1. Wanem nao Jehovah wakem from clay wea winim eni samting wea olketa man wakem?

LONG November 2010, long England, samwan peim wanfala Chinese clay vase for klosap 70 million U.S. dollar. Olketa wakem datfala vase long mek-18 century. Hem barava spesol samting for man iusim samting nating olsem clay for wakem wanfala vase wea luk naes tumas and kostim staka selen. Jehovah hem olsem man wea wakem samting long clay and hem savve duim staka nambawan samting. Bible sei Jehovah wakem wanfala perfect man from “graon [clay].” (Gen. 2:7) Bible sei man hia, Adam, hem wanfala “son bilong God” and hem savve showimaot olketa wei bilong God.—Luke 3:38.

2, 3. Hao nao iumi savve showimaot iumi garem sem tingting olsem olketa Israelite?

² Taem Adam againstim God, hem no son bilong God nao. Bat staka wea kam from laen bilong Adam chus for stap anda long rul bilong God. (Heb. 12:1) Taem olketa hia obeyim God, olketa showimaot  olketa no laek for stap anda long Satan, bat olketa laek for duim wanem God laekem and for hem nao Dadi bilong olketa. (John 8:44) Diswan mekem iumi tingim wanem olketa Israelite talem bifor. Olketa sei: “Jehovah, iu nao Dadi bilong mifala. Mifala nao clay, and iu nao olsem man wea wakem samting long clay. Iu nao wakem mifala evriwan long hand bilong iu.”—Isa. 64:8.

³ Iumi wea worshipim Jehovah distaem tu hambol and stap anda long hem. Long tingting bilong iumi, hem wanfala privilege for kolem Jehovah hem Dadi bilong iumi. Iumi savve God hem olsem man wea wakem olketa naes samting long clay. Waswe, iumi olsem clay wea soft wea God savve trainim and helpem iumi for garem olketa naesfala wei? Waswe, iumi luksavve olketa brata and sista bilong iumi no perfect and God gohed for trainim olketa? Long disfala study, bae iumi storyim hao God chusim olketa wea hem laek for trainim, why hem stretem and trainim iumi, and hao hem duim datwan.

4. Hao nao God chusim olketa wea hem leadim olketa kam long hem? Storyim samfala example.

⁴ Taem Jehovah lukluk long man hem luk insaed long heart, and hem luksavve long wanem kaen man nao iumi. (Readim 1 Samuel 16:7b.) Diswan hem showaot taem God startim Christian kongregeson. Hem leadim staka pipol wea olketa nara pipol ting daonem olketa for kam long hem and Son bilong hem. (John 6:44) Olsem example, hem leadim wanfala Pharisee wea nem bilong hem Saul for kam long hem. Saul hem man wea ‘tok spoelem God, spoelem pipol bilong hem, and hem nating showimaot respect.’ (1 Tim. 1:13) Bat Jehovah lukluk long heart bilong Saul and hem lukim gud samting. (Prov. 17:3) Jehovah luksavve Saul savve changem wei bilong hem for kamap man wea hem “chusim” for preach “long pipol long olketa difren kantri and long olketa king and olketa son bilong Israel tu.” (Acts 9:15) Jehovah chusim tu olketa narawan wea bifor olketa savve drunk, durong, and steal, bat wea hem luksavve olketa fit for changem wei bilong olketa and duim gud samting. (Rome 9:21; 1 Cor. 6:9-11) Taem olketa studyim olketa Holy Raeting, faith bilong olketa long Jehovah hem kamap strong and olketa duim wanem hem laekem.

5, 6. Wanem tingting nao iumi shud garem abaotem (a) pipol long territory? (b) olketa brata and sista bilong iumi?

⁵ Wanem nao iumi lanem from diswan? From iumi savve Jehovah savve lukluk long heart and hem leadim pipol kam long hem, iumi shud no judgem pipol long territory bilong iumi or olketa long kongregeson. Olsem example, tingim wanem wanfala man wea nem bilong hem Michael duim taem Olketa Jehovah’s Witness visitim hem. Hem sei: “Taem olketa kam long haos bilong mi, mi savve les tumas for story long olketa. Wei bilong mi nogud tumas! Wantaem mi meetim wanfala famili long wanfala ples, wea mi laekem tumas wei bilong olketa. Mi barava sapraes taem mi faendaot famili hia Jehovah’s Witness! Datwan mekem mi start for tingting abaotem why nao mi les long olketa Witness. Mi luksavve mi bilivim olketa laea story abaotem olketa.” Datwan mekem Michael laek for savve long tru samting abaotem Olketa Jehovah’s Witness and hem acceptim Bible study. Gogo, hem baptaes and hem start for pioneer.

⁶ Taem iumi luksavve Jehovah hem olsem man wea wakem samting long clay, datwan helpem iumi for garem gudfala tingting abaotem olketa brata and sista bilong iumi. Olketa no perfect bat olketa gohed yet for lanem olketa wei bilong God. Jehovah lukluk long heart bilong olketa, and hem no tingim  nomoa olketa wik point bilong olketa bat hem luksavve wanem olketa fit for duim. (Ps. 130:3) Iumi tu shud tingim gud saed bilong olketa brata and sista, olsem Jehovah hem duim. Taem iumi encouragem brata or sista bilong iumi for gohed gud long spiritual wei, hem olsem iumi waka tugeta witim Jehovah. (1 Thess. 5:14, 15) Olketa elder long kongregeson shud showimaot gudfala example long diswan.—Eph. 4:8, 11-13.

7. Wanem nao mekem iumi tinghae long wei wea Jehovah stretem iumi?

⁷ Maet iu herem pipol savve sei: ‘Taem parents bilong mi stretem mi, mi nating tinghae long datwan go kasem taem mi garem pikinini.’ Taem iumi kamap mature, maet iumi start for luksavve taem samwan stretem iumi datwan showimaot hem lovem iumi. (Readim Hebrew 12:5, 6, 11.) Jehovah lovem iumi dastawe hem patient for stretem iumi. Hem laekem iumi for kamap wise, hapi, and for lovem hem. (Prov. 23:15) Hem no laekem iumi for safa, and hem no laekem iumi for dae from iumi duim rong samting and no repent.—Eph. 2:2, 3.

8, 9. Wanem gud samting nao iumi kasem insaed long spiritual paradaes, and wanem training nao bae iumi gohed kasem long future?

⁸ Taem iumi no savve long Jehovah, maet iumi garem staka nogud wei. Bat Jehovah trainim iumi and distaem iumi garem olketa gudfala wei. (Isa. 11:6-8; Col. 3:9, 10) Iumi stap insaed wanfala spiritual paradaes. Diswan hem minim evri spiritual samting wea Jehovah givim long iumi distaem for helpem iumi for duim wanem hem laekem. Iumi stap sef insaed disfala spiritual paradaes nomata iumi stap long nogud world bilong Satan. Samfala growap insaed famili wea no showimaot love. Bat insaed disfala spiritual paradaes evriwan showimaot love long each other. (John 13:35) Nara samting tu, iumi lanem hao for showimaot love long narawan. Bat main samting nao, iumi lane abaotem Jehovah and luksavve hem lovem iumi.—Jas. 4:8.

⁹ Long niu world wea bae kam, bae iumi kasem barava gud samting from datfala spiritual paradaes. And tu, Kingdom bilong God bae mekem full earth kamap paradaes. Long datfala taem, bae Jehovah duim staka nambawan samting for gohed trainim iumi for garem olketa gudfala wei. (Isa. 11:9) Long datfala taem Jehovah bae mekem mind and body bilong iumi perfect tu. Datwan bae mekem hem isi for iumi minim and obeyim evri samting wea Jehovah talem. So iumi laek for gohed stap anda long Jehovah, and showimaot iumi tinghae long wei wea hem trainim iumi.—Prov. 3:11, 12.

10. Taem Jesus stretem olketa aposol, hao nao hem followim example bilong Jehovah?

¹⁰ Jehovah savve long evri samting abaotem iumi. Hem savve long olketa wik point bilong iumi, wanem iumi fit for duim and no fit for duim, and olketa samting wea iumi duim finis for obeyim hem. (Readim Psalm 103:10-14.) Wei wea Jesus deal witim olketa aposol bilong hem helpem iumi for luksavve long tingting bilong Jehovah abaotem iumi. Samfala taem olketa aposol raoa abaotem hu long olketa nao hem important. Sapos iu stap witim olketa aposol taem olketa raoa, bae iu ting hao long olketa? Maet iu ting olketa praod and hem hard for olketa changem wei bilong olketa. Bat Jesus savve olketa fit for change. So hem kaen and patient witim olketa taem hem givim kaonsel long olketa, and hem encouragem olketa for followim example bilong hem for hambol. (Mark 9:33-37; 10:37, 41-45; Luke 22:24-27) Bihaen Jesus laef bak, olketa aposol kasem holy spirit bilong God and olketa no raoa moa abaotem hu long olketa hem important. Bat olketa  gohed strong for duim preaching waka.—Acts 5:42.

11. Wanem gudfala example nao David showimaot for iumi?

¹¹ Distaem Jehovah iusim Bible, holy spirit, and kongregeson for trainim pipol bilong hem. Wanem nao iumi mas duim mekem iumi kasem training from Bible? Iumi mas readim, ting raonem wanem iumi readim, and askem Jehovah for helpem iumi followim wanem iumi readim. King David sei: “Taem mi leidaon long bed bilong mi, mi savve tingim iu. Long midol naet, mi ting raonem evri samting wea iu duim.” (Ps. 63:6) Hem sei tu: “Mi bae praisem Jehovah, wea givim advaes long mi. Long naet taem tu olketa samting wea mi ting raonem hem helpem mi for stretem tingting bilong mi.” (Ps. 16:7) Tru nao, David ting raonem kaonsel bilong Jehovah and letem datwan for stretem tingting bilong hem, nomata samfala taem hem no isi for followim kaonsel hia. (2 Sam. 12:1-13) David hem hambol and hem obeyim God, wea datwan hem gudfala example for iumi followim. So hem gud for iumi tingim diswan: ‘Taem mi readim Bible, waswe, mi ting raonem and letem datwan for kasem heart bilong mi? Waswe, mi savve kamap gud moa long diswan?’—Ps. 1:2, 3.

12, 13. Hao nao Jehovah iusim holy spirit and kongregeson for helpem iumi duim stret samting?

¹² Holy spirit savve helpem iumi long olketa difren wei. Olsem example, hem savve helpem iumi for garem olketa gudfala wei olsem Jesus and for showimaot olketa wei hia wea spirit helpem iumi for garem. (Gal. 5:22, 23) Holy spirit helpem iumi for showimaot love. Iumi lovem God and iumi laek for obeyim hem bikos iumi savve bae iumi kasem gud samting from training wea iumi kasem from hem. And tu, holy spirit savve helpem iumi for no followim tingting bilong pipol long world. (Eph. 2:2) Taem aposol Paul hem young, hem followim nogud wei bilong olketa bigman bilong olketa Jew. Bat holy spirit helpem hem for change. Hem sei: “Nomata wanem samting hem kasem mi, paoa wea mi kasem from God nao hem strongim mi for  gohed.” (Phil. 4:13) Iumi tu mas askem Jehovah for holy spirit. Iumi savve hem bae ansarem prea bilong iumi.—Ps. 10:17.

¹³ Jehovah iusim kongregeson and olketa elder tu for helpem iumi duim stret samting. Olsem example, sapos olketa elder luksavve iumi start for go rong, olketa bae trae for helpem iumi. Nomata olsem, olketa bae no givim kaonsel followim tingting bilong olketa seleva. (Gal. 6:1) Bat olketa bae askem Jehovah for helpem olketa garem wisdom and wei for luksavve. Then, olketa bae duim research long Bible and olketa Bible pablikeson for faendem information wea bae helpem iumi. Sapos olketa elder kam long iu and givim iu kaonsel long kaenfala wei, maet saed long kaleko bilong iu, iu mas remember datwan showimaot God hem lovem iu. Sapos iu followim datfala kaonsel bae iu kasem gud samting.

14. Wanem nao showimaot Jehovah respectim wei wea iumi savve disaedem samting seleva?

¹⁴ Taem iumi luksavve long olketa wei wea Jehovah trainim iumi, datwan savve helpem iumi for stap gud witim olketa brata and sista bilong iumi. And tu, bae iumi garem gudfala tingting abaotem pipol long territory and olketa Bible study bilong iumi. Long taem bilong Bible, man wea laek wakem samting long clay hem no stretawe wakem samting from clay wea hem digim. Hem mas isisi klinim firstaem datfala clay and aotem olketa ston and samfala nara samting from clay hia. Jehovah hem helpem pipol wea willing for change. Hem no forcem olketa for change, bat hem showim olketa wanem hem laekem olketa for duim. Then olketa nao bae disaed sapos olketa laek for changem wei bilong olketa.

15, 16. Hao nao olketa Bible student savve showimaot olketa laek for duim wanem God laekem? Storyim example.

¹⁵ Tingim samting wea happen long Tessie, wanfala sista long Australia. Taem Tessie study, hem kwiktaem minim wanem hem lanem long Bible. Nomata olsem, hem no gohed gud long spiritual wei and hem no go long olketa meeting. Sista wea study witim Tessie prea long Jehovah abaotem datwan and disaed for stop for study witim hem. Then long next study wea hem laek for storyim datwan long Tessie, Tessie storyim long hem why hem no gohed gud long spiritual wei. Tessie sei hem feel guilty bikos hem gohed nomoa for gambol. Bat distaem hem sei hem disaed for stop nao for gambol.

¹⁶ No longtaem bihaen, Tessie start for go long olketa meeting and changem wei bilong hem nomata samfala fren bilong hem mekfani long hem. Gogo Tessie hem baptaes and kamap wanfala regular pioneer, nomata taem hem garem olketa smol pikinini. Tru nao, taem olketa Bible student changem wei bilong olketa and duim wanem God laekem, hem bae fren gud witim olketa and helpem olketa for duim gudfala samting.

17. (a) Why nao iu laekem Jehovah for trainim iu? (b) Wanem nao bae iumi storyim long nextfala study?

¹⁷ Distaem, samfala man still iusim clay for wakem samfala samting. Olketa savve iusim hand for isisi wakem olketa pot wea luk naes. Long sem wei, Jehovah isisi trainim and helpem iumi for garem olketa gudfala wei, and hem lukluk sapos iumi bae followim wanem hem talem. (Readim Psalm 32:8.) Waswe, iu luksavve Jehovah hem lovem iu? Waswe, iu luksavve long olketa wei wea Jehovah gohed for trainim iu? Sapos olsem, wanem nao bae helpem iumi for hambol mekem iumi willing for gohed kasem training from Jehovah? Wanem nao samfala samting wea maet mekem iumi for no willing for Jehovah trainim iumi? Hao nao dadi and mami savve obeyim God taem olketa trainim pikinini bilong olketa? Bae iumi storyim olketa kwestin hia long nextfala study.