For mekem Jehovah hapi, iumi mas garem faith. Bat, Bible sei “no evriwan hem garem faith.” (2 Thess. 3:2) Taem aposol Paul iusim disfala toktok, hem story abaotem “olketa nogud man” wea persecutim hem. Bat wat hem talem abaotem faith hem fitim staka nara pipol tu. Samfala pipol chus for no acceptim klia pruv wea showim wanfala Creator hem stap, wea hem nao God. (Rome 1:20) Bat olketa narawan maet biliv dat samwan or samting, wea barava paoaful hem stap. Bat wei for biliv olsem, hem no showimaot dat man garem tru faith.

Iumi need for barava sure dat Jehovah hem stap and bae hem rewardim olketa wea garem strong faith. (Heb. 11:6) Faith hem part lo frut blo holy spirit. Taem man prea lo Jehovah, datwan savve helpem hem for kasem holy spirit. (Luke 11:​9, 10, 13) Wanfala main wei for kasem holy spirit hem for readim Word blo God, Bible. Then iumi savve ting raonem wat iumi readim and trae for followim. Taem olsem, spirit blo Jehovah bae helpem iumi and mekem iumi for garem faith wea Jehovah hapi lo hem.