1. Why nao Cain mekem rong disison, and wanem nao kamaot from datwan?

CAIN mas mekem wanfala barava important disison. Hem savve disaed for kontrolem nogud feeling wea hem garem mekem hem no duim sin. Or hem savve disaed for duim nogud samting. Bible sei Cain hem mekem rong disison. From datwan, Cain hem killim dae brata bilong hem Abel, and tu, disison wea hem mekem spoelem wei wea hem fren witim Creator bilong hem.—Gen. 4:3-16.

2. Why nao hem important for iumi mekem olketa gudfala disison?

² Iumi tu savve mekem olketa disison long laef bilong iumi. Iumi savve disaedem olketa big samting and olketa smol samting. Nomata olsem, staka disison wea iumi mekem savve affectim laef bilong iumi. Taem iumi mekem olketa gudfala disison, bae iumi no garem staka problem and bae iumi stap gud witim olketa narawan. Bat taem iumi mekem olketa disison wea no stret, iumi bae kasem staka problem and bae iumi barava feel nogud.—Prov. 14:8.

3. (a) Wanem nao savve helpem iumi for mekem olketa wise disison? (b) Olketa wanem kwestin nao bae iumi storyim?

³ Wanem nao savve helpem iumi for mekem olketa wise disison? Iumi mas garem faith long God bikos iumi sure hem laek for helpem iumi and hem bae givim iumi wisdom wea iumi needim for  mekem olketa gudfala disison. And tu, iumi mas trustim olketa advaes bilong hem wea stap insaed long Bible. (Readim James 1:5-8.) Taem iumi fren gud witim God and tinghae long toktok bilong hem, datwan bae helpem iumi for trustim hao Jehovah hem savve long best wei for helpem iumi. So bifor iumi mekem eni disison, iumi bae lukaotem advaes long Bible for helpem iumi. Bat wanem nao savve helpem iumi for evritaem mekem olketa gudfala disison? And waswe, iumi savve changem wanfala disison wea iumi mekem finis?

4. Wanem samting nao Adam mas disaedem, and wanem nao kamaot from datwan?

⁴ Start kam long taem wea olketa man stap long disfala earth, olketa mas mekem olketa important disison. Olsem example, Adam mas disaed sapos hem bae followim wanem Jehovah talem, or bae hem followim wanem waef bilong hem talem. Adam disaed for followim wanem Eve talem, and datwan mekem hem for disaedem samting wea no stret. From datwan, Jehovah aotem Adam from garden bilong Eden and gogo hem dae. Iumi distaem tu kasem nogud samting from disison wea Adam mekem.

5. Hao nao iumi shud ting long wei for mekem olketa disison?

⁵ Samfala pipol maet tingse laef bilong olketa bae hem isi sapos olketa no need for disaedem eni samting. Maet iu tu garem kaen tingting olsem. Bat hem gud for iumi tingim, Jehovah no wakem iumi olketa man for olsem wanfala machine wea no savve tingting seleva or disaedem samting seleva. Jehovah givim kam Bible for helpem iumi savve hao for mekem olketa wise disison. Jehovah laekem iumi for disaedem samting seleva and hem important for iumi duim datwan. Iumi bae storyim samfala example abaotem diswan.

6, 7. Wanem samting nao olketa Israelite mas disaedem, and why nao hem hard tumas for olketa mekem datfala disison? (Lukim piksa long start bilong study.)

⁶ Taem olketa Israelite stap long Promis Land, olketa mas disaed sapos olketa bae worshipim Jehovah or worshipim olketa laea god. (Readim Joshua 24:15.) Maet luk olsem datwan hem isi samting nomoa for disaedem. Nomata olsem, wanem olketa disaedem hem important bikos datwan bae mekem olketa gohed stap laef or bae olketa dae. Long taem bilong olketa judge, olketa Israelite gohed mekem olketa nogud disison. Olketa stop for worshipim Jehovah and start for worshipim olketa laea god. (Judg. 2:3, 11-23) Bihaen, long taem bilong profet Elijah, pipol bilong God mas disaed sapos olketa bae worshipim Jehovah or datfala laea god, Baal. (1 Ki. 18:21) Maet diswan hem isi samting nomoa for disaedem bikos wei for worshipim Jehovah nao hem best samting for duim. Man wea wise hem no laek for worshipim god wea no garem paoa. Bat Bible sei olketa Israelite no savve disaedem wanem for duim. Elijah hem encouragem olketa for disaedem stret samting, wea hem nao for worshipim trufala God, Jehovah.

⁷ Why nao hem hard tumas for olketa Israelite mekem wise disison? First samting, olketa no garem faith long Jehovah, and olketa no laek for followim wanem hem talem. Olketa no trustim Jehovah, and olketa no laek for lane abaotem hem or lane abaotem wisdom bilong hem. Bat sapos olketa duim olketa samting hia, datwan bae helpem olketa for mekem olketa wise disison. (Ps. 25:12) Mek-tu samting, olketa Israelite letem olketa nara nation for spoelem olketa. Gogo olketa Israelite start for followim wei, and tingting bilong olketa nara nation and worshipim olketa laea god. Long bifor kam yet Jehovah warnim olketa Israelite abaotem datwan.—Ex. 23:2.

8. Wanem nao iumi savve lanem from example bilong olketa Israelite?

⁸ Example bilong olketa Israelite teachim iumi hao hem important for iumi depend long toktok bilong God bikos datwan savve helpem iumi for mekem olketa wise disison. Olsem Galatia 6:5 storyim, iumiseleva nao mas disaedem samting. So iumi shud no depend long olketa narawan for disaedem samting for iumi. Bat iumiseleva nao shud savve long wanem God sei hem stret and then followim datwan.

9. Why nao hem no stret for letem olketa narawan mekem disison for iumi?

⁹ Wanem nao iumi maet duim wea showimaot iumi letem olketa narawan mekem disison for iumi? Hem nao sapos iumi letem narawan forcem iumi for followim idea bilong hem gogo iumi mekem rong disison. (Prov. 1:10, 15) Datwan hem no stret bikos iumiseleva nao shud disaedem samting followim konsens bilong iumi wea kasem training from Bible. Sapos iumi letem olketa narawan mekem disison for iumi, datwan showimaot iumiseleva nao disaed for followim olketa. Iumi bae no kasem eni gud samting sapos iumi duim olsem.

10. Wanem warning nao Paul talem for olketa Christian long Galatia?

¹⁰ Aposol Paul warnim olketa Christian long Galatia for no depend long olketa narawan for mekem disison for olketa. (Readim Galatia 4:17.) Samfala Christian long Galatia laek for mekem disison for olketa narawan insaed long kongregeson. Why nao olketa laek for duim olsem? Bikos olketa laekem olketa narawan long kongregeson for followim olketa, and no followim olketa aposol. Olketa hia no hambol, and olketa no respectim raet bilong olketa nara Christian for disaedem samting seleva.

11. Hao nao iumi savve helpem olketa narawan taem olketa mas disaedem samting?

¹¹ Iumi evriwan savve lane from gudfala example bilong aposol Paul. Hem savve olketa long kongregeson garem raet for disaed seleva, and hem respectim datwan. (Readim 2 Corinth 1:24.) Distaem tu, olketa elder followim example bilong Paul taem olketa givim kaonsel long olketa narawan saed long  olketa samting wea man seleva savve disaedem. Olketa hapi for storyim samting wea kam from Bible long olketa brata and sista. Nomata olsem, olketa elder letem olketa Christian disaedem samting seleva bikos olketa bae harvestim samting wea kamaot from disison wea olketa mekem. Hem important for iumi tingim diswan: Iumi savve helpem olketa narawan for savve wanem Bible talem abaotem samting wea happen long olketa. Nomata olsem, olketa brata and sista garem raet for disaedem samting and hem nao wanem olketa mas duim. Taem olketa mekem wise disison, olketa bae kasem gud samting. Tru nao, iumi shud no tingse iumi garem raet for disaedem wanem olketa brata and sista shud duim.

12, 13. Why nao hem no wise for iumi mekem eni disison taem iumi kros or feel wikdaon?

¹² Distaem, staka pipol savve disaed followim samting wea heart bilong olketa laekem. Bat datwan hem no wise samting for duim. Bible warnim iumi for no disaedem samting followim wanem heart bilong iumi laekem, wea diswan minim for disaedem samting followim feeling nomoa. (Prov. 28:26) Bible sei: “Heart bilong man savve laea long hem and hem laekem tumas for duim rabis samting.” (Jer. 17:9) Bible hem storyim samfala example wea showimaot nogud samting wea happen taem samfala disaed followim samting wea heart bilong olketa laekem. (1 Ki. 11:9; Jer. 3:17; 13:10) So wanem nao savve happen sapos iumi mekem disison followim samting wea heart bilong iumi laekem?

¹³ Jehovah laekem iumi for lovem hem long full heart bilong iumi and for lovem olketa narawan long sem wei wea iumi lovem iumiseleva. (Matt. 22:37-39) Bat olketa scripture long paragraf 12 showimaot wanem savve happen sapos iumi letem heart bilong iumi for kontrolem tingting and wanem iumi duim. Olsem example, taem man hem kros, hard for hem mekem eni gudfala disison. (Prov. 14:17; 29:22) And tu, hem hard for samwan wea hem feel wikdaon for mekem eni wise disison. (Num. 32:6-12; Prov. 24:10) Iumi shud followim olketa law bilong God insaed long Bible. (Rome 7:25) Taem iumi disaedem olketa important samting, iumi shud no disaed followim feeling bilong iumi nomoa.

14. Hao nao iumi savve hem no rong for changem samfala disison wea iumi mekem finis?

¹⁴ Iumi evriwan need for mekem olketa wise disison. Nomata olsem, samfala taem iumi savve ting raonem moa wanfala disison wea iumi mekem finis and maet changem datwan. Jehovah God showimaot nambawan example for iumi followim. Tingim wanem hem duim for olketa long Nineveh long taem bilong Jonah. Bible sei: “Taem trufala God hem lukim olketa lusim nogud wei bilong olketa, hem sorre from hem sei hem bae finisim olketa, and hem no duim datwan nao.” (Jonah 3:10) Taem Jehovah lukim olketa long Nineveh change and stop for duim olketa nogud samting, Jehovah changem wanem hem disaedem finis. Datwan showimaot Jehovah hem no ova tumas, hem hambol, and hem barava kaen. Jehovah hem no olsem olketa man, bikos nomata hem kros, hem evritaem mekem olketa wise disison.

15. Why nao samfala taem maet iumi need for changem wanfala disison wea iumi mekem finis?

¹⁵ Samfala taem maet samting kamap wea mekem iumi ting raonem moa disison wea iumi mekem finis. Samfala taem Jehovah tu savve changem samting wea hem disaedem finis. (1 Ki. 21:20, 21, 27-29; 2 Ki. 20:1-5) Iumi savve changem disison wea iumi mekem  finis sapos iumi kasem samfala niu information abaotem datwan. Tingim example bilong King David, hem herem wanfala laea story abaotem Mephibosheth, granson bilong Saul, and hem mekem wanfala disison followim datwan. Bihaen, taem David herem tru story, hem changem disison wea hem bin mekem. (2 Sam. 16:3, 4; 19:24-29) Samfala taem maet iumi tu need for duim sem samting.

16. (a) Wanem nao samfala samting wea iumi savve duim taem iumi mekem wanfala disison? (b) Wanem taem nao iumi need for changem disison wea iumi mekem finis, and hao nao iumi savve duim datwan?

¹⁶ Bible sei iumi shud no kwiktaem for disaed taem iumi mekem wanfala important disison. (Prov. 21:5) Iumi shud ting raonem gud datwan mekem iumi savve disaed long wisefala wei. (1 Thess. 5:21) Olsem example, bifor hed long famili hem disaedem eni samting for famili duim, firstaem, hem shud duim research insaed Bible and olketa Bible pablikeson. Hem gud tu for hem herem tingting bilong olketa long famili bilong hem. Tingim Abraham, God talem hem for lisin long waef bilong hem. (Gen. 21:9-12) Olketa elder tu shud markem taem for duim research. Taem olketa kasem wanfala niu direction wea showim olketa mas changem disison wea olketa bin mekem, olketa shud no hol bak for duim datwan. Long taem wea fitim, olketa elder wea hambol and no ova tumas shud willing for changem tingting and disison wea olketa mekem finis. And hem gud for iumi followim example bilong olketa. Datwan bae helpem evriwan long kongregeson for stap gud and garem wan mind.—Acts 6:1-4.

17. Wanem nao savve helpem iumi for mekem olketa gudfala disison?

¹⁷ Samfala disison hem big winim olketa nara disison wea iumi savve mekem. Olsem example, for disaedem sapos iumi bae marit or nomoa, or hu nao bae iumi maritim. Nara bigfala disison hem for disaedem wanem taem iumi bae start for duim full-taem service. Bifor iumi disaedem olketa important samting olsem, iumi mas tingting gud abaotem datwan, and prea long Jehovah for helpem iumi. Maet datwan no happen kwiktaem, bat sapos iumi trustim Jehovah, and followim olketa instruction and direction wea kam from hem, iumi bae mekem olketa wise disison. (Prov. 1:5) Jehovah hem givim iumi olketa gudfala advaes insaed long Bible. So hem important for iumi duim research, and prea long Jehovah for helpem iumi. Jehovah savve helpem iumi for garem olketa gudfala wei wea iumi needim, mekem iumi savve disaedem samting wea followim wanem hem laekem. Bifor iumi mekem eni important disison, hem gud for tingim olketa kwestin hia: ‘Waswe, wanem mi disaedem showimaot mi lovem Jehovah? Waswe, datfala disison bae mekem famili bilong mi hapi and stap gud tugeta? And waswe, disison wea mi mekem showimaot mi kaen and patient?’

18. Why nao Jehovah expectim iumi for disaedem samting seleva?

¹⁸ Jehovah no forcem iumi for lovem hem and for worshipim hem. Bat hem laekem iumiseleva nao for disaedem datwan. Hem respectim raet wea iumi garem for disaedem samting seleva, and disison wea iumi mekem sapos iumi bae worshipim hem or nomoa. (Josh. 24:15; Eccl. 5:4) Bat hem expectim iumi for duim wanem iumi disaedem wea followim Bible. Sapos iumi trustim direction wea kam from Jehovah and followim olketa Bible principle, datwan savve helpem iumi for mekem olketa wise disison wea Jehovah bae hapi long hem.—Jas. 1:5-8; 4:8.