Jehovah talem profet Ezekiel for raetem profesi abaotem pipol bilong hem. Hem sei pipol bilong hem bae go bak long Promis Land and olketa bae kamap wanfala nation moa. And tu, datfala profesi showimaot pipol bilong God wea stap long olketa last day bae wan mind for worshipim hem.

Jehovah talem profet Ezekiel for raet long tufala stik. Hem mas raet olsem long wanfala stik: “For Judah and for pipol bilong Israel wea stap witim hem.” And long mek-tu stik hem mas raet olsem: “For Joseph, stik bilong Ephraim, and olketa Israelite wea stap witim hem.” Tufala stik hia bae kamap “wanfala stik” long hand bilong Ezekiel.—Ezek. 37:15-17.

 Wanem nao “Ephraim” hem piksarem? Tribe bilong Ephraim nao hem main tribe insaed long ten tribe kingdom bilong Israel long north. Firstfala king wea rul long datfala kingdom hem Jeroboam wea hem kam from tribe bilong Ephraim. (Deut. 33:13, 17; 1 Ki. 11:26) Datfala tribe kam from laen bilong Ephraim, wea hem wanfala son bilong Joseph. (Num. 1:32, 33) Joseph kasem spesol blessing from dadi bilong hem, Jacob. Dastawe hem fitim for “stik bilong Ephraim” hem piksarem ten tribe kingdom bilong Israel long north. Long 740 B.C.E., staka year bifor Ezekiel raetem datfala profesi, olketa bilong Assyria tekovarem datfala ten tribe kingdom bilong Israel and tekem olketa Israelite olsem prisoner. (2 Ki. 17:6) Staka year bihaen datwan, olketa bilong Babylon winim olketa bilong Assyria. So taem Ezekiel raetem profesi abaotem tufala stik hia, staka Israelite nao stap long olketa difren ples wea Babylon rulim.

Long 607 B.C.E., olketa bilong Babylon tekovarem kingdom bilong Judah long south and tekem olketa Israelite for kamap prisoner long Babylon. Maet samfala wea stap long ten tribe kingdom long north bifor tu olketa kamap prisoner. Olketa king long kingdom bilong south kam from tribe bilong Judah. Olketa priest tu stap long Judah bikos olketa waka long temple long Jerusalem. (2 Chron. 11:13, 14; 34:30) Dastawe hem fitim for datfala stik “for Judah” hem piksarem kingdom bilong Judah long south.

Wanem taem nao tufala stik hia join and kamap wanfala stik? Diswan hem happen long 537 B.C.E taem olketa Israelite from kingdom bilong Judah long south, and kingdom bilong Israel long north, go bak long Jerusalem for buildim bak temple. Datfala nation bilong Israel no divaed nao. Long datfala taem olketa Israelite worshipim Jehovah tugeta. (Ezek. 37:21, 22) Profet Isaiah and Jeremiah tu talem profesi abaotem diswan.—Isa. 11:12, 13; Jer. 31:1, 6, 31.

Wanem nao profesi hia wea Ezekiel storyim hem showimaot abaotem tru worship? Hem showimaot Jehovah bae mekem evriwan wea worshipim hem for wan mind. (Ezek. 37:18, 19) Waswe, disfala profesi kamap tru long taem bilong iumi? Yes. Long 1919, datfala profesi hem start for kamap tru. Bifor datfala taem, Satan trae for mekem pipol bilong God for divaed. Bat long 1919, pipol bilong God start for organize gud and garem wan mind.

Long datfala taem, klosap evriwan wea worshipim Jehovah garem hope for go long heven for kamap king and priest witim Jesus. (Rev. 20:6) Olketa olsem stik for Judah. Bat samfala long olketa garem hope for laef olowe long earth. And long olketa year bihaen 1919, staka moa garem datfala sem hope. (Zech. 8:23) Olketa hia kamap olsem stik for Joseph.

Distaem, tufala grup hia worshipim Jehovah tugeta. And olketa garem wanfala King nomoa wea hem nao Jesus Christ. Taem profesi bilong Ezekiel sei “wakaman bilong mi David,” hem minim Jesus Christ. (Ezek. 37:24, 25) Jesus prea olsem abaotem olketa disaepol bilong hem: “Dadi, mi prea for evriwan hia savve wan mind, olsem iumi tufala wan mind, mekem olketa tu savve wan mind witim iumi.” * (John 17:20, 21) And tu, Jesus sei “smol sekson” bilong olketa anointed Christian and “olketa nara sheepsheep” bae “wanfala sekson nomoa and wanfala man nao bae lukaftarem olketa.” (John 10:16) Olsem Jesus storyim, evriwan wea worshipim Jehovah distaem olketa garem wan mind, nomata olketa garem hope for laef olowe long heven or long earth!