STUDY ARTICLE 23
SONG 28 Kamap Fren Bilong Jehovah
Jehovah Invaetem Iumi for Kamap Guest blo Hem
“Tent blo mi bae stap witim olketa, and bae mi nao God blo olketa.”—EZEK. 37:27.
MAIN FOCUS
Disfala article bae helpem iumi for appreciatim go moa invitation blo Jehovah for iumi kamap guest lo tent blo hem and hao hem lukaftarem iumi gud olsem Host.
1-2. Wat nao invitation wea Jehovah givim for olketa loyal worshipper blo hem?
LO IUSELEVA, hao nao iu ting lo Jehovah? Maet iu sei, ‘Jehovah hem Dadi blo mi, God blo mi, and Fren blo mi.’ Maet iu tingim tu olketa nara title, or toktok for describem Jehovah. Bat waswe, enitaem iu ting lo hem olsem Host or samwan wea invaetem iu for kam lo haos blo hem?
2 King David comparem frenship wea Jehovah garem witim olketa loyal worshipper blo hem witim wanfala host and olketa guest. Hem sei: “O Jehovah, hu nao savve kamap guest lo tent blo iu? Hu nao hem savve stap lo holy maunten blo iu?” (Ps. 15:1) Disfala verse helpem iumi for savve hao iumi savve kamap olketa guest blo Jehovah wea minim iumi kamap fren blo hem. Datwan hem spesol invitation from Jehovah!
JEHOVAH LAEKEM IUMI FOR KAMAP GUEST BLO HEM
3. Hu nao first guest blo Jehovah, and wat nao feeling blo tufala abaotem each other?
3 Bifor Jehovah start for creatim evri samting, hem stap seleva. Bat then, first person wea hem welkamim insaed tokpiksa tent blo hem nao firstborn Son blo hem. Jehovah hapi tumas for kamap Host blo hem. Bible sei Jesus nao “main wan wea [Jehovah] hapi lo hem.” And tu, Jesus datfala first guest, hem “hapi front lo [Jehovah] evritaem.”—Prov. 8:30.
4. Olketa hu moa Jehovah includim for kamap guest lo tent blo hem?
4 Afta Jehovah creatim olketa angel, hem invaetem olketa tu for kamap guest blo hem. Bible kolem olketa angel olketa “son blo God,” and Bible sei olketa hapi for stap witim Jehovah. (Job 38:7; Dan. 7:10) And for longfala taem, olketa angel hia nomoa stap witim hem lo heven olsem guest blo hem. Bihaen Jehovah wakem olketa man, hem extendim tent blo hem for includim olketa tu. Samfala lo olketa guest hia hem Enoch, Noah, Abraham, and Job. Bible kolem olketa tru worshipper hia olketa fren blo God, or olketa wea wakabaot “witim datfala tru God.”—Gen. 5:24; 6:9; Job 29:4; Isa. 41:8.
5. Wat nao iumi savve lanem from profesi lo Ezekiel 37:26, 27?
5 Lo staka handred year wea go pas, Jehovah gohed for invaetem olketa fren blo hem for kamap guest blo hem. (Readim Ezekiel 37:26, 27.) For example, lo profesi blo Ezekiel iumi lanem hao God barava laekem olketa loyal worshipper blo hem for fren klos witim hem. Hem promis for mekem “wanfala covenant blo peace witim olketa.” Datfala profesi storyim taem wea olketa wea garem hope for go lo heven and olketa wea garem hope for stap lo earth bae wan mind for stap anda lo tokpiksa tent blo God olsem “wanfala sekson nomoa.” (John 10:16) Datwan hem happen distaem!
GOD LUKAFTAREM IUMI NOMATA WEA NAO IUMI STAP
6. Hao nao samwan savve kamap guest lo tent blo Jehovah, and wea nao tent blo hem stap?
6 Pipol lo taem blo Bible iusim tent for kamap ples for rest and kasem protection from weather. Guest lo datfala tent savve expectim host for lukaftarem hem gud. Taem iumi dedicatem laef blo iumi lo Jehovah, iumi kamap guest lo tokpiksa tent blo hem. (Ps. 61:4) Iumi hapi for kasem staka spiritual kaikai and iumi enjoyim wei for fren witim olketa nara guest blo Jehovah tu. Tent blo Hem no stap lo wanfala ples nomoa. Maet iu bin travel lo nara kantri, maybe for attendim wanfala spesol convention, and iu meetim olketa narawan wea hapi tu bikos olketa stap insaed tent blo God. So lo eni ples wea olketa faithful worshipper blo Jehovah stap, tent blo hem stap lo there.—Rev. 21:3.
7. Hao nao iumi savve olketa faithful wan wea dae olketa still guest lo tent blo Jehovah? (Lukim tu piksa.)
7 Hao abaot olketa faithful wan wea dae finis? Hao, olketa still guest insaed tent blo Jehovah? Yes! Why nao iumi talem datwan? Bikos Jehovah rememberim evri samting abaotem olketa, hem ting lo olketa olsem olketa laef nomoa. Jesus sei: “Moses . . . storyim tu olketa wea laef bak from dae long datfala story abaotem tree wea fire gohed bonem. Hem sei Jehovah hem ‘God bilong Abraham and God bilong Isaac and God bilong Jacob.’ Hem God bilong olketa wea laef, hem no God bilong olketa wea dae finis, bikos long tingting bilong hem, evriwan hia laef nomoa.”—Luke 20:37, 38.
Even olketa faithful wan wea dae finis, olketa still olsem guest lo tent blo God (Lukim paragraf 7)
OLKETA BENEFIT AND RESPONSIBILITY BLO IUMI
8. Wat nao benefit wea olketa guest blo Jehovah kasem from olketa stap lo tent blo hem?
8 Wanfala really tent hem ples wea samwan savve rest and kasem protection from weather. Lo sem wei tu, tent blo Jehovah protectim olketa guest blo hem from olketa samting wea savve spoelem olketa lo spiritual wei and givim olketa hope for future. Taem iumi fren klos witim Jehovah, no eni samting wea Satan duim bae spoelem iumi for olowe. (Ps. 31:23; 1 John 3:8) Lo niu world, Jehovah bae gohed for protectim olketa faithful fren blo hem lo spiritual wei and even from wei for dae tu.—Rev. 21:4.
9. Wat kaen attitude nao Jehovah expectim olketa guest blo hem for garem?
9 Hem spesol privilege for kamap guest lo tent blo Jehovah, wea minim for gohed enjoyim klos frenship witim hem. Wat kaen attitude nao iumi shud garem if iumi laek gohed stap olsem guest blo hem? If samwan invaetem iu lo haos blo hem, iu bae laek for duim wat hem expectim. For example, hem maet expectim iu for aotem shoe bifor iu go insaed haos, and iu willing for duim datwan. Lo sem wei, if iumi laek for gohed stap olsem guest lo tent blo Jehovah, iumi bae laek for savve wat nao hem expectim iumi for duim. Love for Jehovah bae mekem iumi for duim evri samting wea iumi fit for duim for “mekem hem hapi.” (Col. 1:10) And nomata iumi ting lo Jehovah olsem Fren, iumi luksavve tu hem God and Dadi blo iumi, wea iumi mas respectim hem. (Ps. 25:14) Bikos lo datwan, iumi shud evritaem fraet lo Hem and no forgetim hu nao hem. Wei for tinghae lo hem bae helpem iumi for no duim eni samting wea bae mekem hem feel nogud. Iumi evritaem laek for ‘hambol taem iumi wakabaot’ witim God blo iumi.—Mic. 6:8.
LO WILDERNESS, JEHOVAH NO FEVAREM ENIWAN
10-11. Hao nao wei wea Jehovah deal witim olketa Israelite lo wilderness blo Sinai showimaot hem no fevarem eniwan?
10 Jehovah no fevarem eniwan lo olketa guest blo hem. (Rome 2:11) Iumi savve lane abaotem wei blo Jehovah for no fevarem eniwan from hao hem deal witim olketa Israelite lo wilderness blo Sinai.
11 Bihaen Jehovah mekem olketa Israelite kamap free from Egypt, Jehovah appointim olketa priest for serve lo tabernacle. Olketa Levite kasem assignment for duim samfala waka lo datfala tabernacle. Hao, Jehovah lukaftarem gud olketa wea serve lo tabernacle or olketa wea camp klosap lo tabernacle, winim olketa narawan? Nomoa! Jehovah no fevarem eniwan.
12. Hao nao wei wea Jehovah deal witim nation blo Israel showimaot hem Host wea no fevarem eniwan? (Exodus 40:38) (Lukim tu piksa.)
12 Evriwan lo camp blo Israel garem chance for enjoyim klos frenship witim Jehovah, nomata if olketa kasem spesol privilege or camp klosap or farawe from datfala tabernacle. For example, Jehovah mek sure full nation blo Israel savve lukim datfala spesol cloud and fire wea stap antap lo tabernacle. (Readim Exodus 40:38.) Taem datfala cloud start for muv lo eni niu direction, nomata olketa lo barava end blo datfala camp olketa savve lukim, and olketa savve redyim tings blo olketa, daonem tent, and muv lo semtaem witim full nation. (Num. 9:15-23) Evriwan savve herem klia saond blo tufala silver trumpet wea givim saen lo evriwan for start for muv. (Num. 10:2) So nomata samfala stap klosap lo tabernacle hem no minim olketa garem klos frenship witim Jehovah winim olketa narawan. Bat, hem minim evriwan insaed datfala nation olketa kamap guest blo hem and kasem sem direction and protection from hem. Distaem tu, nomata wea nao iumi stap lo earth, iumi kasem benefit from wei wea Jehovah lovem, lukaftarem, and protectim iumi.
Arrangement blo God for tabernacle showimaot hem no fevarem eniwan (Lukim paragraf 12)
EXAMPLE WEA SHOWIM JEHOVAH NO FEVAREM ENIWAN DISTAEM
13. Wat nao wanfala samting wea showim Jehovah no fevarem eniwan distaem?
13 Samfala pipol blo God distaem stap klosap lo world hedquarter or branch office blo Olketa Jehovah’s Witness. And samfala waka lo olketa ples hia. From datwan, olketa hia savve share lo staka activity wea gohed lo olketa ples olsem and associate witim olketa brata wea leadim waka blo iumi lo there. And samfala serve olsem olketa traveling overseer or duim olketa nara waka lo spesol full-taem service. Nomata staka lo iumi no garem olketa privilege olsem, iumi sure Host blo iumi, Jehovah, lovem evri guest blo hem. And hem lukaftarem gud each wan lo iumi. (1 Pet. 5:7) So evri pipol blo God kasem spiritual kaikai, direction, and protection wea olketa needim.
14. Wat nao nara example wea showim Host blo iumi Jehovah no fevarem eniwan?
14 Wei wea Jehovah mek sure pipol evriwea lo world kasem Bible, hem nara samting wea showim Jehovah hem Host wea no fevarem eniwan. Lo bifor, olketa raetem olketa Holy Scripture lo thrifala languis: Hebrew, Aramaic, and Greek. So hao, olketa wea savve readim olketa original languis hia garem klos frenship witim Jehovah winim olketa narawan? Nomoa.—Matt. 11:25.
15. Wat nao pruvim Jehovah no fevarem eniwan? (Lukim tu piksa.)
15 Jehovah no invaetem nomoa olketa wea garem hae education or olketa wea savve lo original languis blo Bible for kamap fren blo hem. Hem mekem wisdom blo hem available for pipol evriwea lo earth, nomata olketa kasem hae education or nomoa. Olketa transleitim Word blo hem, Bible, lo staka thousand languis mekem pipol evriwea lo world savve benefit from teaching blo hem and lane hao for kamap fren blo hem.—2 Tim. 3:16, 17.
Hao nao wei wea God mekem Bible available distaem hem pruvim God no fevarem eniwan? (Lukim paragraf 15)
GOHED DUIM SAMTING WEA JEHOVAH HAPI LO HEM
16. Olsem Acts 10:34, 35 storyim, wat nao iumi savve gohed duim for Jehovah acceptim iumi?
16 Hem wanfala spesol privilege for kamap guest blo Jehovah lo tokpiksa tent blo hem. Hem wanfala Host wea barava kaen, showimaot love, and lukaftarem gud olketa guest blo hem. And tu, hem no fevarem eniwan, bat hem welkamim iumi evriwan nomata wea nao iumi stap, wat kaen background, education, kala skin, tribe, age, or nomata iu man or woman. Bat only olketa wea followim standard blo hem nomoa hem acceptim for kamap guest blo hem.—Readim Acts 10:34, 35.
17. Wea nao bae iumi faendem samfala information moa abaotem wei for stap olsem guest lo tent blo Jehovah?
17 Olsem iumi lukim lo Psalm 15:1, David askem olketa kwestin hia: “O Jehovah, hu nao savve kamap guest lo tent blo iu? Hu nao hem savve stap lo holy maunten blo iu?” Insaed datfala sem psalm, Jehovah givim ansa for olketa kwestin hia. Lo next article, bae iumi discussim samfala specific samting wea iumi need for duim mekem Jehovah gohed acceptim iumi.
SONG 32 Saed Witim Jehovah!
