Olketa Young Wan—Wanem Nao Iu Savve Duim Mekem Iu Redi for Baptaes?
“God bilong mi, mi hapi tumas for duim samting wea iu laekem.”—PS. 40:8.
SONG: 51, 58
1, 2. (a) Storyim why wei for baptaes hem serious samting. (b) Hao nao man bae luksavve hem redi for baptaes?
WASWE, iu wanfala young wan wea laek for baptaes? Hem nambawan privilege for baptaes. Olsem iumi storyim finis, taem man disaed for baptaes hem wanfala serious samting. Taem iu baptaes iu showimaot iu dedicate long Jehovah, wea minim iu promis long Jehovah for worshipim hem for olowe, and worship bilong hem bae first samting long laef bilong iu. So iu shud baptaes nomoa taem iu garem mature tingting, hem disison bilong iuseleva for baptaes, and iu savve wanem hem minim for dedicate long God.
2 Waswe sapos iu tingse iu no redi yet for baptaes? Or maet iu ting iu redi bat parents bilong iu laekem iu for weit firstaem. Sapos olsem, wanem nao iu shud duim? No feel wikdaon. Iusim taem hia for duim olketa samting wea bae helpem iu for kamap strong long spiritual wei, mekem gogo iu savve baptaes. Iu savve markem olketa goal saed long thrifala samting hia: (1) faith bilong iu, (2) wanem iu duim, and (3) wei for tinghae.
FAITH BILONG IU
3, 4. Wanem nao olketa young wan savve lanem from example bilong Timothy?
3 Ting raonem hao bae iu ansarem olketa kwestin hia: Why nao mi bilivim God hem stap? Wanem nao mekem mi barava sure Bible hem kam from God? Why nao mi obeyim olketa law bilong God and no followim wei bilong pipol long world? Wei for ting raonem olketa kwestin hia savve helpem iu for followim wanem aposol Paul talem. Hem sei: “Luksavve long samting wea God laekem iumi for duim, wea hem gudfala and stret and wea hem hapi long hem.” (Rome 12:2) Why nao iu shud duim datwan?
4 Tingim example bilong Timothy. Hem savve gud long olketa Holy Raeting bikos mami and grani bilong hem teachim truth long hem. Nomata olsem, Paul sei long Timothy: “Gohed for followim olketa samting wea iu lanem and wea olketa narawan helpem iu for bilivim.” (2 Tim. 3:14, 15) Long Greek languis, disfala toktok “helpem iu for bilivim” hem minim “man hem barava sure wanfala samting hem tru.” So Timothy mas barava sure wanem hem lanem long olketa Holy Raeting hem tru. Hem followim wanem hem lanem, no bikos mami and grani bilong hem talem hem for duim olsem, bat bikos hem ting raonem wanem hem lanem and hem bilivim wanem hem lanem hem tru.—Readim 1 Thessalonica 5:21.
5, 6. Why nao hem important for iu “chekim evri samting for mek sure long wanem hem tru” taem iu young yet?
5 Waswe long iu? Maet iu savve long truth for longfala taem finis. Sapos olsem, ting raonem olketa reason why iu bilivim olketa samting wea iu lanem hem tru. Datwan bae helpem iu for strongim faith bilong iu and no duim nogud samting wea olketa nara young wan or pipol long world duim.
6 Sapos iu “chekim evri samting for mek sure long wanem hem tru” taem iu young yet, datwan bae helpem iu for ansarem olketa kwestin wea olketa nara young wan maet askem iu, olsem: ‘Hao nao iu savve God hem stap? Sapos God lovem iumi, why nao hem letem olketa nogud samting for happen? Hao nao God hem no garem start?’ Olketa kwestin olsem bae no spoelem faith bilong iu sapos iu savve finis long ansa. And tu, from iu savve ansarem olketa kwestin olsem, datwan bae mekem iu laek for lanem samfala samting moa long Bible.
7-9. Storyim hao olketa study guide wea garem title “What Does the Bible Really Teach?” savve helpem iu for strongim faith bilong iu.
7 Wei for study seleva savve helpem iu for ansarem olketa kwestin wea eniwan askem long iu, aotem wei for daot, and strongim faith bilong iu. (Acts 17:11) Iumi garem olketa pablikeson wea savve helpem iu. Staka kasem gud samting taem olketa studyim datfala brochure The Origin of Life—Five Questions Worth Asking and datfala buk Is There a Creator Who Cares About You? And tu, staka young wan kasem gud samting taem olketa iusim olketa study guide long jw.org website wea garem title “What Does the Bible Really Teach?” Iu savve lukim olketa study guide hia long BIBLE TEACHINGS long English website. Olketa study guide hia storyim olketa difren subject and olketa savve helpem iu for strongim faith bilong iu.
8 Iu lanem finis staka samting long Bible, so maet iu savve long ansa for samfala kwestin long olketa study guide hia. Bat wanem nao mekem iu barava sure ansa bilong iu hem tru? Olketa study guide bae helpem iu for iusim olketa difren scripture for pruvim why nao ansa bilong iu hem tru. Datwan bae helpem iu for savve hao for
explainim wanem iu bilivim long olketa narawan. Sapos iu savve daonlodim olketa study guide wea garem title “What Does the Bible Really Teach?” iu savve iusim taem iu duim study seleva for helpem iu for strongim faith bilong iu.9 Iu mas bilivim wanem iu lanem from Bible hem tru. Datwan bae helpem iu for redi for baptaes. Wanfala teenage sista sei: “Bifor mi disaed for baptaes, mi studyim Bible and mi luksavve diswan hem tru religion. Datwan hem samting wea mi barava sure long hem.”
WANEM IU DUIM
10. Why nao Christian wea baptaes mas duim samting wea showimaot hem garem faith?
10 Bible sei: “Sapos man no duim gudfala samting for showimaot hem garem faith, datfala faith hem dae finis.” (Jas. 2:17) Sapos iu garem strongfala faith, samting wea iu duim bae showimaot datwan. Bible sei iumi bae “holy and duim samting wea showimaot [iumi] faithful long God.”—Readim 2 Peter 3:11.
11. Wanem nao man wea “holy” hem duim?
11 Iumi “holy” taem fasin bilong iumi hem klin and iumi followim wanem God laekem. Olsem example, tingim fasin bilong iu insaed six month wea go finis. Taem iu kasem test, waswe, iu ting raonem gud wanem nao stret samting wea God laekem iu for duim? (Heb. 5:14) Waswe, iu tingim enitaem wea iu no foldaon long wanfala test or iu no duim nogud samting wea olketa nara young wan laekem iu for duim? Waswe, iu showimaot gudfala wei taem iu long skul? Waswe, iu gohed faithful long Jehovah, or iu followim wei bilong olketa narawan long skul mekem olketa no mekfani long iu? (1 Pet. 4:3, 4) Hem tru, no eniwan long iumi hem perfect. Samfala taem, nomata olketa wea worshipim Jehovah for staka year finis maet fraet for preach long narawan. Bat man wea dedicate finis long God hem hapi hem wanfala Jehovah’s Witness, and hem evritaem showimaot gudfala wei.
12. Wanem nao samfala samting wea iumi savve ‘duim for showimaot iumi faithful long God,’ and hao nao iumi shud ting long olketa samting hia?
12 And tu, iumi mas “duim samting wea showimaot [iumi] faithful long God.” Wanem nao samfala samting hia? Hem nao for go long olketa meeting and duim preaching waka. And tu, hem for duim olketa samting wea olketa narawan maet no lukim, olsem for prea long Jehovah and duim study seleva. Man wea dedicate long Jehovah bae no tingse hem hard for hem duim olketa samting hia. Hem bae garem sem tingting olsem King David, wea sei: “God bilong mi, mi hapi tumas for duim samting wea iu laekem. Law bilong iu hem stap insaed long heart bilong mi.”—Ps. 40:8.
13, 14. Wanem nao savve helpem iu for ‘duim samting wea showimaot iu faithful long God,’ and wanem gud samting nao samfala young wan kasem from datwan?
13 Olketa kwestin long page 308 and 309 long buk Questions Young People Ask—Answers That Work, Volume 2, savve helpem iu for markem olketa spiritual goal. Iu savve raetem ansa bilong iu for olketa kwestin olsem: “Waswe, iu talem klia long Jehovah wanem iu laekem taem iu prea, and waswe, olketa prea bilong iu showimaot iu lovem Jehovah?” “Wanem nao iu studyim taem iu duim study seleva?” “Waswe, iu go preaching nomata dadi and mami no go witim iu?” And tu, iu savve raetem eni goal wea iu laek markem saed long olketa prea bilong iu, wei for study seleva, and for duim preaching waka.
14 Olketa kwestin hia helpem staka young wan wea tingting for baptaes. Tilda, wanfala young sista, hem sei: “Olketa kwestin hia
helpem mi for markem samfala goal. Mi isisi kasem olketa goal hia, and bihaen wan year mi redi for baptaes.” And tu, olketa kwestin hia helpem Patrick, wanfala young brata. Hem sei: “Mi savve finis long olketa goal wea mi laek for kasem, bat taem mi raetem, datwan helpem mi for waka hard for kasem olketa goal bilong mi.”Waswe, bae iu gohed worshipim Jehovah nomata dadi and mami bilong iu stop for worshipim hem? (Paragraf 15 storyim diswan)
15. Why nao wei for baptaes hem samting wea iuseleva mas disaedem?
15 Wanfala kwestin long page 309 long datfala buk hem sei: “Waswe, bae iu gohed worshipim Jehovah nomata dadi and mami and olketa fren bilong iu stop for worshipim hem?” Taem iu dedicate long Jehovah and baptaes, iuseleva bae givim ansa long Jehovah for wanem iu duim. Iu no worshipim Jehovah bikos dadi and mami or olketa narawan worshipim hem. Wei wea iu holy and duim samting wea showimaot iu faithful long God hem showimaot iu bilivim iu garem truth and iu laek for followim olketa standard bilong God. Sapos iu duim olsem, no longtaem bihaen bae iu redi for baptaes.
WEI FOR TINGHAE
16, 17. (a) Wanem nao mekem iumi laek for kamap Christian? (b) Storyim example wea savve helpem iumi for tinghae long ransom.
16 Wanday, wanfala man wea savve gud long Law bilong Moses askem Jesus: “Wanem law nao hem important winim olketa nara law?” Jesus sei: “Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.” (Matt. 22:35-37) Datfala scripture showimaot why iumi laek for baptaes and kamap Christian. Hem from iumi lovem Jehovah long full heart bilong iumi. Wanfala wei for strongim wei wea iu lovem Jehovah hem for ting raonem ransom sakrifaes bilong Jesus, wea hem nambawan present wea God givim long olketa man. (Readim 2 Corinth 5:14, 15; 1 John 4:9, 19.) Taem iu duim olsem, iu bae laek for showimaot iu tinghae long datfala nambawan present.
17 Disfala example bae helpem iu for tinghae long ransom: Tingim, iu klosap for draon and samwan sevem iu. Waswe, bae iu go bak long haos, draem iuseleva, and forgetim samting wea datfala man duim for iu? Nomoa! Iu bae barava tinghae long datfala man wea sevem iu and no forgetim datwan! Olsem tu, iumi shud barava tinghae long Jehovah and Jesus for datfala ransom. Tufala sevem laef bilong iumi! Tufala sevem iumi from sin and dae. From tufala lovem iumi, iumi garem hope for laef olowe long Paradaes long earth!
18, 19. (a) Why nao iu shud no hol bak for dedicate and for baptaes? (b) Wanem nao olketa gud samting wea iu kasem from iu worshipim Jehovah?
Heb. 11:6) Taem iu dedicate long God and baptaes, datwan bae no mekem laef bilong iu hard, bat bae iu garem gudfala laef! Wanfala brata wea 24 year distaem, wea baptaes taem hem no teenager yet, hem sei: “Hem tru, maet mi bae savve long staka nara samting long Bible sapos mi baptaes taem mi big, bat datfala disison bilong mi for dedicate long Jehovah hem protectim mi for no aftarem olketa samting long disfala world.”
18 Waswe, iu tinghae long olketa samting wea Jehovah duim for iu? Sapos olsem, iu shud no hol bak for dedicate and for baptaes. Taem iu dedicate long God, iu promis for duim wanem hem laekem for olowe. Waswe, iu shud wari nogud hem hard for iu keepim datfala promis? Nomoa! No forget, Jehovah laekem iu for kasem gud samting, and hem bae “givim gud samting long olketa wea barava lukaotem hem.” (19 Jehovah laekem iu for kasem gud samting. Satan no savve givim iu eni gud samting sapos iu followim hem. Satan tingim hemseleva and hem no warim iu. Hem no garem eni gud samting, so hem hard for givim eni gud samting long iu! Satan no garem eni hope. Hem bae mekem iu kasem nogud samting nomoa, bikos hem tu bae kasem nogud samting long future!—Rev. 20:10.
20. Wanem nao wanfala young wan savve duim mekem hem redi for baptaes? (Lukim box “ Olketa Samting for Helpem Iu Kamap Strong Long Spiritual Wei.”)
20 So wei for dedicate long Jehovah hem barava gud samting for iu duim. Waswe, iu laek for dedicate and baptaes? Sapos olsem, no hol bak for mekem datfala promis. Bat sapos iu feel olsem iu no redi yet, followim wanem iu lanem long disfala study for helpem iu kamap strong long spiritual wei. Paul talem olketa brata and sista long Philippi for gohed kamap strongfala Christian. (Phil. 3:16) Sapos iu tu duim olsem, gogo iu bae laek for dedicate long Jehovah and for baptaes.