1, 2. (a) Olketa wanem saen nao sevem laef bilong staka pipol? (Lukim piksa long start bilong study.) (b) Wanem nao God duim for pipol bilong hem?

“STOP, LUKLUK, LISIN.” For winim 100 year finis, datfala toktok stap long samfala saen long road long North America. Olketa putim olketa saen hia long olketa road wea akrosim road bilong train. Why nao olketa garem olketa saen olsem? Hem for helpem olketa draeva long trak for lukluk firstaem bifor olketa akrosim road bilong train, nogud train hem speed kam and bangam olketa. Olketa saen hia sevem laef bilong staka pipol.

² Samting wea Jehovah duim for iumi hem winim kaen saen olsem. Hem leadim pipol bilong hem mekem olketa stap klia long olketa danger samting and for kasem laef olowe. Jehovah hem olsem wanfala shepherd wea leadim and protectim olketa sheepsheep mekem olketa no kasem eni nogud samting.—Readim Isaiah 30:20, 21.

3. Wanem nao mekem evri man for followim wanfala road wea lead go long dae?

³ Start kam long taem wea Jehovah wakem olketa man, hem  givim instruction long olketa. Olsem example, long garden bilong Eden, Jehovah givim instruction wea bae leadim olketa man for kasem laef olowe and for hapi. (Gen. 2:15-17) Bat Adam and Eve no followim wanem Jehovah talem. Eve followim advaes from wanfala snek nomoa, and Adam followim samting wea Eve talem. Wanem nao kamaot from datwan? Tufala evriwan kasem nogud samting and tufala dae and bae no laef moa. And tu, bikos Adam and Eve no obeyim God, datwan mekem evri man for followim wanfala road wea lead go long dae.

4. (a) Why nao God givim samfala niu instruction bihaen long Flood? (b) Wanem nao iumi lanem abaotem tingting bilong God from datfala niu instruction?

⁴ Olketa instruction wea God givim long Noah sevem laef bilong pipol. Bihaen long Flood, Jehovah talem pipol for no kaikaim or drinkim blood. Why nao Jehovah talem datwan? Bikos start long datfala taem, Jehovah letem pipol for kaikaim meat. From datwan hem wanfala niu samting, Jehovah givim olketa niu instruction. Hem sei: “Iufala mas no kaikaim meat wea blood stap yet insaed long hem bikos datwan hem soul bilong hem.” (Gen. 9:1-4) Datwan helpem iumi for savve long tingting bilong God abaotem laef. Laef bilong evri samting hem bilong God. Hem nao wakem iumi and givim iumi laef, so hem garem raet for mekem olketa rul saed long laef. Olsem example, hem sei olketa man mas no killim dae narawan. Long tingting bilong God, laef and blood hem holy, and hem bae panisim eniwan wea no followim wanem hem talem abaotem datwan.—Gen. 9:5, 6.

5. Wanem nao bae iumi storyim distaem, and why nao olsem?

⁵ Distaem iumi bae storyim samfala wei wea God gohed for leadim pipol bilong hem bihaen long taem bilong Noah. Diswan bae strongim iumi for gohed followim direction wea kam from Jehovah distaem and long niu world tu.

6. Why nao God givim Law bilong Moses long pipol bilong hem, and hao nao olketa shud ting long olketa law hia?

⁶ Long taem bilong Moses, Jehovah givim instruction long pipol bilong hem abaotem olketa standard bilong hem and worship wea hem acceptim. Why nao olsem? Samfala change hem kamap. Olketa Israelite slave long Egypt for winim tu handred year. Pipol long Egypt worshipim olketa idol and olketa wea dae finis, and olketa duim staka nara samting wea God heitim. Taem pipol bilong God kamap free from Egypt, olketa needim samfala niu instruction. Olketa bae kamap nation wea followim nomoa Law bilong Jehovah. Samfala buk sei Hebrew word “law” hem kam from wanfala word wea minim “instruction, givim direction, and leadim.” Law bilong Moses helpem olketa Israelite for no duim olketa nogud samting wea join witim false religion. Taem olketa Israelite obeyim God, olketa kasem blessing. Taem olketa no obeyim hem, olketa kasem olketa barava nogud samting.—Readim Deuteronomy 28:1, 2, 15.

7. (a) Wanem nao narafala reason why God givim Law bilong Moses long olketa Israelite? (b) Hao nao Law hem gaedem olketa Israelite?

⁷ Nara reason stap tu why God givim Law bilong Moses long olketa Israelite. Datfala Law helpem olketa Israelite for redi for wanfala barava important samting long plan bilong Jehovah, wea hem nao kakam bilong Messiah, Jesus Christ. Law helpem olketa Israelite for luksavve olketa no  perfect. And tu, hem helpem olketa for luksavve olketa needim ransom, wea hem nomoa sakrifaes wea savve finisim sin. (Gal. 3:19; Heb. 10:1-10) Datfala Law protectim famili laen wea Messiah bae born kam long hem and helpem olketa Israelite for luksavve long Messiah taem hem kam. So Law hem “gaedem” olketa Israelite and leadim olketa go long Christ.—Gal. 3:23, 24.

8. Why nao hem gud for iumi followim olketa principle long Law bilong Moses?

⁸ Iumi olketa Christian tu savve kasem gud samting from Law bilong Moses. Long wanem wei? Iumi savve lanem staka samting from olketa principle long datfala Law. Nomata iumi no followim Law bilong Moses distaem, staka samting long datfala Law savve helpem iumi saed long laef and worship bilong iumi. Jehovah mek sure olketa law hia stap long Bible mekem iumi lane from olketa, followim olketa principle long datfala Law, and tu, for helpem iumi tinghae long teaching bilong Jesus wea winim datfala Law. Olsem example, Jesus sei: “Iufala herem hao olketa sei: ‘Iu mas no duim adultery.’ Bat mi talem iufala distaem, eniwan wea gohed for lukluk long wanfala woman and laek for durong witim hem, hem duim adultery finis witim hem long heart bilong hem.” So iumi mas no durong, and tu, iumi mas aotem tingting for laek durong witim narawan.—Matt. 5:27, 28.

9. Why nao Jehovah givim samfala niu instruction long pipol bilong hem?

⁹ Bihaen Jesus kamap Messiah, Jehovah givim samfala niu instruction long pipol bilong hem and storyim samfala samting moa abaotem plan bilong hem. Why nao Jehovah duim olsem? Bikos samfala change moa kamap. Long 33 C.E., Jehovah rejectim nation bilong Israel and olketa long Christian kongregeson nao kamap pipol bilong hem.

10. Why nao God givim olketa niu instruction long Christian kongregeson, and hao nao olketa instruction hia hem difren from Law bilong Moses?

¹⁰ Jehovah givim Law bilong Moses long olketa Israelite for helpem olketa worshipim hem long stretfala wei. Start long first century, pipol bilong God no kam from wanfala kantri nomoa bat olketa kam from olketa difren kantri and garem difren kaen living. Olketa nao spiritual Israel, wea hem Christian kongregeson, and olketa insaed long wanfala niu agreement. Jehovah givim olketa niu instruction for helpem olketa Christian worshipim hem long stretfala wei. Tru nao, “God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.” (Acts 10:34, 35) Olketa Christian obeyim “law bilong Christ,” wea garem staka principle, wea God no raetem long ston, bat hem raetem insaed heart bilong olketa. “Law bilong Christ” hem leadim and helpem olketa Christian nomata long eni ples wea olketa stap.—Gal. 6:2.

11. Wanem nao tufala instruction wea Jesus talem long olketa Christian?

¹¹ Spiritual Israel kasem barava gud samting from olketa instruction wea Jehovah iusim Jesus for givim long olketa. Bifor Jesus startim niu agreement, hem talem tufala important instruction long olketa Christian. Firstfala instruction hem abaotem preaching waka. Mek-tu hem abaotem wei wea olketa Christian shud ting long each other. Olketa instruction hia hem for olketa Christian distaem tu, nomata iumi garem hope for laef olowe long heven or long earth.

12. Storyim wei wea preaching waka hem wanfala niu samting.

¹² Tingim instruction wea Jesus talem  abaotem preaching waka. Long bifor, pipol from olketa difren kantri mas kam long Israel for worshipim Jehovah. (1 Ki. 8:41-43) Bat wanfala change kamap taem Jesus talem komand wea stap long Matthew 28:19, 20. (Readim.) Jesus talem olketa disaepol for “go” and teachim evriwan. Long Pentecost 33 C.E., Jehovah showimaot klia hem laekem olketa Christian for preachim gud nius evriwea long world. Long datfala day, samting olsem 120 Christian kasem holy spirit and start for toktok long olketa difren languis long pipol wea Jew and olketa wea followim religion bilong olketa Jew. (Acts 2:4-11) Bihaen datwan, olketa start for preach long pipol bilong Samaria. Then, long 36 C.E., olketa preach long pipol wea no Jew wea no circumcise. So olketa Christian mas go preach long evriwan long world!

13, 14. (a) Wanem nao iumi mas duim for followim datfala “niu law” wea Jesus talem? (b) Wanem nao iumi savve lanem from example bilong Jesus?

¹³ And tu, Jesus givim “wanfala niu law” abaotem wei wea iumi shud ting long olketa brata and sista. (Readim John 13:34, 35.) Iumi mas evritaem showimaot love long olketa, and tu, iumi mas willing for dae for olketa. Datwan hem samting wea Law bilong Moses no talem olketa Israelite for duim.—Matt. 22:39; 1 John 3:16.

¹⁴ Jesus showimaot nambawan example long wei for showimaot love. From hem barava lovem olketa disaepol, hem willing for dae for olketa. And hem laekem evriwan wea followim hem for duim sem samting. So iumi willing for kasem olketa hard samting and iumi willing for dae tu for olketa brata and sista bilong iumi.—1 Thess. 2:8.

15, 16. Hao nao God leadim iumi distaem, and why nao iumi needim datfala direction?

¹⁵ Jesus markem datfala “wakaman wea faithful and wise” for givim olketa Christian ‘kaikai long barava taem.’ (Matt. 24:45-47) Samfala taem datfala kaikai hem olketa important direction for pipol bilong God for fitim samfala samting wea kasem olketa distaem and waka wea olketa mas duim.

¹⁶ Iumi stap long “olketa last day,” and klosap nao wanfala trabol bae kamap wea hem worse winim eni trabol wea happen bifor. (2 Tim. 3:1; Mark 13:19) And tu, Jesus aotem Satan and olketa demon from heven and torowem olketa go daon long earth, and from datwan, olketa man kasem barava nogud samting. (Rev. 12:9, 12) Nara samting tu, iumi followim komand bilong Jesus for preach long staka pipol evriwea long world and iumi iusim staka difren languis for duim datfala preaching waka!

17, 18. Wanem nao iumi shud duim taem iumi kasem olketa instruction from organization bilong God?

¹⁷ Organization bilong God givim iumi staka tul for helpem iumi duim preaching waka. Waswe, iu iusim olketa tul hia? Long olketa meeting bilong iumi, iumi kasem olketa instruction long hao for iusim olketa tul hia long gudfala wei. Waswe, iu luksavve olketa instruction hia kam from Jehovah?

¹⁸ Sapos iumi laekem God for blessim iumi, iumi mas followim evri instruction wea hem iusim organization bilong hem for talem long iumi. Sapos hem wei bilong iumi for obeyim God distaem, hem bae isi for iumi followim olketa instruction wea iumi kasem long taem bilong “bigfala trabol,” taem disfala nogud world bilong Satan hem finis. (Matt. 24:21) Bihaen datwan, iumi bae kasem olketa niu instruction for helpem iumi duim wanem God laekem long niu world, wea evriwan bae raeteous and Satan hem nomoa nao.

19, 20. Wanem nao bae iumi kasem long niu world, and wanem gud samting nao bae iumi kasem from olketa scroll hia?

 ¹⁹ Long taem bilong Moses, nation bilong Israel needim olketa niu instruction, so God givim Law bilong Moses long olketa. Then, long first century, olketa Christian mas followim “law bilong Christ.” Bible sei, long niu world, iumi bae kasem olketa scroll wea garem olketa niu instruction. (Readim Revelation 20:12.) Luk olsem olketa scroll hia bae explainim wanem Jehovah laekem iumi olketa man for duim long datfala taem. Wei for studyim olketa scroll hia bae helpem evriwan, and olketa wea laef bak tu, for savve long wanem God laekem olketa for duim. Olketa scroll hia bae helpem iumi for savve long staka nara samting abaotem tingting bilong Jehovah. And tu, from iumi bae minim gud Bible, long Paradaes bae iumi showimaot love and respect for each other. (Isa. 26:9) Jesus Christ, wea hem King, bae helpem iumi for lanem staka samting and for teachim long olketa narawan.

²⁰ Sapos iumi followim olketa instruction wea “stap insaed long olketa scroll” and iumi gohed faithful long Jehovah long lastfala test, hem bae raetem nem bilong iumi insaed long “scroll bilong laef.” Iumi savve laef olowe! So iumi mas readim Bible, ting raonem wanem hem talem, and followim olketa instruction wea kam from God distaem. Sapos iumi duim olsem, iumi savve stap laef long taem bilong bigfala trabol, and gohed for lane abaotem God bilong iumi Jehovah, wea hem wise and lovem iumi, for olowe!—Eccl. 3:11; Rome 11:33.