.

2. Sapos iumi fraet, wat nao savve happen?

² Maet iumi fraetem olketa samting olsem tu. Bat sapos iumi fraet, maet iumi mekem olketa rong disison wea savve mekem Jehovah for no hapi lo iumi. And tu, sapos iumi fraet maet iumi no obeyim olketa law blo Jehovah. For example, sapos iumi fraet maet iumi stop for preachim gud nius. Satan bae hapi tumas lo datwan. (Rev. 12:17) Satan laek for spoelem iumi, hem no garem mercy, and hem garem bigfala paoa. Bat iumi savve protectim iumiseleva from Satan. Wanem nao iumi savve duim?

3. Wat nao savve helpem iumi for no fraet?

 ³ Taem iumi sure Jehovah lovem iumi and hem stap witim iumi, datwan savve helpem iumi for againstim Satan. (Sams 118:6) For example, man wea raetem Sams 118 hem feisim samfala hard samting. Hem garem staka enemy, and samfala lo olketa, hem olketa bigman tu (verse 9, 10). Samfala taem pipol againstim hem (verse 13). And hem kasem strong discipline from Jehovah (verse 18). Nomata olsem, datfala man wea raetem psalm hem sei: “Bae mi no save fraet.” Wat nao helpem hem for no fraet? Nomata Jehovah disciplinem hem, hem savve Jehovah barava lovem hem. Hem sure nomata wanem hard samting nao hem feisim, Jehovah bae evritaem helpem hem.​—Sams 118:29.

4. Sapos iumi sure Jehovah lovem iumi, hao nao datwan savve helpem iumi?

⁴ Iumi need for sure Jehovah lovem iumi bikos datwan bae helpem iumi for no warim or fraet lo thrifala samting hia, (1) wari abaotem need blo famili, (2) fraet lo man, and (3) fraetem dae. Samting wea helpem olketa wea iumi storyim lo first paragraf for no gohed wari and fraet, hem from olketa sure God lovem olketa.

5. Wat nao samfala samting wea olketa famili hed savve wari abaotem? (Lukim piksa lo front page.)

⁵ Olketa famili hed luksavve hem important for provaedem need blo famili. (1 Tim. 5:8) Sapos iu wanfala famili hed, maet lo taem blo COVID-19 pandemic iu wari nogud iu lusim waka blo iu for selen, and bae iu no savve provaedem kaikai or peim rent. And tu, iu maet wari sapos iu lusim waka blo iu bae hem hard for iu faendem nara waka. Or olsem Nestor and María wea iumi storyim finis, maet iu hol bak for katdaon saed lo waka, bikos iu wari nogud iu bae no garem inaf selen for peim evri samting wea iu laekem. Satan iusim olketa kaen situation olsem for spoelem staka brata and sista.

6. Wat kaen tingting nao Satan laekem iumi for garem?

⁶ Satan trae for mekem iumi tingse Jehovah no lovem iumi and bae no helpem iumi for provaedem need blo famili blo iumi. From datwan, maet iumi duim eni samting for keepim waka blo iumi, nomata datwan maet minim iumi bae duim samting wea Jehovah no hapi lo hem.

7. Wat nao Jesus talem lo iumi?

⁷ Jesus savve gud lo Jehovah, and hem talem iumi hao God “savve finis long wanem [iumi] needim bifor [iumi] askem hem.” (Matt. 6:8) So Jesus sure Jehovah bae provaedem wanem iumi needim. Iumi olketa Christian insaed famili blo God. From Jehovah nao hed lo famili blo iumi, iumi sure bae hem duim wanem hem talem lo olketa famili hed lo 1 Timothy 5:8.

8. (a) Wanem nao bae helpem famili hed for no wari tumas abaotem need blo famili? (Matthew 6:31-33) (b) Hao nao iumi savve followim example blo hasband and waef wea givim kaikai lo wanfala sista? (Lukim piksa.)

⁸ Sapos iumi sure Jehovah lovem iumi and famili blo iumi, iumi savve trustim hao bae iumi garem evri samting iumi needim. (Readim Matthew 6:31-33.) From Jehovah lovem iumi hem laek for provaedem staka samting for iumi! Taem hem creatim earth, hem provaedem olketa samting wea iumi needim for gohed laef and staka nara samting wea iumi savve enjoyim. (Jenesis 2:9) Nomata distaem iumi garem nomoa wanem iumi  needim, hem gud for tingim Jehovah nao provaedem olketa samting hia and iumi savve gohed laef. (Matt. 6:11) Iumi need for tingim hao sapos iumi no garem staka material samting from iumi duim moa samting for Jehovah, hem bae mek sure iumi garem evri samting wea iumi needim distaem and lo future. And hem nao samting wea gogo Nestor and María luksavve lo hem.​—Aesaea 65:21, 22.

9. Wat nao iumi savve lanem from example blo Nestor and María?

⁹ Nestor and María stap lo Colombia, and tufala garem naes haos and gudfala waka. Tufala sei: “Mitufala laek for mekem laef simpol and for duim moa samting for Jehovah, bat mitufala wari nogud bae mifala no garem inaf selen and no hapi.” Wat nao helpem tufala for no gohed warim olketa samting hia? Tufala ting raonem staka samting wea Jehovah duim finis for tufala wea showimaot hem lovem tufala. Datwan mekem Nestor and María sure bae Jehovah gohed for lukaftarem tufala. So tufala resign from gudfala waka blo tufala, salem haos, and muv lo nara ples lo Colombia wea needim samfala pablisa moa. Waswe, datfala disison mekem tufala hapi? Nestor sei: “Wanem Matthew 6:33 talem hem barava tru for mitufala. Mitufala evritaem garem samting wea mitufala needim, and distaem mitufala hapi winim bifor.”

10. Why nao pipol savve fraetem olketa narawan?

¹⁰ Lo history blo iumi olketa man, pipol gohed spoelem olketa narawan. (Eklesiastes 8:9) For example, olketa bigman iusim paoa wea olketa garem for spoelem narawan, olketa criminal raf tumas, olketa bully lo skul tok spoelem and mekem olketa nara pikinini fraet, and samfala famili member savve raf tumas insaed famili. Dastawe pipol savve fraetem olketa narawan! Hao nao Satan iusim datwan for mekem iumi for duim wanem Jehovah no hapi lo hem?

11-12. Wat nao Satan savve iusim for mekem iumi fraet?

¹¹ Satan hem laekem iumi for fraetem pipol mekem iumi no preach or for duim olketa nara samting wea Jehovah no laekem. Satan iusim olketa gavman for banim waka blo iumi and for persecutim iumi. (Luke 21:12; Rev. 2:10) Lo world  blo Satan, pipol savve laea abaotem Olketa Jehovah’s Witness. Olketa wea bilivim olketa laea hia savve tok spoelem iumi, or maet killim iumi nogud. (Matt. 10:36) Iumi no sapraes hao Satan duim olketa samting hia for mekem iumi fraet bikos hem duim olketa sem samting lo first century.​—Acts 5:27, 28, 40.

¹² Satan iusim olketa gavman for mekem iumi fraet, bat hem duim olketa nara samting tu. Taem samfala kamap Witness, olketa no warim tumas persecution bat olketa warim hao famili bae ting lo olketa. Olketa lovem tumas famili blo olketa and laekem olketa insaed famili for savve and lovem Jehovah. Olketa sorre tumas taem olketa herem olketa lo famili tok daonem Jehovah and pipol blo hem. Samfala taem, olketa lo famili wea duim olsem olketa kam insaed lo truth. Bat hao sapos olketa lo famili les lo iumi and no laek lukim iumi moa? Wat nao bae iumi duim?

13. Nomata famili les lo iumi, wanem nao iumi savve sure lo hem? (Sams 27:10)

¹³ Toktok wea stap lo Sams 27:10 savve barava comfortim iumi. (Readim) Sapos iumi tingim hao Jehovah barava lovem iumi, bae iumi no wari or fraet nomata famili les lo iumi. And from iumi no givap, iumi savve sure hem bae blessim iumi. Jehovah nao bae givim evri samting iumi needim, helpem iumi for fren witim hem and for gohed hapi and garem peace! Diswan nao wanem happen lo Biniam wea iumi storyim finis.

14. Wat nao iu savve lanem from example blo Biniam?

¹⁴ Biniam kamap wanfala Jehovah’s Witness nomata hem savve gavman barava againstim Olketa Jehovah’s Witness lo kantri blo hem. Hem sei: “Persecution wea olketa brata and sista kasem hem barava nogud tumas. Bat samting mi wari abaotem winim datwan, hem sapos famili blo mi bae againstim mi. Mi wari nogud dadi blo mi bae no hapi lo mi, and olketa narawan lo famili bae no respectim mi.” Bat from Biniam savve Jehovah lovem and bae lukaftarem olketa wea lovem hem, datwan helpem hem for no fraet lo man. Biniam sei: “Mi lukim hao Jehovah helpem olketa brata and sista taem olketa kasem hard taem saed lo selen, pipol heitim olketa, and taem pipol attakim olketa. Mi sure sapos mi gohed faithful  lo Jehovah, bae hem blessim mi. Tu-thri taem olketa arrestim mi and whipim mi nogud, bat mi luksavve Jehovah hem evritaem helpem iumi sapos iumi gohed faithful lo hem.” Biniam lukim hao Jehovah barava lukaftarem hem olsem wanfala dadi, and olketa brata and sista kamap famili blo hem.

15. Why nao hem normal samting for iumi fraet for dae?

¹⁵ Bible sei dae hem wanfala enemy. (1 Cor. 15:25, 26) Taem iumi or samwan wea iumi lovem hem sik big, iumi savve fraet tumas nogud iumi or olketa bae dae. Why nao hem normal samting for iumi fraet for dae? Bikos Jehovah wakem iumi for laef olowe, so iumi no laek for dae. (Eklesiastes 3:11) And datfala feeling savve protectim laef blo iumi. For example, from iumi no laek for dae iumi maet disaed for kaikaim healthy kaikai and for exercise. And taem iumi sik bae iumi go lukim doctor and tekem medicine. And tu, iumi bae no putim laef blo iumi lo danger.

16. Hao nao Satan trae for iusim datfala feeling for no laek dae for mekem iumi no obeyim Jehovah?

¹⁶ Satan savve iumi no laek for dae. And hem sei iumi bae willing for duim eni samting for sevem laef blo iumi, nomata for duim samting wea bae mekem iumi no faithful lo Jehovah tu. (Job 2:4, 5) Bat hem no tru! Nomata olsem, from Satan garem paoa for “mekem pipol for dae,” hem iusim datfala feeling for no laek dae for trae mekem iumi no obeyim Jehovah. (Heb. 2:14, 15) Satan savve iusim pipol for mekem iumi fraetem dae. For example, olketa wea againstim iumi savve sei olketa bae killim iumi dae sapos iumi no stop for worshipim Jehovah. Or maet iumi kasem big sik, and olketa doctor or olketa famili member wea no Witness laek forcem iumi for tekem blood transfusion, wea datwan hem brekem law blo God. Or samwan maet encouragem iumi for acceptim wanfala treatment wea bae mekem iumi no followim olketa Bible principle.

17. Olsem Rome 8:37-39 storyim, why nao iumi no need for fraetem dae?

¹⁷ Nomata iumi maet dae, iumi savve Jehovah bae gohed for lovem iumi. (Readim Rome 8:37-39.) Taem samwan wea Jehovah lovem hem dae, hem bae gohed tingim datfala man olsem hem laef nomoa. (Luke 20:37, 38) Jehovah laekem tumas for mekem olketa for laef bak. (Job 14:15) Hem sendem kam spesol Son blo hem for dae for iumi mekem iumi savve “kasem laef olowe.” (John 3:16) Iumi sure Jehovah barava lovem iumi. So iumi no laek for lusim hem taem iumi sik or pipol sei olketa bae killim iumi dae. Bat iumi depend lo Jehovah for comfortim iumi, and givim iumi wisdom and strong for deal witim datwan. Hem nao wanem Valérie and hasband blo hem duim.​—Sams 41:3.

18. Wanem nao iumi savve lanem from example blo Valérie?

¹⁸ Taem Valérie hem 35 years, hem faendaot hem garem barava nogud cancer. Tingim hao love blo Jehovah helpem hem for no fraetem dae. Hem sei: “Mi and hasband blo mi seke tumas taem mitufala faendaot mi garem cancer. Mi need for kasem big operation. Mi go lukim staka doctor bat no eniwan willing for duim operation hia sapos mi no acceptim blood transfusion. Mi wari nogud mi  dae, bat mi disaed strong for followim law blo God abaotem blood. Mi lukim hao Jehovah duim staka samting finis wea showimaot hem lovem mi. So diswan hem chance blo mi for showimaot mi lovem hem. Each taem wanfala doctor no willing for helpem mi, datwan mekem mi disaed strong go moa for duim wanem Jehovah laekem and no letem Satan win. Gogo, mi kasem datfala operation and olketa doctor no iusim blood. Nomata sik blo mi no finis, Jehovah hem evritaem provaedem wanem mi needim. For example, weekend bifor mi faendaot mi garem cancer, lo meeting mifala studyim wanfala article wea garem title ‘Gohed Faithful and No Fraet Nomata Iu Kasem Olketa Hard Taem.’ * Disfala article barava helpem mitufala, and mitufala readim staka taem. Mi and hasband blo mi savve readim staka article olsem and gohed preach and attendim olketa meeting, and datwan helpem mifala for no wari tumas, garem balance tingting, and mekem olketa gudfala disison.”

19. Wat nao hem klosap for happen?

¹⁹ Jehovah helpem staka brata and sista evriwea lo earth for deal witim olketa hard samting wea olketa feisim, and for no duim wanem Satan laekem. (1 Pet. 5:8, 9) Iu savve duim datwan tu. Klosap nao, Jehovah bae iusim Jesus and 144,000 wea rul witim hem for “finisim evri samting wea Devil hem duim.” (1 John 3:8) Bihaen datwan, bae no eni samting mekem pipol wea worshipim God “fo fraet moa.” (Aesaea 54:14; Maeka 4:4) Bat go kasem datfala taem, iumi need for waka hard for no letem feeling for wari and fraet for spoelem iumi.

20. Wat nao bae helpem iumi for no fraet?

²⁰ Iumi mas barava trustim hao Jehovah lovem and bae hem lukaftarem iumi wea worshipim hem. So hem gud for ting raonem and story witim olketa brata and sista abaotem hao Jehovah lukaftarem pipol blo hem bifor. And hem gud tu for tingim wanem Jehovah duim for helpem iumi taem iumi kasem hard taem. Jehovah bae helpem iumi for no fraet!​—Sams 34:4.