Followim Example Bilong Olketa Profet
WASWE, eni samting iu duim hem semsem witim wanem olketa profet bifor duim? Long dictionary bilong 2013 revised English New World Translation hem storyim mining bilong disfala word profet. Hem sei: “Profet hem samwan wea talemaot olketa plan bilong God. Olketa profet story for God. Olketa talemaot samting wea bae happen long future, and tu, olketa talemaot olketa teaching bilong Jehovah, olketa law bilong hem, and olketa judgment bilong hem.” Nomata iu no talemaot olketa profesi olsem wanfala profet, iu story for God long wei for talemaot olketa samting wea stap long Bible.—Matt. 24:14.
Hem nambawan privilege for iumi story long pipol abaotem Jehovah, and for teachim olketa abaotem plan bilong hem for olketa man! Iumi waka tugeta witim datfala ‘angel wea flae long skae.’ (Rev. 14:6) Nomata olsem, maet iumi kasem samfala hard samting wea mekem iumi for ting smol long datfala privilege. Wanem nao samfala hard samting wea savve kasem iumi? Maet iumi savve taed tumas, feel wikdaon, or feel olsem iumi no fit. Olketa profet bifor savve feel olsem tu, bat olketa no givap. And Jehovah helpem olketa for duim waka bilong olketa. Iumi bae storyim thrifala profet, and wanem iumi savve duim for followim example bilong olketa.
HEM BARAVA WAKA HARD
Maet samfala taem iumi feel taed tumas and no laek for duim preaching waka. Hem tru, iumi need for rest samfala taem. Jesus and olketa aposol tu rest samfala taem. (Mark 6:31) Bat tingim Ezekiel taem hem stap long Babylon. Hem talemaot message long olketa Israelite wea kamap prisoner long Babylon. Wanfala taem, God talem Ezekiel for drawim piksa bilong Jerusalem long wanfala brik. Then God talem Ezekiel for leidaon klosap long datfala brik. Hem mas leidaon long left saed bilong hem for 390 day, and leidaon long raet saed bilong hem for 40 day. Samting wea Ezekiel duim piksarem wei wea samfala bae attakim Jerusalem. Jehovah sei long Ezekiel: “Bae mi iusim olketa rope for taengem iu mekem iu no savve tane taem iu leidaon go kasem taem olketa day wea mi markem for iu attakim datfala taon hem finis.” (Ezek. 4:1-8) Masbi olketa Israelite laek for savve why nao Ezekiel duim datwan. Ezekiel mas duim datwan for winim wanfala year. Datwan mas mekem hem barava taed. Wanem nao helpem Ezekiel for duim datfala assignment?
Ezekiel evritaem tingim why nao hem duim datfala assignment. God sei: “Nomata [olketa Israelite] bae herem iu or bae les for herem iu . . . olketa bae luksavve wanfala profet hem stap witim olketa.” (Ezek. 2:5) So Ezekiel willing for leidaon saed long datfala brik for staka day for piksarem wei wea samfala bae attakim Jerusalem. Gogo, wanfala man talem Ezekiel and olketa Israelite: “Olketa tekovarem Jerusalem nao!” Then olketa Israelite luksavve nao Ezekiel hem wanfala profet.—Ezek. 33:21, 33.
Distaem, iumi talem pipol God hem klosap for finisim disfala world bilong Satan. Nomata iumi savve taed, iumi gohed for preachim gud nius, duim olketa return visit, and studyim Bible witim pipol. Iumi hapi for “talemaot olketa plan bilong God” bikos evri samting iumi talem hem gohed for kamap tru.
SAMFALA TAEM HEM FEEL WIKDAON
Holy spirit bilong Jehovah helpem iumi for waka hard for preachim gud nius. Nomata olsem, samfala taem maet iumi feel wikdaon bikos pipol no laek for lisin. Hem gud for iumi tingim example bilong profet Jeremiah. Olketa Israelite mekfani and tok spoelem hem taem hem talemaot message bilong God. Wanfala taem, Jeremiah sei: “Distaem bae mi nating story abaotem hem and bae mi nating talem eni samting moa long nem bilong hem.” Jeremiah hem man wea savve feel wikdaon olsem iumi tu. Nomata olsem, hem gohed for talemaot message bilong God. Why nao olsem? Jeremiah sei: “Bat long heart bilong mi, hem olsem wanfala fire wea bone long olketa bon bilong mi. Mi trae for holem insaed long mi bat hem hard nao.”—Jer. 20:7-9.
Sapos iumi feel wikdaon bikos pipol no interest long gud nius, iumi shud ting raonem message wea iumi preach abaotem. Datfala message bae olsem ‘wanfala fire wea bone long olketa bon bilong iumi.’ Sapos iumi readim Bible evriday, datwan bae strongim iumi for duim preaching waka.
HEM DUIM NOMATA HEM NO ISI
Samfala Christian wea kasem wanfala assignment maet wari bikos olketa no savve hao for duim datfala assignment or olketa no savve why nao olketa kasem assignment hia. Maet profet Hosea garem kaen feeling olsem. Jehovah talem hem: “Iu go maritim wanfala jury woman and garem olketa pikinini from datfala woman hem durong.” (Hos. 1:2) Hao nao bae iu feel sapos God talem iu for maritim wanfala jury woman! Hosea duim datfala assignment. Hem maritim Gomer, and tufala garem wanfala son. Bihaen, Gomer bornem wanfala gele and then wanfala boy. Bat hem luk olsem tufala pikinini hia Gomer tekem from olketa nara man. Jehovah talem Hosea waef bilong hem bae durong witim olketa nara man, bat then bae hem laek for kam bak long Hosea. Sapos iu nao Hosea, waswe, bae iu tekem bak waef bilong iu? Hem nao samting wea Jehovah talem Hosea for duim! And Hosea peim staka selen for tekem bak waef bilong hem.—Hos. 2:7; 3:1-5.
Maet Hosea no savve why nao God talem hem for duim datfala assignment. Nomata olsem, gud samting kamaot from wanem hem duim. Samting wea Hosea duim savve helpem iumi for luksavve long feeling bilong Jehovah taem olketa Israelite no faithful long hem. And tu, samfala Israelite kam bak long God.
Distaem, God no talem eniwan for “maritim wanfala jury woman.” Nomata olsem, iumi savve lane from wei wea Hosea willing for duim datfala assignment. Iumi shud willing for preachim gud nius “long pablik and long haos tu haos,” nomata hem Acts 20:20) Maet samfala wei for duim preaching waka hem no isi long iu. Staka pipol wea studyim Bible witim Olketa Jehovah’s Witness sei olketa laek for studyim Bible bat olketa sei hem hard tumas for olketa go preach long haos tu haos. Nomata olsem, staka long olketa start for preach long haos tu haos. Waswe, iumi savve lanem eni gud samting from datwan?
no isi long iumi. (Iumi savve lanem nara samting from wei wea Hosea willing for duim datfala assignment nomata hem no isi. Hem savve mekem enikaen excuse mekem hem no duim datfala assignment. No eniwan bae savve God talem Hosea for duim datfala assignment sapos Hosea no raetem story hia long Bible buk bilong hem. Maet iumi tu garem chance for story long samwan abaotem Jehovah and no eniwan savve iumi garem datfala chance. Hem nao samting wea kasem Anna, wanfala hae skul student long United States. Teacher bilong hem talem evriwan long class for raetem story abaotem eni subject, and then, olketa mas story long full class abaotem datfala subject. Anna savve chus for no story abaotem truth, bat hem ting long datwan olsem chance wea God givim long hem. So nomata hem fraet, hem prea long Jehovah, and datwan mekem hem barava laek for iusim datfala chance for story abaotem truth. Hem raetem wanfala story wea garem title “Evolution: Ting Raonem Olketa Pruv.”
Olketa young wan followim example bilong olketa profet taem olketa no fraet for story abaotem Jehovah
Taem Anna story long class abaotem datfala subject, wanfala gele wea bilivim teaching bilong evolution askem staka kwestin for trae pruvim wanem Anna talem hem rong. Anna ansarem gud evri kwestin bilong datfala gele. Teacher bilong Anna barava tinghae long story wea Anna raetem and hem kasem hae mark winim olketa nara student. Bihaen datwan, Anna and datfala gele savve story samfala taem moa abaotem creation. Bihaen Anna duim datfala assignment, hem sei: “Distaem mi no fraet nao for preachim gud nius.”
Nomata iumi no olketa profet, example bilong olketa profet olsem Ezekiel, Jeremiah, and Hosea, savve helpem iumi for duim wanem Jehovah laekem distaem! Long taem bilong famili worship or taem iumi study seleva, hem gud for iumi read abaotem olketa nara profet and for ting raonem hao iumi savve followim example bilong olketa.