1, 2. Why nao God ting long Daniel olsem “man wea barava spesol,” and hao nao iumi savve followim example bilong Daniel?

TAEM olketa Jew wea kamap prisoner long Babylon bifor olketa go insaed long datfala taon, olketa lukim staka idol long there, and hem ples wea pipol worshipim olketa demon. Nomata olsem, olketa Jew wea faithful, olsem Daniel and thrifala fren bilong hem, olketa no followim wei bilong pipol long Babylon. (Dan. 1:6, 8, 12; 3:16-18) Daniel and olketa fren bilong hem gohed for worshipim Jehovah nomoa. For klosap full laef bilong Daniel, hem stap witim pipol wea wei bilong olketa hem nogud. Nomata olsem, Daniel gohed faithful, dastawe angel bilong God sei hem “man wea barava spesol.”—Dan. 10:11, 19.

² Long bifor, man for wakem samting long clay savve pressim clay insaed long wanfala mold mekem clay hia garem sheip wea hem laekem. Olketa wea worshipim Jehovah luksavve hem nao Ruler bilong universe, and hem garem paoa for mekem olketa nation duim eni samting wea hem laekem. (Readim Jeremiah 18:6.) God garem paoa for duim sem samting long iumi tu. Bat hem no forcem iumi for duim wanem hem laekem. Hem laekem iumi for  willing for duim wanem hem askem iumi. Disfala study bae helpem iumi for gohed duim wanem God laekem iumi for duim. Bae iumi story raonem thrifala kwestin hia: (1) Wanem nao samfala samting wea maet mekem iumi no letem Jehovah for trainim iumi? (2) Wanem nao savve helpem iumi for gohed letem Jehovah trainim iumi? (3) Hao nao dadi and mami savve obeyim God taem olketa trainim pikinini bilong olketa?

3. Wanem nao savve spoelem heart bilong iumi? Storyim example.

³ Proverbs 4:23 sei: “Heart nao hem samting wea hem barava important for iu protectim, bikos samting wea kamaot from heart nao savve mekem man laef.” Iumi mas protectim heart bilong iumi mekem iumi willing for Jehovah gohed trainim iumi. Samfala samting wea savve spoelem heart bilong iumi nao hem sapos iumi praod, gohed duim sin, and iumi no garem strongfala faith. Sapos iumi no keakea, olketa samting hia savve mekem iumi bighed and no willing for obeyim God. (Dan. 5:1, 20; Heb. 3:13, 18, 19) Hem nao samting wea happen long King Uzziah bilong Judah. (Readim 2 Chronicles 26:3-5, 16-21.) Long firstaem, Uzziah hem obeyim God and fren gud witim hem, so God stap witim hem. Bat taem hem garem bigfala paoa, hem kamap praod tumas. From hem barava praod, hem laek for bonem incense long temple, nomata olketa priest nomoa garem raet for duim datfala waka. Taem olketa priest talem Uzziah for no duim datwan, hem kros fogud! Jehovah panisim Uzziah, and hem garem leprosy go kasem taem hem dae.—Prov. 16:18.

4, 5. Wanem nao savve happen sapos iumi start for praod? Storyim example.

⁴ Wei for praod savve mekem iumi start for tingse iumi gud winim narawan, and maet iumi no laek for followim kaonsel wea iumi kasem from Bible. (Rome 12:3; Prov. 29:1) Datwan nao samting wea happen long Jim, wanfala elder. Hem no agree witim olketa nara elder abaotem wanfala samting long kongregeson. Jim sei: “Mi talem olketa elder olketa no showimaot love, and then mi go aot from datfala meeting.” Samting olsem six month bihaen, Jim muv go long nara kongregeson, bat olketa no markem hem for kamap elder long datfala kongregeson. Jim feel nogud tumas. From hem tingse tingting bilong hem nao stret, hem wikdaon long spiritual wei and gogo hem inactive for tenfala year. Jim sei: “Mi praod and mi start for blamem Jehovah for samting wea happen. For staka year, olketa brata kam lukim mi and trae for helpem mi, bat mi les for olketa helpem mi.”

⁵ Jim sei: “Long tingting bilong mi, olketa narawan nao rong, and hem nomoa samting wea mi tingim olowe.” Samting wea kasem Jim showimaot man wea praod savve faendem excuse for rong samting wea hem duim, and hem no letem Jehovah for trainim hem. (Jer. 17:9) Waswe, enitaem wanfala brata or sista mekem iu feel nogud? Waswe, enitaem iu lusim wanfala privilege? Wanem nao iu duim? Waswe, iu praod, or iu luksavve important samting nao hem for stap gud witim brata bilong iu and for gohed faithful long Jehovah?—Readim Psalm 119:165; Colossae 3:13.

6. Wanem nao savve happen sapos iumi gohed for duim sin?

⁶ Sapos man gohed duim sin and maet hem haedem tu wanem hem duim, gogo datwan savve mekem hem ting nating long kaonsel wea kam from God. And bae hem ting smol nomoa long wei for duim sin. Wanfala brata wea duim olsem sei gogo hem no feel guilty abaotem olketa sin wea hem duim. (Eccl. 8:11) Narafala brata wea savve lukluk long olketa rabis piksa sei: “Mi start for tok againstim  olketa elder.” Samting wea hem duim spoelem wei wea hem fren witim Jehovah. Taem olketa elder faendaot, olketa helpem hem. Hem tru, iumi evriwan no perfect. Bat sapos iumi tok againstim olketa wea givim kaonsel long iumi or mekem excuse for rong samting wea iumi duim, datwan showimaot iumi no letem Jehovah for trainim iumi. Iumi shud askem God for forgivim iumi and helpem iumi.

7, 8. (a) Wanem nao showimaot olketa Israelite no garem strongfala faith? (b) Wanem nao iumi lanem from samting wea kasem olketa Israelite?

⁷ Olketa Israelite lukim staka mirakol wea Jehovah duim taem hem mekem olketa kamap free from Egypt. Nomata olsem, taem olketa klosap kasem Promis Land, olketa start for bighed. Why nao olsem? Olketa no garem strongfala faith long God. Olketa no trustim Jehovah, bat olketa fraet and komplenim Moses. Olketa laek go bak tu long Egypt, ples wea olketa slave long hem bifor! Jehovah feel nogud tumas and sei: “Hao long nao bae pipol hia gohed for no respectim mi?” (Num. 14:1-4, 11; Ps. 78:40, 41) From olketa Israelite hia no garem faith and no obeyim God, olketa dae long wilderness.

⁸ Distaem, iumi barava klosap for go insaed long niu world, and staka samting testim faith bilong iumi. So iumi mas mek sure faith bilong iumi hem strong. Hao nao iumi savve duim datwan? Iumi savve ting raonem toktok bilong Jesus long Matthew 6:33, and then tingim olketa kwestin hia: ‘Waswe, olketa goal bilong mi, and wanem mi disaedem showimaot mi bilivim wanem Jesus talem? Waswe, bae mi missim olketa meeting and preaching bikos mi aftarem waka for kasem staka selen? Wanem nao bae mi duim sapos boss askem mi for duim samfala extra waka moa? Waswe, bae mi followim wei bilong pipol long world wea savve mekem mi stop for worshipim Jehovah?’

9. Why nao iumi mas gohed chekim faith bilong iumi, and hao nao iumi savve duim datwan?

⁹ Sapos iumi no followim wanem Bible talem abaotem wei for associate witim nogud pipol, olketa wea disfellowship, or hapitaem, datwan showimaot iumi no letem Jehovah for trainim iumi. Wanem nao iu mas duim sapos samfala taem iu duim datwan? Iu mas chekim faith bilong iu! Bible sei: “Gohed for lukluk gud long iufala seleva for savve sapos iufala followim yet olketa tru teaching.” (2 Cor. 13:5) Iumi mas evritaem mek sure iumi followim wanem Bible talem.

10. Wanem nao savve helpem iumi for hambol and letem Jehovah for trainim iumi?

¹⁰ God iusim Bible, Christian kongregeson, and ministry for helpem iumi gohed kasem training from hem. Taem iumi readim Bible evriday and ting raonem wanem iumi readim, iumi letem Jehovah for trainim iumi. Jehovah komandim olketa king bilong Israel for raetem wanfala copy bilong Law, and readim datwan evriday. (Deut. 17:18, 19) Olketa aposol tu luksavve wei for readim and ting raonem olketa Holy Raeting bae helpem olketa long ministry. Olketa talem toktok from olketa Hebrew Scripture long olketa Bible buk wea olketa raetem, and taem olketa preach olketa encouragem pipol for readim and ting raonem olketa Holy Raeting tu. (Acts 17:11) Iumi tu luksavve hem barava important for readim and ting raonem Bible evriday. (1 Tim. 4:15) Diswan helpem iumi for hambol mekem Jehovah savve gohed trainim iumi.

11, 12. Hao nao Jehovah iusim Christian kongregeson for trainim iumi? Storyim example.

¹¹ Jehovah savve wanem nao iumi needim, and hem iusim Christian kongregeson for trainim iumi. Jim, wea iumi storyim finis, start for changem tingting bilong hem taem wanfala elder kaen long hem. Jim sei: “No  enitaem hem blamem mi for samting wea kasem mi or judgem mi. Bat hem sei hem barava laek for helpem mi.” Bihaen samting olsem thrifala month, datfala elder invaetem Jim for go long wanfala meeting. Jim sei olketa long kongregeson kaen long hem and welkamim hem, and love wea olketa showimaot helpem hem for changem tingting bilong hem. Mi start for luksavve tingting wea mi garem hem no stret. Olketa elder long kongregeson, and waef bilong Jim encouragem hem and gogo hem kam bak long Jehovah. Samfala article wea helpem Jim tu hem “Jehovah Is Not to Blame” and “Serve Jehovah Loyally,” wea stap long The Watchtower bilong November 15, 1992.

¹² Gogo Jim hem kamap elder moa. Bihaen datwan, hem helpem olketa nara brata wea kasem semkaen problem olsem hem, and hem strongim faith bilong olketa. Jim sei: “Mi tingse mi fren gud witim Jehovah, bat mi nating fren gud witim hem nomoa! Mi sorre tumas bikos mi praod and datwan mekem mi tingim nomoa wik point bilong olketa narawan, and mi no luksavve long wanem hem important.”—1 Cor. 10:12.

13. Hao nao ministry helpem iumi for garem olketa gudfala wei, and wanem gud samting nao kamaot from datwan?

¹³ Ministry tu savve trainim iumi and helpem iumi for followim olketa wei bilong God. Taem iumi preachim gud nius long pipol, datwan helpem iumi for hambol and for garem olketa nara gudfala wei tu. (Gal. 5:22, 23) Ting raonem wei wea ministry helpem iu for garem olketa gudfala wei. Taem iumi followim example bilong Christ, datwan savve mekem pipol laek for herem message bilong iumi and garem gudfala tingting abaotem iumi. Olsem example, taem tufala Witness  long Australia preach long wanfala woman, woman hia barava kros and tok nogud long tufala. Nomata olsem, tufala Witness hia respectim hem and stap kwaet nomoa taem hem tok long tufala. Bihaen, woman hia feel nogud long samting wea hem duim, and hem raet go long branch office. Hem sei sorre from nogud samting wea hem duim. Hem sei: “Mi krangge tumas bikos mi trae for raosem tufala wea laek for talemaot toktok bilong God.” Disfala experience showimaot why hem barava important for iumi hambol and kontrolem seleva taem iumi preach. Hem tru, ministry bilong iumi hem helpem nara pipol, bat hem helpem iumi tu for garem olketa gudfala wei.

14. Wanem nao dadi and mami mas duim sapos tufala laekem pikinini for followim wanem Bible talem?

¹⁴ Hem wei bilong olketa smol pikinini for hambol and laek for lanem samting. (Matt. 18:1-4) Dastawe olketa dadi and mami shud teachim truth long pikinini bilong olketa, and tu, for teachim olketa for barava tinghae long truth taem olketa smol yet. (2 Tim. 3:14, 15) Sapos dadi and mami laekem pikinini for followim wanem Bible talem, tufala tu mas followim wanem Bible talem and tinghae long truth. Gudfala example bilong dadi and mami bae helpem pikinini for obeyim God. And tu, taem dadi and mami stretem pikinini, bae hem luksavve tufala duim datwan bikos tufala lovem hem and Jehovah tu lovem hem.

15, 16. Hao nao olketa dadi and mami bae showimaot olketa trustim God taem pikinini bilong olketa disfellowship?

¹⁵ Nomata dadi and mami helpem pikinini for savve long truth, gogo samfala pikinini lusim Jehovah or olketa disfellowship. Sapos datwan happen, olketa nara famili member savve sorre tumas. Wanfala sista long South Africa sei: “Taem brata bilong mi disfellowship, hem olsem hem dae. Mi barava sorre fogud!” Wanem nao sista hia and parents bilong hem duim? Olketa followim wanem Bible talem. (Readim 1 Corinth 5:11, 13.) Dadi and mami bilong sista hia savve sapos olketa obeyim Jehovah, bae evriwan kasem gud samting. And tufala luksavve wei for disfellowshipim man showimaot Jehovah lovem iumi. So only taem wea tufala story long son bilong tufala hem taem eni big samting kamap long famili.

¹⁶ Wanem nao tingting bilong son bilong tufala abaotem datwan? Bihaen, hem sei olsem: “Mi savve famili bilong mi no les long mi, bat olketa obeyim Jehovah and organization bilong hem.” And tu, hem sei bihaen hem disfellowship nao hem luksavve hem barava needim Jehovah, and hem prea strong long Jehovah for helpem hem and forgivim hem. Famili bilong hem barava hapi taem hem kam bak long Jehovah! Tru nao, sapos iumi evritaem obeyim God bae iumi hapi and kasem gud samting.—Prov. 3:5, 6; 28:26.

17. Why nao iumi shud evritaem obeyim Jehovah, and wanem gud samting nao bae iumi kasem from diswan?

¹⁷ Profet Isaiah sei gogo bae olketa Jew wea prisoner long Babylon luksavve olketa needim Jehovah and bae sei: “Jehovah, iu nao Dadi bilong mifala. Mifala nao clay, and iu nao olsem man wea wakem samting long clay. Iu nao wakem mifala evriwan long hand bilong iu.” And tu, olketa bae sei: “No tingim olowe sin bilong mifala. Plis tingim mifala olketa pipol bilong iu.” (Isa. 64:8, 9) Taem iumi hambol and evritaem obeyim Jehovah, iumi bae barava spesol long hem olsem Daniel. Jehovah iusim Bible, holy spirit, and organization bilong hem for gohed trainim iumi mekem long future bae iumi kamap “olketa pikinini bilong God” wea perfect.—Rome 8:21.