1, 2. (a) Wanem nao mekem pipol bilong God hapi tumas? (b) Wanem nao parents and olketa elder savve duim for helpem olketa young wan savve long wanem hem minim for baptaes?

WANFALA elder sei long Christopher, wea 12 year: “Mi savve long iu taem iu baby yet, and mi hapi tumas iu laek for baptaes. Mi laek askem iu, why nao iu laek for duim datwan?” Hem fitim nomoa for datfala elder askem kwestin olsem. Iumi hapi tumas taem staka thousand young wan baptaes evri year. (Eccl. 12:1) Bat parents and olketa elder long kongregeson laek for mek sure olketa young wan disaed seleva for baptaes and olketa savve wanem hem minim for baptaes.

² Bible showimaot bihaen man dedicate and baptaes, hem  bae kasem olketa blessing from Jehovah, bat Satan bae againstim hem. (Prov. 10:22; 1 Pet. 5:8) Dastawe olketa dadi and mami mas teachim pikinini bilong olketa wanem hem minim for kamap disaepol bilong Christ. Olketa elder nao bae helpem olketa young wan long kongregeson wea parents bilong olketa no worshipim Jehovah for savve wanem hem minim for dedicate and baptaes. (Readim Luke 14:27-30.) Bifor man buildim haos, hem mas plan gud firstaem mekem hem savve finisim datfala haos. Olsem tu, olketa young wan mas mek sure olketa redi for baptaes mekem olketa savve gohed faithful long Jehovah “go kasem taem world hem finis.” (Matt. 24:13) Wanem nao bae helpem olketa young wan gohed faithful long Jehovah for olowe? Bae iumi storyim datwan.

3. (a) Hao nao Matthew 28:19, 20 and 1 Peter 3:21 showimaot hem important for baptaes? (b) Iumi bae storyim olketa wanem kwestin, and why nao olsem?

³ Waswe, iu wanfala young wan wea laek for baptaes? Datwan hem barava gudfala goal! Hem nambawan privilege for baptaes and kamap wanfala Jehovah’s Witness. And tu, hem samting wea man mas duim for kamap wanfala Christian, and hem important tumas sapos iumi laek for sev long taem bilong bigfala trabol. (Matt. 28:19, 20; 1 Pet. 3:21) Taem iu baptaes, datwan showimaot iu promis long Jehovah for worshipim hem for olowe. From iu barava laek keepim promis bilong iu, olketa kwestin hia bae helpem iu for luksavve sapos iu redi for baptaes: (1) Waswe, mi garem mature tingting for disaedem diswan? (2) Waswe, hem samting wea miseleva laek for duim? (3) Waswe, mi savve long wanem hem minim for dedicate long Jehovah? Iumi bae storyim olketa kwestin hia.

4, 5. (a) Why nao olketa young wan tu fit for baptaes? (b) Wanem nao showimaot wanfala Christian hem mature?

⁴ Bible no talem wanem age nao man  mas kasem bifor hem savve baptaes. Proverbs 20:11 sei: “Samting wea pikinini duim nao bae mekem pipol savve sapos hem garem gudfala wei and duim stretfala samting.” Nomata pikinini tu hem fit for savve long stret samting and wanem hem minim for dedicate long Jehovah. So hem fitim for wanfala young wan wea garem mature tingting and wea dedicate long Jehovah for baptaes.—Prov. 20:7.

⁵ Wanem nao showimaot man hem mature? Hem no evritaem minim man hem big finis or hem olo. Bible sei pipol wea mature “iusim evritaem tingting bilong olketa for luksavve long samting” wea stret and no stret. (Heb. 5:14) So man wea mature savve long wanem hem stret and hem barava laek for duim datwan. Hem no isi for narawan switim hem for duim rong samting, and hem no needim narawan for evritaem talem hem for duim stret samting. Wanfala young wan wea baptaes bae duim wanem hem stret nomata taem parents or olketa narawan no stap.—Comparem Philippi 2:12.

6, 7. (a) Storyim olketa samting wea testim faith bilong Daniel taem hem stap long Babylon. (b) Wanem nao Daniel duim wea showimaot hem garem mature tingting?

⁶ Waswe, olketa young wan savve garem mature tingting? Tingim example bilong Daniel and olketa samting wea testim faith bilong hem. Maet hem teenager nomoa taem olketa soldia tekem hem from parents bilong hem go long Babylon. Long Babylon, Daniel stap witim pipol wea no obeyim olketa law bilong God. Hem kasem nara test tu. Hem kasem spesol privilege long Babylon. Olketa long Babylon chusim hem witim samfala nara young wan for waka for king. (Dan. 1:3-5, 13) Luk olsem Daniel kasem olketa privilege long Babylon wea hem bae no savve kasem long Israel.

⁷ So wanem nao Daniel duim? Waswe, hem letem pipol long Babylon for changem wei bilong hem or spoelem faith bilong hem? Nomoa nao! Bible sei taem Daniel stap long Babylon, hem “disaed strong insaed heart bilong hem for no spoelem hemseleva.” Hem no laek duim eni samting wea join witim false worship. (Dan. 1:8) Datwan showimaot Daniel garem mature tingting!

8. Wanem nao iumi lanem from example bilong Daniel?

⁸ Wanem nao iumi lanem from example bilong Daniel? Wanfala young wan wea garem mature tingting bae gohed faithful long God, nomata long taem wea hem no isi. Hem no act olsem hem fren gud witim God taem hem long Kingdom Hall bat hem fren witim world taem hem long skul. Hem bae gohed for faithful nomata eni samting testim faith bilong hem.—Readim Ephesus 4:14, 15.

9, 10. (a) Why nao hem important for wanfala young wan ting raonem wanem hem duim taem hem kasem test? (b) Wanem nao man wea baptaes promis for duim?

⁹ Hem tru, no eniwan hem perfect. Nomata iumi young or iumi olo, iumi evriwan savve duim mistek. (Eccl. 7:20) Bat sapos iu laek for baptaes, hem gud for lukluk gud long iuseleva for savve sapos iu disaed strong insaed heart bilong iu for obeyim olketa law bilong Jehovah. Ting raonem kwestin hia, ‘Waswe, mi evritaem traem best for obeyim Jehovah?’ Tingim samting wea testim faith bilong iu no longtaem go nomoa. Waswe, iu luksavve wanem nao stret samting for duim, and iu  duim datwan? Waswe, eniwan encouragem iu for kasem big waka or bignem long world bilong Satan, olsem olketa duim long Daniel? Taem iu kasem kaen test olsem, waswe, iu luksavve wanem Jehovah laekem iu for duim and iu duim datwan?—Eph. 5:17.

¹⁰ Why nao hem important for iu ting raonem olketa kwestin hia? Datwan bae helpem iu for luksavve wei for baptaes hem serious samting. Taem iu baptaes, datwan showimaot iu promis long Jehovah for lovem hem, and for worshipim hem long full heart bilong iu for olowe. (Mark 12:30) Evriwan wea baptaes shud disaed strong for keepim promis bilong hem long Jehovah.—Readim Ecclesiastes 5:4, 5.

11, 12. (a) Eniwan wea laek for baptaes mas barava sure long wanem samting? (b) Wanem nao bae helpem iu for garem tingting bilong Jehovah abaotem baptism?

¹¹ Bible sei evri pipol bilong Jehovah, nomata olketa young wan tu, bae “willing” for worshipim hem. (Ps. 110:3) So eniwan wea laek for baptaes mas barava sure hem samting wea hemseleva laek for duim. Sapos iu laek for baptaes, iu shud ting raonem why nao iu laek duim datwan, especially sapos iu growap long truth.

¹² Taem iu growap, maet iu lukim staka pipol baptaes. Maet samfala hem olketa fren bilong iu or really brata or sista bilong iu. Bat iu shud no tingse iu mas baptaes bikos iu kasem age wea olketa narawan savve baptaes, or iu lukim staka narawan baptaes finis. Wanem nao bae helpem iu for garem tingting bilong Jehovah abaotem baptism? Ting raonem why hem barava important for baptaes. Disfala study and next study bae storyim olketa reason why hem important for baptaes.

13. Wanem nao savve helpem iu for luksavve sapos hem disison bilong iuseleva for baptaes?

¹³ Wanem nao savve helpem iu for luksavve sapos hem disison bilong iuseleva for baptaes? Ting raonem olketa prea bilong iu. Waswe, iu prea evritaem long Jehovah? Taem iu prea, waswe, iu talem klia long Jehovah wanem iu laekem? Ansa bilong iu for olketa kwestin hia bae helpem iu for luksavve sapos iu fren gud witim Jehovah. (Ps. 25:4) Plande taem iumi savve kasem ansa for olketa prea bilong iumi long Bible. So nara samting wea savve helpem iu for luksavve iu laek fren gud witim Jehovah and worshipim hem long full heart bilong iu hem for lukluk gud long wei bilong iu for study. (Josh. 1:8) Ting raonem tufala kwestin hia: ‘Waswe, mi evritaem studyim Bible? Waswe, mi willing for joinim famili worship?’ Ansa bilong iu for olketa kwestin hia bae helpem iu for luksavve sapos hem disison bilong iuseleva for baptaes.

14. Hao nao wei for dedicate hem join witim wei for baptaes?

¹⁴ Maet samfala young wan no barava savve wanem hem minim for dedicate and hao datwan hem join witim wei for baptaes. Olsem example, maet samfala young wan sei olketa dedicate long Jehovah finis bat olketa no redi yet for baptaes. Waswe, kaen tingting olsem hem stret? Nomoa. Dedicate hem minim long wanfala prea iu promis long Jehovah for worshipim hem for olowe. Then, taem iu baptaes, iu showimaot long olketa narawan  iu dedicate finis long Jehovah. So bifor iu baptaes, iu mas savve long wanem hem minim for dedicate long God.

15. Wanem nao hem minim for dedicate?

¹⁵ Taem iu dedicate long Jehovah, iu givim laef bilong iu long hem. Iu promis hao worship bilong hem bae first samting long laef bilong iu. (Readim Matthew 16:24.) Taem iu mekem promis olsem long God, hem wanfala serious samting! (Matt. 5:33) So wanem nao iu savve duim for showimaot iu givim laef bilong iu long Jehovah for duim wanem hem laekem?—Rome 14:8.

16, 17. (a) Storyim example wea showimaot wanem hem minim for givim laef bilong iu long Jehovah. (b) Taem man dedicate long Jehovah, wanem nao hem talem long God?

¹⁶ Tingim disfala example. Wanfala fren givim car long iu. Hem sei hem present bilong iu. Hem sei: “Diswan hem car bilong iu nao.” Bat hem sei: “Mi nao bae holem key, and mi nao bae draevem disfala car, and no iu.” Hao nao bae iu ting long datfala present? Hao nao bae iu ting long fren bilong iu?

¹⁷ Taem man dedicate long Jehovah, hem sei long hem: “Mi givim laef bilong mi long iu. Mi bilong iu nao.” Jehovah expectim man hia for keepim promis bilong hem. Bat waswe sapos hem start for no obeyim Jehovah long wei for frenim haed samwan wea no worshipim God? Or waswe sapos hem duim waka wea mekem hem no savve joinim preaching and mekem hem misstim olketa meeting? Sapos olsem, hem no keepim promis bilong hem long Jehovah. Bae hem olsem datfala fren wea givim car bat holem key. Taem iumi dedicate long Jehovah, iumi sei long hem: “Laef bilong mi hem bilong iu nao, and hem no bilong miseleva.” So iumi bae evritaem duim wanem Jehovah laekem, nomata long taem wea iumiseleva laek for duim difren samting. Iumi laek followim example bilong Jesus, wea sei: “Mi kam daon from heven, no for duim samting wea miseleva laekem bat for duim samting wea Dadi, wea hem sendem mi kam, laekem mi for duim.”—John 6:38.

18, 19. (a) Wanem nao Rose and Christopher talem wea showimaot man kasem blessing taem hem baptaes? (b) Wanem nao tingting bilong iu abaotem wei for baptaes?

¹⁸ So iumi shud tingting gud sapos iumi laek for baptaes, bikos datwan hem wanfala important disison. Hem nambawan privilege for dedicate long Jehovah and for baptaes. Olketa young wan wea lovem Jehovah and savve gud wanem hem minim for dedicate long God bae no hol bak for dedicate and baptaes. Olketa no sorre olketa disaed for baptaes. Rose, wanfala teenager wea baptaes finis, hem sei: “Mi lovem Jehovah, and mi barava hapi for worshipim hem. Mi barava hapi mi disaed for baptaes.”

¹⁹ Waswe long Christopher wea iumi storyim finis? Wanem nao tingting bilong hem abaotem disison wea hem mekem for baptaes taem hem 12 year? Hem sei hem barava hapi hem disaed for baptaes. Hem start for regular pioneer taem hem 17 year, and hem kamap ministerial servant taem hem 18 year. Distaem hem waka long Bethel. Hem sei: “Mi hapi mi disaed for baptaes. Mi duim waka for Jehovah and organization bilong hem wea mekem mi hapi tumas.” Sapos iu laek for baptaes, wanem nao iu savve duim mekem iu redi for datwan? Nextfala study bae ansarem datfala kwestin.