WASWE, iu savve long eni brata or sista wea muv go long nara kantri wea needim samfala pablisa moa? Waswe, enitaem iu ting olsem: ‘Wanem nao mekem olketa willing for go long nara kantri? Wanem nao olketa duim mekem olketa savve kasem datfala goal? Waswe, mi savve duim sem samting tu?’ For savve long ansa bilong olketa kwestin hia, bae iumi askem samfala brata and sista wea duim diswan finis.

Wanem nao mekem iu willing for go long nara kantri wea needim samfala pablisa moa? Amy, wea distaem hem samting olsem 35 year, hem kam from United States. Hem sei: “For staka year nao mi laek for go pioneer long nara kantri, bat luk olsem mi no fit for kasem datfala goal.” Wanem nao mekem hem changem tingting bilong hem? Amy sei: “Long 2004, wanfala hasband and waef wea pioneer long Belize invaetem mi for go pioneer witim tufala for wanfala month. Mi go and mi barava enjoyim! Long year bihaen, mi muv long Ghana for pioneer long there.”

Stephanie, wea distaem hem klosap 30 year, hem tu kam from United States. Samfala year bifor, Stephanie, tingting raonem living bilong hem and sei: ‘Mi healthy and mi no garem eni famili responsibility. So mi shud duim moa samting long waka bilong Jehovah.’ Bihaen hem tingting gud raonem datwan, hem willing for go pioneer long Ghana. Filip and Ida, hasband and waef wea winim 50 year, tufala kam from Denmark. Tufala laekem tumas for muv long ples wea needim samfala pablisa moa. Tufala duim samfala samting mekem tufala savve kasem goal bilong tufala. Filip sei: “Taem chance kamap for mitufala go, hem olsem Jehovah sei long mitufala: ‘Iutufala go nao!’” So long 2008, tufala muv go long Ghana and pioneer long there for winim thrifala year.

 Hans and Brook, hasband and waef wea winim 30 year, tufala pioneer long United States. Long 2005, bihaen Hurricane Katrina spoelem samfala ples long America, tufala help long relief waka. Bihaen datwan, tufala apply for duim construction waka long difren kantri, bat tufala no herem eni samting. Hans sei: “Then mifala herem wanfala tok long convention wea storyim example bilong King David. Hem acceptim wei wea Jehovah sei bae hem no buildim temple, so hem changem goal bilong hem. Datwan helpem mifala for luksavve hem no rong for changem olketa spiritual goal bilong mifala.” (1 Chron. 17:1-4, 11, 12; 22:5-11) Brook sei: “Jehovah laekem mitufala for duim difren waka.”

Bihaen Hans and Brook herem olketa gudfala experience bilong olketa fren bilong tufala wea pioneer long nara kantri, tufala tu laek for duim datwan. Long 2012, tufala go pioneer long Ghana for fofala month, and tufala helpem wanfala saen languis kongregeson. Nomata tufala mas go bak long United States, datfala taem wea tufala pioneer long Ghana mekem tufala barava laek for Kingdom hem first samting long laef bilong tufala. Bihaen datwan, tufala waka long construction for buildim branch office long Micronesia.

Wanem samting nao iu duim mekem iu fit for go long nara kantri wea needim samfala pablisa moa? Stephanie sei: “Mi readim olketa Wastaoa article abaotem olketa wea pioneer long olketa ples wea needim samfala pablisa moa. * Mi story tu witim olketa elder long kongregeson, circuit overseer and waef bilong hem abaotem goal bilong mi for go pioneer long nara kantri. And main samting nao, mi prea staka taem long Jehovah abaotem datfala goal bilong mi.” Long semtaem, Stephanie garem simpol laef, and diswan mekem hem sevem selen wea bae sapotim hem taem hem pioneer long nara kantri.

Hans hem sei: “Mifala prea long Jehovah for helpem mifala bikos mifala  laekem hem nao for leadim mifala long diswan. Taem mifala prea mifala talem Jehovah barava taem wea mifala plan for go.” Tufala raetem leta long fofala branch office. Branch office long Ghana raetem naesfala leta go bak long tufala. So tufala disaed for go long Ghana for tufala month. Hans hem sei: “From mitufala enjoyim tumas for waka witim kongregeson, mifala no stap for tufala month, bat mifala stap for samfala month moa.”

George and Adria, wea klosap 40 year kam from Canada, tufala evritaem tingim hao Jehovah savve blessim man wea mekem olketa gudfala disison. So tufala duim samting for kasem goal bilong tufala. Tufala raet go long wanfala sista wea muv go for pioneer long Ghana and askem hem staka kwestin. And tu, tufala raet go long branch office long Canada and branch office long Ghana. Adria sei: “Mitufala lukaotem samfala wei moa for mekem laef bilong mitufala simpol.” Olketa gudfala disison hia mekem tufala fit for muv go long Ghana long 2004.

Wanem nao samfala hard samting wea iu feisim, and hao nao iu deal witim? Firstfala hard samting wea Amy feisim nao hem misstim hom and famili bilong hem. Hem sei: “Evri samting hem difren from wanem mi getius long hem.” Wanem nao helpem hem? Hem sei: “Taem famili bilong mi ringim mi and sei olketa tinghae long wanem mi duim, datwan mekem mi tingim evritaem why mi muv kam long hia. Bihaen datwan, mi and famili bilong mi savve iusim Internet for story long each other. From mifala savve lukim mifala, mi feel olsem olketa no farawe nomoa.” Amy sei hem fren gud  witim wanfala sista from Ghana, and datwan helpem hem for minim olketa difren kastom bilong pipol long there. Hem sei: “Taem mi no minim samfala samting wea pipol duim, mi savve go long datfala fren bilong mi for helpem mi. From datwan, mi savve wanem for duim and wanem for no duim, wea datwan helpem mi for hapi long ministry bilong mi.”

George and Adria sei taem tufala just muv go long Ghana, tufala feel olsem tufala stap long olketa taem long bifor kam yet. Adria sei: “Mifala no iusim washing machine for waswas kaleko, bat mifala iusim olketa baket. Hem tek longtaem for redyim and kukim kaikai winim long hom. Bat no longtaem bihaen mifala kasem long hia, olketa samting wea mifala tingse hem hard, hem olketa samting wea difren nomoa.” Brook sei: “Nomata mifala olketa pioneer feisim olketa hard samting, mifala hapi and satisfae. Taem mifala tingim evri naesfala experience wea mifala garem, hem olketa naesfala memory wea mifala no savve forgetim.”

Why nao iu laek for encouragem olketa narawan for duim disfala waka? Stephanie sei: “Taem iu preach long ples wea pipol barava interest for lanem truth and laekem iu for studyim Bible witim olketa evriday, datwan mekem iu hapi fogud. Wei wea mi disaed for go pioneer long ples wea needim samfala pablisa moa hem wanfala barava gudfala disison wea mi mekem!” Long 2014, Stephanie maritim Aaron, and distaem tufala waka long branch office long Ghana.

Christine, wanfala pioneer sista wea kam from Germany, wea distaem hem winim 30 year, hem sei: “Taem iu duim disfala waka bae iu experiencem staka gud samting.” Bifor Christine kam long Ghana hem pioneer long Bolivia tu. Hem sei: “From mi stap farawe from famili bilong mi, mi evritaem depend long Jehovah for helpem mi. Mi barava fren gud witim hem winim bifor. Mi experiencem tu nambawan wei wea pipol bilong Jehovah garem wan mind. Disfala waka hem mekem mi garem gudfala laef.” No longtaem go nomoa Christine maritim Gideon, and tufala gohed pioneer long Ghana.

Filip and Ida storyim wanem tufala duim for helpem olketa Bible study for gohed gud long spiritual wei. Tufala sei: “Bifor mitufala garem winim 15-fala Bible study, bat for mifala teachim gud olketa Bible study hia, mitufala disaed for garem 10-fala nomoa.” Waswe, olketa Bible study kasem gud samting from diswan? Filip sei: “Mi study witim wanfala young man wea nem bilong hem Michael. Hem laek for study evriday and hem redyim gud tu study bilong hem, so insaed wanfala month nomoa mitufala finisim Wanem Bible Teachim buk nao. Bihaen datwan, Michael kamap anbaptaes pablisa. Long first day wea hem go aot long preaching, hem sei long mi: ‘Hem olraet sapos iu helpem mi witim olketa Bible study bilong mi?’ Mi seke long wanem hem talem. Michael sei hem startim finis thrifala study and laekem mi for helpem hem long hao for conductim study.” Tingim diswan, from staka pipol laek for study, olketa wea study yet bat olketa tu garem Bible study!

Amy luksavve wanfala bigfala need hem stap. Hem sei: “No longtaem bihaen mi kasem Ghana, mifala go preach long wanfala smol vilij and mifala lukaotem olketa wea earpas. Mifala no faendem wanfala nomoa wea earpas, bat mifala faendem eitfala long datfala vilij!” Gogo, Amy maritim Eric, and tufala duim spesol pioneer waka and tufala help long wanfala saen languis kongregeson. Ghana hem garem winim 300 pablisa wea earpas and olketa nara earpas wea interest long Bible. Taem George and Adria pioneer long Ghana, tufala experiencem laef bilong olketa missionary. So tufala hapi tumas taem tufala kasem invitation for attendim mek-126 class bilong Gilead Skul! Distaem, tufala duim missionary waka long Mozambique.

Hem nambawan samting for lukim plande brata and sista from difren kantri olketa waka tugeta witim olketa brata and sista long Ghana for duim bigfala harvest waka. (John 4:35) Each year, samting olsem 120 niu wan olketa baptaes evri week long Ghana. Seventin-fala brata and sista nao muv go long Ghana for pioneer. Staka thousand brata and sista raonem world tu muv long olketa nara kantri for pioneer. Love wea olketa garem for Jehovah nao mekem olketa willing for “givim olketa seleva” for duim diswan. Evriwan hia pioneer long olketa ples wea needim samfala pablisa moa. Masbi Jehovah hapi tumas long olketa hia wea willing for duim disfala nambawan waka!—Ps. 110:3; Prov. 27:11.